Luˉka‸ 24

1Teˇ shinˉ awˬ hk'aw lo awˉ lawˉ teˇ nyi mvuhˇ htiˇ la htaˇ, yaˇ miˇ teˇ hpaˍ lehˬ, yawˇ hui gu taˍ ve sha hawnˉ teˇ hpaˍ hta‸ yuˬ leh tuˍ hpfuh lo k'ai ve yoˬ. 2Yawˇ hui oˇ kaˬ lo gaˬ ve teˇ yanˇ, tuˍ hpfuh hta‸ hoˆ taˍ ve haˉ pui shiˍ hpfuhˆ baˬ taˍ ve hta‸ g'a mawˬ ve yoˬ. 3Yawˇ hui lo‸-e ve teˇ yanˇ, Jawˇ mawˇ Yeˍsuˆ ve awˬ to hta‸ maˇ mawˬ 4Awˬ lawn chi hta‸ yawˇ hui dawˇ maˇ tawˆ chehˇ ve teˇ yanˇ, awˬ g'euˆ ba ve veu‸ k'aˇ hta‸ veu‸ deh taˍ ve chaw nyiˇ g'aˇ tawˆ la leh yawˇ hui awˬ paˇ lo huˉ taˍ ve yoˬ. 5Yaˇ miˇ oˇ ve teˇ hpaˍ kawˆ jaˇ leh miˬ chaˇ hk'oˆ boˆ taˍ ve teˇ yanˇ, chaw oˇ ve nyiˇ g'aˇ k'oˆ ve, Nawˬ hui lehˬ, aˬ hto‸ ma pa taw te‸ chehˇ ve chaw hta‸ suh ve chaw chehˇ kuiˬ lo ca la ve le. 6Yawˇ choˬ kaˬ maˇ chehˇ. K'aw‸ te‸ tu la peuˬ. Gaˍliˍlehˇ mvuhˇ miˬ awˬ hk'aw lo chehˇ htaˇ yawˇ nawˬ hui hta‸ k'oˆ laˇ ve tawˇ hkawˇ hta‸ dawˇ nawˇ-oˆ. 7Yawˇ k'oˆ ve, Chaw yaˇ ve Yaˇ hpu lehˬ, venˇ baˆ yaˇ hui ve la‸ hk'aw lo chiˇ a‸ piˇ ve hta‸ g'a hkanˍ leh, la‸ ka hk'oˆ lo hta‸ pehˍ peuˬ hk'aw‸ nawˉ, shehˆ nyi gaˬ k'o, k'aw‸ te‸ tu la tuˬ yoˬ teh‸, nawˬ hui hta‸ k'oˆ laˇ ve yoˬ teh‸, yawˇ hui hta‸ k'oˆ piˇ ve yoˬ. 8Oˇ htaˇ, Yeˍsuˆ k'oˆ taˍ ve tawˇ hkawˇ hta‸ yawˇ hui k'aw‸ dawˇ nawˇ la ve yoˬ. 9Yawˇ hui lehˬ, tuˍ hpfuh lo k'aw‸ la peuˬ hk'aw‸ nawˉ, tcuh yaˇ teˇ chi teˇ g'aˇ leh awˬ kaˍ awˬ nu awˬ la‸ g'awˇ hk'a peu-eˬ hta‸ awˬ lawn oˇ ve hk'a peu-eˬ ca hto piˇ ve yoˬ. 10Awˬ lawn oˇ ve teˇ hpaˍ tcuh yaˇ hui hta‸ ca hto piˇ ve yaˇ miˇ teˇ hpaˍ lehˬ, Maˍriˆ Maˍgaˍdaˍlaˆ, Yoˇhaˍnaˆ, Yaˍkoˆ ve awˬ e Maˍriˆ leh, awˬ kaˍ awˬ nu ve yaˇ miˇ teˇ hpaˍ yoˬ. 11Yaˇ miˇ teˇ hpaˍ k'oˆ ve tawˇ hkawˇ lehˬ, tcuhˉ kuiˬ maˇ cawˬ ve tawˇ hkawˇ hpeh‸ ve yoˬ teh‸, tcuh yaˇ teˇ hpaˍ dawˇ leh, yawˇ hui hta‸ maˇ yonˍ. 13Chi hk'oˆ ka‸, oˇ ve teˇ nyi awˬ hk'aw lo awˬ la‸ g'awˇ nyiˇ g'aˇ lehˬ, Yeˍruˆsaˍlehnˍ venˇ hta‸ suhˍ laˆ vuiˇ da‸ ve Eˇmaw‸ hk'aˆ lo k'ai chehˇ ve teˇ yanˇ, 14hk'a hpeh‸ la ve awˬ lawn hk'a peu-eˬ yawˇ huiˉ maˬ k'aoˍ da‸ chehˇ ve yoˬ. 15Yawˇ huiˉ maˬ chi hk'e k'aoˍ da‸ jehˬ da‸ chehˇ ve teˇ yanˇ, Yeˍsuˆ awˬ to awˬ paˇ lo laˬ leh, yawˇ huiˉ maˬ geh teˇ geh k'ai ve yoˬ. 16Ya‸ hk'aˇ, yawˇ hta‸ maˇ g'a shiˍ tuˬ, yawˇ huiˉ maˬ ve mehˆ shiˍ hta‸ koˍ taˍ ve hk'e hpeh‸ piˇ lawˬ ve yoˬ. 17Oˇ htaˇ Yeˍsuˆ k'oˆ ve, Nawˬ huiˉ maˬ ya‸ k'aw k'ai chehˇ htaˇ, aˬ hto‸ ma awˬ lawn na‸ uˉ te da‸ ve le teh‸ na nyi ve teˇ yanˇ, yawˇ huiˉ maˬ lehˬ mehˆ hpfuhˇ nawˍ lehˍ te leh huˉ taˍ ve yoˬ. 18Oˇ htaˇ, yawˇ huiˉ maˬ awˬ hk'aw lo Kaˍlawˇhpaˆ meh ve chaw teˇ g'aˇ k'oˆ ve, Yeˍruˆsaˍlehnˍ venˇ awˬ hk'aw lo hkehˉ chaw hpeh‸ leh, chi nyiˇ nyi venˇ oˇ ve awˬ hk'aw lo hpeh‸ la ve awˬ lawn teˇ hpaˍ hta‸ maˇ shiˍ ve chaw nawˬ teˇ g'aˇ tiˉ yoˬ laˇ teh‸, yawˇ hta‸ k'aw‸ k'oˆ piˇ ve yoˬ. 19Yeˍsuˆ k'aw‸ k'oˆ ve, Aˬ hto‸ ma teˇ hpaˍ awˬ lawn le teh‸ na nyi ve teˇ yanˇ, yawˇ huiˉ maˬ k'aw‸ k'oˆ ve, Naˍzaˍrehˆ chaw Yeˍsuˆ ve awˬ lawn yoˬ. Chaw oˇ ve lehˬ, G'uiˬ sha mehˆ g'uˇ suhˍ leh chaw hk'a peu-eˬ mehˆ g'aˇ suhˍ, yawˇ k'oˆ ve te ve awˬ hk'aw lo kanˇ paˆ uiˍ ve G'uiˬ sha ve tcuh kaˍ paˍ teˇ g'aˇ hpeh‸ ve yoˬ. 20Paw hkuˇ lonˉ teˇ hpaˍ leh ngaˬ hui ve jawˇ mawˇ teˇ hpaˍ lehˬ, yawˇ g'a suh tuˬ awˬ pon suhˉ taˆ tuˬ chiˇ a‸ piˇ leh, la‸ ka hk'oˆ lo hta‸ pehˍ ve yoˬ. 21Yawˇ lehˬ, Iˉsaˍreˍlaˆ chaw ceuˬ hta‸ htaiˍ hk'aw‸ shehˍ hpaˇ hpeh‸ ve yoˬ teh‸, ngaˬ hui dawˇ law jaw ve yoˬ. Chi hk'oˆ ka‸, awˬ lawn chi teˇ hpaˍ hpeh‸ la ve lehˬ, ya‸ nyi shehˆ nyi gaˬ peuˬ. 22Ngaˬ hui ve awˬ moˍ awˬ hk'aw lo yaˇ miˇ teˇ hpaˍ hpaˍ htawˇ anˇ jaˇ ve awˬ lawn teˇ hpaˍ ngaˬ hui hta‸ hto laˇ ve yoˬ. Ya‸ shawˉ teˇ na‸ yawˇ hui tuˍ hpfuh lo k'ai leh, yawˇ ve awˬ to hta‸ maˇ mawˬ. 23Oˇ htaˇ, yawˇ hui k'aw‸ la leh k'oˆ ve, Awˬ ha awˬ hk'aw lo mvuhˇ naw ma tcuh yaˇ teˇ hpaˍ hta‸ ngaˬ hui g'a mawˬ leh, Yawˇ te‸ chehˇ ve yoˬ teh‸ k'oˆ laˇ ve yoˬ teh‸ yaˇ miˇ teˇ hpaˍ k'oˆ ve yoˬ. 24Ngaˬ hui ve chaw teˇ hpaˍ hpaˍ lehˬ, tuˍ hpfuh lo k'ai leh, yaˇ miˇ teˇ hpaˍ k'oˆ ve hk'e g'a mawˬ ve yoˬ. Ya‸ hk'aˇ, yawˇ hui yawˇ hta‸ maˇ mawˬ teh‸, yawˇ hta‸ k'oˆ piˇ ve yoˬ. 25Oˇ htaˇ Yeˍsuˆ k'oˆ ve, G'uiˬ sha ve tcuh kaˍ paˍ hui k'oˆ taˍ ve tawˇ hkawˇ hk'a peu-eˬ hta‸ yonˍ tuˬ, nyi ma hk'aw maˇ dawˇ pawnˍ puiˉ leh cuˇ yiˍ maˇ cawˬ ve chaw hui-oˬ, 26Hkri‸ lehˬ chi hk'e g'a tu‸ g'a hkanˍ leh, yawˇ ve awˬ me‸ awˬ hponˇ awˬ hk'aw lo g'a lo‸-e ve maˇ heˆ laˇ teh‸, yawˇ huiˉ maˬ hta‸ k'oˆ piˇ ve yoˬ. 27Oˇ htaˇ, Moˉseˍ leh G'uiˬ sha ve tcuh kaˍ paˍ hk'a peu-eˬ hta‸ tanˬ leh, Li‸ hpu hk'a peu-eˬ awˬ hk'aw lo yawˇ ve awˬ lawn hk'a bvuh‸ taˍ ve teˇ hpaˍ yawˇ yawˇ huiˉ maˬ hta‸ tcuhˉ kuiˬ hpeu‸ maˍ piˇ ve yoˬ. 28Yawˇ huiˉ maˬ k'ai chehˇ ve hk'aˆ lo gaˬ paˇ neˇ ve teˇ yanˇ Yeˍsuˆ lehˬ, awˬ g'uˇ suhˍ k'ai-a teh‸ te ve yoˬ. 29Oˇ htaˇ yawˇ huiˉ maˬ k'oˆ ve, Ngaˬ huiˉ maˬ geh haˉ taˉ sheˍ. Mvuhˇ nyi k'ehˬ peuˬ. Mvuhˇ ka‸ hpeu‸ la yoˬ teh‸ k'oˆ leh, yawˇ hta‸ g'aˇ hte‸ lawˬ ve yoˬ. Hk'e te leh, yawˇ huiˉ maˬ geh ca haˉ tuˬ yawˇ lo‸-e ve yoˬ. 30Yawˇ yawˇ huiˉ maˬ geh hpui lawˇ paˇ lo mui ve teˇ yanˇ, yawˇ hkaoˍ monˇ hta‸ yuˬ leh bon hta‸ chiˇ mvuh peuˬ hk'aw‸ nawˉ, hkaoˍ monˇ hk'eh‸ leh yawˇ huiˉ maˬ hta‸ piˇ ve yoˬ. 31Oˇ htaˇ, yawˇ huiˉ maˬ mehˆ hpaw la leh, Yeˍsuˆ yoˬ teh‸ g'a shiˍ ve yoˬ. Yeˍsuˆ lehˬ, yawˇ huiˉ maˬ mehˆ g'uˇ suhˍ mehˉ sheˬ ve yoˬ. 32Yawˇ huiˉ maˬ k'oˆ ve, Ya‸ k'aw k'aˉ lo yawˇ ngaˬ huiˉ maˬ hta‸ tawˇ yaw laˇ leh Li‸ hpu tcuhˉ kuiˬ hpeu‸ maˍ laˇ ve teˇ yanˇ, ngaˬ huiˉ maˬ ve nyi ma hk'aw lo geh jaˇ ve maˇ heˆ laˇ teh‸, teˇ g'aˇ leh teˇ g'aˇ k'oˆ da‸ ve yoˬ. 33Awˬ yanˇ oˇ ve awˬ hk'aw lo yawˇ huiˉ maˬ teˇ cawˬ haˉ tu leh Yeˍruˆsaˍlehnˍ venˇ lo k'aw‸ k'ai ve yoˬ. Oˇ kaˬ lo gaˬ ve teˇ yanˇ, tcuh yaˇ teˇ chi teˇ g'aˇ leh yawˇ hui geh chehˇ ve chaw teˇ hpaˍ hpawnˬ da‸ chehˇ ve hta‸ g'a mawˬ ve yoˬ. 34Chaw oˇ ve teˇ hpaˍ yawˇ huiˉ maˬ hta‸ k'oˆ piˇ ve, Jawˇ mawˇ Yeˍsuˆ awˬ tehˬ awˬ na k'aw‸ te‸ tu la peuˬ. Siˉmonˍ hta‸ yawˇ ve awˬ to maw piˇ peuˬ teh‸ k'oˆ ve yoˬ. 35Oˇ htaˇ yawˇ huiˉ maˬ htawˇ, ya‸ k'aw k'aˉ lo hpeh‸ la ve awˬ lawn teˇ hpaˍ maˇ k'oˆ, hkaoˍ monˇ hk'eh‸ ve teˇ yanˇ yawˇ yoˬ teh‸ shiˍ la ve awˬ lawn maˇ k'oˆ, yawˇ hui hta‸ k'aoˍ maˍ piˇ ve yoˬ. 36Yawˇ hui chi hk'e k'oˆ da‸ chehˇ ve teˇ yanˇ, Yeˍsuˆ awˬ to yawˇ hui awˬ k'aw ji lo huˉ taˍ leh, Nawˬ hui geh dawˇ sha tuˬ cawˬ piˇ-oˆ teh‸, yawˇ hui hta‸ k'oˆ piˇ ve yoˬ. 37Ya‸ hk'aˇ yawˇ hui lehˬ, chaw ha ku hta‸ mawˬ ve law teh‸ dawˇ leh, kawˆ jaˇ leh cheˇ lehˍ k'ai ve yoˬ. 38Yawˇ hui hta‸ k'oˆ piˇ ve, Aˬ hto‸ ma pa taw nawˬ hui nyi ma sho‸ sha‸ ve le. Aˬ hto‸ ma pa taw nawˬ hui ve nyi ma hk'aw lo htawˇ dawˇ nawˬ dawˇ te chehˇ ve le. 39Awˬ tehˬ awˬ na ngaˬ yoˬ. Ngaˬ ve la‸ sheh hkui sheh hta‸ nyi-o. Ngaˬ hta‸ shoˆ nyi htawˇ nyi-o. Ngaˬ lehˬ, nawˬ hui mawˬ taˍ ve hk'e, awˬ shaˍ leh awˬ mu‸ ku cawˬ ve yoˬ. Chaw ha ku lehˬ, oˇ hk'e cawˬ tuˬ maˇ heˆ teh‸ k'oˆ leh, 40yawˇ ve la‸ sheh hkui sheh yawˇ hui hta‸ maw piˇ ve yoˬ. 41Yawˇ hui anˇ leh ha lehˬ jaˇ ve pa taw, hk'a deh‸ maˇ yonˍ sheˍ ve teˇ yanˇ, Nawˬ hui geh caˇ tuˬ teˇ ceuˬ ceuˬ cawˬ laˇ teh‸, yawˇ yawˇ hui hta‸ na nyi ve yoˬ. 42Ngaˇ pinˍ taˍ ve teˇ tawn yawˇ hui yawˇ hta‸ piˇ ve teˇ yanˇ, 43Yawˇ yuˬ leh yawˇ hui mehˆ g'uˇ suhˍ caˇ ve yoˬ. 44Oˇ htaˇ yawˇ k'aw‸ k'oˆ ve, Moˉseˍ ve awˬ liˇ tawˇ hkawˇ li‸ awˬ hk'aw lo maˇ k'oˆ, G'uiˬ sha ve tcuh kaˍ paˍ hui ve li‸ teˇ hpaˍ awˬ hk'aw lo maˇ k'oˆ, chiˇ mvuh ve li‸ teˇ hpaˍ awˬ hk'aw lo htawˇ maˇ k'oˆ, ngaˬ awˬ lawn hk'a bvuh‸ taˍ ve hk'a peu-eˬ g'a biˇ la tuˬ yoˬ teh‸, ngaˬ nawˬ hui geh teˇ geh chehˇ ve teˇ yanˇ, ngaˬ nawˬ hui hta‸ chi hk'e k'oˆ piˇ taˍ ve yoˬ. 45Oˇ htaˇ, Li‸ hpu ve tcuhˉ kuiˬ hta‸ shiˍ tuˬ, yawˇ yawˇ hui ve nyi ma hta‸ dawˇ pawnˍ piˇ ve yoˬ. 46Yawˇ k'oˆ ve, Li‸ hpu hk'aw chi hk'e bvuh‸ taˍ ve, Hkri‸ lehˬ g'a hkanˍ suh leh shehˆ nyi gaˬ k'o g'a k'aw‸ te‸ tu la tuˬ yoˬ. 47Venˇ baˆ dawˇ hpfuhˆ leh venˇ baˆ hpehˇ hk'a tuˬ awˬ lawn, Yeˍruˆsaˍlehnˍ venˇ hta‸ tanˬ leh chaw ceuˬ hk'a peu-eˬ hta‸ yawˇ ve awˬ meh awˬ hawˉ lo g'a maˍ piˇ tuˬ yoˬ teh‸ bvuh‸ taˍ ve yoˬ. 48Nawˬ hui lehˬ, chi teˇ hpaˍ awˬ lawn shaˉ hkiˆ hkanˍ shehˍ hpaˇ hpeh‸ ve yoˬ. 49Ngaˬ Awˬ pa piˇ tuˬ yoˬ teh‸ k'oˆ taˍ ve awˬ ceuˬ nawˬ hui geh lo ngaˬ peu laˇ tuˬ yoˬ. Hk'e te leh, mvuhˇ naw ma lo ve kanˇ paˆ hta‸ nawˬ hui maˇ g'a sheˍ ve ceh ceh, venˇ chi awˬ hk'aw lo chehˇ taˍ sheˍ teh‸ yawˇ hui hta‸ k'oˆ piˇ ve yoˬ. 50Oˇ htaˇ, yawˇ yawˇ hui hta‸ Beˍtaˍniˆ hk'aˆ awˬ paˇ lo hk'a gaˬ shiˍ k'ai peuˬ hk'aw‸ nawˉ, yawˇ la‸ sheh chiˇ leh, yawˇ hui hta‸ bon na‸ piˇ ve yoˬ. 51Chi hk'e bon na‸ piˇ chehˇ ve teˇ yanˇ, yawˇ yawˇ hui hta‸ hpaˆ da‸ leh mvuhˇ naw ma hk'oˆ lo taˆ k'o‸-e ve yoˬ. 52Yawˇ hui yawˇ hta‸ oˉ k'oˍ pui taˉ leh, ha lehˬ jaˇ ve awˬ hk'aw lo Yeˍruˆsaˍlehnˍ venˇ lo k'aw‸ k'o‸-e ve yoˬ. 53Yawˇ hui lehˬ, hk'aˬ htaˆ ka‸ bon yehˬ lonˉ awˬ hk'aw lo chehˇ leh G'uiˬ sha hta‸ chiˇ mvuh chehˇ ve yoˬ.

will be added

X\