Yoˇhanˬ 6

1Oˇ ve awˬ hk'aw‸ nawˉ, Yeˍsuˆ lehˬ, Tiˍbeˍriˆ teh‸ k'oˆ ve Gaˍliˍlehˇ g'uiˬ po coˇ paˉ lo hkanˍ k'ai ve yoˬ. 2Naˬ ve gawˬ ve chaw teˇ hpaˍ awˬ hk'aw lo yawˇ te ve awˬ heˆ teˇ hpaˍ hta‸ chaw awˬ moˍ lonˉ g'a mawˬ ve pa taw, yawˇ hui yawˇ awˬ hk'aˇ suh k'ai ve yoˬ. 3Oˇ htaˇ Yeˍsuˆ lehˬ, hk'aw pui hk'oˆ lo taˆ-e leh, oˇ kaˬ lo yawˇ ve awˬ la‸ g'awˇ teˇ hpaˍ geh mui taˍ ve yoˬ. 4Oˇ htaˇ, Yuˇda‸ chaw hui ve Paˍsaˍhkaˍ pawehˇ te tuˬ awˬ yanˇ gaˬ la paˇ neˇ ve yoˬ. 5Yeˍsuˆ chiˇ nyi leh, chaw awˬ moˍ lonˉ yawˇ geh laˬ chehˇ ve hta‸ g'a mawˬ ve teˇ yanˇ, yawˇ Hpiˇliˇpuˆ hta‸ k'oˆ piˇ ve, Chaw chi ma ve g'a caˇ tuˬ, ngaˬ hui hkaoˍ monˇ hk'aˬ lo ca vuiˬ tuˬ le teh‸ na nyi ve yoˬ. 6Yawˇ chi hk'e na nyi ve lehˬ, Hpiˇliˇpuˆ hta‸ lawˇ nyi ve ceh yoˬ. Awˬ lawn k'o, hk'aˬ hk'e te tuˬ ve hta‸ Yeˍsuˆ yawˇ awˬ to shiˍ taˍ ve yoˬ. 7Hpiˇliˇpuˆ k'aw‸ k'oˆ ve, Chaw chi ma ve hkaoˍ monˇ teˇ g'aˇ teˇ hk'eh‸ g'a caˇ tuˬ, hpu nyiˇ ha hteh‸ hpfuhˇ vuiˬ ve htawˇ maˇ law‸ taˬ teh‸, yawˇ hta‸ k'oˆ piˇ ve yoˬ. 8Yawˇ ve awˬ la‸ g'awˇ teˇ hpaˍ awˬ hk'aw lo, Siˉmonˍ Peˍtruˆ ve awˬ nyi paˍ Anˍdrehˍ k'oˆ ve, 9Cho‸ te taˍ ve hkaoˍ monˇ ngaˇ diˬ leh ngaˇ ehˉ nyiˇ hkeh cawˬ ve yaˇ paˍ ehˉ teˇ g'aˇ choˬ kaˬ chehˇ taˍ ve yoˬ. Ya‸ hk'aˇ, chaw chi ma ve awˬ pon chi teˇ hpaˍ ceh tiˉ aˬ hto‸ ma k'oˆ tuˬ cawˬ le teh, Yeˍsuˆ hta‸ k'oˆ piˇ ve yoˬ. 10Yeˍsuˆ lehˬ, Chaw chi teˇ hpaˍ hta‸ mui tcuh-o teh‸ k'oˆ piˇ ve yoˬ. Oˇ kaˬ lo mvuh‸ de hpeh‸ ve yoˬ. Hk'e te leh, oˇ kaˬ lo mui taˍ ve chaw, hawˉ hk'aˆ ceh tiˉ ngaˇ hinˉ g'aˇ hk'e cawˬ ve yoˬ. 11Oˇ htaˇ Yeˍsuˆ lehˬ, hkaoˍ monˇ oˇ ve teˇ hpaˍ hta‸ yuˬ leh, bon hta‸ chiˇ mvuh peuˬ hk'aw‸ nawˉ, mui chehˇ ve chaw teˇ hpaˍ hta‸ pehˬ piˇ ve yoˬ. Oˇ ve hk'a shuˍ shuˍ, ngaˇ shaˍ hta‸ htawˇ yawˇ hui caˇ gaˇ ve hk'e pehˬ piˇ ve yoˬ. 12Yawˇ hui hk'a bvuhˆ g'a caˇ peuˬ hk'aw‸ nawˉ yawˇ k'oˆ ve, Te‸ chiˉ maˇ g'a mehˉ k'ai tuˬ, caˇ leuˉ taˍ ve teˇ hpaˍ hta‸ k'aw‸ g'awˆ-oˆ teh‸, yawˇ ve awˬ la‸ g'awˇ teˇ hpaˍ hta‸ k'oˆ piˇ ve yoˬ. 13Hk'e te leh, yawˇ hui k'aw‸ g'awˆ ve teˇ yanˇ, cho‸ te taˍ ve hkaoˍ monˇ ngaˇ diˬ hta‸ caˇ leuˉ taˍ ve teˇ hpaˍ, teˇ chi nyiˇ hk'awˍ lawˇ g'a ve yoˬ. 14Hk'e te leh, yawˇ te ve awˬ heˆ chi hta‸ chaw chi ma ve g'a mawˬ ve teˇ yanˇ, Chaw chi lehˬ, miˬ guiˬ hk'oˆ lo laˬ tuˬ ve G'uiˬ sha ve tcuh kaˍ paˍ awˬ tehˬ awˬ na hpeh‸ ve yoˬ teh‸, yawˇ hui k'oˆ da‸ ve yoˬ. 15Chaw oˇ ve teˇ hpaˍ lehˬ, yawˇ hta‸ hkunˉ hawˉ hkanˇ nyiˉ te tcuh-a teh‸ dawˇ ve hta‸ Yeˍsuˆ shiˍ ve pa taw, yawˇ teˇ g'aˇ tiˉ hk'aw pui hk'oˆ lo k'aw‸ taˆ-e ve yoˬ. 16Mvuhˇ hpeu‸ la htaˇ, yawˇ ve awˬ la‸ g'awˇ teˇ hpaˍ g'uiˬ po lo ya‸-e leh, 17haw lo‸ k'oˍ hk'aw lo‸-e peuˬ hk'aw‸ nawˉ, g'uiˬ po coˇ paˉ Kaˍpeˍneˍonˍ venˇ lo hkanˍ k'ai ve yoˬ. Oˇ teˇ hkui mehˆ muiˉ naˆ jaˇ peuˬ ve ka‸, Yeˍsuˆ yawˇ hui geh maˇ gaˬ la sheˍ. 18Mvuhˇ haw lonˉ meuˆ jaˇ leh, g'uiˬ baˇ taˆ la ve yoˬ. 19Yawˇ hui haw lo‸ k'oˍ hta‸ shehˆ laˆ awˇ laˆ hk'e g'awˆ k'ai peuˬ ve teˇ yanˇ, Yeˍsuˆ g'uiˬ po awˬ hk'oˆ lo ya‸ k'aw juˇ leh, haw lo‸ k'oˍ awˬ paˇ lo laˬ chehˇ ve hta‸ yawˇ hui g'a mawˬ htaˇ kawˆ jaˇ ve yoˬ. 20Yeˍsuˆ lehˬ, Ngaˬ yoˬ, taˇ kawˆ teh‸ yawˇ hui hta‸ k'oˆ piˇ ve yoˬ. 21Hk'e te leh, yawˇ hui yawˇ hta‸ haw lo‸ k'oˍ awˬ hk'aw lo ha lehˬ ha k'a ha‸ yuˬ leh, haw lo‸ k'oˍ lehˬ yawˇ hui k'ai chehˇ ve teˇ kaˬ lo teˇ cawˬ haˉ gaˬ sheˬ ve yoˬ. 22Awˬ hk'aw‸ nawˉ teˇ nyi g'uiˬ po coˇ paˉ lo chehˇ taˉ ve chaw awˬ moˍ lonˉ lehˬ, aˉ nyi htaˇ haw lo‸ k'oˍ ehˉ teˇ maˬ ceh tiˉ cawˬ taˍ ve hta‸ maˇ k'oˆ, Yeˍsuˆ lehˬ yawˇ ve awˬ la‸ g'awˇ teˇ hpaˍ geh teˇ geh haw lo‸ k'oˍ oˇ ve awˬ hk'aw lo maˇ lo‸-e leh, yawˇ ve awˬ la‸ g'awˇ teˇ hpaˍ ceh tiˉ k'ai ve hta‸ maˇ k'oˆ, yawˇ hui g'a mawˬ ve yoˬ. 23Ya‸ hk'aˇ, Tiˍbeˍriˆ venˇ lo laˬ ve haw lo‸ k'oˍ ehˉ teˇ hpaˍ lehˬ, Jawˇ mawˇ Yeˍsuˆ bon hta‸ chiˇ mvuh peuˬ hk'aw‸ nawˉ yawˇ hui hkaoˍ monˇ g'a caˇ ve chehˇ kuiˬ awˬ paˇ lo gaˬ la ve yoˬ. 24Hk'e te leh, Yeˍsuˆ leh yawˇ ve awˬ la‸ g'awˇ teˇ hpaˍ oˇ kaˬ lo maˇ chehˇ ve hta‸ chaw awˬ moˍ lonˉ g'a shiˍ ve teˇ yanˇ, haw lo‸ k'oˍ oˇ ve teˇ hpaˍ hta‸ yawˇ hui ciˇ leh, Yeˍsuˆ hta‸ ca nyi tuˬ Kaˍpeˍneˍonˍ venˇ lo k'ai ve yoˬ. 25G'uiˬ po coˇ paˉ lo yawˇ hui Yeˍsuˆ hta‸ g'a mawˬ ve teˇ yanˇ, Raˍbiˆ-oˬ, nawˬ choˬ kaˬ lo hk'aˬ htaˆ laˬ ve le teh‸, yawˇ hui yawˇ hta‸ na nyi ve yoˬ. 26Yeˍsuˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, awˬ heˆ teˇ hpaˍ hta‸ nawˬ hui g'a mawˬ ve pa taw ngaˬ hta‸ ca ve maˇ heˆ. Hkaoˍ monˇ hk'a bvuhˆ g'a caˇ ve pa taw ceh nawˬ hui ngaˬ hta‸ ca ve yoˬ. 27Luˬ puiˉ sheˆ puiˉ ve caˇ tuˬ hta‸ g'a tuˬ awˬ pon g'aˇ hte‸ taˇ te. Chaw yaˇ ve Yaˇ hpu nawˬ hui hta‸ pe‸ laˇ tuˬ ve caˇ tuˬ hta‸ g'a tuˬ awˬ pon g'aˇ hte‸ te-o. Caˇ tuˬ oˇ ve lehˬ, co ti‸ ha ti‸ g'a tuˬ awˬ pon yeˬ ve caˇ tuˬ dawˬ tuˬ hpeh‸ ve yoˬ. Awˬ lawn k'o, Awˬ pa G'uiˬ sha lehˬ chaw yaˇ ve Yaˇ hpu hta‸ yinˉ tcuhˉ taˍ peuˬ teh‸, yawˇ hui hta‸ k'oˆ piˇ ve yoˬ. 28Hk'e te leh, yawˇ hui k'aw‸ k'oˆ ve, G'uiˬ sha ve kanˉ te tuˬ, ngaˬ hui hk'aˬ hk'e g'a te tuˬ le teh‸ yawˇ hta‸ na nyi htaˇ, 29Yeˍsuˆ k'aw‸ k'oˆ ve, G'uiˬ sha ve kanˉ te ve teˇ ceuˬ lehˬ, yawˇ peu laˇ ve teˇ g'aˇ hta‸ yonˍ ve teˇ ceuˬ hpeh‸ ve yoˬ teh‸, yawˇ hui hta‸ k'aw‸ k'oˆ piˇ ve yoˬ. 30Hk'e te leh yawˇ hui k'aw‸ k'oˆ ve, Ngaˬ hui g'a mawˬ leh nawˬ hta‸ g'a yonˍ tuˬ, nawˬ aˬ hto‸ ma awˬ heˆ te maˍ laˇ ve le. 31Nawˬ aˬ hto‸ ma kanˉ te maˍ laˇ ve le. Awˬ puˍ aw‸ pi teˇ hpaˍ g'a caˇ tuˬ awˬ pon, mvuhˇ naw ma ve hkaoˍ monˇ yawˇ yawˇ hui hta‸ piˇ ve yoˬ teh‸ bvuh‸ taˍ ve hk'e, ngaˬ hui ve awˬ puˍ awˬ pi teˇ hpaˍ lehˬ, heh puiˉ hk'aw lo maˍnaˆ shi hta‸ g'a caˇ ve yoˬ teh‸, yawˇ hta‸ k'oˇ piˇ ve yoˬ. 32Oˇ htaˇ Yeˍsuˆ k'aw‸ k'oˆ ve, Ngaˬ nawˬ hui hta‸ awˬ teh‸ awˬ na k'oˆ laˇ ve, mvuhˇ naw ma ve hkaoˍ monˇ nawˬ hui hta‸ pe‸ laˇ shehˍ hpaˇ lehˬ Moˉseˍ maˇ heˆ. Awˬ tehˬ awˬ na ve mvuhˇ naw ma ve hkaoˍ monˇ nawˬ hui hta‸ pe‸ laˇ shehˍ hpaˇ lehˬ ngaˬ Awˬ pa yoˬ. 33Awˬ lawn k'o, G'uiˬ sha ve hkaoˍ monˇ lehˬ, mvuhˇ naw ma hk'oˆ lo ya‸ la leh, miˬ guiˬ yaˇ teˇ hpaˍ hta‸ co ha te‸ piˇ lawˬ ve hkaoˍ monˇ hpeh‸ ve yoˬ teh‸, yawˇ hui hta‸ k'oˆ piˇ ve yoˬ. 34Yawˇ hui k'aw‸ k'oˆ ve, Jawˇ mawˇ-oˬ, hkaoˍ monˇ oˇ ve ngaˬ hui hta‸ hk'aˬ htaˆ ka‸ pe‸ laˇ-oˆ teh‸ yawˇ hta‸ k'oˆ piˇ ve yoˬ. 35Yeˍsuˆ k'aw‸ k'oˆ ve, Ngaˬ lehˬ co ha te‸ piˇ lawˬ ve hkaoˍ monˇ hpeh‸ ve yoˬ. Ngaˬ geh laˬ ve chaw lehˬ, maˇ k'aw‸ meu‸-o. Ngaˬ hta‸ yonˍ ve chaw lehˬ, iˉ kaˆ teˇ pawˆ ka‸ maˇ k'aw‸ shiˉ-o. 36Ya‸ hk'aˇ, nawˬ hui ngaˬ hta‸ mawˬ ve htawˇ maˇ yonˍ teh‸ ngaˬ nawˬ hui hta‸ k'oˆ laˇ peuˬ. 37Awˬ pa ngaˬ hta‸ hk'a pe‸ laˇ ve chaw hui lehˬ, ngaˬ geh laˬ tuˬ yoˬ. Ngaˬ geh laˬ ve chaw hta‸ ngaˬ maˇ chiˇ baˬ. 38Awˬ lawn k'o, ngaˬ mvuhˇ naw ma hk'oˆ lo ya‸ la ve lehˬ, ngaˬ ve a loˍ hta‸ te tuˬ ya‸ la ve maˇ heˆ. Ngaˬ hta‸ peu laˇ shehˍ hpaˇ ve a loˍ hta‸ te tuˬ awˬ pon ngaˬ ya‸ la ve yoˬ. 39Ngaˬ hta‸ peu laˇ shehˍ hpaˇ ve a loˍ lehˬ chi hk'e yoˬ. Yawˇ ngaˬ hta‸ hk'a pe‸ laˇ peuˬ ve chaw teˇ hpaˍ teˇ g'aˇ ka‸ maˇ g'a mehˉ k'ai leh, awˬ leh meuˇ ve awˬ nyi awˬ hk'aw lo yawˇ hui hk'a peu-eˬ hta‸ k'aw‸ te‸ tu la piˇ tuˬ yoˬ. 40Yaˇ hpu hta‸ mawˬ leh yonˍ ve chaw teˇ g'aˇ le le co ti‸ ha ti‸ g'a tuˬ, ngaˬ Awˬ pa a loˍ cawˇ ve yoˬ. Awˬ leh meuˇ ve awˬ nyi awˬ hk'aw lo chaw oˇ ve teˇ hpaˍ hta‸ ngaˬ k'aw‸ te‸ tu la piˇ tuˬ yoˬ teh‸ yawˇ hui hta‸ k'oˆ piˇ ve yoˬ. 41Ngaˬ lehˬ mvuhˇ naw ma hk'oˆ lo ya‸ la ve hkaoˍ monˇ yoˬ teh‸ yawˇ k'oˆ ve pa taw, Yuˇda‸ chaw teˇ hpaˍ yawˇ hta‸ ca beu ca hk'aiˉ ve yoˬ. 42Chaw chi lehˬ, Yoˇseh‸ ve yaˇ paˍ Yeˍsuˆ maˇ heˆ laˇ. Yawˇ ve awˬ pa awˬ e hta‸ ngaˬ hui shiˍ taˍ ve maˇ heˆ laˇ. Ngaˬ mvuhˇ naw ma hk'oˆ lo ya‸ la ve yoˬ teh‸, chi beu‸ yawˇ hk'aˬ hk'e te k'oˆ hpeh‸ ve le teh‸, yawˇ hui k'oˆ da‸ ve yoˬ. 43Oˇ htaˇ Yeˍsuˆ k'oˆ ve, Nawˬ hui ngaˬ hta‸ taˇ beu taˇ hk'aiˉ . 44Ngaˬ hta‸ peu laˇ shehˍ hpaˇ Awˬ pa lehˬ, shu hta‸ ngaˬ geh lo maˇ g'awˬ veu laˇ ve k'o, chaw teˇ g'aˇ ka‸ ngaˬ geh laˬ maˇ hpeh‸. Ngaˬ geh g'awˬ veu laˇ ve chaw hta‸ awˬ leh meuˇ ve awˬ nyi awˬ hk'aw lo ngaˬ k'aw‸ te‸ tu la piˇ tuˬ yoˬ. 45G'uiˬ sha ve tcuh kaˍ paˍ teˇ hpaˍ ve li‸ awˬ hk'aw lo, G'uiˬ sha lehˬ yawˇ hui hk'a peu-eˬ hta‸ maˍ piˇ tuˬ yoˬ teh‸ bvuh‸ taˍ ve yoˬ. Awˬ pa geh hk'a g'a kaˇ leh hk'a g'a henˇ peuˬ ve chaw teˇ g'aˇ le le lehˬ, ngaˬ geh laˬ ve yoˬ. 46Chaw teˇ g'a ka‸ Awˬ pa hta‸ maˇ mawˬ jaw. G'uiˬ sha lo laˬ ve teˇ g'aˇ ceh tiˉ Awˬ pa hta‸ mawˬ jaw ve yoˬ. 47Ngaˬ nawˬ hui hta‸ awˬ tehˬ awˬ na k'oˆ laˇ ve, yonˍ ve chaw lehˬ, co ti‸ ha ti‸ cawˬ taˍ ve yoˬ. 48Ngaˬ lehˬ, co ha te‸ piˇ lawˬ ve hkaoˍ monˇ hpeh‸ ve yoˬ. 49Nawˬ hui ve awˬ puˍ awˬ pi teˇ hpaˍ lehˬ, heh puiˉ hk'aw lo maˍnaˆ shiˍ hta‸ g'a caˇ ve htawˇ, yawˇ hui suh ve yoˬ. 50Hkaoˍ monˇ chi hta‸ g'a caˇ ve chaw maˇ g'a suh tuˬ, hkaoˍ monˇ chi lehˬ mvuhˇ naw ma hk'oˆ lo ya‸ la ve yoˬ. 51Ngaˬ lehˬ, mvuhˇ naw ma hk'oˆ lo ya‸ la ve co ha te‸ piˇ lawˬ ve hkaoˍ monˇ hpeh‸ ve yoˬ. Hkaoˍ monˇ chi hta‸ g'a caˇ ve chaw lehˬ, co co taiˍ taiˍ co ha te‸ tuˬ yoˬ. Miˬ guiˬ yaˇ co ha g'a te‸ tuˬ ve awˬ pon, ngaˬ piˇ tuˬ ve hkaoˍ monˇ lehˬ, ngaˬ ve awˬ shaˍ yoˬ teh‸, yawˇ hui hta‸ k'oˆ piˇ ve yoˬ. 52Hk'e te leh, Yuˇda‸ chaw teˇ hpaˍ k'oˆ ve, Chaw chi lehˬ, yawˇ ve awˬ shaˍ ngaˬ hui hta‸ hk'aˬ hk'e te caˍ laˇ hpeh‸ tuˬ le teh‸, teˇ g'aˇ leh teˇ g'aˇ tawˇ g'awˬ da‸ ve yoˬ. 53Yeˍsuˆ k'aw‸ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, chaw yaˇ ve Yaˇ hpu ve awˬ shaˍ hta‸ maˇ caˇ leh yawˇ ve awˬ suhˍ hta‸ maˇ dawˬ ve k'o, nawˬ hui awˬ hk'aw lo co ha te‸ ve teˇ ceuˬ maˇ cawˬ. 54Ngaˬ ve awˬ shaˍ hta‸ caˇ leh ngaˬ ve awˬ suhˍ hta‸ dawˬ ve chaw lehˬ, co ti‸ ha ti‸ cawˬ taˍ ve yoˬ. Awˬ leh meuˇ teˇ nyi awˬ hk'aw lo ngaˬ yawˇ hta‸ k'aw‸ te‸ tu la piˇ tuˬ yoˬ. 55Awˬ lawn k'o, ngaˬ ve awˬ shaˍ lehˬ, awˬ tehˬ awˬ na caˇ tuˬ hpeh‸ ve yoˬ. Ngaˬ ve awˬ suhˍ htawˇ awˬ tehˬ awˬ na dawˬ tuˬ hpeh‸ ve yoˬ. 56Ngaˬ ve awˬ shaˍ hta‸ caˇ leh ngaˬ ve awˬ suhˍ hta‸ dawˬ ve chaw lehˬ, ngaˬ awˬ hk'aw lo chehˇ leh, ngaˬ htawˇ yawˇ awˬ hk'aw lo chehˇ ve yoˬ. 57Te‸ chehˇ ve Awˬ pa ngaˬ hta‸ peu laˇ leh, yawˇ hta‸ pa taw ngaˬ te‸ chehˇ ve hk'e, ngaˬ hta‸ caˇ ve chaw htawˇ, ngaˬ hta‸ pa taw co ha te‸ chehˇ tuˬ yoˬ. 58Hkaoˍ monˇ chi lehˬ, awˬ puˍ awˬ pi hui g'a caˇ ve hkaoˍ monˇ hk'a shuˍ shuˍ hpeh‸ ve maˇ heˆ. Hkaoˍ monˇ oˇ ve hta‸ yawˇ hui g'a caˇ ve htawˇ suh ve yoˬ. Hkaoˍ monˇ chi lehˬ, mvuhˇ naw ma hk'oˆ lo ya‸ la ve yoˬ. Hkaoˍ monˇ chi hta‸ caˇ ve chaw lehˬ, co co taiˍ taiˍ co ha g'a te‸ tuˬ yoˬ teh‸ yawˇ hui hta‸ k'oˆ piˇ ve yoˬ. 59Kaˍpeˍneˍonˍ venˇ lo cawˬ ve bon yehˬ awˬ hk'aw lo yawˇ maˍ piˇ chehˇ htaˇ, awˬ lawn chi teˇ hpaˍ hta‸ yawˇ k'oˆ ve yoˬ. 60Yawˇ ve awˬ la‸ g'awˇ hui tawˇ oˇ ve hta‸ g'a kaˇ ve teˇ yanˇ, yawˇ hui laiˉ g'aˇ k'oˆ ve, Tawˇ chi lehˬ haˍ jaˇ ve yoˬ. A shu na hpeh‸ tuˬ le teh‸ k'oˆ da‸ ve yoˬ. 61Awˬ lawn chi yawˇ ve awˬ la‸ g'awˇ teˇ hpaˍ ca beu ca hk'aiˉ chehˇ ve hta‸ Yeˍsuˆ yawˇ ve nyi ma awˬ hk'aw lo shiˍ ve teˇ yanˇ yawˇ k'oˆ ve, Tawˇ chi ve hta‸ pa taw nawˬ hui nyi ma luˬ ve leh laˇ. 62Chaw yaˇ ve Yaˇ hpu lehˬ, awˉ lawˉ chehˇ jaw kuiˬ lo k'aw‸ taˆ k'o‸-e chehˇ ve hta‸ nawˬ hui g'a mawˬ ve k'o, hk'aˬ hk'e dawˇ tuˬ ve le. 63Co ha te‸ piˇ lawˬ ve teˇ ceuˬ lehˬ, awˬ ha yoˬ. Awˬ shaˍ lehˬ, te‸ chiˉ te maˇ g'a. Ngaˬ nawˬ hui hta‸ k'oˆ laˇ ve tawˇ hkawˇ teˇ hpaˍ lehˬ, awˬ ha hpeh‸ ve yoˬ. Co ha te‸ ve teˇ ceuˬ ka‸ hpeh‸ ve yoˬ. 64Ya‸ hk'aˇ, nawˬ hui awˬ hk'aw lo chaw teˇ hpaˍ hpaˍ maˇ yonˍ teh‸, yawˇ hui hta‸ k'oˆ piˇ ve yoˬ. Awˬ lawn k'o, maˇ yonˍ ve chaw teˇ hpaˍ a shu hpeh‸ ve hta‸ maˇ k'oˆ, yawˇ hta‸ chiˇ a‸ piˇ tuˬ ve chaw teˇ g'aˇ a shu hpeh‸ ve hta‸ maˇ k'oˆ, awˬ hkuiˉ puiˍ htaˇ ka‸ Yeˍsuˆ shiˍ taˍ ve yoˬ. 65Yawˇ k'oˆ ve, Hk'e te leh ngaˬ Awˬ pa a hkaw-anˬ maˇ piˇ ve k'o, chaw teˇ g'aˇ ka‸ ngaˬ geh laˬ maˇ hpeh‸ teh‸, ngaˬ nawˬ hui hta‸ k'oˆ laˇ taˍ peuˬ teh‸ k'oˆ ve yoˬ. 66Oˇ ve awˬ hk'aw‸ nawˉ yawˇ ve awˬ la‸ g'awˇ laiˉ g'aˇ k'aw‸ hpfuhˆ k'o‸-e leh yawˇ geh maˇ k'aw‸ te toˇ ve yoˬ. 67Nawˬ hui htawˇ k'aw‸ k'o‸-e tuˬ ve laˇ teh‸, tcuh yaˇ teˇ chi nyiˇ g'aˇ hta‸ Yeˍsuˆ na nyi ve yoˬ. 68Siˉmonˍ Peˍtruˆ k'aw‸ k'oˆ ve, Jawˇ mawˇ-oˬ, ngaˬ hui a shu geh k'ai tuˬ ve le. Nawˬ lehˬ co ti‸ ha ti‸ ve tawˇ hkawˇ cawˬ taˍ ve yoˬ. 69Nawˬ lehˬ G'uiˬ sha ve da‸ kehˬ shehˍ hpaˇ teˇ g'aˇ hpeh‸ ve hta‸ ngaˬ hui yonˍ taˍ leh shiˍ taˍ peuˬ teh‸ yawˇ hta‸ k'oˆ piˇ ve yoˬ. 70Yeˍsuˆ k'aw‸ k'oˆ ve, Ngaˬ nawˬ hui teˇ chi nyiˇ g'aˇ hta‸ leuˆ yuˬ taˍ ve maˇ heˆ laˇ. Ya‸ hk'aˇ, nawˬ hui awˬ hk'aw lo teˇ g'aˇ lehˬ, neˇ haiˬ hpeh‸ ve yoˬ teh‸, yawˇ hui hta‸ k'oˆ piˇ ve yoˬ. 71Yawˇ chi hk'e k'oˆ ve lehˬ, Siˉmonˍ Iˉsaˍkaˍriˍoˆ ve yaˇ Yuˇda‸ hta‸ k'oˆ gaˇ ve yoˬ. Awˬ lawn k'o, yawˇ lehˬ tcuh yaˇ teˇ chi nyiˇ g'aˇ awˬ hk'aw lo chehˇ leh, Yeˍsuˆ hta‸ chiˇ a‸ piˇ tuˬ ve teˇ g'aˇ hpeh‸ ve yoˬ.

will be added

X\