Luˉka‸ 5

1Teˇ pawˆ htaˇ, chaw awˬ moˍ lonˉ lehˬ, G'uiˬ sha ve tawˇ hkawˇ hta‸ na tuˬ Yeˍsuˆ geh buiˆ lo‸ la chehˇ ve yoˬ. Yawˇ lehˬ, Geˍneˍsaˍrehˆ g'uiˬ po paˇ lo huˉ taˍ leh, 2g'uiˬ pfuhˍ paˇ lo haw lo‸ k'oˍ nyiˇ maˬ deh taˍ ve hta‸ yawˇ g'a mawˬ ve yoˬ. Ngaˇ ca paˍ teˇ hpaˍ lehˬ, haw lo‸ k'oˍ hk'aw tawˆ k'ai peuˬ leh, yawˇ hui ve geu‸ teˇ hpaˍ hta‸ tsuhˇ baˬ chehˇ ve yoˬ. 3Siˉmonˍ ve haw lo‸ k'oˍ teˇ maˬ hk'aw yawˇ lo‸-e leh, iˉ kaˆ hk'aw a ciˉ jiˆ k'ai tuˬ Siˉmonˍ hta‸ lawˬ ve yoˬ. Oˇ htaˇ, yawˇ haw lo‸ k'oˍ hk'aw mui taˍ leh, chaw awˬ moˍ lonˉ hta‸ maˍ piˇ ve yoˬ. 4Yawˇ maˍ piˇ ve hpehˇ peuˬ hk'aw‸ nawˉ, Siˉmonˍ hta‸ k'oˆ piˇ ve, Iˉ kaˆ naˉ kuiˬ lo jiˆ k'ai leh, ngaˇ g'a tuˬ nawˬ hui ve geu‸ teˇ hpaˍ hta‸ hpehˇ-oˆ teh‸ k'oˆ piˇ ve yoˬ. 5Siˉmonˍ k'aw‸ k'oˆ ve, Jawˇ mawˇ-oˬ, ngaˬ hui aˬ miˍ haˉ teˇ haˉ mvuhˇ hk'a htiˇ g'aˇ hte‸ te ve htawˇ, teˇ hkeh ka‸ maˇ g'a. Ya‸ hk'aˇ, nawˬ ve tawˇ hkawˇ hta‸ pa taw, geu‸ teˇ hpaˍ hta‸ ngaˬ hpehˇ tuˬ yoˬ teh‸ k'oˆ piˇ ve yoˬ. 6Yawˇ hui oˇ hk'e te ve teˇ yanˇ, ngaˇ geh maˇ jaˇ ve pa taw, yawˇ hui ve geu‸ teˇ hpaˍ tzuh‸ paˇ neˇ ve yoˬ. 7Oˇ htaˇ, awˬ kaˍ awˬ nu haw lo‸ k'oˍ hk'aw chehˇ ve awˬ chawˇ teˇ hpaˍ laˬ ga laˇ tuˬ yawˇ hui la‸ mehˆ muiˬ piˇ ve yoˬ. Awˬ chawˇ teˇ hpaˍ laˬ leh, haw lo‸ k'oˍ oˇ ve nyiˇ maˬ awˬ hk'aw lo ngaˇ yuˬ keu ve teˇ yanˇ, ngaˇ hk'a biˇ cawˬ ve pa taw, haw lo‸ k'oˍ oˇ ve nyiˇ maˬ aˬ laˬ hk'e iˉ kaˆ tuˍ sheˬ ve yoˬ. 8Siˉmonˍ Peˍtruˆ oˇ ve hta‸ g'a mawˬ ve teˇ yanˇ, Yeˍsuˆ hkui paˇ lo yawˇ boˆ sheˬ leh, Jawˇ mawˇ-oˬ, ngaˬ geh lo tawˆ k'ai-o. Awˬ lawn k'o, ngaˬ lehˬ venˇ baˆ uiˍ ve chaw hpeh‸ ve yoˬ teh‸ k'oˆ piˇ ve yoˬ. 9Yawˇ hui ngaˇ g'a maˇ jaˇ ve hta‸ pa taw, Siˉmonˍ leh yawˇ geh chehˇ ve chaw hk'a peu-eˬ anˇ jaˇ ve yoˬ. 10Siˉmonˍ geh teˇ geh kanˉ te ve yawˇ ve awˬ chawˇ, Zeˍbeˍdehˇ ve awˬ yaˇ paˍ Yaˍkoˆ leh Yoˇhanˬ htawˇ, anˇ jaˇ ve yoˬ. Oˇ htaˇ, Yeˍsuˆ Siˉmonˍ hta‸ k'oˆ piˇ ve, Taˇ kawˆ. Ya‸ nyi hk'aw‸ nawˉ k'o, nawˬ lehˬ chaw ca shehˍ hpaˇ hpeh‸ tuˬ yoˬ teh‸ k'oˆ ve yoˬ. 11Yawˇ hui teˇ hpaˍ lehˬ, g'uiˬ pfuhˍ paˇ lo haw lo‸ k'oˍ teˇ hpaˍ hta‸ deh piˇ peuˬ hk'aw‸ nawˉ, hk'a peu-eˬ hta‸ baˬ taˉ leh Yeˍsuˆ awˬ hk'aˇ suh k'ai ve yoˬ. 12Teˇ pawˆ htaˇ, yawˇ venˇ teˇ venˇ awˬ hk'aw lo chehˇ taˍ ve teˇ yanˇ, awˬ to teˇ to hk'a peu-eˬ hkiˬ tu‸ keuˆ ve chaw teˇ g'aˇ cawˬ ve yoˬ. Yawˇ Yeˍsuˆ hta‸ mawˬ ve teˇ yanˇ, mehˆ hpfuhˇ miˬ chaˇ hk'oˆ boˆ sheˬ leh, Jawˇ mawˇ-oˬ, nawˬ te gaˇ ve k'o, ngaˬ hta‸ da‸ la kehˬ la tuˬ nawˬ te hpeh‸ ve yoˬ teh‸ k'oˆ leh lawˬ hkawˉ ve yoˬ. 13Yeˍsuˆ la‸ sheh che leh yawˇ hta‸ htawˇ leh k'oˆ ve, Ngaˬ te gaˇ ve yoˬ. Da‸ la kehˬ la-o teh‸ k'oˆ piˇ ve yoˬ. Teˇ cawˬ haˉ yawˇ awˬ hk'aw lo hkiˬ tu‸ a naˍ mehˉ k'ai ve yoˬ. 14Chaw teˇ g'aˇ hta‸ ka‸ maˇ g'a hto piˇ tuˬ Yeˍsuˆ yawˇ hta‸ tawˇ piˇ ve yoˬ. Chi hk'oˆ ka‸ Yeˍsuˆ k'aw‸ k'oˆ ve, Nawˬ k'ai leh paw hkuˇ hta‸ nawˬ awˬ to ca maw piˇ-oˆ Shu mehˆ g'uˇ suhˍ shaˉ hkiˆ hpeh‸ tuˬ, nawˬ da‸ la kehˬ la peuˬ ve awˬ pon Moˉseˍ awˬ liˇ teh taˍ ve hk'e, tanˇ tuˬ ca tanˇ piˇ-oˆ teh‸ yawˇ hta‸ k'oˆ piˇ ve yoˬ. 15Ya‸ hk'aˇ, yawˇ ve awˬ lawn leuˉ leh teˇ kaˬ le le lo bvuhˬ k'ai ve pa taw, chaw awˬ moˍ lonˉ teˇ hpaˍ lehˬ, yawˇ ve hkawˇ hta‸ na tuˬ maˇ k'oˆ, yawˇ hui ve naˬ ve gawˬ ve teˇ hpaˍ hta‸ gu na-e laˇ tuˬ maˇ k'oˆ, hpawnˬ la ve yoˬ. 16Ya‸ hk'aˇ Yeˍsuˆ lehˬ, yawˇ teˇ g'aˇ tiˉ heh puiˉ hk'aw lo k'ai leh bon ca lawˬ ve yoˬ. 17Teˇ nyi htaˇ, yawˇ maˍ piˇ chehˇ ve teˇ yanˇ, Yeˍruˆsaˍlehnˍ venˇ lo leh Gaˍliˍlehˇ mvuhˇ miˬ, Yuˇda‸ mvuhˇ miˬ awˬ hk'aw cawˬ ve hk'aˆ teˇ hk'aˆ le le lo chehˇ ve Hpaˍriˍsehˇ leh awˬ liˇ tawˇ hkawˇ maˍ ve saˍ la‸ teˇ hpaˍ gaˬ la leh mui taˍ ve yoˬ. Naˬ ve chaw hui hta‸ gu na-e piˇ tuˬ Jawˇ mawˇ G'uiˬ sha ve kanˇ paˆ yawˇ geh cawˬ ve yoˬ. 18Oˇ htaˇ chaw teˇ hpaˍ lehˬ, ku-iˍ hk'oˆ zuh‸ chehˇ ve hkui sheh la‸ sheh suh ve chaw teˇ g'aˇ hta‸ taˆ veu laˇ ve yoˬ. Yawˇ hta‸ yuˬ lo‸-e leh Yeˍsuˆ mehˆ g'uˇ suhˍ taˍ tuˬ yawˇ hui ca ve yoˬ. 19Chaw awˬ moˍ lonˉ chehˇ taˍ ve pa taw, yawˇ hta‸ yuˬ lo‸-e tuˬ yawˇ hui ya‸ k'aw ca maˇ mawˬ ve teˇ yanˇ, yehˬ awˬ hk'oˆ lo yawˇ hui taˆ-e leh, beh taˍ ve hta‸ hpaˆ pawnˍ peuˬ hk'aw‸ nawˉ, chaw naˬ oˇ ve leh yawˇ zuh‸ taˍ ve ku-iˍ hta‸ chaw chi ma ve awˬ k'aw ji lo Yeˍsuˆ mehˆ g'uˇ suhˍ hpehˇ ya‸-e ve yoˬ. 20Yeˍsuˆ lehˬ, yawˇ hui yonˍ ve nyi ma hta‸ g'a mawˬ htaˇ, Awˬ chawˇ-oˬ, nawˬ ve venˇ baˆ hpehˇ hk'a peuˬ teh‸ k'oˆ piˇ ve yoˬ. 21Oˇ htaˇ, li‸ bvuh‸ paˍ teˇ hpaˍ leh Hpaˍriˍsehˇ teˇ hpaˍ k'oˆ ve, G'uiˬ sha hta‸ maˇ shawˍ maˇ caˆ k'oˆ ve chaw chi teˇ g'aˇ lehˬ, hk'aˬ hk'e ve chaw le. G'uiˬ sha teˇ g'aˇ maˇ heˆ k'o, venˇ baˆ hta‸ a shu hpehˇ hk'a hpeh‸ tuˬ le teh‸, yawˇ hui dawˇ chehˇ ve yoˬ. 22Yawˇ hui chi hk'e dawˇ chehˇ ve hta‸ Yeˍsuˆ shiˍ leh yawˇ hui hta‸ k'oˆ piˇ ve, Nawˬ hui nyi ma hk'aw aˬ hto‸ ma te chi hk'e dawˇ chehˇ ve le. 23Tawˇ hk'aˬ ve teˇ hkawˇ a ciˉ k'oˆ piˇ sha le. Nawˬ ve venˇ baˆ hpehˇ hk'a peuˬ teh‸ k'oˆ piˇ ve sha laˇ. Maˇ heˆ k'o, Tu leh ya‸ k'aw toˇ k'ai loˬ teh‸ k'oˆ piˇ ve sha laˇ. 24Ya‸ hk'aˇ, chaw yaˇ ve Yaˇ hpu lehˬ, miˬ guiˬ hk'oˆ lo venˇ baˆ hpehˇ hk'a tu kanˇ paˆ cawˬ ve hta‸ nawˬ hui g'a shiˍ tuˬ teh‸ k'oˆ peuˬ leh, hkui sheh la‸ sheh suh ve chaw hta‸ k'aw‸ k'oˆ piˇ ve, Ngaˬ nawˬ hta‸ k'oˆ laˇ ve, tu-o. Nawˬ ve ku-iˍ hta‸ taˆ leh nawˬ ve aˉ hk'aw lo k'o‸-e loˬ teh‸, yawˇ hta‸ k'oˆ piˇ ve yoˬ. 25Teˇ cawˬ haˉ yawˇ hui mehˆ g'uˇ suhˍ yawˇ tu leh, yawˇ ve zuh‸ kuiˬ hta‸ taˆ peuˬ hk'aw‸ nawˉ, G'uiˬ sha hta‸ chiˇ uiˍ chiˇ mvuh ve awˬ hk'aw lo yawˇ ve aˉ hk'aw lo k'o‸-e ve yoˬ. 26Chaw hk'a peu-eˬ anˇ jaˇ leh G'uiˬ sha hta‸ chiˇ uiˍ chiˇ mvuh piˇ ve yoˬ. Yawˇ hui kawˆ jaˇ ve awˬ hk'aw lo, Ngaˬ hui maˇ dawˇ nyi jaw ve awˬ ceuˬ teˇ hpaˍ hta‸ ya‸ nyi g'a mawˬ peuˬ teh‸ k'oˆ ve yoˬ. 27Oˇ ve awˬ hk'aw‸ nawˉ Yeˍsuˆ tawˆ k'ai leh, Leˍviˆ meh ve awˬ hkawnˍ shaw paˍ teˇ g'aˇ awˬ hkawnˍ shaw kuiˬ yehˬ awˬ hk'aw lo mui chehˇ ve hta‸ g'a mawˬ htaˇ, Ngaˬ hk'aˇ suh laˬ-o‸ teh‸, yawˇ hta‸ k'oˆ piˇ ve yoˬ. 28Yawˇ lehˬ, hk'a cawˬ ve hk'a peu-eˬ hta‸ baˬ taˉ leh, tu leh Yeˍsuˆ awˬ hk'aˇ suh k'ai ve yoˬ. 29Oˇ htaˇ, Leˍviˆ lehˬ yawˇ ve aˉ hk'aw lo Yeˍsuˆ awˬ pon hti caˇ hti dawˬ ve pawehˇ lonˉ te ve yoˬ. Awˬ hkawnˍ shaw paˍ teˇ hpaˍ leh awˬ kaˍ awˬ nu chaw maˇ maˇ, yawˇ hui geh teˇ geh hpui lawˇ paˇ lo mui caˇ chehˇ ve yoˬ. 30Hpaˍriˍsehˇ teˇ hpaˍ leh yawˇ hui ve li‸ bvuh‸ paˍ teˇ hpaˍ lehˬ, Yeˍsuˆ ve awˬ la‸ g'awˇ hui hta‸ ca beu ca hk'aiˉ leh k'oˆ ve, Naw hui aˬ hto‸ ma pa taw awˬ hkawnˍ shaw paˍ leh venˇ baˆ yaˇ hui geh hk'a geh hti caˇ hti dawˬ ve le teh‸ na nyi ve yoˬ. 31Yeˍsuˆ yawˇ hui hta‸ k'aw‸ k'oˆ piˇ ve, Chehˇ sha ve chaw hui naˆ tsuhˇ shehˍ hpaˇ hta‸ maˇ loˍ. Naˬ ve chaw hui ceh tiˉ loˍ ve yoˬ. 32Hteˇ ve cawˇ ve chaw hui hta‸ kuˬ yuˬ tuˬ ngaˬ laˬ ve maˇ heˆ. Venˇ baˆ yaˇ teˇ hpaˍ, a shu yawˇ ve venˇ baˆ hta‸ dawˇ hpfuhˆ tuˬ awˬ pon kuˬ yuˬ tuˬ ngaˬ laˬ ve yoˬ teh‸ k'oˆ piˇ ve yoˬ. 33Oˇ htaˇ, yawˇ hui yawˇ hta‸ k'aw‸ k'oˆ piˇ ve, Yoˇhanˬ ve awˬ la‸ g'awˇ teˇ hpaˍ lehˬ, teˇ hkui teˇ hkui caˇ tuˬ ce leh bon lawˬ ve yoˬ. Hpaˍriˍsehˇ ve awˬ la‸ g'awˇ teˇ hpaˍ htawˇ oˇ hk'e te chehˇ ve yoˬ. Ya‸ hk'aˇ, nawˬ ve awˬ la‸ g'awˇ teˇ hpaˍ lehˬ, caˇ chehˇ dawˬ chehˇ ve yoˬ. 34Yeˍsuˆ yawˇ hui hta‸ k'aw‸ k'oˆ piˇ ve, Awˬ miˇ ma heuˆ shehˍ hpaˇ lehˬ, hkehˉ caˇ la ve chaw hui geh chehˇ htaˇ, nawˬ hui yawˇ hui hta‸ caˇ tuˬ ce piˇ lawˬ g'a tuˬ leh laˇ. 35Ya‸ hk'aˇ, awˬ miˇ ma heuˆ shehˍ hpaˇ hta‸ hkehˉ caˇ la ve chaw teˇ hpaˍ geh yuˬ hpaˆ piˇ ve awˬ nyi gaˬ la tuˬ yoˬ. Awˬ yanˇ oˇ ve awˬ hk'aw lo yawˇ hui caˇ tuˬ ce tuˬ yoˬ teh‸, yawˇ hui hta‸ k'oˆ piˇ ve yoˬ. 36Chi hk'oˆ ka‸, yawˇ yawˇ hui hta‸ tawˇ pa haˉ te maˍ leh k'oˆ piˇ ve, Veu‸ k'aˇ awˬ suhˉ teˇ hk'oˆ awˬ hk'aw lo teˇ peˆ tzuh‸ sheˬ leh, veu‸ k'aˇ awˬ piˍ hta‸ a shu ka‸ maˇ nehˉ jaw. Oˇ hk'e nehˉ ve k'o, veu‸ k'aˇ awˬ suhˉ hta‸ tzuh‸ ve awˬ hk'oˆ ka‸, veu‸ k'aˇ awˬ suhˉ ve hpa peˆ lehˬ, veu‸ k'aˇ awˬ piˍ hta‸ maˇ hawˍ da‸. 37Chi hk'oˆ ka‸, shaˍ guiˬ htuˉ pui awˬ piˍ awˬ hk'aw lo a pehˉ meuˇ g'uiˬ awˬ suhˉ a shu ka‸ maˇ keu jaw. Oˇ hk'e keu ve k'o, a pehˉ meuˇ g'uiˬ awˬ suhˉ lehˬ, shaˍ guiˬ htuˉ pui hta‸ te hkoˇ ve pa taw, a pehˉ meuˇ g'uiˬ sheˆ leh, shaˍ guiˬ htuˉ pui htawˇ luˬ k'ai ve yoˬ. 38A pehˉ meuˇ g'uiˬ awˬ suhˉ hta‸ shaˍ guiˬ htuˉ pui awˬ suhˉ awˬ hk'aw lo g'a keu ve yoˬ. 39A pehˉ meuˇ g'uiˬ awˬ piˍ hta‸ dawˬ peuˬ ve chaw hk'aˬ ve teˇ g'aˇ maˇ k'oˆ, awˬ suhˉ hta‸ maˇ dawˬ gaˇ. Awˬ lawn k'o, Awˬ piˍ lehˬ da‸ ve yoˬ. teh‸ yawˇ k'oˆ ve yoˬ.

will be added

X\