Luˉka‸ 22

1Oˇ htaˇ, Paˍsaˍhkaˍ pawehˇ meh ve, Hkaoˍ monˇ awˬ hk'aw lo diˇ maˇ keu ve pawehˇ gaˬ la paˇ neˇ ve yoˬ. 2paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ lehˬ, hk'aˬ hk'e te leh yawˇ hta‸ g'a tiˇ pehˍ tuˬ ca ve yoˬ. Awˬ lawn k'o, yawˇ hui lehˬ chaw chi ma ve hta‸ kawˆ ve yoˬ. 3Oˇ htaˇ, awˬ la‸ g'awˇ teˇ chi nyiˇ g'aˇ awˬ hk'aw lo Iˉsaˍkaˍriˍoˆ meh ve Yuˇda‸ teˇ g'aˇ ve nyi ma awˬ hk'aw lo Saˍtanˍ lo‸-e ve yoˬ. 4Yawˇ tawˆ k'ai leh, paw hkuˇ lonˉ teˇ hpaˍ leh bon yehˬ lonˉ ve ma‸ poˍ teˇ hpaˍ geh k'ai leh, Yeˍsuˆ hta‸ yawˇ hui ve la‸ sheh awˬ hk'aw lo hk'aˬ hk'e te g'a chiˇ a‸ piˇ tuˬ, yawˇ yawˇ hui geh jehˬ da‸ ve yoˬ. 5Yawˇ hui ha lehˬ jaˇ leh, yawˇ hta‸ hpu piˇ tuˬ yoˬ teh‸ hkanˍ taˍ ve yoˬ. 6Yawˇ htawˇ hkanˍ yuˬ leh, chaw awˬ moˍ lonˉ maˇ chehˇ ve teˇ yanˇ Yeˍsuˆ hta‸ yawˇ hui ve la‸ sheh awˬ hk'aw lo chiˇ a‸ piˇ tuˬ, da‸ ve awˬ yanˇ hta‸ yawˇ ca chehˇ ve yoˬ. 7Paˍsaˍhkaˍ yawˬ ehˉ hta‸ tiˇ pehˍ ve awˬ nyi, Hkaoˍ monˇ awˬ hk'aw lo diˇ maˇ keu ve awˬ nyi teˇ nyi gaˬ la ve yoˬ. 8Oˇ htaˇ, Yeˍsuˆ lehˬ Peˍtruˆ leh Yoˇhanˬ hta‸ k'ai tcuh leh, Ngaˬ hui Paˍsaˍhkaˍ pawehˇ hta‸ g'a caˇ tuˬ, ngaˬ hui awˬ pon ca gu-o teh‸ k'oˆ piˇ ve yoˬ. 9Yawˇ huiˉ maˬ lehˬ, Hk'aˬ ve teˇ kaˬ lo nawˬ gu tcuh laˇ gaˇ ve le teh‸ yawˇ hta‸ na nyi ve yoˬ. 10Yeˍsuˆ k'aw‸ k'oˆ ve, Nawˬ huiˉ maˬ venˇ hk'aw gaˬ ve teˇ yanˇ, iˉ kaˆ mu‸ hk'u taˆ ve chaw teˇ g'aˇ hta‸ g'a hpuˇ da‸ tuˬ yoˬ. Yawˇ awˬ hk'aˇ suh k'ai leh, yawˇ lo‸-e ve yehˬ hk'aw nawˬ huiˉ maˬ lo‸-e peuˬ hk'aw‸ nawˉ, 11yehˬ shehˍ hpaˇ hta‸ chi hk'e k'oˆ piˇ-oˆ, Saˍ la‸ nawˬ hta‸ k'oˆ laˇ ve, Ngaˬ leh ngaˬ ve awˬ la‸ g'awˇ hui geh teˇ geh Paˍsaˍhkaˍ pawehˇ caˇ tuˬ, hkehˉ chaw bawehˇ hk'aˬ lo le teh‸, yawˇ hta‸ na nyi-o. 12Oˇ htaˇ, gu taˍ peuˬ ve, awˬ hta‸ teˇ htai‸ bawehˇ uiˍ ve teˇ bawehˇ yawˇ nawˬ huiˉ maˬ hta‸ maˍ laˇ tuˬ yoˬ. Oˇ kaˬ lo gu taˍ-o‸ teh‸, yawˇ huiˉ maˬ hta‸ k'oˆ piˇ ve yoˬ. 13Yawˇ huiˉ maˬ k'ai ve teˇ yanˇ, Yeˍsuˆ k'oˆ ve hk'e g'a mawˬ leh, Paˍsaˍhkaˍ pawehˇ caˇ tuˬ awˬ pon gu taˍ ve yoˬ. 14Awˬ yanˇ gaˬ la ve teˇ yanˇ, yawˇ hpui lawˇ paˇ lo mui leh, tcuh yaˇ teˇ hpaˍ htawˇ yawˇ geh teˇ geh mui ve yoˬ. 15Oˇ htaˇ yawˇ k'oˆ ve, Tu‸ ve hkanˍ ve hta‸ ngaˬ maˇ g'a hkanˍ sheˍ htaˇ, naw hui geh teˇ geh ngaˬ Paˍsaˍhkaˍ pawehˇ chi hta‸ caˇ gaˇ jaˇ ve yoˬ. 16Awˬ lawn k'o, ngaˬ nawˬ hui hta‸ k'oˆ laˇ ve, G'uiˬ sha ve mvuhˇ miˬ awˬ hk'aw lo pawehˇ chi teˇ maˬ maˇ biˇ la sheˍ ve ceh ceh, pawehˇ chi hta‸ ngaˬ maˇ k'aw‸ caˇ teh‸ yawˇ hui hta‸ k'oˆ piˇ ve yoˬ. 17Oˇ htaˇ, yawˇ kawˆ hta‸ yuˬ leh bon hta‸ chiˇ mvuh peuˬ hk'aw‸ nawˉ yawˇ k'oˆ ve, Kawˆ chi hta‸ yuˬ leh nawˬ hui pehˬ dawˬ-o‸. 18Ngaˬ nawˬ hui hta‸ k'oˆ laˇ ve, G'uiˬ sha ve mvuhˇ miˬ maˇ gaˬ la sheˍ ve ceh ceh, ya‸ nyi hk'aw‸ nawˉ k'o, ngaˬ a pehˉ meuˇ g'uiˬ hta‸ maˇ k'aw‸ dawˬ teh‸ k'oˆ ve yoˬ. 19Hkaoˍ monˇ hta‸ htawˇ yawˇ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍ monˇ hta‸ hk'eh‸ leh, awˬ la‸ g'awˇ hui hta‸ piˇ leh k'oˆ ve, Chi lehˬ, nawˬ hui awˬ pon tanˇ piˇ ve ngaˬ ve awˬ to yoˬ. Ngaˬ hta‸ dawˇ nawˇ tuˬ chi hk'e te-o teh‸ k'oˆ ve yoˬ. 20Oˇ ve hk'a shuˍ shuˍ mvuhˇ haˉ awˍ caˇ peuˬ hk'aw‸ nawˉ, kawˆ hta‸ htawˇ yawˇ yuˬ leh k'oˆ ve, Kawˆ chi lehˬ, nawˬ hui awˬ pon ngeuˍ pfuhˍ ve, ngaˬ ve awˬ suhˍ awˬ hk'aw lo te taˍ ve ka ti‸ shaˉ caˆ awˬ suhˉ hpeh‸ ve yoˬ. 21Ya‸ hk'aˇ, ngaˬ hta‸ chiˇ a‸ piˇ tuˬ ve teˇ g'aˇ lehˬ, ngaˬ geh teˇ hkehˇ tiˉ hkaˆ caˇ chehˇ ve yoˬ. 22Chaw yaˇ ve Yaˇ hpu lehˬ, yawˇ ve awˬ lawn G'uiˬ sha dawˇ cheˆ taˍ ve hk'e yawˇ g'a k'o‸-e tuˬ yoˬ. Ya‸ hk'aˇ, yawˇ hta‸ chiˇ a‸ ve chaw teˇ g'aˇ lehˬ, g'a dawˇ haˍ jaˇ tuˬ yoˬ teh‸ k'oˆ ve yoˬ. 23Oˇ htaˇ, awˬ la‸ g'awˇ teˇ hpaˍ lehˬ, Ngaˬ hui awˬ hk'aw lo a shu teˇ g'aˇ chi hk'e te tuˬ le teh‸, teˇ g'aˇ leh teˇ g'a na nyi da‸ ve yoˬ. 24Chi hk'oˆ ka‸, yawˇ hui awˬ hk'aw lo hk'aˬ ve teˇ g'aˇ shu a‸ kehˉ g'a uiˍ tuˬ le teh‸, teˇ g'aˇ leh teˇ g'aˇ g'awˬ da‸ ve yoˬ. 25Hk'e te leh Yeˍsuˆ k'oˆ ve, Buiˇ shaˆ aˉ naˆ chaw hui ve hkunˉ hawˉ hkanˇ teˇ hpaˍ lehˬ, yawˇ hui awˬ hk'oˆ hta‸ uˉ peunˍ ve yoˬ. Yawˇ hui awˬ hk'oˆ hta‸ kanˇ paˆ cawˬ ve chaw teˇ hpaˍ hta‸ bon shehˍ hpaˇ teh‸ yawˇ hui k'oˆ ve yoˬ. 26Ya‸ hk'aˇ, nawˬ hui awˬ hk'aw lo chi hk'e maˇ g'a te. Nawˬ hui awˬ hk'aw lo shu a‸ kehˉ uiˍ ve teˇ g'aˇ lehˬ, shu a‸ kehˉ i ve teˇ g'aˇ hk'e te-o, Awˬ hoˉ teˇ g'aˇ htawˇ, awˬ ceˬ teˇ g'aˇ hk'e te-o. 27Awˬ lawn k'o, hk'aˬ ve teˇ g'aˇ shu a‸ kehˉ uiˍ ve le. Hpui lawˇ lo mui caˇ ve chaw teˇ g'aˇ laˇ. Maˇ heˆ k'o, te caˍ te taw ve chaw teˇ g'aˇ laˇ. Hpui lawˇ lo mui caˇ ve chaw teˇ g'aˇ uiˍ ve yoˬ maˇ heˆ laˇ. Ya‸ hk'aˇ, ngaˬ lehˬ nawˬ hui awˬ hk'aw lo te caˍ te taw shehˍ hpaˇ hk'e hpeh‸ ve yoˬ. 28Beˬ ve lawˇ ve hta‸ ngaˬ g'a hkanˍ ve teˇ yanˇ, nawˬ hui lehˬ ngaˬ geh hk'a geh hk'aˬ htaˆ ka‸ chehˇ taˍ ve chaw teˇ hpaˍ hpeh‸ ve yoˬ. 29Ngaˬ ve Awˬ pa ngaˬ hta‸ mvuhˇ miˬ pe‸ laˇ ve hk'e, ngaˬ htawˇ nawˬ hui hta‸ mvuhˇ miˬ pe‸ laˇ ve yoˬ. 30Hk'e te leh, ngaˬ ve mvuhˇ miˬ awˬ hk'aw lo ngaˬ ve hpui lawˇ lo nawˬ hui g'a caˇ g'a dawˬ tuˬ yoˬ. Nawˬ hui lehˬ, k'aw jaw hk'oˆ mui leh, Iˉsaˍreˍlaˆ chaw teˇ chi nyiˇ ceuˬ hta‸ suhˉ g'a jehˬ tuˬ yoˬ. 31Siˉmonˍ-oˬ, Siˉmonˍ-oˬ, caˬ shiˍ caˬ hk'a htaˬ hkeunˉ ve hk'e, Saˍtanˍ nawˬ hui hta‸ hkeunˉ tuˬ yawˇ lawˬ g'a ve yoˬ. 32Ya‸ hk'aˇ, nawˬ yonˍ ve teˇ ceuˬ maˇ g'a luˬ k'ai tuˬ, ngaˬ nawˬ awˬ pon bon lawˬ peuˬ. Nawˬ k'aw‸ hpfuhˆ k'aw‸ la ve teˇ yanˇ, nawˬ ve awˬ viˉ awˬ nyi teˇ hpaˍ hta‸ awˬ g'aˇ piˇ-oˆ teh‸ k'oˆ ve yoˬ. 33Oˇ htaˇ Siˉmonˍ k'aw‸ k'oˆ ve, Jawˇ mawˇ-oˬ, htawnˍ hk'aw lo maˇ k'oˆ, suh kuiˬ lo maˇ k'oˆ, ngaˬ nawˬ geh hk'a geh k'ai tuˬ gu taˍ peuˬ teh‸, yawˇ hta‸ k'oˆ piˇ ve yoˬ. 34Yeˍsuˆ k'aw‸ k'oˆ ve, Peˍtruˆ-oˬ, ngaˬ nawˬ hta‸ k'oˆ laˇ ve, ya‸ puiˉ g'aˆ hpfuh maˇ bvuhˬ sheˍ htaˇ, nawˬ ngaˬ hta‸ maˇ shiˍ teh‸ shehˆ pawˆ hk'a gaˬ g'awˬ hk'aˆ tuˬ yoˬ teh‸ k'oˆ ve yoˬ. 35Peuˬ leh, yawˇ yawˇ hui hta‸ k'oˆ piˇ ve, Ngaˬ nawˬ hui hta‸ k'ai tcuh leh, hpu guˉ pi, miˉ chaw leh hkuiˉ nuˆ maˇ yuˬ k'ai tcuh laˇ ve teˇ yanˇ, nawˬ hui loˍ ve cuˆ ve teˇ ceuˬ ceuˬ cawˬ laˇ teh‸ Yeˍsuˆ na nyi htaˇ, Loˍ ve cuˆ ve teˇ ceuˬ ka‸ maˇ cawˬ teh‸, yawˇ hui k'aw‸ k'oˆ piˇ ve yoˬ. 36Oˇ htaˇ yawˇ k'aw‸ k'oˆ ve, Ya‸ hk'aˇ chi beu‸ lehˬ, hpu guˉpi cawˬ ve chaw k'o, hpu guˉ pi yuˬ k'ai. Miˉ chaw cawˬ ve chaw k'o, miˉ chaw pfuhˇ k'ai. Aˉ htaw maˇ cawˬ ve chaw k'o, a shu yawˇ ve veu‸ k'aˇ hawˇ leh aˉ htaw ca vuiˬ yuˬ-o‸. 37Awˬ lawn k'o, ngaˬ nawˬ hui hta‸ k'oˆ laˇ ve, Yawˇ hta‸ chaw haiˬ teˇ hpaˍ geh teˇ geh shu shawˍ keu tuˬ yoˬ teh‸ bvuh‸ taˍ ve tawˇ hkawˇ lehˬ, ngaˬ awˬ hk'aw lo g'a biˇ la ve yoˬ. Awˬ lawn k'o, ngaˬ awˬ lawn bvuh‸ taˍ ve teˇ hpaˍ g'a biˇ la ve yoˬ teh‸ k'oˆ ve yoˬ. 38Yawˇ hui k'aw‸ k'oˆ ve, Jawˇ mawˇ-oˬ, nyi loˬ, choˬ kaˬ aˉ htaw nyiˇ taˬ cawˬ ve yoˬ teh‸ k'oˆ ve teˇ yanˇ, Hk'e k'o, law‸ peuˬ teh‸, yawˇ yawˇ hui hta‸ k'aw‸ k'oˆ piˇ ve yoˬ. 39Oˇ ve hk'aw‸ nawˉ yawˇ tawˆ k'ai leh, yawˇ awˬ liˇ cawˬ ve hk'e Shaˍlonˍ hk'aw lo k'ai ve yoˬ. Awˬ la‸ g'awˇ teˇ hpaˍ htawˇ yawˇ awˬ hk'aˇ suh k'ai ve yoˬ. 40Yawˇ oˇ kaˬ lo gaˬ ve teˇ yanˇ, Beˬ ve lawˇ ve awˬ hk'aˇ suh nawˬ hui maˇ g'a k'ai tuˬ bon lawˬ chehˇ-oˆ teh‸, yawˇ yawˇ hui hta‸ k'oˆ piˇ ve yoˬ. 41Awˬ la‸ g'awˇ hui chehˇ kuiˬ te leh, haˉ pui teˇ hk'e baˬ gaˬ law‸ hk'e fui yawˇ k'ai peuˬ hk'aw‸ nawˉ, yawˇ hkui tcuhˉ teh leh k'oˆ ve, 42A pa-oˬ, nawˬ nyi ma cawˇ ve k'o, kawˆ chi hta‸ ngaˬ g'a ponˬ k'ai tuˬ a ciˉ te laˇ-oˆ. Ya‸ hk'aˇ, ngaˬ a loˍ cawˇ ve hk'e taˇ hpeh‸ piˇ. Nawˬ a loˍ cawˇ ve hk'e hpeh‸ piˇ-oˆ teh‸ bon lawˬ ve yoˬ. 43Oˇ htaˇ, mvuhˇ naw ma tcuh yaˇ teˇ g'aˇ mvuhˇ naw ma lo tawˆ la leh yawˇ hta‸ awˬ g'aˇ piˇ ve yoˬ. 44Yawˇ nyi ma hk'aw tu‸ jaˇ hkanˍ jaˇ ve pa taw, yawˇ leuˉ leh g'aˇ hte‸ bon lawˬ ve yoˬ. Yawˇ kuiˍ tawˆ la ve lehˬ, awˬ suhˍ diˬ hk'e hpeh‸ leh miˬ chaˇ hk'oˆ ce ve yoˬ. 45Yawˇ bon lawˬ peuˬ hk'aw‸ nawˉ tu leh, awˬ la‸ g'awˇ teˇ hpaˍ geh k'o‸-e ve teˇ yanˇ, yawˇ hui dawˇ haˍ jaˇ ve awˬ hk'aw lo zuh‸ muiˉ k'a chehˇ ve hta‸ yawˇ g'a mawˬ ve yoˬ. 46Yawˇ k'oˆ ve, Aˬ hto‸ ma te nawˬ hui zuh‸ muiˉ k'a chehˇ ve le. Tu-o. Beˬ ve lawˇ ve awˬ hk'aˇ suh maˇ g'a k'ai tuˬ bon lawˬ chehˇ-oˆ teh‸, yawˇ hui hta‸ k'oˆ piˇ ve yoˬ. 47Yawˇ chi hk'e k'oˆ chehˇ ve teˇ yanˇ, tcuh yaˇ teˇ chi nyiˇ g'aˇ awˬ hk'aw lo Yuˇda‸ meh ve teˇ g'aˇ lehˬ, chaw awˬ moˍ lonˉ hta‸ shiˍ veu laˇ leh laˬ ve yoˬ. Yeˍsuˆ hta‸ boˆ nu tuˬ, awˬ paˇ lo yawˇ jiˆ k'ai ve yoˬ. 48Oˇ htaˇ Yeˍsuˆ k'oˆ ve, Yuˇda‸-oˬ, nawˬ boˆ nu ve hta‸ te leh chaw yaˇ ve Yaˇ hpu hta‸ chiˇ a‸ piˇ ve law leˇ teh‸ yawˇ hta‸ k'oˆ piˇ ve yoˬ. 49Yeˍsuˆ geh hk'a geh chehˇ ve chaw teˇ hpaˍ lehˬ, hk'aˬ hk'e hpeh‸ la tuˬ ve hta‸ g'a mawˬ ve teˇ yanˇ, Jawˇ mawˇ-oˬ, ngaˬ hui aˉ htaw g'a chaw tuˬ ve laˇ teh‸ k'oˆ piˇ ve yoˬ. 50Yawˇ hui awˬ hk'aw lo teˇ g'aˇ lehˬ, paw hkuˇ lonˉ vuiˬ taˍ ve awˬ ceˬ hta‸ chaw leh, la‸ sha paˉ ve naˍ paw cheˆ ve yoˬ. 51Yeˍsuˆ k'oˆ ve, Pehˇ-o, taˇ k'aw‸ te loˬ teh‸ k'oˆ piˇ peuˬ hk'aw‸ nawˉ, awˬ ceˬ oˇ ve teˇ g'aˇ ve naˍ paw hta‸ htawˇ sheˬ leh gu na-e piˇ ve yoˬ. 52Oˇ htaˇ, Yeˍsuˆ lehˬ yawˇ geh gaˬ la ve paw hkuˇ lonˉ teˇ hpaˍ, bon yehˬ lonˉ ve maˬ poˍ teˇ hpaˍ leh awˬ hoˉ chaw mawˇ teˇ hpaˍ hta‸ k'oˆ piˇ ve, Nawˬ hui lehˬ, chaw hk'awˇ hta‸ ca hpeh yuˬ ve hk'e, aˉ htaw leh suhˆ taˬ teˇ hpaˍ yuˬ veu laˇ leh laˬ ve laˇ. 53Teˇ nyi le le bon yehˬ lonˉ awˬ hk'aw lo ngaˬ nawˬ hui geh chehˇ ve teˇ yanˇ, nawˬ hui ngaˬ hta‸ maˇ hpeh yuˬ. Ya‸ hk'aˇ, awˬ yanˇ chi ve lehˬ nawˬ hui ve awˬ yanˇ hpeh‸ leh, naˆ ho‸ ve kanˇ paˆ ve awˬ yanˇ hpeh‸ ve yoˬ teh‸ k'oˆ ve yoˬ. 54Oˇ htaˇ, yawˇ hui yawˇ hta‸ hpeh yuˬ leh, paw hkuˇ lonˉ ve aˉ hk'aw lo sheh k'ai ve yoˬ. Peˍtruˆ lehˬ, awˬ hk'aˇ suh a ciˉ vuiˇ kuiˬ lo g'a‸ k'ai ve yoˬ. 55Shaˉ nanˉ awˬ paˇ ko taˍ kuiˬ awˬ k'aw ji lo chaw teˇ hpaˍ aˬ miˍ tcuh leh teˇ geh mui lehˬ chehˇ ve teˇ yanˇ, Peˍtruˆ htawˇ yawˇ hui geh ca mui lehˬ ve yoˬ. 56Yawˇ aˬ miˍ g'euˆ ba kuiˬ lo mui chehˇ ve hta‸ awˬ ceˬ ma teˇ g'aˇ g'a mawˬ htaˇ, yawˇ hta‸ hk'a deh‸ nyi leh, Chi hpaˇ htawˇ yawˇ geh chehˇ ve chaw hpeh‸ ve yoˬ teh‸ k'oˆ ve yoˬ. 57Ya‸ hk'aˇ Peˍtruˆ g'awˬ hk'aˆ leh, Yaˇ miˇ-oˬ, yawˇ hta‸ ngaˬ maˇ shiˍ teh‸ k'oˆ ve yoˬ. 58Oˇ ve awˬ hk'aw‸ nawˉ maˇ maw maw, awˬ kaˍ awˬ nu chaw teˇ g'aˇ yawˇ hta‸ mawˬ leh, Nawˬ htawˇ yawˇ hui awˬ hk'aw lo chehˇ ve chaw teˇ g'aˇ hpeh‸ ve yoˬ teh‸ k'oˆ piˇ ve teˇ yanˇ, Peˍtruˆ k'oˆ ve, Chi hpaˇ-oˬ, ngaˬ maˇ heˆ teh‸ k'oˆ ve yoˬ. 59Teˇ naˍ riˍ hk'e maw peuˬ hk'aw‸ nawˉ, awˬ kaˍ awˬ nu chaw teˇ g'aˇ htawˇ, Chi hpaˇ ka‸ awˬ tehˬ awˬ na yawˇ geh hk'a geh chehˇ ve chaw yoˬ. Awˬ lawn k'o, yawˇ Gaˍliˍlehˇ chaw hpeh‸ ve yoˬ teh‸, g'aˇ hte‸ k'oˆ tcuhˉ taˍ ve yoˬ. 60Peˍtruˆ k'oˆ ve, Chi hpaˇ-oˬ, nawˬ k'oˆ ve hta‸ ngaˬ maˇ shiˍ teh‸ k'oˆ ve yoˬ. Yawˇ chi hk'e k'oˆ chehˇ ve teˇ yanˇ, teˇ cawˬ haˉ g'aˆ hpfuh bvuhˬ la ve yoˬ. 61Oˇ htaˇ Jawˇ mawˇ Yeˍsuˆ lehˬ, Peˍtruˆ hta‸ hpfuhˆ nyi ve yoˬ. Ya‸ puiˉ g'aˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hk'a gaˬ chiˇ baˬ tuˬ yoˬ teh‸, Jawˇ mawˇ Yeˍsuˆ k'oˆ piˇ taˍ ve hta‸ Peˍtruˆ dawˇ nawˇ la ve yoˬ. 62Oˇ htaˇ, yawˇ tawˆ k'ai leh g'aˇ hte‸ hawˬ ve yoˬ. 63Yeˍsuˆ hta‸ yuˬ taˍ ve chaw teˇ hpaˍ lehˬ, yawˇ hta‸ k'oˆ guiˇ g'uiˬ guiˇ leh dawˆ ve yoˬ. 64Yawˇ ve mehˆ hpfuhˇ hta‸ beh taˍ peuˬ hk'aw‸ nawˉ, Nawˬ hta‸ a shu dawˆ laˇ ve le. G'uiˬ sha ve tcuh kaˍ paˍ hk'e te leh ngaˬ hui hta‸ hto laˇ-oˆ teh‸, yawˇ hta‸ k'oˆ piˇ ve yoˬ. 65Yawˇ hui yawˇ hta‸ awˬ kaˍ awˬ nu laiˉ ceuˬ k'oˆ leh maˇ shawˍ maˇ caˆ k'oˆ ve yoˬ. 66Mvuhˇ htiˇ la ve teˇ yanˇ, Yuˇda‸ chaw hui ve awˬ hoˉ chaw mawˇ hpeh‸ ve paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ hpawnˬ da‸ ve yoˬ. Yawˇ hui yawˇ hta‸ jehˬ shehˍ hpaˇ awˬ moˍ mehˆ g'uˇ suhˍ yuˬ k'ai leh, 67Nawˬ Hkri‸ hpeh‸ ve k'o, ngaˬ hui hta‸ hto laˇ-oˆ teh‸ k'oˆ ve yoˬ. Yeˍsuˆ k'aw‸ k'oˆ ve, Ngaˬ hto laˇ ve htawˇ, nawˬ hui yonˍ tuˬ ve maˇ heˆ. 68Ngaˬ nawˬ hui hta‸ teˇ ceuˬ ceuˬ na nyi ve htawˇ, nawˬ hui k'aw‸ k'oˆ laˇ tuˬ ve maˇ heˆ. 69Ya‸ hk'aˇ, chaw yaˇ ve Yaˇ hpu lehˬ, ya‸ nyi hk'aw‸ nawˉ k'o, G'uiˬ sha ve kanˇ paˆ la‸ sha paˉ lo mui chehˇ tuˬ yoˬ teh‸, yawˇ hui hta‸ k'oˆ piˇ ve yoˬ. 70Oˇ htaˇ yawˇ hui hk'a peu-eˬ k'oˆ ve, Hk'e te k'o, nawˬ G'uiˬ sha ve Yaˇ hpu hpeh‸ ve leh laˇ teh‸ na nyi ve yoˬ. Yoˬ, nawˬ hui k'oˆ ve hk'e yoˬ teh‸, yawˇ yawˇ hui hta‸ k'aw‸ k'oˆ piˇ ve yoˬ. 71Oˇ htaˇ yawˇ hui k'oˆ ve, Ngaˬ hui aˬ hto‸ ma shaˉ hkiˆ k'aw‸ loˍ sheˍ ve le. Awˬ lawn k'o, yawˇ k'oˆ ve tawˇ hkawˇ hta‸ ngaˬ hui awˬ to g'a kaˇ peuˬ teh‸ k'oˆ ve yoˬ.

will be added

X\