Maˍkuˆ 10

1Yawˇ oˇ kaˬ lo tawˆ k'ai leh, Yawˇdanˍ g'uiˬ ma coˇ paˉ lo cawˬ ve Yuˇda‸ mvuhˇ miˬ teˇ tawn lo k'ai leh, chaw awˬ moˍ lonˉ teˇ hpaˍ yawˇ geh k'aw‸ hpawnˬ la ve yoˬ. Yawˇ awˬ liˇ cawˬ taˍ ve hk'e, yawˇ yawˇ hui hta‸ maˍ piˇ ve yoˬ. 2Oˇ htaˇ yawˇ hta‸ lawˇ nyi tuˬ, Hpaˍriˍ sehˇ teˇ hpaˍ yawˇ geh laˬ leh, Awˬ hpawˇ teˇ g'aˇ lehˬ, a shu yawˇ ve awˬ miˇ ma hta‸ baˬ hpeh‸-aw laˇ teh‸, yawˇ hta‸ na nyi ve yoˬ. 3Yawˇ k'aw‸ k'oˆ ve, Moˉseˍ nawˬ hui hta‸ tawˇ hk'aˬ hk'e piˇ taˍ ve le teh‸, yawˇ hui hta‸ na nyi htaˇ, 4Baˬ da‸ ve li‸ teˇ k'oˆ bvuh‸ piˇ peuˬ k'o, awˬ miˇ ma hta‸ baˬ hpeh‸-aw teh‸ Moˉseˍ tawˇ piˇ ve yoˬ teh‸, yawˇ hui k'aw‸ k'oˆ piˇ ve yoˬ. 5Yeˍsuˆ k'aw‸ k'oˆ ve, Nawˬ hui nyi ma heh ve pa taw Moˉseˍ nawˬ hui hta‸ tawˇ chi hk'e piˇ ve yoˬ. 6Ya‸ hk'aˇ, hk'a peu-eˬ hta‸ awˬ hkuiˉ puiˍ te hpanˍ htaˇ ka‸, G'uiˬ sha lehˬ hawˉ hk'aˆ leh yaˇ miˇ hta‸ te hpanˍ taˍ ve yoˬ. 7Chi hta‸ pa taw hawˉ hk'aˆ lehˬ, yawˇ ve awˬ pa awˬ e hta‸ hpaˆ da‸ taˉ leh, 8yawˇ huiˉ maˬ teˇ suhˍ teˇ shaˍ tiˉ hpeh‸ la tuˬ yoˬ. Chi hta‸ pa taw, yawˇ huiˉ maˬ nyiˇ g'aˇ hpeh‸ ve maˇ heˆ, teˇ g'aˇ tiˉ hpeh‸ la peuˬ. 9Hk'e te leh, G'uiˬ sha caˉ da‸ piˇ taˍ ve hta‸ chaw yaˇ maˇ g'a yuˬ hpaˆ da‸ piˇ teh‸ k'oˆ piˇ ve yoˬ. 10Yehˬ awˬ hk'aw lo chehˇ taˍ ve teˇ yanˇ, awˬ la‸ g'awˇ teˇ hpaˍ lehˬ, awˬ lawn oˇ ve yawˇ hta‸ k'aw‸ na nyi ve yoˬ. 11Oˇ htaˇ yawˇ k'oˆ ve, A shu yawˇ ve awˬ miˇ ma hta‸ baˬ leh awˬ kaˍ awˬ nu yaˇ miˇ hta‸ ca heuˆ ve chaw hk'aˬ ve teˇ g'aˇ maˇ k'oˆ, haˉ chawˇ haˉ paˆ te ve pa taw, yawˇ ve awˬ miˇ ma hta‸ ya‸ ve yoˬ. 12Yaˇ miˇ htawˇ, a shu yawˇ ve awˬ hpawˇ hta‸ baˬ leh awˬ kaˍ awˬ nu hawˉ hk'aˆ hta‸ ca heuˆ ve k'o, haˉ chawˇ haˉ paˆ te ve yoˬ teh‸, yawˇ hui hta‸ k'oˆ piˇ ve yoˬ. 13Oˇ htaˇ yaˇ ehˉ teˇ hpaˍ hta‸ Yeˍsuˆ htawˇ piˇ tuˬ, yaˇ ehˉ teˇ hpaˍ hta‸ shu yawˇ geh shiˍ laˬ ve teˇ yanˇ, awˬ la‸ g'awˇ teˇ hpaˍ lehˬ, shiˍ laˬ ve chaw teˇ hpaˍ hta‸ deˇ ve yoˬ. 14Yeˍsuˆ oˇ ve hta‸ g'a mawˬ htaˇ nyi ma zuhˆ leh, Yaˇ ehˉ teˇ hpaˍ hta‸ ngaˬ geh laˬ piˇ-oˆ. Yawˇ hui hta‸ taˇ tawˍ taˍ. Awˬ lawn k'o, G'uiˬ sha ve mvuhˇ miˬ lehˬ, chaw oˇ hk'e ve mvuhˇ miˬ hpeh‸ ve yoˬ. 15Ngaˬ nawˬ hui hta‸ awˬ tehˬ awˬ na k'oˆ laˇ ve, yaˇ ehˉ hk'a shuˍ shuˍ G'uiˬ sha ve mvuhˇ miˬ hta‸ maˇ ha‸ yuˬ ve chaw hk'aˬ ve teˇ g'aˇ maˇ k'oˆ, G'uiˬ sha ve mvuhˇ miˬ awˬ hk'aw lo maˇ g'a lo‸-e taˬ teh‸, yawˇ hui hta‸ k'oˆ piˇ ve yoˬ. 16Oˇ htaˇ, yaˇ ehˉ teˇ hpaˍ hta‸ yawˇ chiˇ taˆ taˍ leh, yawˇ hui awˬ hk'oˆ la‸ sheh taˍ leh bon na‸ piˇ ve yoˬ. 17Yawˇ ya‸ k'aw k'ai chehˇ htaˇ, chaw teˇ g'aˇ yawˇ geh g'uiˇ laˬ leh yawˇ mehˆ g'uˇ suhˍ hkui tcuhˉ teh leh, Da‸ ve Saˍ la‸-oˬ, co ti‸ ha ti‸ g'a tuˬ ngaˬ hk'aˬ hk'e g'a te tuˬ le teh‸, yawˇ hta‸ na nyi ve yoˬ. 18Yeˍsuˆ k'aw‸ k'oˆ ve, Aˬ hto‸ ma pa taw nawˬ ngaˬ hta‸ da‸ ve teh‸ k'oˆ ve le. G'uiˬ sha maˇ heˆ k'o, da‸ ve teˇ g'aˇ ka‸ maˇ cawˬ. 19Awˬ liˇ tawˇ hkawˇ teˇ hpaˍ hta‸ nawˬ shiˍ ve yoˬ. Chaw hta‸ taˇ tiˇ pehˍ, haˉ chawˇ haˉ paˆ taˇ te, shu ve mawˇ hta‸ taˇ hk'awˇ, shu hta‸ maˇ heˆ heˆ ve shaˉ hkiˆ taˇ hkanˍ, shu ve mawˇ hta‸ taˇ heˍ yuˬ, nawˬ ve awˬ pa awˬ e hta‸ yawˆ yawˆ yan yan te-o teh‸, yawˇ hta‸ k'oˆ piˇ ve yoˬ. 20Chaw oˇ ve lehˬ, Saˍ la‸-oˬ, ngaˬ yaˇ nehˬ hpeh‸ ve teˇ yanˇ htaˇ ka‸ tanˬ leh chi hk'a peu-eˬ hta‸ ngaˬ na yuˬ leh te peuˬ teh‸ Yeˍsuˆ hta‸ k'aw‸ k'oˆ piˇ ve yoˬ. 21Yeˍsuˆ yawˇ hta‸ nyi leh yawˇ hta‸ ha‸ leh, Nawˬ teˇ ceuˬ loˍ sheˍ ve yoˬ. Nawˬ k'o‸-e leh hk'a cawˬ ve mawˇ jeˬ hta‸ hawˇ baˬ leh haˍ yaˇ g'awˇ yaˇ teˇ hpaˍ hta‸ pehˬ piˇ-oˆ. Mvuhˇ naw ma hk'oˆ lo awˬ hpfuhˇ hk'aˆ ve mawˇ nawˬ cawˬ taˍ tuˬ yoˬ. Peuˬ leh, nawˬ k'aw‸ laˬ leh ngaˬ hk'aˇ suh laˬ-o‸ teh‸ yawˇ hta‸ k'oˆ piˇ ve yoˬ. 22Tawˇ hkawˇ chi ve hta‸ yawˇ g'a kaˇ htaˇ, mehˆ hpfuhˇ nawˍ lehˍ te leh, dawˇ haˍ jaˇ leh k'o‸-e ve yoˬ. Awˬ lawn k'o, yawˇ mawˇ jeˬ cawˬ maˇ jaˇ ve yoˬ. 23Yeˍsuˆ lehˬ, yawˇ ve awˬ la‸ g'awˇ hui hta‸ caw nyi leh k'oˆ ve, Paw sha ve chaw hui lehˬ, G'uiˬ sha ve mvuhˇ miˬ awˬ hk'aw lo lo‸-e tuˬ hk'aˬ ma haˍ jaˇ ve le. 24Awˬ la‸ g'awˇ teˇ hpaˍ lehˬ, yawˇ k'oˆ ve tawˇ hkawˇ hta‸ g'a kaˇ htaˇ anˇ jaˇ ve yoˬ. Teˇ pawˆ Yeˍsuˆ yawˇ hui hta‸ k'oˆ piˇ ve, Ngaˬ yaˇ teˇ hpaˍ-oˬ, G'uiˬ sha ve mvuhˇ miˬ awˬ hk'aw lo lo‸-e tuˬ hk'aˬ ma haˍ jaˇ ve le. 25Kaˍ laˍ oˆ teˇ hkeh g'o‸ naˍ hk'awˇ awˬ hk'aw lo‸-e tuˬ ve lehˬ, paw sha ve chaw teˇ g'aˇ G'uiˬ sha ve mvuhˇ miˬ awˬ hk'aw lo lo‸-e tuˬ ve a‸ kehˉ sha ve yoˬ teh‸ k'oˆ piˇ ve yoˬ. 26Yawˇ hui leuˉ leh anˇ jaˇ leh, Hk'e te k'o, htaiˍ hk'aw‸ ve hta‸ a shu g'a hpeh‸ tuˬ le teh‸ yawˇ hta‸ k'oˆ piˇ ve yoˬ. 27Yeˍsuˆ yawˇ hui hta‸ nyi leh, Chaw yaˇ lehˬ chi hta‸ te maˇ g'a. Ya‸ hk'aˇ, G'uiˬ sha te maˇ g'a ve maˇ heˆ. Awˬ lawn k'o, G'uiˬ sha lehˬ hk'a peu-eˬ hta‸ te g'a ve yoˬ teh‸, yawˇ hui hta‸ k'oˆ piˇ ve yoˬ. 28Oˇ htaˇ Peˍtruˆ k'oˆ ve, Ngaˬ hui lehˬ hk'a peu-eˬ hta‸ baˬ taˉ leh nawˬ awˬ hk'aˇ suh laˬ peuˬ teh‸ yawˇ hta‸ k'oˆ piˇ ve yoˬ. 29Yeˍsuˆ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ awˬ pon leh ha lehˬ ve bon hkawˇ awˬ pon, a shu yawˇ ve yehˬ, a shu yawˇ ve awˬ viˉ awˬ nyi, a shu yawˇ ve awˬ pa awˬ e, a shu yawˇ ve awˬ yaˇ awˬ duˬ leh a shu yawˇ ve ti mi teˇ hpaˍ hta‸ baˬ taˉ ve chaw hk'aˬ ve teˇ g'aˇ maˇ k'oˆ, 30chi teˇ ca‸ na‸ awˬ hk'aw lo yehˬ, awˬ viˉ awˬ nyi, awˬ e, awˬ yaˇ awˬ duˬ leh ti mi teˇ hpaˍ hta‸ teˇ ha pun g'a ve yoˬ. Chi teˇ hpaˍ geh teˇ geh tu‸ ve hkanˍ ve hta‸ htawˇ g'a ve yoˬ. Awˬ hk'aw‸ nawˉ teˇ ca‸ na‸ awˬ hk'aw lo co ti‸ ha ti‸ hta‸ htawˇ g'a ve yoˬ. 31Ya‸ hk'aˇ, shu awˬ g'uˇ suhˍ chehˇ ve chaw maˇ maˇ, shu awˬ hk'aw‸ nawˉ g'a k'aw‸ chehˇ tuˬ yoˬ. Shu awˬ hk'aw‸ nawˉ chehˇ ve chaw maˇ maˇ, shu awˬ g'uˇ suhˍ g'a k'aw‸ chehˇ tuˬ yoˬ teh‸ k'oˆ piˇ ve yoˬ. 32Oˇ ve awˬ hk'aw‸ nawˉ, yawˇ hui Yeˍruˆsaˍlehnˍ venˇ lo k'ai chehˇ htaˇ, ya‸ k'aw k'aˉ lo Yeˍsuˆ lehˬ yawˇ hui awˬ g'uˇ suhˍ k'ai ve yoˬ. Yawˇ hui anˇ jaˇ leh, yawˇ hui awˬ hk'aˇ suh k'ai ve chaw teˇ hpaˍ htawˇ kawˆ ve yoˬ. Oˇ htaˇ tcuh yaˇ teˇ chi nyiˇ g'aˇ hta‸ yawˇ k'aw‸ kuˬ yuˬ leh, yawˇ hk'aˬ hk'e g'a hkanˍ tuˬ ve awˬ lawn teˇ hpaˍ yawˇ hui hta‸ hto piˇ ve, 33Ngaˬ hui Yeˍruˆsaˍlehnˍ venˇ lo k'ai chehˇ ve yoˬ. Chaw yaˇ ve Yaˇ hpu lehˬ, paw hkuˇ lonˉ hui leh li‸ bvuh‸ paˍ hui ve la‸ sheh awˬ hk'aw lo chiˇ a‸ ve hta‸ g'a hkanˍ tuˬ yoˬ. Yawˇ g'a suh tuˬ ve yawˇ hui yawˇ hta‸ suhˉ taˆ leh, buiˇ shaˆ aˉ naˆ chaw hui ve la‸ sheh awˬ hk'aw lo chiˇ a‸ piˇ tuˬ yoˬ. 34Yawˇ hui yawˇ hta‸ maˇ shawˍ maˇ caˆ te leh, ciˉ g'uiˇ hpe‸ pfuhˍ leh, yawˇ hta‸ jaw‸ peuˬ hk'aw‸ nawˉ yawˇ hta‸ tiˇ pehˍ tuˬ yoˬ. Peuˬ leh shehˆ nyi teˇ nyi gaˬ k'o, yawˇ k'aw‸ te‸ tu la tuˬ yoˬ teh‸ k'oˆ ve yoˬ. 35Oˇ htaˇ, Zeˍbeˍdehˇ ve awˬ yaˇ paˍ Yaˍkoˆ leh Yoˇhanˬ yawˇ geh laˬ leh, Saˍ la‸-oˬ, ngaˬ huiˉ maˬ lawˬ ve hk'e nawˬ te laˇ tuˬ ngaˬ huiˉ maˬ heuˆ gaˇ ve yoˬ teh‸ yawˇ hta‸ k'oˆ piˇ ve yoˬ. 36Yawˇ lehˬ, Nawˬ huiˉ maˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸, yawˇ huiˉ maˬ hta‸ k'oˆ piˇ ve yoˬ. 37Yawˇ huiˉ maˬ lehˬ, Nawˬ awˬ me‸ awˬ hponˇ g'a htaˇ, nawˬ la‸ sha paˉ teˇ g'aˇ, la‸ mehˍ paˉ teˇ g'aˇ, ngaˬ huiˉ maˬ hta‸ mui tcuh laˇ-oˆ teh‸, yawˇ hta‸ k'oˆ piˇ ve yoˬ. 38Yeˍsuˆ k'oˆ ve, Nawˬ huiˉ maˬ aˬ hto‸ ma hta‸ lawˬ ve, nawˬ huiˉ maˬ maˇ shiˍ. Ngaˬ dawˬ ve kawˆ hta‸ nawˬ huiˉ maˬ dawˬ hpeh‸-aw laˇ. Ngaˬ hkanˍ ve baˆtiˆsaˬ hta‸ nawˬ huiˉ maˬ hkanˍ hpeh‸-aw laˇ teh‸, yawˇ huiˉ maˬ hta‸ k'oˆ piˇ ve yoˬ. 39Hkanˍ hpeh‸ ve yoˬ teh‸, yawˇ huiˉ maˬ k'aw‸ k'oˆ piˇ ve teˇ yanˇ, Yeˍsuˆ k'aw‸ k'oˆ ve, Ngaˬ dawˬ ve kawˆ hta‸ nawˬ huiˉ maˬ g'a dawˬ tuˬ yoˬ. Ngaˬ hkanˍ ve baˆtiˆsaˬ hta‸ nawˬ huiˉ maˬ g'a hkanˍ tuˬ yoˬ. 40Ya‸ hk'aˇ, ngaˬ ve la‸ sha paˉ la‸ mehˍ paˉ g'a mui tuˬ, ngaˬ pe‸ laˇ maˇ hpeh‸. Yawˇ hui awˬ pon gu taˍ piˇ ve chaw teˇ hpaˍ ceh tiˉ oˇ kaˬ lo g'a mui ve yoˬ teh‸, yawˇ huiˉ maˬ hta‸ k'oˆ piˇ ve yoˬ. 41Awˬ lawn chi hta‸ awˬ kaˍ awˬ nu tcuh yaˇ teˇ chi g'aˇ g'a kaˇ htaˇ, Yaˍkoˆ leh Yoˇhanˬ hta‸ yawˇ hui nyi ma zuhˆ ve yoˬ. 42Oˇ htaˇ, Yeˍsuˆ yawˇ hui hta‸ kuˬ yuˬ leh k'oˆ piˇ ve, Buiˇ shaˆ aˉ naˆ chaw hui awˬ hk'oˆ hta‸ jawˇ mawˇ te tuˬ aˉ yaˇ g'a ve chaw teˇ hpaˍ lehˬ, yawˇ hui hta‸ uˉ peunˍ leh, yawˇ hui ve chaw uiˍ teˇ hpaˍ lehˬ, yawˇ hui hta‸ nyiˉ te ve hta‸ nawˬ hui shiˍ ve yoˬ. 43Ya‸ hk'aˇ, nawˬ hui awˬ hk'aw lo chi hk'e maˇ g'a te. Nawˬ hui awˬ hk'aw lo chaw uiˍ hpeh‸ gaˇ ve chaw hk'aˬ ve teˇ g'aˇ maˇ k'oˆ, yawˇ nawˬ hui ve awˬ ceˬ g'a te ve yoˬ. 44Nawˬ hui awˬ hk'aw lo awˬ hoˉ te gaˇ ve chaw hk'aˬ ve teˇ g'aˇ maˇ k'oˆ, hk'a peu-eˬ awˬ pon yawˇ lehˬ vuiˬ taˍ ve awˬ ceˬ g'a hpeh‸ ve yoˬ. 45Awˬ lawn k'o, chaw yaˇ ve Yaˇ hpu lehˬ, shu yawˇ awˬ pon kanˉ te tuˬ laˬ ve maˇ heˆ. Yawˇ shu awˬ pon kanˉ te tuˬ laˬ leh, chaw maˇ maˇ hta‸ htaiˍ hk'aw‸ tuˬ, yawˇ ve a sha‸ piˇ tuˬ awˬ pon laˬ ve yoˬ teh‸ k'oˆ ve yoˬ. 46Oˇ htaˇ, yawˇ hui Yeˍriˆhkoˇ venˇ lo gaˬ la ve yoˬ. Yeˍsuˆ lehˬ, yawˇ ve awˬ la‸ g'awˇ hui leh chaw awˬ moˍ lonˉ geh Yeˍriˆhkoˇ venˇ awˬ hk'aw lo tawˆ k'ai chehˇ ve teˇ yanˇ, Tiˆmehˇ ve yaˇ paˍ Baˍtiˆmehˇ meh ve mehˆ cuˉ ve lawˬ leh‸ paˍ teˇ g'aˇ ya‸ k'aw paˇ lo mui chehˇ ve yoˬ. 47Naˍzaˍrehˆ chaw Yeˍsuˆ yoˬ teh‸, yawˇ g'a kaˇ htaˇ yawˇ k'oˆ ve, Daˍviˆ ve Yaˇ hpu Yeˍsuˆ-oˬ, ngaˬ hta‸ ha k'aˉ laˇ-oˆ teh‸ kuˬ ve yoˬ. 48Chaw laiˉ g'aˇ lehˬ, Ta‸ iˉ chehˇ-oˆ teh‸ yawˇ hta‸ deˇ piˇ ve htawˇ, yawˇ lehˬ, Daˍviˆ ve Yaˇ hpu-oˬ, ngaˬ hta‸ ha k'aˉ laˇ-oˆ teh‸, leuˉ leh g'aˇ hte‸ k'aw‸ kuˬ ve yoˬ. 49Yeˍsuˆ huˉ taˍ leh, Yawˇ hta‸ kuˬ laˬ-o‸ teh‸ k'oˆ piˇ ve yoˬ. Yawˇ hui mehˆ cuˉ paˍ oˇ ve hta‸ kuˬ leh, Ha lehˬ chehˇ-oˆ. Tu loˬ. Yawˇ nawˬ hta‸ kuˬ chehˇ ve yoˬ teh‸ k'oˆ piˇ ve yoˬ. 50Chaw oˇ ve lehˬ, yawˇ ve aˉ po‸ zuhˬ ma hta‸ k'ehˆ teh taˉ leh, pawˆ tu leh Yeˍsuˆ geh laˬ ve yoˬ. 51Oˇ htaˇ, Yeˍsuˆ yawˇ hta‸ k'oˆ piˇ ve, Nawˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸ na nyi htaˇ, Jawˇ mawˇ-oˬ, ngaˬ mehˆ mawˬ la tuˬ nawˬ hta‸ te tcuh laˇ gaˇ ve yoˬ teh‸, yawˇ hta‸ k'aw‸ k'oˆ piˇ ve yoˬ. 52Yeˍsuˆ lehˬ, K'ai loˬ. Nawˬ yonˍ ve teˇ ceuˬ lehˬ nawˬ hta‸ na-e la piˇ peuˬ teh‸, yawˇ hta‸ k'oˆ piˇ ve yoˬ. Chaw oˇ ve teˇ cawˬ haˉ mehˆ mawˬ la leh Yeˍsuˆ awˬ hk'aˇ suh k'ai ve yoˬ.

will be added

X\