Yoˇhanˬ 21

1Oˇ ve awˬ hk'aw‸ nawˉ Yeˍsuˆ lehˬ, Tiˍbeˍriˆ g'uiˬ po awˬ paˇ lo awˬ la‸ g'awˇ teˇ hpaˍ hta‸ yawˇ ve awˬ to teˇ pawˆ k'aw‸ maw piˇ ve yoˬ. Yawˇ ve awˬ to maw piˇ ve lehˬ chi hk'e yoˬ. 2Siˉmonˍ Peˍtruˆ, Yaˇ cehˬ k'a teh‸ k'oˆ ve Htoˉma‸, Gaˍliˍlehˇ mvuhˇ miˬ Kaˍnaˆ hk'aˆ yaˇ Naˍtaˍneˍlaˆ, Zeˍbeˍdehˇ ve yaˇ paˍ nyiˇ g'aˇ leh, Yeˍsuˆ ve awˬ la‸ g'awˇ awˬ kaˍ awˬ nu nyiˇ g'aˇ yawˇ hui geh teˇ geh chehˇ taˍ ve yoˬ. 3Siˉmonˍ Peˍtruˆ lehˬ, Ngaˬ ngaˇ ca-e shaˍ teh‸, yawˇ hui hta‸ k'oˆ piˇ ve yoˬ. Yawˇ hui k'aw‸ k'oˆ ve, Ngaˬ hui ka‸ k'ai-a teh‸ yawˇ hta‸ k'oˆ piˇ ve yoˬ. Yawˇ hui k'ai leh, haw lo‸ k'oˍ hk'aw lo‸-e ve yoˬ. Oˇ ve teˇ haˉ yawˇ hui ngaˇ ca ve, teˇ hkeh ka‸ maˇ g'a. 4Mvuhˇ htiˇ la ve teˇ yanˇ, Yeˍsuˆ lehˬ g'uiˬ pfuhˍ paˇ lo huˉ taˍ ve yoˬ. Ya‸ hk'aˇ, Yeˍsuˆ yoˬ teh‸ awˬ la‸ g'awˇ teˇ hpaˍ maˇ shiˍ. 5Yeˍsuˆ k'oˆ ve, Yaˇ teˇ hpaˍ-oˬ, ngaˇ g'a-aw laˇ teh‸ yawˇ hui hta‸ na nyi htaˇ, Maˇ g'a teh‸ yawˇ hui yawˇ hta‸ k'aw‸ k'oˆ piˇ ve yoˬ. 6Oˇ htaˇ Yeˍsuˆ k'oˆ ve, Haw lo‸ k'oˍ la‸ sha paˉ lo geu‸ hpehˇ-oˆ. Oˇ hk'e te ve k'o, g'a tuˍ yoˬ teh‸ yawˇ hui hta‸ k'oˆ piˇ ve yoˬ. Hk'e te leh yawˇ hui geu‸ hpehˇ leh, ngaˇ maˇ maˇ g'a ve pa taw, geu‸ hta‸ g'awˬ maˇ g'aˇ. 7Oˇ htaˇ, Yeˍsuˆ ha‸ ve awˬ la‸ g'awˇ teˇ g'aˇ lehˬ, Peˍtruˆ hta‸ k'oˆ piˇ ve, Jawˇ mawˇ Yeˍsuˆ yoˬ. Jawˇ mawˇ Yeˍsuˆ yoˬ teh‸ Siˉmonˍ Peˍtruˆ g'a kaˇ htaˇ, yawˇ veu‸ k'aˇ maˇ veu‸ taˍ ve pa taw, aˉ po‸ zuhˬ ma hta‸ deh sheˬ leh, g'uiˬ po hk'aw lo pawˆ lo‸-e ve yoˬ. 8Awˬ kaˍ awˬ nu awˬ la‸ g'awˇ teˇ hpaˍ lehˬ, g'uiˬ pfuhˍ hta‸ maˇ vuiˇ, ngaˇ chi loˬ hk'e ceh tiˉ vuiˇ ve pa taw, ngaˇ hk'a biˇ geh taˍ ve geu‸ hta‸ g'awˬ leh, haw lo‸ k'oˍ ciˇ laˬ ve yoˬ. 9Yawˇ hui pehˬ shaˉ lo gaˬ htaˇ, shiˉ g'eu‸ aˬ miˍ ceh taˍ ve hta‸ g'a mawˬ leh, ngaˇ pinˍ taˍ ve hta‸ maˇ k'oˆ, hkaoˍ monˇ teh taˍ ve hta‸ maˇ k'oˆ, g'a mawˬ ve yoˬ. 10Yeˍsuˆ k'oˆ ve, Chi beu‸ nawˬ hui g'a taˍ ve ngaˇ teˇ hpaˍ hpaˍ hta‸ yuˬ veu laˇ-oˆ teh‸ yawˇ hui hta‸ k'oˆ piˇ ve yoˬ. 11Hk'e te leh, Siˉmonˍ Peˍtruˆ lehˬ, haw lo‸ k'oˍ hk'aw lo‸-e leh, ngaˇ hk'a biˇ cawˬ ve geu‸ oˇ ve hta‸ pehˬ shaˉ lo g'awˬ veu laˇ ve yoˬ. Geu‸ oˇ ve awˬ hk'aw lo uiˍ ve ngaˇ 153 hkeh cawˬ ve yoˬ. Ngaˇ chi taw taw g'a maˇ ve htawˇ, geu‸ maˇ tzuh‸. 12Oˇ htaˇ Yeˍsuˆ k'oˆ ve, Awˍ caˇ la-o teh‸, yawˇ hui hta‸ k'oˆ piˇ ve yoˬ. Yawˇ lehˬ Jawˇ mawˇ Yeˍsuˆ hpeh‸ ve yoˬ teh‸, awˬ la‸ g'awˇ hui shiˍ ve pa taw, Nawˬ a shu le teh‸, teˇ g'aˇ ka‸ yawˇ hta‸ na nyi maˇ haˆ. 13Yeˍsuˆ laˬ leh hkaoˍ monˇ hta‸ yuˬ leh awˬ la‸ g'awˇ teˇ hpaˍ hta‸ pehˬ piˇ ve yoˬ. Ngaˇ shaˍ hta‸ htawˇ oˇ hk'e te pehˬ piˇ ve yoˬ. 14Yeˍsuˆ yawˇ suh kuiˬ lo k'aw‸ te‸ tu la peuˬ hk'aw‸ nawˉ, yawˇ ve awˬ to awˬ la‸ g'awˇ hui hta‸ maw piˇ ve lehˬ, chi teˇ pawˆ shehˆ pawˆ teˇ pawˆ hpeh‸ ve yoˬ. 15Yawˇ hui awˍ caˇ peuˬ hk'aw‸ nawˉ, Yeˍsuˆ lehˬ Siˉmonˍ Peˍtruˆ hta‸ k'oˆ piˇ ve, Yoˇhanˬ ve yaˇ Siˉmonˍ-oˬ, chaw chi teˇ hpaˍ ha‸ ve a‸ kehˉ nawˬ ngaˬ hta‸ ha‸-aw laˇ teh‸ na nyi ve teˇ yanˇ, Ha‸ ve yoˬ, Jawˇ mawˇ-oˬ, ngaˬ nawˬ hta‸ ha‸ ve nawˬ shiˍ ve yoˬ teh‸ k'aw‸ k'oˆ piˇ ve yoˬ. Yeˍsuˆ k'aw‸ k'oˆ ve, Ngaˬ ve yawˬ ehˉ teˇ hpaˍ hta‸ caˍ piˇ taw piˇ-oˆ teh‸ yawˇ hta‸ k'oˆ piˇ ve yoˬ. 16Yeˍsuˆ yawˇ hta‸ teˇ pawˆ k'aw‸ k'oˆ ve, Yoˇhanˬ ve yaˇ Siˉmonˍ-oˬ, nawˬ ngaˬ hta‸ ha‸-aw laˇ teh‸ k'aw‸ na nyi ve teˇ yanˇ, Ha‸ ve yoˬ, Jawˇ mawˇ-oˬ, ngaˬ nawˬ hta‸ ha‸ ve nawˬ shiˍ ve yoˬ teh‸ k'aw‸ k'oˆ piˇ ve yoˬ. Yeˍsuˆ k'aw‸ k'oˆ ve, Ngaˬ ve yawˬ teˇ hpaˍ hta‸ ha‸ shaˉ-oˆ teh‸ yawˇ hta‸ k'oˆ piˇ ve yoˬ. 17Yeˍsuˆ yawˇ hta‸ shehˆ pawˆ teˇ pawˆ k'aw‸ k'oˆ piˇ ve, Yoˇhanˬ ve yaˇ Siˉmonˍ-oˬ, nawˬ ngaˬ hta‸ ha‸-aw laˇ teh‸ na nyi ve yoˬ. Nawˬ ngaˬ hta‸ ha‸-aw laˇ teh‸ shehˆ pawˆ hk'a gaˬ Yeˍsuˆ yawˇ hta‸ na nyi ve pa taw Peˍtruˆ dawˇ haˍ leh k'oˆ ve, Jawˇ mawˇ-oˬ, nawˬ hk'a peu-eˬ hta‸ shiˍ ve yoˬ. Ngaˬ nawˬ hta‸ ha‸ ve nawˬ shiˍ ve yoˬ teh‸ k'aw‸ k'oˆ piˇ ve yoˬ. Yeˍsuˆ k'aw‸ k'oˆ ve, Ngaˬ ve yawˬ teˇ hpaˍ hta‸ caˍ piˇ taw piˇ-oˆ. 18Ngaˬ nawˬ hta‸ awˬ tehˬ awˬ na k'oˆ laˇ ve, nawˬ yaˇ nehˬ hpeh‸ ve teˇ yanˇ nawˬ hk'aˇ nawˬ haˍ pi tsuh‸ leh, nawˬ k'ai gaˇ kuiˬ lo k'ai ve yoˬ. Ya‸ hk'aˇ, nawˬ mawˇ la ve teˇ yanˇ, nawˬ ve la‸ sheh nyiˇ paˉ che leh, shu nawˬ hta‸ haˍ pi tsuh‸ laˇ peuˬ hk'aw‸ nawˉ, nawˬ maˇ k'ai gaˇ kuiˬ teˇ kaˬ lo shu nawˬ hta‸ yuˬ k'ai tuˬ yoˬ teh‸ yawˇ hta‸ k'oˆ piˇ ve yoˬ. 19(Yeˍsuˆ chi hk'e k'oˆ ve lehˬ, G'uiˬ sha ve awˬ me‸ awˬ hponˇ tawˆ la tuˬ ve awˬ pon Peˍtruˆ hk'aˬ hk'e g'a te suh tuˬ ve hta‸ k'oˆ gaˇ ve yoˬ.) Yeˍsuˆ tawˇ oˇ ve teˇ hpaˍ hta‸ k'oˆ peuˬ hk'aw‸ nawˉ, Ngaˬ hk'aˇ suh laˬ-o‸ teh‸ Peˍtruˆ hta‸ k'oˆ piˇ ve yoˬ. 20Peˍtruˆ hpfuhˆ nyi ve teˇ yanˇ, Yeˍsuˆ ha‸ ve awˬ la‸ g'awˇ teˇ g'aˇ awˬ hk'aˇ suh laˬ chehˇ ve hta‸ g'a mawˬ ve yoˬ. Awˬ la‸ g'awˇ oˇ ve teˇ g'aˇ lehˬ, ponˬ laˬ ve teˇ pawˆ yawˇ hui mvuhˇ hpeu‸ awˍ caˇ chehˇ ve teˇ yanˇ, Yeˍsuˆ ve nyi ma pui awˬ paˇ lo ngeh mui taˍ leh, Jawˇ mawˇ-oˬ, nawˬ hta‸ chiˇ a‸ piˇ tuˬ ve a shu le teh‸ na nyi shehˍ hpaˇ teˇ g'aˇ yoˬ. 21Peˍtruˆ lehˬ, awˬ la‸ g'awˇ oˇ ve hta‸ g'a mawˬ ve teˇ yanˇ, Jawˇ mawˇ-oˬ, chi hpaˇ hk'aˬ hk'e g'a hpeh‸ tuˬ ve le teh‸ Yeˍsuˆ hta‸ na nyi ve yoˬ. 22Yeˍsuˆ k'aw‸ k'oˆ ve, Ngaˬ k'aw‸ laˬ htaˇ hk'a gaˬ ngaˬ yawˇ hta‸ chehˇ tcuh piˇ gaˇ ve k'o, nawˬ hta‸ hk'aˬ hk'e caˉ da‸ le. Nawˬ awˬ to ngaˬ hk'aˇ suh laˬ-o‸ teh‸, yawˇ hta‸ k'oˆ piˇ ve yoˬ. 23Tawˇ hkawˇ oˇ ve hta‸ pa taw, awˬ la‸ g'awˇ oˇ ve teˇ g'aˇ maˇ g'a suh teh‸, awˬ viˉ awˬ nyi teˇ hpaˍ awˬ hk'aw lo bvuhˬ k'ai ve yoˬ. Ya‸ hk'aˇ, awˬ la‸ g'awˇ oˇ ve teˇ g'aˇ maˇ g'a suh teh‸ Yeˍsuˆ k'oˆ ve maˇ heˆ. Ngaˬ k'aw‸ laˬ htaˇ hk'a gaˬ ngaˬ yawˇ hta‸ chehˇ tcuh piˇ gaˇ ve k'o, nawˬ hta‸ hk'aˬ hk'e caˉ da‸ le teh‸ Yeˍsuˆ k'oˆ ve yoˬ. 24Awˬ la‸ g'awˇ oˇ ve teˇ g'aˇ lehˬ, awˬ lawn chi teˇ hpaˍ hta‸ shaˉ hkiˆ hkanˍ leh bvuh‸ taˍ shehˍ hpaˇ hpeh‸ ve yoˬ. Yawˇ shaˉ hkiˆ hkanˍ ve lehˬ cawˇ ve yoˬ teh‸ ngaˬ hui shiˍ ve yoˬ. 25Yeˍsuˆ te ve kanˉ awˬ kaˍ awˬ nu laiˉ ceuˬ cawˬ sheˍ ve yoˬ. Yawˇ hk'a te ve awˬ lawn teˇ ceuˬ le le hta‸ bvuh‸ taˍ ve hk'e k'o, bvuh‸ taˍ ve li‸ daw oˇ ve teˇ hpaˍ miˬ guiˬ chi ka‸ maˇ daw teh‸ ngaˬ dawˇ ve yoˬ.

will be added

X\