Luˉka‸ 15

1Awˬ hkawnˍ shaw paˍ hui leh venˇ baˆ yaˇ hui hk'a peu-eˬ, Yeˍsuˆ ve tawˇ hta‸ na tuˬ yawˇ awˬ paˇ lo jiˆ laˬ ve yoˬ. 2Hpaˍriˍsehˇ hui leh li‸ bvuh‸ paˍ hui k'oˆ ve, Chi hpaˇ lehˬ, venˇ baˆ yaˇ hui hta‸ ha‸ yuˬ leh yawˇ hui geh teˇ geh hti caˇ hti dawˬ ve law teh‸, yawˇ hui ca beu ca hk'aiˉ leh k'oˆ ve yoˬ. 3Oˇ htaˇ yawˇ hui hta‸ Yeˍsuˆ tawˇ pa haˉ chi maˍ piˇ leh k'oˆ ve, 4Nawˬ hui awˬ hk'aw lo chaw teˇ g'aˇ yawˬ teˇ ha hkeh cawˬ leh teˇ hkeh mehˉ k'ai ve k'o, k'awˇ chi k'awˇ hkeh hta‸ heh puiˉ hk'aw lo teh taˉ leh, mehˉ k'ai ve yawˬ ehˉ hta‸ mawˬ htaˇ hk'a gaˬ maˇ ca nyi ve chaw teˇ g'aˇ g'aˇ cawˬ laˇ. 5Yawˬ oˇ ve hta‸ yawˇ k'aw‸ mawˬ htaˇ, ha lehˬ ha k'a la‸ hpeh k'aˉ hk'oˆ chiˇ taˆ ve yoˬ. 6Yawˇ ve aˉ hk'aw lo gaˬ la htaˇ, yawˇ ve awˬ chawˇ teˇ hpaˍ leh awˬ paˇ awˬ kui lo chehˇ ve chaw teˇ hpaˍ hta‸ kuˬ leh, Ngaˬ geh ga ha lehˬ la-o. Ngaˬ ve mehˉ k'ai ve yawˬ hta‸ k'aw‸ ca mawˬ peuˬ teh‸ yawˇ k'oˆ tuˬ yoˬ. 7Oˇ ve hk'a shuˍ shuˍ, venˇ baˆ hta‸ dawˇ hpfuhˆ tuˬ maˇ loˍ ve hteˇ ve cawˇ ve chaw k'awˇ chi k'awˇ g'aˇ hta‸ pa taw, mvuhˇ naw ma hk'oˆ lo ha lehˬ tuˬ cawˬ ve a‸ kehˉ, venˇ baˆ yaˇ teˇ g'aˇ, venˇ baˆ hta‸ dawˇ hpfuhˆ ve pa taw, mvuhˇ naw ma hk'oˆ lo ha lehˬ tuˬ leuˉ leh cawˬ maˇ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 8Teˇ lawn lehˬ, yaˇ miˇ teˇ g'aˇ hpu teˇ chi hteh‸ cawˬ leh, teˇ hteh‸ mehˉ k'ai ve k'o, aˬ miˍ tuˉ leh yehˬ hta‸ shiˆ leh mawˬ htaˇ hk'a gaˬ maˇ ca nyi ve chaw teˇ g'aˇ g'aˇ cawˬ laˇ. 9Hpu oˇ ve hta‸ k'aw‸ mawˬ htaˇ, yawˇ ve awˬ chawˇ teˇ hpaˍ leh awˬ paˇ awˬ kui lo chehˇ ve chaw teˇ hpaˍ hta‸ kuˬ leh, Ngaˬ geh ga ha lehˬ la-o. Mehˉ k'ai ve hpu hta‸ ngaˬ k'aw‸ ca mawˬ peuˬ teh‸ k'oˆ tuˬ yoˬ. 10Oˇ ve hk'a shuˍ shuˍ, venˇ baˆ yaˇ teˇ g'aˇ, venˇ baˆ hta‸ dawˇ hpfuhˆ ve hta‸ pa taw, G'uiˬ sha ve mvuhˇ naw ma tcuh yaˇ teˇ hpaˍ mehˆ g'uˇ suhˍ ha lehˬ tuˬ cawˬ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 11Yeˍsuˆ teˇ pawˆ k'aw‸ k'oˆ ve, Chaw teˇ g'aˇ, yawˇ yaˇ paˍ nyiˇ g'aˇ cawˬ ve yoˬ. 12Awˬ nyi paˍ teˇ g'aˇ lehˬ, yawˇ awˬ pa hta‸ k'oˆ piˇ ve, Ngaˬ pa-oˬ, ngaˬ g'a cawˇ ve awˬ shinˉ pehˬ laˇ-oˆ teh‸ lawˬ htaˇ, awˬ pa yawˇ huiˉ maˬ hta‸ awˬ shinˉ pehˬ piˇ ve yoˬ. 13Awˬ hk'aw‸ nawˉ maˇ maw maw, awˬ nyi paˍ teˇ g'aˇ lehˬ, yawˇ ve mawˇ jeˬ hk'a peu-eˬ hta‸ shaw yuˬ veu leh, vuiˇ ve mvuhˇ miˬ lo k'ai ve yoˬ. Oˇ kaˬ lo yawˇ miˬ guiˬ ha lehˬ tuˬ te ponˬ te leuˉ leh, hpu shi mawˇ jeˬ hta‸ yehˇ baˬ caˇ baˬ peuˬ sheˬ ve yoˬ. 14Yawˇ hk'a cawˬ ve hk'a peu-eˬ hta‸ yehˇ baˬ peuˬ hk'aw‸ nawˉ, mvuhˇ miˬ oˇ ve awˬ hk'aw lo meu‸ lonˉ kaˆ lonˉ gaˬ la leh, yawˇ g'a haˍ g'a g'awˇ jaˇ ve yoˬ. 15Hk'e te leh, mvuhˇ miˬ oˇ ve awˬ hk'aw lo chehˇ ve chaw teˇ g'aˇ hta‸ yawˇ ca peun chehˇ taˍ ve yoˬ. Yawˇ yawˇ hta‸ heh hk'aw lo va‸ ca hawˉ caˍ tcuh ve yoˬ. 16Va‸ caˇ ve nawˆ shiˍ teˇ hpaˍ hta‸ yawˇ hk'a bvuhˆ caˇ gaˇ htawˇ, shu teˇ g'aˇ ka‸ yawˇ hta‸ caˇ tuˬ maˇ caˍ piˇ. 17Yawˇ k'aw‸ shiˍ k'aw‸ nawˇ la leh, Ngaˬ pa geh chehˇ ve g'aˇ hpfuhˇ caˇ shehˍ hpaˇ teˇ hpaˍ caˇ maˇ peuˬ dawˬ maˇ peuˬ ve ka‸, ngaˬ choˬ kaˬ lo meu‸ jehˇ kaˆ jehˇ leh suh tuˬ yoˬ. 18Ngaˬ tu leh ngaˬ pa geh k'o‸-e leh, Ngaˬ pa-oˬ, ngaˬ lehˬ G'uiˬ sha hta‸ ka‸ nawˬ hta‸ ka‸ te ya‸ peuˬ. 19Ya‸ nyi hk'aw‸ nawˉ, nawˬ ve yaˇ teh‸ k'oˆ laˇ ve hta‸ ngaˬ maˇ keunˍ. Nawˬ ve g'aˇ hpfuhˇ caˇ shehˍ hpaˇ teˇ g'aˇ hk'e ngaˬ hta‸ shawˍ taˍ laˇ-oˆ k'oˆ piˇ tuˬ yoˬ teh‸ yawˇ k'oˆ ve yoˬ. 20Yawˇ tu leh awˬ pa geh k'o‸-e ve yoˬ. Yawˇ vuiˇ kuiˬ lo k'aw‸ la chehˇ ve hta‸ awˬ pa g'a mawˬ htaˇ, yawˇ hta‸ ha k'aˉ leh, yawˇ geh g'uiˇ k'ai ve yoˬ. Awˬ yaˇ paˍ ve k'awˍ peˍ hta‸ yawˇ k'uˉ taˍ leh boˆ nu ve yoˬ. 21Oˇ htaˇ awˬ yaˇ paˍ yawˇ hta‸ k'oˆ piˇ ve, Ngaˬ pa-oˬ, ngaˬ lehˬ G'uiˬ sha hta‸ ka‸ nawˬ hta‸ ka‸ te ya‸ peuˬ. Ya‸ nyi hk'aw‸ nawˉ, nawˬ ve yaˇ teh‸ k'oˆ laˇ ve hta‸ ngaˬ maˇ keunˍ. 22Awˬ ceˬ teˇ hpaˍ hta‸ awˬ pa k'oˆ piˇ ve, Da‸ jaˇ ve aˉ po‸ lonˉ hta‸ haˆ haˆ yuˬ veu laˇ leh yawˇ hta‸ deh piˇ-oˆ. Yawˇ ve la‸ naw hta‸ la‸ peˍ tcuhˉ piˇ-oˆ. Hkui sheh hta‸ hkuiˉ nuˆ tcuhˉ piˇ-oˆ. 23Caˍ chu taˍ ve nuˇ ehˉ hta‸ sheh veu laˇ leh tiˇ pehˍ-o‸. Ngaˬ hui hti caˇ hti dawˬ leh ha lehˬ ha k'a te-a veuˬ. 24Awˬ lawn k'o, ngaˬ yaˇ paˍ chi lehˬ awˉ lawˉ htaˇ suh peuˬ htawˇ, chi beu‸ k'aw‸ te‸ la peuˬ. Mehˉ k'ai peuˬ ve htawˇ, chi beu‸ k'aw‸ mawˬ peuˬ teh‸ k'oˆ leh, yawˇ hui ha lehˬ ha k'a tanˬ te k'ai ve yoˬ. 25Awˬ viˉ paˍ teˇ g'aˇ lehˬ, heh hk'aw chehˇ taˍ ve yoˬ. Yawˇ k'aw‸ la leh, yehˬ awˬ paˇ lo gaˬ la htaˇ, nawˍ meuˆ leh k'aˍ hk'eˆ ve awˬ hkawˇ hta‸ g'a kaˇ ve yoˬ. 26Yawˇ awˬ ceˬ teˇ g'aˇ hta‸ kuˬ leh, Aˬ hto‸ ma te chehˇ ve le teh‸ na nyi ve yoˬ. 27Awˬ ceˬ paˍ k'oˆ ve, Nawˬ nyi paˍ k'aw‸ k'aw‸ la peuˬ. Yawˇ naˬ ve gawˬ ve luˬ ve sheˆ ve hta‸ g'a ponˬ leh, awˬ pa yawˇ hta‸ g'a k'aw‸ ha‸ yuˬ ve pa taw, caˍ chu taˍ ve nuˇ ehˉ hta‸ tiˇ peuˬ teh‸ k'aw‸ k'oˆ piˇ ve yoˬ. 28Awˬ viˉ paˍ teˇ g'aˇ nyi ma zuhˆ jaˇ leh, yehˬ hk'aw maˇ lo‸-e. Hk'e te leh, awˬ pa tawˆ la leh yawˇ hta‸ ca lawˬ hkawˉ ve yoˬ. 29Yawˇ awˬ pa hta‸ k'aw‸ k'oˆ piˇ ve, Nyi-o, ngaˬ lehˬ nawˬ ve awˬ ceˬ tiˉ te chehˇ ve awˬ hk'aw‸ awˬ yanˇ chi maw maw gaˬ peuˬ. Nawˬ ve tawˇ teˇ hkawˇ hta‸ ka‸ ngaˬ maˇ ponˬ leuˉ jaw. Ya‸ hk'aˇ, ngaˬ ve awˬ chawˇ teˇ hpaˍ geh ha lehˬ ha k'a te tuˬ, aˉ che‸ ehˉ teˇ hkeh ceh ka‸ nawˬ teˇ pawˆ htawˇ ngaˬ hta‸ maˇ pe‸ laˇ jaw. 30Ya‸ hk'aˇ, meh maˬ lanˉ hui geh awˬ chawˇ te leh, nawˬ ve hpu shi mawˇ jeˬ hta‸ yehˇ baˬ caˇ baˬ peuˬ ve, nawˬ ve yaˇ paˍ chi teˇ g'aˇ k'aw‸ la leh, caˍ chu taˍ ve nuˇ ehˉ yawˇ awˬ pon nawˬ tiˇ peuˬ law leˇ teh‸, awˬ pa hta‸ k'aw‸ k'oˆ piˇ ve yoˬ. 31Awˬ pa k'aw‸ k'oˆ ve, Ngaˬ yaˇ paˍ-oˬ, nawˬ lehˬ ngaˬ geh hk'aˬ htaˆ ka‸ chehˇ ve yoˬ. 32Ngaˬ hk'a cawˬ taˍ ve mawˇ jeˬ hk'a peu-eˬ nawˬ ve deˇ deˇ yoˬ. Nawˬ nyi paˍ lehˬ, awˉ lawˉ htaˇ suh peuˬ htawˇ chi beu‸ k'aw‸ te‸ la peuˬ. Awˉ lawˉ htaˇ mehˉ k'ai peuˬ htawˇ, chi beu‸ k'aw‸ mawˬ peuˬ. Chi hta‸ pa taw, ha lehˬ ha k'a te piˇ cawˇ tehˬ ve yoˬ teh‸, awˬ pa yawˇ hta‸ k'aw‸ k'oˆ piˇ ve yoˬ.

will be added

X\