Yoˇhanˬ 5

1Oˇ ve awˬ hk'aw‸ nawˉ, Yuˇda‸ chaw hui pawehˇ te ve awˬ yanˇ gaˬ la leh, Yeˍsuˆ Yeˍruˆsaˍlehnˍ venˇ lo taˆ-e ve yoˬ. 2Yeˍruˆsaˍlehnˍ venˇ awˬ hk'aw, yawˬ taˍ meu‸ hpe‸ awˬ paˇ lo, Heˍbrehˇ hkawˇ Beˍteˍsaˍdaˆ teh‸ k'oˆ ve g'uiˬ po teˇ maˬ cawˬ ve yoˬ. G'uiˬ po oˇ ve awˬ jaˇ lo aˉ po k'o ngaˇ maˬ cawˬ ve yoˬ. 3Aˉ po k'o oˇ ve teˇ hpaˍ awˬ hk'aw lo naˬ ve chaw, mehˆ cuˉ ve chaw, hkui luˬ ve chaw leh hkui sheh la‸ sheh suh ve chaw maˇ maˇ zuh‸ chehˇ taˍ ve yoˬ. 4Awˬ yanˇ awˬ yanˇ k'o, mvuhˇ naw ma tcuh yaˇ g'uiˬ po awˬ hk'aw lo ya‸ la leh iˉ kaˆ hta‸ hiˆ piˇ ve yoˬ. Iˉ kaˆ hiˆ la ve teˇ yanˇ, awˉ lawˉ peuˇ g'a lo‸-e ve chaw teˇ g'aˇ lehˬ, yawˇ naˬ ve a naˍ hk'aˬ ve teˇ ceuˬ maˇ k'oˆ, na-e la ve yoˬ. 5Shehˆ chi hiˉ hk'aw‸ hk'a gaˬ naˬ ve chaw teˇ g'aˇ lehˬ, oˇ kaˬ lo chehˇ taˍ ve yoˬ. 6Yeˍsuˆ lehˬ, chaw oˇ ve hta‸ g'a mawˬ leh, yawˇ naˬ maw jaˇ peuˬ ve hta‸ g'a shiˍ ve teˇ yanˇ, Nawˬ chehˇ sha la gaˇ laˇ teh‸, yawˇ hta‸ na nyi ve yoˬ. 7Chaw naˬ oˇ ve teˇ g'aˇ k'oˆ ve, Jawˇ mawˇ-oˬ, iˉ kaˆ hiˆ la ve teˇ yanˇ, g'uiˬ po awˬ hk'aw lo ngaˬ hta‸ yuˬ keu laˇ tuˬ ve chaw maˇ cawˬ. Ngaˬ ya‸-e chehˇ ve teˇ yanˇ, awˬ kaˍ awˬ nu chaw teˇ g'aˇ ngaˬ awˬ g'uˇ suhˍ lo‸-e ve yoˬ teh‸, yawˇ hta‸ k'oˆ piˇ ve yoˬ. 8Yeˍsuˆ k'oˆ ve, Tu loˬ. Nawˬ ve zuh‸ hpui hta‸ yuˬ leh k'ai-o teh‸, yawˇ hta‸ k'oˆ piˇ ve yoˬ. 9Chaw oˇ ve teˇ g'aˇ lehˬ, teˇ cawˬ haˉ na-e la leh, yawˇ ve zuh‸ hpui hta‸ yuˬ leh k'ai ve yoˬ. 10Oˇ ve teˇ nyi lehˬ, shinˉ nyi hpeh‸ ve yoˬ. Hk'e te leh, na-e la ve chaw oˇ ve teˇ g'aˇ hta‸ Yuˇda‸ chaw teˇ hpaˍ k'oˆ piˇ ve, Ya‸ nyi lehˬ shinˉ nyi yoˬ. Nawˬ ve zuh‸ hpui hta‸ yuˬ k'ai ve lehˬ maˇ cawˇ teh‸ k'oˆ ve yoˬ. 11Oˇ htaˇ yawˇ k'oˆ ve, Ngaˬ hta‸ gu na-e laˇ ve chaw teˇ g'aˇ lehˬ, Nawˬ ve zuh‸ hpui hta‸ yuˬ leh k'ai-o teh‸ ngaˬ hta‸ k'oˆ laˇ ve yoˬ teh‸, yawˇ hui hta‸ k'oˆ piˇ ve yoˬ. 12Yawˇ hui k'aw‸ k'oˆ ve, Nawˬ ve zuh‸ hpui hta‸ yuˬ leh k'ai-o teh‸ k'oˆ laˇ ve chaw a shu le teh‸ yawˇ hta‸ na nyi ve yoˬ. 13Na-e la ve chaw oˇ ve teˇ g'aˇ lehˬ, yawˇ hta‸ gu na-e laˇ ve chaw teˇ g'aˇ a shu leh naˍ maˇ shiˍ. Awˬ lawn k'o, oˇ kaˬ lo chaw chehˇ maˇ jaˇ ve pa taw, Yeˍsuˆ tawˆ k'ai peuˬ. 14Oˇ ve awˬ hk'aw‸ nawˉ, bon yehˬ lonˉ awˬ hk'aw lo Yeˍsuˆ yawˇ hta‸ g'a mawˬ htaˇ, Nawˬ chehˇ sha la peuˬ. Chi a‸ kehˉ leuˉ leh tu‸ ve hkanˍ ve hta‸ nawˬ maˇ g'a hkanˍ tuˬ, venˇ baˆ taˇ k'aw‸ te teh‸, yawˇ hta‸ k'oˆ piˇ ve yoˬ. 15Chaw oˇ ve teˇ g'aˇ k'ai leh, Ngaˬ hta‸ gu na-e laˇ ve chaw teˇ g'aˇ lehˬ Yeˍsuˆ yoˬ teh‸, Yuˇda‸ chaw hui hta‸ ca hto piˇ ve yoˬ. 16Shinˉ nyi teˇ nyi htaˇ Yeˍsuˆ oˇ hk'e te ve pa taw, Yuˇda‸ chaw teˇ hpaˍ yawˇ hta‸ fawˉ mehˍ ve yoˬ. 17Oˇ htaˇ Yeˍsuˆ k'oˆ ve, Ngaˬ Awˬ pa lehˬ, chi beu‸ hk'a gaˬ kanˉ te chehˇ ve yoˬ. Ngaˬ htawˇ kanˉ te chehˇ ve yoˬ teh‸, yawˇ hui hta‸ k'aw‸ k'oˆ piˇ ve yoˬ. 18Hk'e te leh, yawˇ shinˉ nyi hta‸ te luˬ ve awˬ hk'oˆ ka‸ G'uiˬ sha hta‸ yawˇ ve Awˬ pa teh‸ k'oˆ leh, yawˇ awˬ to hta‸ G'uiˬ sha hk'a shuˍ shuˍ taˍ ve pa taw, Yuˇda‸ chaw teˇ hpaˍ yawˇ hta‸ hk'aˬ hk'e te leh g'a tiˇ pehˍ tuˬ leuˉ leh ca ve yoˬ. 19Yeˍsuˆ k'oˆ ve, Ngaˬ nawˬ hui hta‸ awˬ tehˬ awˬ na k'oˆ laˇ ve, Yaˇ hpu lehˬ yawˇ hk'aˇ yawˇ a loˍ cawˇ ve hk'e te‸ chiˉ ka‸ te maˇ g'a. Awˬ pa te chehˇ ve hta‸ g'a mawˬ ve hk'e ceh tiˉ yawˇ te ve yoˬ. Awˬ pa hk'a te ve teˇ ceuˬ le le hta‸ Yaˇ hpu htawˇ te ve yoˬ. 20Awˬ pa lehˬ, Yaˇ hpu hta‸ ha‸ leh, yawˇ awˬ to hk'a te ve hk'a peu-eˬ Yaˇ hpu hta‸ maˍ piˇ ve yoˬ. Nawˬ hui g'a anˇ jaˇ tuˬ, chi teˇ hpaˍ a‸ kehˉ uiˍ ve kanˉ teˇ hpaˍ htawˇ Yaˇ hpu hta‸ yawˇ hpeu‸ maˍ piˇ tuˬ yoˬ. 21Awˬ lawn k'o, Awˬ pa lehˬ suh taˍ ve chaw teˇ hpaˍ hta‸ k'aw‸ te‸ tu la piˇ lawˬ ve hk'e, Yaˇ hpu htawˇ yawˇ te‸ la piˇ gaˇ ve chaw teˇ hpaˍ hta‸ te‸ la piˇ lawˬ ve yoˬ. 22Chaw hk'a peu-eˬ Awˬ pa hta‸ yawˆ yan ve hk'e Yaˇ hpu hta‸ htawˇ yawˆ yan tuˬ, Awˬ pa lehˬ chaw teˇ g'aˇ hta‸ ka‸ suhˉ maˇ jehˬ. Suhˉ jehˬ tuˬ hk'a peu-eˬ Yaˇ hpu hta‸ chiˇ a‸ piˇ peuˬ. 23Yaˇ hpu hta‸ maˇ yawˆ yan ve chaw lehˬ, yawˇ hta‸ peu laˇ shehˍ hpaˇ, Awˬ pa hta‸ htawˇ maˇ yawˆ yan ve yoˬ. 24Ngaˬ nawˬ hui hta‸ awˬ tehˬ awˬ na k'oˆ laˇ ve, ngaˬ ve tawˇ hkawˇ hta‸ na yuˬ leh, ngaˬ hta‸ peu laˇ shehˍ hpaˇ hta‸ yonˍ ve chaw teˇ g'aˇ lehˬ, co ti‸ ha ti‸ cawˬ taˍ peuˬ. Suhˉ jehˬ ve hta‸ yawˇ maˇ g'a hkanˍ. Suh ve awˬ hk'aw lo yawˇ ponˬ tawˆ-e leh, te‸ ve awˬ hk'aw lo g'a lo‸-e peuˬ. 25Ngaˬ nawˬ hui hta‸ awˬ tehˬ awˬ na k'oˆ laˇ ve, suh taˍ ve chaw teˇ hpaˍ lehˬ, G'uiˬ sha ve Yaˇ hpu ve tawˇ hkawˇ hta‸ g'a kaˇ tuˬ awˬ yanˇ gaˬ la chehˇ leh, chi beu‸ ka‸ gaˬ la peuˬ. G'a kaˇ ve chaw hui htawˇ co ha g'a te‸ tuˬ yoˬ. 26Awˬ lawn k'o, Awˬ pa awˬ hk'aw lo co ha te‸ ve teˇ ceuˬ cawˬ ve hk'a shuˍ shuˍ, Yaˇ hpu awˬ hk'aw lo htawˇ co ha te‸ ve teˇ ceuˬ cawˬ tuˬ Awˬ pa a hkaw-anˬ piˇ ve yoˬ. 27Chi hk'oˆ ka‸, yawˇ lehˬ chaw yaˇ ve Yaˇ hpu hpeh‸ ve pa taw, suhˉ jehˬ tuˬ ve kanˇ paˆ htawˇ yawˇ hta‸ piˇ taˍ ve yoˬ. 28Awˬ lawn chi hta‸ taˇ anˇ. Awˬ lawn k'o, tuˍ hpfuh awˬ hk'aw lo chehˇ ve chaw hk'a peu-eˬ lehˬ, yawˇ ve tawˇ hkawˇ hta‸ g'a kaˇ leh tawˆ la tuˬ ve awˬ yanˇ gaˬ la tuˬ yoˬ. 29Da‸ ve hta‸ te ve chaw teˇ hpaˍ lehˬ, co ha te‸ ve awˬ pon k'aw‸ te‸ tu la tuˬ yoˬ. Haiˬ ve hta‸ te ve chaw teˇ hpaˍ lehˬ, suhˉ jehˬ tuˬ awˬ pon k'aw‸ te‸ tu la tuˬ yoˬ. 30Ngaˬ lehˬ, ngaˬ hk'aˇ ngaˬ ngaˬ a loˍ cawˇ ve hk'e te‸ chiˉ ka‸ te maˇ g'a. Ngaˬ g'a kaˇ ve hk'e ceh ngaˬ suhˉ jehˬ ve yoˬ. Ngaˬ suhˉ jehˬ ve lehˬ cawˇ ve yoˬ. Awˬ lawn k'o, ngaˬ ve a loˍ hta‸ ngaˬ maˇ te. Ngaˬ hta‸ peu laˇ shehˍ hpaˇ ve a loˍ hta‸ ceh tiˉ ngaˬ te ve yoˬ. 31Ngaˬ lehˬ, ngaˬ awˬ to awˬ lawn shaˉ hkiˆ hkanˍ ve k'o, ngaˬ ve shaˉ hkiˆ lehˬ maˇ cawˇ. 32Ngaˬ ve awˬ lawn hta‸ shaˉ hkiˆ hkanˍ shehˍ hpaˇ awˬ kaˍ awˬ nu chaw teˇ g'aˇ cawˬ ve yoˬ. Yawˇ ngaˬ awˬ lawn shaˉ hkiˆ hkanˍ ve lehˬ, cawˇ ve yoˬ teh‸ ngaˬ shiˍ ve yoˬ. 33Nawˬ hui lehˬ, Yoˇhanˬ geh shu hta‸ k'ai tcuh leh, hteˇ ve cawˇ ve awˬ lawn hta‸ yawˇ shaˉ hkiˆ hkanˍ taˍ ve yoˬ. 34Chaw yaˇ lo laˬ ve shaˉ hkiˆ hkanˍ ve hta‸ ngaˬ hkanˍ yuˬ ve maˇ heˆ. Ya‸ hk'aˇ, nawˬ hui htaiˍ hk'aw‸ ve hta‸ g'a tuˬ, ngaˬ chi hk'e k'oˆ laˇ ve yoˬ. 35Yoˇhanˬ lehˬ, aˬ miˍ to‸ chehˇ leh awˬ g'euˆ ba chehˇ ve kawˆ faiˇ hpeh‸ ve yoˬ. Nawˬ hui lehˬ, yawˇ ve awˬ g'euˆ awˬ hk'aw lo teˇ tcuhˉ teˇ yanˇ ha lehˬ tuˬ nyi ma cawˬ ve yoˬ. 36Ya‸ hk'aˇ ngaˬ cawˬ taˍ ve shaˉ hkiˆ lehˬ, Yoˇhanˬ shaˉ hkiˆ hkanˍ ve a‸ kehˉ uiˍ ve yoˬ. Awˬ lawn k'o, peuˬ htaˇ hk'a gaˬ te tuˬ Awˬ pa ngaˬ hta‸ te tcuh laˇ ve kanˉ teˇ hpaˍ lehˬ, Awˬ pa ngaˬ hta‸ peu laˇ ve yoˬ teh‸ shaˉ hkiˆ hpeh‸ ve yoˬ. Chi beu‸ ka‸ kanˉ oˇ ve teˇ hpaˍ hta‸ ngaˬ te chehˇ taˍ ve yoˬ. 37Ngaˬ hta‸ peu laˇ shehˍ hpaˇ Awˬ pa htawˇ, ngaˬ awˬ pon shaˉ hkiˆ hkanˍ ve yoˬ. Nawˬ hui lehˬ, yawˇ tawˇ yaw ve awˬ hkawˇ hta‸ teˇ pawˆ ka‸ maˇ kaˇ jaw. Yawˇ ve awˬ ho‸ awˬ han hta‸ htawˇ nawˬ hui maˇ mawˬ jaw. 38Yawˇ ve tawˇ hkawˇ htawˇ nawˬ hui awˬ hk'aw lo maˇ cawˬ. Awˬ lawn k'o, yawˇ peu laˇ ve teˇ g'aˇ hta‸ nawˬ hui maˇ yonˍ. 39Nawˬ hui lehˬ, Li‸ hpu awˬ hk'aw lo co ti‸ ha ti‸ hta‸ g'a tuˬ yoˬ teh‸ dawˇ ve pa taw, Li‸ hpu hta‸ nawˬ hui hk'a deh‸ ca hpeu‸ nyi g'aw nyi ve yoˬ. Li‸ hpu oˇ ve lehˬ, ngaˬ awˬ lawn shaˉ hkiˆ hkanˍ ve yoˬ. 40Ya‸ hk'aˇ, nawˬ hui co ha te‸ ve hta‸ g'a tuˬ, ngaˬ geh laˬ tuˬ nawˬ hui nyi ma maˇ cawˬ. 41Chaw yaˇ piˇ ve awˬ me‸ awˬ hponˇ hta‸ ngaˬ maˇ ha‸ yuˬ. 42G'uiˬ sha ve ha‸ pehnˇ ve nawˬ hui awˬ hk'aw lo maˇ cawˬ ve hta‸ ngaˬ shiˍ ve yoˬ. 43Ngaˬ lehˬ, ngaˬ Awˬ pa ve awˬ meh awˬ hk'aw lo laˬ ve htawˇ, nawˬ hui ngaˬ hta‸ maˇ ha‸ yuˬ. Awˬ kaˍ awˬ nu chaw teˇ g'aˇ a shu yawˇ ve awˬ meh awˬ hk'aw lo laˬ ve k'o, yawˇ hta‸ nawˬ hui ha‸ yuˬ tuˬ yoˬ. 44Nawˬ hui teˇ g'aˇ leh teˇ g'aˇ piˇ ve awˬ me‸ awˬ hponˇ hta‸ ha‸ yuˬ leh, teˇ g'aˇ tiˉ hpeh‸ ve G'uiˬ sha piˇ ve awˬ me‸ awˬ hponˇ hta‸ maˇ ca ve nawˬ hui lehˬ, hk'aˬ hk'e te yonˍ hpeh‸ tuˬ le. 45Awˬ pa mehˆ g'uˇ suhˍ ngaˬ nawˬ hui hta‸ venˇ baˆ taˍ laˇ tuˬ ve teh‸ taˇ dawˇ. Nawˬ hui hta‸ venˇ baˆ taˍ ve chaw teˇ g'aˇ cawˬ ve yoˬ. Yawˇ lehˬ, nawˬ hui g'aˇ va taˍ ve Moˉseˍ hpeh‸ ve yoˬ. 46Moˉseˍ hta‸ nawˬ hui yonˍ ve hk'e k'o, ngaˬ hta‸ htawˇ nawˬ hui yonˍ tuˬ yoˬ. Awˬ lawn k'o, yawˇ ngaˬ ve awˬ lawn bvuh‸ taˍ ve yoˬ. 47Yawˇ bvuh‸ taˍ ve li‸ teˇ hpaˍ hta‸ nawˬ hui maˇ yonˍ ve k'o, ngaˬ ve tawˇ hkawˇ hta‸ nawˬ hui hk'aˬ hk'e te yonˍ tuˬ le teh‸, yawˇ hui hta‸ k'oˆ piˇ ve yoˬ.

will be added

X\