Maˍkuˆ 4

1Teˇ pawˆ g'uiˬ po paˇ lo Yeˍsuˆ k'aw‸ maˍ piˇ chehˇ htaˇ, chaw awˬ moˍ lonˉ yawˇ geh hpawnˬ la ve pa taw, g'uiˬ po hk'aw cawˬ ve haw lo‸ k'oˍ hk'aw yawˇ ca lo‸ mui ve yoˬ. Chaw awˬ moˍ lonˉ hk'a peu-eˬ lehˬ, g'uiˬ pfuhˍ paˇ lo chehˇ taˍ ve yoˬ. 2Oˇ htaˇ, yawˇ tawˇ pa haˉ te leh, awˬ lawn laiˉ ceuˬ maˍ piˇ ve yoˬ. Yawˇ maˍ piˇ ve awˬ hk'aw lo chi hk'e k'oˆ ve, 3Na sheˍ. Awˬ yawˇ sheˍ paˍ teˇ g'aˇ awˬ yawˇ ca sheˍ ve yoˬ. 4Yawˇ sheˍ ve teˇ yanˇ, awˬ yawˇ teˇ hpaˍ hpaˍ ya‸ k'aw hpuiˇ lo ce leh, ngaˆ teˇ hpaˍ g'awˆ caˇ sheˬ ve yoˬ. 5Awˬ yawˇ teˇ hpaˍ hpaˍ miˬ shaˍ paˇ kuiˬ haˉ pui de lo ce leh, miˬ shaˍ maˇ naˉ ve pa taw, teˇ cawˬ haˉ yeˬ la ve yoˬ. 6Ya‸ hk'aˇ, awˬ yeˬ oˇ ve awˬ geu maˇ naw‸ ve pa taw, mvuhˇ nyi tawˆ la htaˇ, haw jaˇ chiˆ jaˇ leh nawˍ k'ai goˇ k'ai ve yoˬ. 7Awˬ yawˇ teˇ hpaˍ hpaˍ aˉ chuˇ de lo ce ve yoˬ. Aˉ chuˇ buiˇ uiˍ la leh awˬ yeˬ hta‸ hoˆ ve pa taw, awˬ shiˍ maˇ naw‸. 8Peuˬ leh awˬ yawˇ teˇ hpaˍ hpaˍ miˬ hkuiˇ da‸ kuiˬ lo ce ve yoˬ. Awˬ yeˬ yeˬ la uiˍ la leh, awˬ shiˍ maˇ maˇ naw‸ la ve yoˬ. Awˬ shiˍ shehˆ chi pun, hkaw‸ chi pun leh teˇ ha pun naw‸ maˇ la ve yoˬ. 9Kaˇ tuˬ naˍ paw cawˬ ve chaw hui hk'a deh‸ na-o teh‸ yawˇ k'oˆ ve yoˬ. 10Awˬ hk'aw‸ nawˉ shu maˇ chehˇ ve teˇ yanˇ, yawˇ awˬ hk'aˇ suh k'ai ve chaw leh tcuh yaˇ teˇ chi nyiˇ g'aˇ, yawˇ hta‸ tawˇ pa haˉ teˇ hpaˍ awˬ lawn ca na nyi la ve yoˬ. 11Yeˍsuˆ yawˇ hui hta‸ k'oˆ piˇ ve, G'uiˬ sha ve mvuhˇ miˬ awˬ lawn faˉ taˍ ve awˬ ceuˬ teˇ hpaˍ hta‸ nawˬ hui shiˍ hpeh‸ ve yoˬ. Ya‸ hk'aˇ, awˬ baˬ hpawˇ chehˇ ve chaw hui hta‸ lehˬ, hk'a peu-eˬ tawˇ pa haˉ tiˉ g'a te maˍ piˇ ve yoˬ. 12Aˬ hto‸ ma pa taw le teh‸ k'oˆ k'o, Yawˇ hui nyi ve ka‸ nyi maˇ mawˬ. Yawˇ hui kaˇ ve ka‸ na maˇ g'a. Chi hk'e maˇ heˆ k'o, yawˇ hui k'aw‸ hpfuhˆ k'aw‸ la leh yawˇ hui ve venˇ baˆ hpehˇ hk'a tuˬ yoˬ teh‸ k'oˆ ve yoˬ. 13Yeˍsuˆ yawˇ hui hta‸ k'aw‸ k'oˆ piˇ ve, Tawˇ pa haˉ chi ve hta‸ nawˬ hui na maˇ g'a leh laˇ. Na maˇ g'a ve k'o, tawˇ pa haˉ hk'a peu-eˬ hta‸ hk'aˬ hk'e te na g'a tuˬ le. 14Awˬ yawˇ sheˍ paˍ lehˬ, bon hkawˇ hta‸ sheˍ ve yoˬ. 15Ya‸ k'aw hpuiˇ lo bon hkawˇ sheˍ ve awˬ lawn lehˬ, bon hkawˇ hta‸ kaˇ htaˇ teˇ cawˬ haˉ Saˍtanˍ laˬ leh, yawˇ hui awˬ hk'aw lo sheˍ taˍ ve bon hkawˇ hta‸ yuˬ tawˆ ve hta‸ k'oˆ ve yoˬ. 16Haˉ pui de lo sheˍ ve awˬ lawn lehˬ, bon hkawˇ hta‸ g'a kaˇ leh, teˇ cawˬ haˉ ha lehˬ ha k'a ha‸ yuˬ ve hta‸ k'oˆ ve yoˬ. 17Ya‸ hk'aˇ, yawˇ hui awˬ geu maˇ naw‸ ve hta‸ pa taw, teˇ tcuhˉ teˇ jaw ceh tiˉ te‸ ve yoˬ. Awˬ hk'aw‸ nawˉ bon hkawˇ hta‸ pa taw dawˇ haˍ gaˇ haˍ leh fawˉ ve mehˍ ve hta‸ g'a hpuˇ da‸ htaˇ, teˇ cawˬ haˉ yawˇ hui luˬ k'ai ve yoˬ. 18Aˉ chuˇ de lo sheˍ ve awˬ lawn lehˬ, yawˇ hui bon hkawˇ hta‸ kaˇ ve htawˇ, 19chi miˬ guiˬ dawˇ haˍ tuˬ teˇ hpaˍ, hpu shi mawˇ jeˬ hta‸ ha lehˬ ve teˇ hpaˍ leh, awˬ kaˍ awˬ nu awˬ ceuˬ teˇ hpaˍ hta‸ sheˉ lai ve teˇ hpaˍ lehˬ, bon hkawˇ hta‸ hoˆ taˍ ve pa taw, awˬ shiˍ naw‸ la maˇ hpeh‸ ve hta‸ k'oˆ ve yoˬ. 20Miˬ hkuiˇ da‸ kuiˬ lo sheˍ ve awˬ lawn lehˬ, bon hkawˇ hta‸ kaˇ leh ha‸ yuˬ ve pa taw, awˬ shiˍ shehˆ chi pun, hkaw‸ chi pun, teˇ ha pun naw‸ la ve chaw hta‸ k'oˆ ve yoˬ teh‸ k'oˆ piˇ ve yoˬ. 21Peuˬ leh Yeˍsuˆ yawˇ hui hta‸ k'oˆ piˇ ve, Kawˆ faiˇ tuˉ leh hk'awˍ lawˇ tcuhˍ mvuh‸ taˍ tuˬ laˇ. Maˇ heˆ k'o, ku-iˍ hawˉ teh taˍ tuˬ laˇ. Kawˆ faiˇ taˍ kuiˬ awˬ hk'oˆ lo teh taˍ tuˬ maˇ heˆ laˇ. 22Awˬ lawn k'o, hk'a faˉ taˍ ve awˬ ceuˬ teˇ hpaˍ hk'a tawˍ lehˆ tawˆ la tuˬ yoˬ. Shu hta‸ maˇ shiˍ tcuh ve awˬ ceuˬ teˇ hpaˍ htawˇ, awˬ g'euˆ ba kuiˬ lo tawˆ la tuˬ yoˬ. 23Kaˇ tuˬ naˍ paw cawˬ ve chaw a shu htawˇ maˇ k'oˆ, hk'a deh‸ na-o. 24Peuˬ leh, yawˇ yawˇ hui hta‸ k'oˆ piˇ ve, Nawˬ hui hk'a g'a kaˇ ve teˇ hpaˍ hta‸ shaˍ ti‸ taˍ-o‸. Nawˬ hui kawˬ piˇ ve hk'a shuˍ shuˍ, shu nawˬ hui hta‸ k'aw‸ kawˬ laˇ tuˬ ve awˬ hk'oˆ, awˬ leuˉ ka‸ k'aw‸ htehˍ laˇ tuˬ yoˬ. 25Awˬ lawn k'o, cawˬ ve chaw hta‸ k'aw‸ htehˍ piˇ tuˬ yoˬ. Maˇ cawˬ ve chaw geh, yawˇ hk'a cawˬ ve teˇ hpaˍ hta‸ k'aw‸ yuˬ tawˆ sheˬ tuˬ yoˬ teh‸ k'oˆ piˇ ve yoˬ. 26Yeˍsuˆ teˇ pawˆ k'aw‸ k'oˆ ve, G'uiˬ sha ve mvuhˇ miˬ lehˬ, chaw teˇ g'aˇ heh hk'aw lo awˬ yawˇ sheˍ ve hta‸ shuˍ ve yoˬ. 27Yawˇ mvuhˇ hpeu‸ zuh‸ leh mvuhˇ shawˉ tu la ve yoˬ. Awˬ yawˇ oˇ ve hk'aˬ hk'e te yeˬ la uiˍ la ve hta‸ yawˇ maˇ shiˍ. 28Miˬ guiˬ yawˇ hk'aˇ yawˇ awˬ shiˍ naw‸ la piˇ ve yoˬ. Awˉ lawˉ awˬ yeˬ yeˬ la leh, awˬ hk'aw‸ nawˉ awˬ nu, awˬ hk'aw‸ nawˉ awˬ nu awˬ hk'aw lo awˬ shiˍ naw‸ la maˬ la ve yoˬ. 29Meh la leh g'eu‸ ve awˬ yanˇ gaˬ la ve pa taw, awˬ shehˍ hpaˇ teˇ cawˬ haˉ law‸ k'awˉ yuˬ leh g'eu‸ ve yoˬ teh‸ Yeˍsuˆ k'oˆ ve yoˬ. 30Peuˬ leh yawˇ k'oˆ ve, G'uiˬ sha ve mvuhˇ miˬ hta‸ aˬ hto‸ ma yuˬ leh tehˆ da‸ nyi tuˬ le. Tawˇ pa haˉ hk'aˬ ve teˇ ceuˬ yehˇ leh tehˆ maˍ tuˬ le. 31G'uiˬ sha ve mvuhˇ miˬ lehˬ, g'awˇ caˉ yawˇ hta‸ shuˍ ve yoˬ. Awˬ yawˇ oˇ ve hta‸ heh hk'aw lo sheˍ ve teˇ yanˇ, miˬ guiˬ hk'oˆ hk'a cawˬ ve awˬ yawˇ hk'a peu-eˬ a‸ kehˉ i ve htawˇ, 32sheˍ peuˬ hk'aw‸ nawˉ awˬ yeˬ yeˬ la uiˍ la leh, g'awˇ hpa‸ mvuhˬ naweh hk'a peu-eˬ a‸ kehˉ uiˍ ve yoˬ. Awˬ k'aˉ teˇ hpaˍ uiˍ la leh, mvuhˇ hpe lo poˬ ve ngaˆ teˇ hpaˍ aˉ g'uiˬ ha baˬ kuiˬ lo g'aˇ jehˇ hpeh‸ ve yoˬ teh‸ Yeˍsuˆ k'oˆ ve yoˬ. 33Yawˇ hui na g'a puiˉ ve hk'e ceh, chi hk'e ve tawˇ pa haˉ maˇ maˇ Yeˍsuˆ yawˇ hui hta‸ bon hkawˇ maˍ piˇ ve yoˬ. 34Tawˇ pa haˉ maˇ yehˇ k'o, yawˇ yawˇ hui hta‸ maˇ maˍ piˇ. Ya‸ hk'aˇ, yawˇ ve awˬ la‸ g'awˇ hui ceh tiˉ chehˇ ve teˇ yanˇ, yawˇ yawˇ hui hta‸ awˬ lawn chi teˇ hpaˍ hk'a peu-eˬ hk'a deh‸ k'aoˍ maˍ piˇ ve yoˬ. 35Oˇ teˇ nyi mvuhˇ hpeu‸ la htaˇ, Coˇ paˉ hpawˇ lo hkanˍ k'ai-a veuˬ teh‸, Yeˍsuˆ yawˇ hui hta‸ k'oˆ piˇ ve yoˬ. 36Hk'e te leh chaw awˬ moˍ lonˉ hta‸ yawˇ hui hpaˆ da‸ taˉ leh, Yeˍsuˆ chehˇ taˍ ve hk'e haw lo‸ k'oˍ hk'aw yawˇ hui yawˇ hta‸ shiˍ k'ai ve yoˬ. Awˬ kaˍ awˬ nu haw lo‸ k'oˍ teˇ hpaˍ ka‸ yawˇ hui geh k'ai ve yoˬ. 37Oˇ htaˇ, mvuhˇ haw lonˉ meuˆ la leh, g'uiˬ baˇ teˇ hpaˍ haw lo‸ k'oˍ hta‸ htinˍ lo‸ la ve pa taw, haw lo‸ k'oˍ awˬ hk'aw lo iˉ kaˆ biˇ la chehˇ ve yoˬ. 38Yeˍsuˆ lehˬ haw lo‸ k'oˍ awˬ mehˍ hpawˇ lo uˉ gehˇ tcuhˉ leh, zuh‸ muiˉ k'a chehˇ ve yoˬ. Hk'e te leh, awˬ la‸ g'awˇ teˇ hpaˍ yawˇ hta‸ ca nawˍ piˇ leh, Saˍ la‸-oˬ, ngaˬ hui luˬ k'ai tuˬ ve hta‸ nawˬ a ciˉ ka‸ maˇ dawˇ nyi leh laˇ teh‸ k'oˆ piˇ ve yoˬ. 39Yeˍsuˆ tu la leh mvuhˇ haw hta‸ deˇ piˇ leh, g'uiˬ po hta‸, Ta‸ iˉ gawˬ lehˍ chehˇ-oˆ teh‸ k'oˆ piˇ ve yoˬ. Mvuhˇ haw dehˬ k'ai leh, ta‸ iˉ gawˬ lehˍ chehˇ sheˬ ve yoˬ. 40Oˇ htaˇ Yeˍsuˆ k'oˆ ve, Nawˬ hui aˬ hto‸ ma pa taw kawˆ ve le. Nawˬ hui yonˍ ve nyi ma maˇ cawˬ leh laˇ teh‸, yawˇ hui hta‸ na nyi ve yoˬ. 41Yawˇ hui kawˆ jaˇ leh, teˇ g'aˇ leh teˇ g'aˇ k'oˆ da‸ ve, Chi hpaˇ a shu le. Mvuhˇ haw leh g'uiˬ po yawˇ ve hkawˇ hta‸ na yuˬ ve law teh‸ k'oˆ da‸ ve yoˬ.

will be added

X\