Luˉka‸ 12

1Oˇ htaˇ, teˇ g'aˇ leh teˇ g'aˇ naˆ da‸ htaˇ hk'a gaˬ chaw awˬ hinˉ awˬ meunˍ hpawnˬ la ve teˇ yanˇ, awˉ lawˉ yawˇ ve awˬ la‸ g'awˇ teˇ hpaˍ hta‸ yawˇ k'oˆ piˇ ve, Hpaˍriˍsehˇ ve diˇ hta‸ shaˍ ti‸ te leh jaw k'ai-o. Diˇ teh‸ k'oˆ ve lehˬ, heˍ puiˉ ve teˇ ceuˬ hta‸ k'oˆ gaˇ ve yoˬ. 2Hk'a beh taˍ ve awˬ ceuˬ hk'a peu-eˬ maˇ hpeu‸ tawˆ la tuˬ ve teˇ ceuˬ ka‸ maˇ cawˬ. Hk'a faˉ taˍ ve awˬ ceuˬ hk'a peu-eˬ htawˇ, maˇ shiˍ la tuˬ ve teˇ ceuˬ ka‸ maˇ cawˬ. 3Naˆ ho‸ kuiˬ awˬ hk'aw lo nawˬ hui hk'a k'oˆ ve teˇ hpaˍ awˬ g'euˆ ba kuiˬ lo shu g'a kaˇ tuˬ yoˬ. Bawehˇ awˬ hk'aw lo nawˬ hui a yehˉ yehˉ hk'a yaw ve teˇ hpaˍ yehˬ awˬ hk'oˆ lo shu k'aw‸ kuˬ maˍ piˇ tuˬ yoˬ. 4Ngaˬ ve awˬ chawˇ teˇ hpaˍ-oˬ, ngaˬ nawˬ hui hta‸ k'oˆ laˇ ve, awˬ to hta‸ tiˇ pehˍ g'a leh, awˬ hk'aw‸ nawˉ te‸ chiˉ k'aw‸ te maˇ g'a ve chaw teˇ hpaˍ hta‸ taˇ kawˆ. 5Ya‸ hk'aˇ, nawˬ hui a shu hta‸ g'a kawˆ tuˬ ve ngaˬ nawˬ hui hta‸ hto laˇ shaˍ. Awˬ to hta‸ tiˇ pehˍ peuˬ hk'aw‸ nawˉ moˬ naˆ ho‸ awˬ hk'aw lo baˬ keu tuˬ kanˇ paˆ cawˬ shehˍ hpaˇ hta‸ kawˆ-oˆ. Ngaˬ nawˬ hui hta‸ awˬ tehˬ awˬ na k'oˆ laˇ ve, yawˇ hta‸ kawˆ-oˆ. 6Jaˍ meuˇ ngaˇ hkeh hta‸ peh‸ shanˍ nyiˇ peh‸ hawˇ ve maˇ heˆ laˇ. Jaˍ meuˇ oˇ ve teˇ hpaˍ awˬ hk'aw lo, teˇ hkeh hta‸ ka‸ G'uiˬ sha maˇ leunˇ. 7Nawˬ hui ve uˉ hkeh mvuh hk'a peu-eˬ hta‸ htawˇ g'aw nyi taˍ peuˬ. Hk'e te leh, taˇ kawˆ. Jaˍ meuˇ maˇ jaˇ ve a‸ kehˉ nawˬ hui awˬ hpfuhˇ hk'aˆ jaˇ ve yoˬ. 8Ngaˬ nawˬ hui hta‸ k'oˆ laˇ ve, hk'aˬ ve chaw teˇ g'aˇ maˇ k'oˆ, chaw yaˇ mehˆ g'uˇ suhˍ ngaˬ hta‸ hkanˍ yuˬ ve k'o, G'uiˬ sha ve mvuhˇ naw ma tcuh yaˇ teˇ hpaˍ mehˆ g'uˇ suhˍ chaw yaˇ ve Yaˇ hpu htawˇ yawˇ hta‸ hkanˍ yuˬ tuˬ yoˬ. 9Chaw yaˇ mehˆ g'uˇ suhˍ ngaˬ hta‸ chiˇ baˬ ve chaw lehˬ, G'uiˬ sha ve mvuhˇ naw ma tcuh yaˇ teˇ hpaˍ mehˆ g'uˇ suhˍ chaw yaˇ ve Yaˇ hpu htawˇ yawˇ hta‸ chiˇ baˬ tuˬ yoˬ. 10Chaw yaˇ ve Yaˇ hpu hta‸ yaw ya‸ ve chaw hk'aˬ ve teˇ g'aˇ maˇ k'oˆ, yawˇ ve venˇ baˆ hta‸ hpehˇ piˇ tuˬ yoˬ. Ya‸ hk'aˇ, da‸ ve kehˬ ve Awˬ ha hpu hta‸ maˇ shawˍ maˇ caˆ k'oˆ ve chaw teˇ hpaˍ ve venˇ baˆ hta‸ hpehˇ piˇ tuˬ maˇ heˆ. 11Shu nawˬ hui hta‸ bon yehˬ awˬ hk'aw lo maˇ k'oˆ, jawˇ mawˇ teˇ hpaˍ leh kanˇ paˆ uiˍ shehˍ hpaˇ teˇ hpaˍ mehˆ g'uˇ suhˍ maˇ k'oˆ, yuˬ k'ai ve teˇ yanˇ, nawˬ hui hk'aˬ hk'e g'a yaw hk'aw‸ tuˬ, hk'aˬ hk'e g'a k'oˆ tuˬ taˇ dawˇ hkiˉ. 12Awˬ lawn k'o, awˬ yanˇ oˇ ve awˬ hk'aw lo nawˬ hui hk'aˬ hk'e g'a k'oˆ tuˬ, da‸ ve kehˬ ve Awˬ ha hpu nawˬ hui hta‸ maˍ laˇ tuˬ yoˬ teh‸ k'oˆ piˇ ve yoˬ. 13Oˇ htaˇ, chaw awˬ moˍ lonˉ awˬ hk'aw lo chaw teˇ g'aˇ k'oˆ ve, Saˍ la‸-oˬ, ngaˬ awˬ viˉ paˍ ngaˬ hta‸ awˬ shinˉ pehˬ laˇ tuˬ yawˇ hta‸ a ciˉ k'oˆ piˇ-oˆ teh‸ Yeˍsuˆ hta‸ k'oˆ piˇ ve yoˬ. 14Ya‸ hk'aˇ Yeˍsuˆ k'aw‸ k'oˆ ve, Awˬ chawˇ-oˬ, nawˬ huiˉ maˬ awˬ hk'oˆ hta‸ suhˉ jehˬ shehˍ hpaˇ leh awˬ shinˉ pehˬ shehˍ hpaˇ te tuˬ, a shu ngaˬ hta‸ teh taˍ laˇ ve le teh‸ yawˇ hta‸ k'oˆ piˇ ve yoˬ. 15Yawˇ yawˇ hui hta‸ k'oˆ piˇ ve, Shu mawˇ shu jeˬ hta‸ sheˉ lai ve nyi ma a ciˉ ka‸ taˇ cawˬ piˇ. Awˬ lawn k'o, mawˇ jeˬ maˇ maˇ cawˬ ve pa taw chaw yaˇ a sha‸ g'a te‸ ve maˇ heˆ teh‸ k'oˆ ve yoˬ. 16Oˇ htaˇ, yawˇ yawˇ hui hta‸ tawˇ pa haˉ te maˍ piˇ leh k'oˆ ve, Paw sha paˍ teˇ g'aˇ yawˇ ve miˬ guiˬ da‸ leh, awˬ shiˍ g'a maˇ jaˇ ve yoˬ. 17Paw sha paˍ oˇ ve yawˇ ve nyi ma hk'aw chi hk'e dawˇ ve, Ngaˬ hk'aˬ hk'e g'a te tuˬ le. Ngaˬ ve awˬ shiˍ awˬ nu teˇ hpaˍ hta‸ keu taˍ kuiˬ maˇ k'aw‸ cawˬ. 18Peuˬ leh yawˇ dawˇ ve, Ngaˬ chi hk'e te tuˬ yoˬ. Ngaˬ ve caˬ ciˇ yehˬ teˇ hpaˍ hta‸ hpaˆ baˬ leh, leuˉ leh uiˍ ve teˇ hpaˍ hta‸ k'aw‸ te tuˬ yoˬ. Oˇ ve teˇ hpaˍ awˬ hk'aw lo ngaˬ ve caˬ shiˍ leh mawˇ jeˬ hk'a peu-eˬ hta‸ keu taˍ tuˬ yoˬ. 19Oˇ htaˇ ngaˬ ve nyi ma hta‸ chi hk'e k'oˆ piˇ tuˬ yoˬ. Nyi ma-oˬ, nawˬ lehˬ laiˉ hk'aw‸ awˬ pon mawˇ jeˬ teˇ hpaˍ hk'a deh‸ shaw hpoˆ taˍ peuˬ. G'aˇ jehˇ-oˆ. Hk'a deh‸ caˇ chehˇ dawˬ chehˇ leh ha lehˬ chehˇ-oˆ teh‸ k'oˆ tuˬ yoˬ. 20Ya‸ hk'aˇ G'uiˬ sha k'oˆ ve, Chaw luˬ paˍ-oˬ, ya‸ puiˉ ka‸ nawˬ ve co ha hta‸ yuˬ hk'aw‸ tuˬ yoˬ. Hk'e te leh, nawˬ shaw hpoˆ taˍ ve mawˇ teˇ hpaˍ a shu ve mawˇ hpeh‸ tuˬ le teh‸ yawˇ hta‸ k'oˆ piˇ ve yoˬ. 21A shu yawˇ awˬ to awˬ pon mawˇ jeˬ hta‸ shaw hpoˆ leh, G'uiˬ sha hpawˇ lo haˍ g'awˇ ve chaw lehˬ, oˇ ve hk'a shuˍ shuˍ hpeh‸ ve yoˬ teh‸, yawˇ hui hta‸ k'oˆ piˇ ve yoˬ. 22Peuˬ leh, yawˇ ve awˬ la‸ g'awˇ hui hta‸ k'oˆ piˇ ve, Hk'e te leh, ngaˬ nawˬ hui hta‸ k'oˆ laˇ ve, hk'aˬ hk'e te g'a caˇ g'a dawˬ tuˬ, nawˬ hui a sha‸ te‸ ve awˬ pon taˇ dawˇ hkiˉ. Hk'aˬ hk'e te g'a veu‸ g'a deh tuˬ, nawˬ hui awˬ to awˬ pon ka‸ taˇ dawˇ hkiˉ. 23A sha‸ te‸ ve teˇ ceuˬ lehˬ, caˇ tuˬ a‸ kehˉ awˬ hpfuhˇ hk'aˆ leh, awˬ to htawˇ veu‸ k'aˇ a‸ kehˉ awˬ hpfuhˇ hk'aˆ ve yoˬ. 24Aˉ naˆ k'aˍ teˇ hpaˍ hta‸ dawˇ nyi-o. Yawˇ hui lehˬ, caˬ maˇ ti, maˇ g'eu‸. Caˬ ciˇ yehˬ maˇ k'oˆ, mawˇ jeˬ shaw hpoˆ kuiˬ yehˬ maˇ k'oˆ, maˇ cawˬ. Ya‸ hk'aˇ, G'uiˬ sha yawˇ hui hta‸ caˍ piˇ taw piˇ ve yoˬ. Nawˬ hui lehˬ, ngaˆ oˇ ve teˇ hpaˍ a‸ kehˉ awˬ hpfuhˇ hk'aˬ ma hk'aˆ ve le. 25Nawˬ hui awˬ hk'aw lo hk'aˬ ve chaw teˇ g'aˇ maˇ k'oˆ, dawˇ hkiˉ ve pa taw a shu yawˇ ve a sha‸ teˇ jaˆ k'aw‸ zuhˬ la tuˬ, a shu te g'a le. 26Hk'e te leh, i jaˇ ve awˬ ceuˬ hta‸ ceh ka‸ nawˬ hui te maˇ g'a ve k'o, awˬ kaˍ awˬ nu awˬ ceuˬ teˇ hpaˍ hta‸ aˬ hto‸ ma te nawˬ hui dawˇ hkiˉ ve le. 27Shiˍ ya‸ veˆ hk'aˬ hk'e te uiˍ la ve hta‸ dawˇ nyi-o. Awˬ cehˬ oˇ ve teˇ hpaˍ lehˬ, kanˉ maˇ te, hkeh ka‸ maˇ g'awˬ. Ya‸ hk'aˇ, awˬ me‸ awˬ hponˇ uiˍ ve jawˇ mawˇ Sawˉla‸monˍ lehˬ, awˬ cehˬ oˇ ve teˇ hpaˍ awˬ hk'aw lo teˇ cehˬ hk'e taw ka‸ maˇ g'a veu‸ maˇ g'a deh jaw teh‸ ngaˬ nawˬ hui hta‸ k'oˆ laˇ ve yoˬ. 28Hk'a deh‸ maˇ yonˍ ve chaw teˇ hpaˍ-oˬ, ya‸ nyi te‸ chehˇ leh shawˉ pawˍ aˬ miˍ hk'aw baˬ keu tuˬ ve mvuh‸ cehˬ hta‸ G'uiˬ sha chi hk'e feuˉ piˇ deh piˇ ve k'o, oˇ ve a‸ kehˉ leuˉ leh nawˬ hui hta‸ feuˉ laˇ deh laˇ tuˬ maˇ heˆ laˇ. 29Nawˬ hui hk'aˬ hk'e te g'a caˇ g'a dawˬ tuˬ taˇ ca. Dawˇ hkiˉ ve nyi ma ka‸ taˇ cawˬ piˇ. 30Awˬ lawn k'o, miˬ guiˬ chaw ceuˬ hk'a peu-eˬ lehˬ, awˬ ceuˬ chi teˇ hpaˍ hta‸ ca chehˇ ve yoˬ. Awˬ ceuˬ chi teˇ hpaˍ nawˬ hui loˍ ve hta‸ nawˬ hui ve Awˬ pa shiˍ taˍ ve yoˬ. 31Nawˬ hui lehˬ yawˇ ve mvuhˇ miˬ hta‸ ca-o. Awˬ ceuˬ chi teˇ hpaˍ htawˇ yawˇ nawˬ hui hta‸ htehˍ laˇ tuˬ yoˬ. 32I ve yawˬ teˇ moˍ-oˬ, taˇ kawˆ. Nawˬ hui ve Awˬ pa lehˬ, nawˬ hui hta‸ mvuhˇ miˬ oˇ ve pe‸ laˇ tuˬ nyi ma cawˇ ve yoˬ. 33Nawˬ hui ve mawˇ jeˬ hta‸ hawˇ baˬ leh, shu hta‸ ha k'aˉ leh tanˇ piˇ-oˆ. Maˇ piˍ puiˉ ve hpu guˉ pi teˇ hpaˍ hta‸ nawˬ hui awˬ pon te-o. Chaw hk'awˇ hk'awˇ yuˬ maˇ g'a ve, pfuhˇ maˇ caˇ puiˉ ve, mvuhˇ naw ma hk'oˆ lo maˇ peuˬ maˇ leh puiˉ ve mawˇ jeˬ hta‸ shaw hpoˆ taˍ-o‸. 34Awˬ lawn k'o, nawˬ hui ve mawˇ jeˬ shaw hpoˆ taˍ ve teˇ kaˬ lo nawˬ hui ve nyi ma htawˇ oˇ kaˬ lo cawˬ tuˬ yoˬ. 35Nawˬ hui ve caw‸ cehˍ nyi hta‸ haˍ pi caˆ tsuh‸ leh, kawˆ faiˇ teˇ hpaˍ hta‸ tuˉ taˍ-o‸. 36A shu yawˇ ve awˬ shehˍ hpaˇ hkehˉ caˇ kuiˬ lo k'ai k'aw‸ la leh, yehˬ miˉ hta‸ htawˆ ve teˇ yanˇ, yawˇ hta‸ teˇ cawˬ haˉ hpaw piˇ tuˬ law chehˇ ve chaw teˇ hpaˍ hk'a shuˍ shuˍ nawˬ hui htawˇ oˇ hk'e te chehˇ-oˆ. 37Awˬ shehˍ hpaˇ k'aw‸ gaˬ la ve teˇ yanˇ, shaw chehˇ ve awˬ ceˬ teˇ hpaˍ lehˬ, awˬ bon uiˍ ve yoˬ. Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ shehˍ hpaˇ lehˬ yawˇ haˍ pi tsuh‸ leh, awˬ ceˬ teˇ hpaˍ hta‸ hpui lawˇ paˇ lo mui tcuh sheˬ leh, yawˇ awˬ to yawˇ hui hta‸ te caˍ te taw piˇ tuˬ yoˬ. 38Shehˍ k'aw hkui maˇ gaˬ sheˍ htaˇ leh naˍ, maˇ heˆ k'o shehˍ k'aw hkui ponˬ peuˬ hk'aw‸ nawˉ leh naˍ, awˬ shehˍ hpaˇ k'aw‸ gaˬ la leh, awˬ ceˬ teˇ hpaˍ chi hk'e shaw chehˇ ve hta‸ g'a mawˬ ve k'o, yawˇ hui awˬ bon uiˍ ve yoˬ. 39Yehˬ shehˍ hpaˇ lehˬ, chaw hk'awˇ laˬ tuˬ ve awˬ yanˇ hta‸ shiˍ taˍ ve hk'e k'o, yawˇ ve yehˬ awˬ hk'aw lo chaw hk'awˇ maˇ g'a lo‸ la tuˬ yawˇ hk'a deh‸ shaw taˍ tuˬ yoˬ teh‸ nawˬ hui shiˍ-o‸. 40Nawˬ hui htawˇ hk'a deh‸ hehnˇ taˍ-o‸. Awˬ lawn k'o, nawˬ hui maˇ dawˇ maˇ gaˇ ve awˬ yanˇ awˬ hk'aw lo chaw yaˇ ve Yaˇ hpu k'aw‸ ya‸ la tuˬ yoˬ teh‸, Yeˍsuˆ yawˇ hui hta‸ k'oˆ piˇ ve yoˬ. 41Oˇ htaˇ Peˍtruˆ k'oˆ ve, Jawˇ mawˇ-oˬ, tawˇ pa haˉ chi ngaˬ hui hta‸ ceh tiˉ k'oˆ laˇ ve laˇ, maˇ heˆ k'o chaw hk'a peu-eˬ hta‸ k'oˆ piˇ ve laˇ teh‸ na nyi ve yoˬ. 42Jawˇ mawˇ Yeˍsuˆ k'aw‸ k'oˆ ve, Ka ti‸ yeˬ leh cuˇ yiˍ cawˬ ve mawˇ ha‸ shaˉ shehˍ hpaˇ teˇ g'aˇ lehˬ, a shu le. Awˬ shehˍ hpaˇ ve awˬ ceˬ teˇ hpaˍ hta‸ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ, yawˇ ve awˬ shehˍ hpaˇ lehˬ yawˇ hta‸ awˬ hoˉ teh taˍ tuˬ yoˬ maˇ heˆ laˇ. 43Yawˇ ve awˬ shehˍ hpaˇ k'aw‸ gaˬ la htaˇ, awˬ ceˬ teˇ g'aˇ chi hk'e te chehˇ ve hta‸ yawˇ g'a mawˬ ve k'o, awˬ ceˬ oˇ ve lehˬ awˬ bon uiˍ ve yoˬ. 44Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ shehˍ hpaˇ lehˬ, yawˇ ve mawˇ jeˬ hk'a peu-eˬ awˬ hk'oˆ awˬ ceˬ oˇ ve hta‸ awˬ hoˉ te tcuh tuˬ yoˬ. 45Ya‸ hk'aˇ awˬ ceˬ oˇ ve lehˬ, Ngaˬ ve awˬ jawˇ mawˇ haˆ haˆ maˇ k'aw‸ la taˬ teh‸ yawˇ ve nyi ma hk'aw dawˇ leh, awˬ ceˬ paˍ awˬ ceˬ ma teˇ hpaˍ hta‸ dawˆ leh, caˇ chehˇ dawˬ chehˇ leh tzuhˬ dawˬ bvuhˆ ve k'o, 46awˬ ceˬ oˇ ve maˇ dawˇ maˇ gaˇ ve awˬ nyi, maˇ shiˍ ve awˬ yanˇ awˬ hk'aw lo yawˇ ve awˬ shehˍ hpaˇ k'aw‸ gaˬ la leh, yawˇ hta‸ hehnˇ chaweh ciˍ yanˍ leh, ka ti‸ maˇ yeˬ ve chaw teˇ hpaˍ geh chehˇ piˇ lawˬ tuˬ yoˬ. 47A shu yawˇ ve awˬ shehˍ hpaˇ ve a loˍ hta‸ shiˍ taˍ ve ka‸, maˇ gu maˇ hehnˇ taˍ leh, awˬ shehˍ hpaˇ ve a loˍ hta‸ maˇ te ve awˬ ceˬ teˇ g'aˇ lehˬ, laiˉ hk'e jaw‸ ve hta‸ g'a hkanˍ tuˬ yoˬ. 48Maˇ shiˍ ve awˬ hk'aw lo, jaw‸ keunˍ jaw‸ cawˇ ve teˇ ceuˬ hta‸ te ya‸ ve awˬ ceˬ teˇ g'aˇ lehˬ, a ciˉ ceh tiˉ jaw‸ ve hta‸ g'a hkanˍ tuˬ yoˬ. Maˇ chaweh g'a ve chaw teˇ g'aˇ le le lehˬ, maˇ chaweh g'a k'aw‸ shaiˍ tuˬ yoˬ. Maˇ chaweh a‸ piˇ taˍ ve hta‸ g'a ha‸ yuˬ taˍ ve chaw teˇ g'aˇ geh leuˉ leh k'aw‸ lawˬ hk'aw‸ tuˬ yoˬ. 49Miˬ guiˬ hk'oˆ lo aˬ miˍ baˬ keu tuˬ ngaˬ laˬ ve yoˬ. Aˬ miˍ oˇ ve chi beu‸ ka‸ to‸ chehˇ tuˬ ve hta‸ ngaˬ heuˆ gaˇ ve yoˬ. 50Ya‸ hk'aˇ, ngaˬ g'a hkanˍ tuˬ ve baˆtiˆsaˬ teˇ maˬ cawˬ ve yoˬ. Oˇ ve hta‸ ngaˬ maˇ hkanˍ sheˍ ve ceh ceh, nyiˉ tiˍ taˍ ve hta‸ ngaˬ hk'aˬ ma g'a hkanˍ ve le. 51Miˬ guiˬ hk'oˆ lo shu cawˇ da‸ hui da‸ tuˬ awˬ pon ngaˬ laˬ ve teh‸ nawˬ hui dawˇ ve laˇ. Oˇ hk'e te tuˬ awˬ pon ngaˬ laˬ ve maˇ heˆ. Shu hpaˆ da‸ guiˇ da‸ tuˬ awˬ pon laˬ ve yoˬ teh‸, ngaˬ nawˬ hui hta‸ k'oˆ laˇ ve yoˬ. 52Awˬ lawn k'o, chi beu‸ hta‸ tanˬ leh, yehˬ teˇ yehˬ tiˉ awˬ hk'aw lo chehˇ ve chaw ngaˇ g'aˇ lehˬ, hpaˆ da‸ leh nyiˇ g'aˇ teˇ moˍ, shehˆ g'aˇ teˇ moˍ hpeh‸ k'ai tuˬ yoˬ. 53Awˬ pa leh awˬ yaˇ paˍ, awˬ e leh awˬ yaˇ miˇ awˬ pi leh awˬ hkuiˇ ma, teˇ g'aˇ leh teˇ g'aˇ hpaˆ da‸ k'ai tuˬ yoˬ teh‸ k'oˆ ve yoˬ. 54Chaw awˬ moˍ lonˉ hta‸ htawˇ yawˇ k'oˆ piˇ ve, Mvuhˇ nyi k'ehˬ hpawˇ lo moˬ tawˆ la ve hta‸ nawˬ hui g'a mawˬ ve teˇ yanˇ, Mvuhˇ yeˬ laˬ tuˬ yoˬ teh‸, teˇ cawˬ haˉ nawˬ hui k'oˆ ve yoˬ. K'oˆ ve hk'a shuˍ shuˍ hpeh‸ la ve yoˬ. 55Awˬ hawˉ hpawˇ ve mvuhˇ haw meuˆ laˬ ve hta‸ nawˬ hui g'a mawˬ ve teˇ yanˇ, Haw jaˇ chiˆ jaˇ tuˬ yoˬ teh‸ nawˬ hui k'oˆ ve yoˬ. K'oˆ ve hk'a shuˍ shuˍ hpeh‸ la ve yoˬ. 56Heˍ puiˉ ve chaw teˇ hpaˍ-oˬ, miˬ guiˬ leh mvuhˇ naw ma hta‸ nyi leh fuiˍ da‸ pehˬ da‸ tuˬ nawˬ hui shiˍ ve yoˬ. Ya‸ hk'aˇ, chi beu‸ ve awˬ yanˇ hta‸ aˬ hto‸ ma te nawˬ hui fuiˍ da‸ pehˬ da‸ maˇ g'a ve le. 57Aˬ hto‸ ma te nawˬ hui hk'aˇ nawˬ hui hteˇ ve cawˇ ve teˇ ceuˬ hta‸ fuiˍ da‸ pehˬ da‸ maˇ g'a ve le. 58Nawˬ hta‸ tawˇ te ve chaw geh teˇ geh jawˇ mawˇ geh k'ai chehˇ ve teˇ yanˇ, ya‸ k'aw k'aˉ lo k'ai chehˇ htaˇ, yawˇ hta‸ cawˇ da‸ tuˬ g'aˇ hte‸ te-o. Hk'e maˇ heˆ k'o, yawˇ lehˬ suhˉ jehˬ shehˍ hpaˇ geh nawˬ hta‸ g'awˬ k'ai leh, suhˉ jehˬ shehˍ hpaˇ htawˇ htawnˍ awˬ hoˉ ve la‸ sheh awˬ hk'aw lo nawˬ hta‸ chiˇ a‸ piˇ tuˬ yoˬ. Htawnˍ awˬ hoˉ lehˬ, nawˬ hta‸ htawnˍ hk'aw keu laˇ tuˬ yoˬ. 59Ngaˬ nawˬ hta‸ k'oˆ laˇ ve, peh‸ shanˍ awˬ leh teˇ peh‸ hk'a gaˬ maˇ shaiˍ peuˬ ve ceh ceh, htawnˍ hk'aw lo nawˬ maˇ g'a tawˆ k'ai taˬ teh‸ Yeˍsuˆ k'oˆ ve yoˬ.

will be added

X\