1 Kawˇrenˍhtuˆ 7

1Nawˬ hui ngaˬ hta‸ li‸ bvuh‸ laˇ ve awˬ lawn teˇ hpaˍ ngaˬ nawˬ hui hta‸ k'aw‸ bvuh‸ laˇ shaˍ. Hawˉ hk'aˆ lehˬ, awˬ miˇ ma maˇ heuˆ k'o da‸ ve yoˬ. 2Ya‸ hk'aˇ, haˉ chawˇ haˉ paˆ cawˬ maˇ ve pa taw, hawˉ hk'aˆ teˇ g'aˇ le le awˬ miˇ ma heuˆ cawˇ leh, yaˇ miˇ teˇ g'aˇ le le htawˇ awˬ hpawˇ heuˆ cawˇ ve yoˬ. 3Awˬ hpawˇ lehˬ, awˬ liˇ awˬ hk'aˇ cawˬ ve hk'e, awˬ miˇ ma hta‸ hk'a deh‸ caˉ da‸ cawˇ ve yoˬ. Awˬ miˇ ma htawˇ, oˇ ve hk'a shuˍ shuˍ yawˇ ve awˬ hpawˇ hta‸ hk'a deh‸ caˉ da‸ cawˇ ve yoˬ. 4Awˬ miˇ ma lehˬ, a shu yawˇ ve awˬ to hta‸ maˇ uˉ peunˍ. Ya‸ hk'aˇ, awˬ hpawˇ uˉ peunˍ ve yoˬ. Oˇ ve hk'a shuˍ shuˍ, awˬ hpawˇ htawˇ a shu yawˇ ve awˬ to hta‸ maˇ uˉ peunˍ. Ya‸ hk'aˇ, awˬ miˇ ma uˉ peunˍ ve yoˬ. 5Awˬ hpawˇ awˬ miˇ teˇ geh zuh‸ tuˬ, teˇ g'aˇ leh teˇ g'aˇ taˇ tawˍ taˍ. Bon hk'a deh‸ lawˬ hpeh‸ tuˬ, nyiˇ g'aˇ g'aˇ nyi ma cawˇ leh teˇ tcuhˉ teˇ yanˇ teˇ geh maˇ zuh‸ ve teˇ ceuˬ maˇ heˆ k'o, teˇ g'aˇ leh teˇ g'aˇ taˇ tawˍ taˍ. Awˬ to hta‸ maˇ g'aˇ puiˉ ve pa taw, Saˍtanˍ nawˬ hui hta‸ maˇ g'a beˬ tuˬ, awˬ hk'aw‸ nawˉ teˇ geh k'aw‸ chehˇ-oˆ. 6Ngaˬ chi hk'e k'oˆ ve lehˬ, tawˇ piˇ ve teˇ ceuˬ maˇ heˆ, a hkaw-anˬ piˇ ve teˇceuˬ yoˬ. 7Chaw hk'a peu-eˬ hta‸ ngaˬ hk'a shuˍ shuˍ hpeh‸ piˇ gaˇ ve yoˬ. Ya‸ hk'aˇ, chaw teˇ g'aˇ peuˬ teˇ g'aˇ, G'uiˬ sha geh a shu yawˇ ve la‸ shawnˍ teˇ g'aˇ teˇ ceuˬ g'a taˍ ve yoˬ. 8Awˬ hpawˇ awˬ miˇ maˇ heuˆ sheˍ ve chaw leh mehˇ chawˇ ma teˇ hpaˍ hta‸ ngaˬ chi hk'e k'oˆ ve yoˬ. Yawˇ hui ngaˬ hk'a shuˍ shuˍ te chehˇ ve k'o da‸ ve yoˬ. 9Ya‸ hk'aˇ, a shu yawˇ awˬ to hta‸ maˇ g'aˇ ve k'o, heuˆ da‸ cawˇ ve yoˬ. Awˬ lawn k'o, awˬ hpawˇ awˬ miˇ heuˆ gaˇ leh nyi ma haw haw chiˆ chiˆ hpeh‸ ve a‸ kehˉ heuˆ da‸ ve lehˬ da‸ leuˉ ve yoˬ. 10Awˬ miˇ ma teˇ g'aˇ lehˬ, a shu yawˇ ve awˬ hpawˇ hta‸ maˇ g'a hpaˆ da‸ teh‸, heuˆ da‸ peuˬ ve chaw hui hta‸ ngaˬ tawˇ piˇ ve yoˬ. Chi lehˬ ngaˬ ve tawˇ hkawˇ maˇ heˆ, Jawˇ mawˇ Yeˍsuˆ ve tawˇ hkawˇ hpeh‸ ve yoˬ. 11Ya‸ hk'aˇ, hpaˆ da‸ peuˬ ve k'o, yawˇ awˬ hpawˇ maˇ k'aw‸ ca leh, yawˇ hk'aˇ yawˇ chehˇ cawˇ ve yoˬ. Maˇ heˆ k'o, yawˇ awˬ hpawˇ hta‸ k'aw‸ cawˇ da‸ tuˬ te cawˇ ve yoˬ. Awˬ hpawˇ htawˇ, awˬ miˇ ma hta‸ maˇ g'a baˬ. 12Awˬ viˉ awˬ nyi teˇ g'aˇ g'aˇ, a shu yawˇ ve awˬ miˇ ma Hkri‸ yaˇ maˇ hpeh‸ ve ka‸, yawˇ ve awˬ hpawˇ geh chehˇ gaˇ ve nyi ma cawˬ ve k'o, yawˇ hta‸ maˇ baˬ cawˇ ve teh‸, awˬ kaˍ awˬ nu chaw teˇ hpaˍ hta‸ ngaˬ k'oˆ ve yoˬ. Tawˇ chi ve hta‸ Jawˇ mawˇ Yeˍsuˆ k'oˆ ve maˇ heˆ, ngaˬ k'oˆ ve yoˬ. 13Awˬ miˇ ma htawˇ, a shu yawˇ ve awˬ hpawˇ Hkri‸ yaˇ maˇ hpeh‸ ve ka‸, yawˇ ve awˬ miˇ ma geh chehˇ gaˇ ve nyi ma cawˬ ve k'o, yawˇ hta‸ maˇ baˬ cawˇ ve yoˬ. 14Awˬ lawn k'o, Hkri‸ yaˇ maˇ hpeh‸ ve awˬ hpawˇ lehˬ, awˬ miˇ ma hta‸ pa taw da‸ la kehˬ la ve yoˬ. Hkri‸ yaˇ maˇ hpeh‸ ve awˬ miˇ ma htawˇ, awˬ hpawˇ hta‸ pa taw da‸ la kehˬ la ve yoˬ. Chi hk'e maˇ heˆ k'o, nawˬ hui ve awˬ yaˇ awˬ duˬ lehˬ, maˇ da‸ maˇ kehˬ ve yoˬ. Ya‸ hk'aˇ, chi beu‸ lehˬ yawˇ hui da‸ kehˬ peuˬ. 15Ya‸ hk'aˇ, Hkri‸ yaˇ maˇ hpeh‸ ve chaw teˇ g'aˇ lehˬ, awˬ hpawˇ awˬ miˇ hpaˆ da‸ gaˇ ve k'o, hpaˆ da‸ piˇ-oˆ. Chi hk'e te hpaˆ da‸ gaˇ ve k'o, awˬ viˉ awˬ nyi teˇ g'aˇ, hawˉ hk'aˆ maˇ k'oˆ, yaˇ miˇ maˇ k'oˆ, Hkri‸ yaˇ maˇ hpeh‸ ve teˇ g'aˇ hta‸ hpeh ka taˍ ve maˇ heˆ. Awˬ lawn k'o, G'uiˬ sha ngaˬ hui hta‸ kuˬ taˍ ve lehˬ, cawˇ da‸ hui da‸ tuˬ awˬ pon kuˬ taˍ ve yoˬ. 16Awˬ miˇ ma teˇ hpaˍ-oˬ, a shu yawˇ ve awˬ hpawˇ hta‸ htaiˍ hk'aw‸ piˇ g'a tuˬ leh naˍ, maˇ g'a tuˬ leh naˍ, nawˬ hui hk'aˬ hk'e te shiˍ hpeh‸ le. Awˬ hpawˇ teˇ hpaˍ-oˬ, a shu yawˇ ve awˬ miˇ ma hta‸ htaiˍ hk'aw‸ piˇ g'a tuˬ leh naˍ, maˇ g'a tuˬ leh naˍ, nawˬ hui hk'aˬ hk'e te shiˍ hpeh‸ le. 17Jawˇ mawˇ Yeˍsuˆ lehˬ teˇ g'aˇ peuˬ teˇ g'aˇ hta‸ hpeh‸ tcuh ve hk'e leh, G'uiˬ sha lehˬ teˇ g'aˇ peuˬ teˇ g'aˇ hta‸ kuˬ taˍ ve hk'e ceh, chaw teˇ g'aˇ le le te k'ai sheˍ. Hkri‸ yaˇ awˬ moˍ teˇ moˍ le le awˬ hk'aw lo ngaˬ awˬ hk'aˇ chi hk'e te teh taˍ ve yoˬ. 18Chaw teˇ g'aˇ g'aˇ hta‸ G'uiˬ sha kuˬ yuˬ htaˇ, yawˇ awˬ guiˬ meuˇ shoˍ ve chaw hpeh‸ ve laˇ. Awˬ guiˬ meuˇ maˇ shoˍ ve hk'e taˇ k'aw‸ te. Chaw teˇ g'aˇ g'aˇ hta‸ kuˬ yuˬ htaˇ, awˬ guiˬ meuˇ maˇ shoˍ ve chaw hpeh‸ ve laˇ. Awˬ guiˬ meuˇ shoˍ ve taˇ te. 19Awˬ lawn k'o, awˬ guiˬ meuˇ shoˍ ve maˇ k'oˆ, awˬ guiˬ meuˇ maˇ shoˍ ve maˇ k'oˆ, te‸ chiˉ awˬ bon maˇ cawˬ. G'uiˬ sha ve awˬ liˇ tawˇ hkawˇ hta‸ na yuˬ leh te ve teˇ ceuˬ ceh tiˉ awˬ bon cawˬ ve yoˬ. 20Teˇ g'aˇ peuˬ teˇ g'aˇ kuˬ yuˬ htaˇ hpeh‸ chehˇ taˍ ve hk'e ceh, hpeh‸ chehˇ taˍ sheˍ. 21Nawˬ hta‸ kuˬ yuˬ htaˇ, nawˬ awˬ ceˬ hpeh‸ chehˇ ve laˇ. Chi ve hta‸ nawˬ taˇ dawˇ haˍ. Ya‸ hk'aˇ, awˬ ceˬ te ve awˬ hk'aw lo nawˬ ponˬ hpeh‸ ve hk'e k'o, nawˬ tawˆ k'ai cawˇ ve yoˬ. 22Awˬ lawn k'o, awˬ ceˬ hpeh‸ chehˇ htaˇ, Jawˇ mawˇ Yeˍsuˆ kuˬ yuˬ taˍ ve chaw teˇ g'aˇ lehˬ, Jawˇ mawˇ Yeˍsuˆ ve ponˬ ve chaw hpeh‸ la ve yoˬ. Chi hk'a shuˍ shuˍ, ponˬ ve chaw hpeh‸ chehˇ htaˇ, Jawˇ mawˇ Yeˍsuˆ kuˬ yuˬ taˍ ve chaw teˇ g'aˇ lehˬ, yawˇ ve awˬ ceˬ hpeh‸ la ve yoˬ. 23G'uiˬ sha awˬ hpfuhˇ piˇ leh nawˬ hui hta‸ vuiˬ hk'aw‸ taˍ ve pa taw, chaw yaˇ ve awˬ ceˬ taˇ hpeh‸ la piˇ. 24Awˬ viˉ awˬ nyi teˇ hpaˍ-oˬ, nawˬ hui hta‸ kuˬ yuˬ htaˇ teˇ g'aˇ peuˬ teˇ g'aˇ hpeh‸ chehˇ taˍ ve hk'e, G'uiˬ sha geh teˇ geh oˇ hk'e hpeh‸ chehˇ taˍ-o‸. 25Yaˇ miˇ haˉ teˇ hpaˍ awˬ pon Jawˇ mawˇ Yeˍsuˆ geh ngaˬ g'a taˍ ve tawˇ maˇ cawˬ. Ya‸ hk'aˇ, Jawˇ mawˇ Yeˍsuˆ ha k'aˉ laˇ ve awˬ bon hta‸ pa taw ngaˬ ka ti‸ yeˬ ve chaw hpeh‸ ve hk'e, ngaˬ ve dawˇ hk'aˇ nawˬ hui hta‸ hto laˇ ve yoˬ. 26Hk'e te leh, chi beu‸ tu‸ hkanˍ jaˇ ve awˬ yanˇ gaˬ la ve pa taw, chaw teˇ g'aˇ le le a shu yawˇ hpeh‸ chehˇ ve hk'e chehˇ taˍ ve k'o, da‸ jaˇ ve yoˬ. 27Nawˬ awˬ miˇ ma cawˬ laˇ. Cawˬ k'o, yawˇ hta‸ taˇ baˬ. Nawˬ awˬ miˇ ma maˇ cawˬ laˇ. Maˇ cawˬ k'o awˬ miˇ ma taˇ heuˆ. 28Ya‸ hk'aˇ, nawˬ awˬ miˇ ma heuˆ ve k'o, venˇ baˆ te ve maˇ heˆ. Yaˇ miˇ haˉ htawˇ, awˬ hpawˇ heuˆ ve k'o, venˇ baˆ te ve maˇ heˆ. Ya‸ hk'aˇ, chi hk'e te ve chaw lehˬ, awˬ suhˍ awˬ shaˍ hpawˇ g'a tu‸ g'a hkanˍ tuˬ yoˬ. Tu‸ ve hkanˍ ve chi ngaˬ nawˬ hui hta‸ ponˬ piˇ gaˇ ve yoˬ. 29Awˬ viˉ awˬ nyi teˇ hpaˍ-oˬ, ngaˬ k'oˆ gaˇ ve lehˬ, awˬ yanˇ ngeh jaˇ peuˬ. Chi beu‸ hta‸ tanˬ leh, awˬ miˇ ma cawˬ ve chaw lehˬ, awˬ miˇ ma maˇ cawˬ ve chaw hk'e chehˇ-oˆ. 30Paˆ hawˬ kehˇ hawˬ ve chaw lehˬ, maˇ hawˬ ve chaw hk'e chehˇ-oˆ. Ha lehˬ ve chaw lehˬ, maˇ ha lehˬ ve chaw hk'e chehˇ-oˆ. Mawˇ vuiˬ ve chaw lehˬ, mawˇ maˇ cawˬ ve chaw hk'e chehˇ-oˆ. 31Miˬ guiˬ hta‸ caˉ da‸ ve teˇ hpaˍ hta‸ ca ve chaw lehˬ, maˇ ca ve chaw hk'e chehˇ-oˆ. Awˬ lawn k'o, miˬ guiˬ ve awˬ liˇ awˬ hk'aˇ lehˬ, pa k'ai mehˉ k'ai chehˇ ve yoˬ. 32Nawˬ hui maˇ g'a dawˇ haˍ tuˬ ngaˬ heuˆ gaˇ ve yoˬ. Awˬ miˇ ma maˇ cawˬ ve chaw lehˬ, hk'aˬ hk'e te leh Jawˇ mawˇ Yeˍsuˆ nyi ma cawˇ tuˬ, Jawˇ mawˇ Yeˍsuˆ ve kanˉ hta‸ yawˇ dawˇ nyi leh shaˍ ti‸ taˍ puiˉ ve yoˬ. 33Ya‸ hk'aˇ, awˬ miˇ ma cawˬ ve chaw teˇ g'aˇ lehˬ, hk'aˬ hk'e te leh awˬ miˇ ma nyi ma cawˇ tuˬ, miˬ guiˬ ve kanˉ hta‸ yawˇ dawˇ nyi leh dawˇ hkiˉ puiˉ ve yoˬ. Yawˇ lehˬ, nyi ma nyiˇ hk'aˇ dawˇ puiˉ ve yoˬ. 34Awˬ hpawˇ maˇ cawˬ ve yaˇ miˇ leh yaˇ miˇ haˉ teˇ hpaˍ lehˬ, hk'aˬ hk'e te leh awˬ to hpawˇ leh co ha hpawˇ da‸ la kehˬ la tuˬ, Jawˇ mawˇ Yeˍsuˆ ve kanˉ hta‸ yawˇ hui dawˇ nyi leh shaˍ ti‸ taˍ puiˉ ve yoˬ. Ya‸ hk'aˇ, awˬ hpawˇ cawˬ ve yaˇ miˇ lehˬ, hk'aˬ hk'e te leh awˬ hpawˇ nyi ma cawˇ tuˬ miˬ guiˬ ve kanˉ hta‸ yawˇ dawˇ nyi leh dawˇ hkiˉ puiˉ ve yoˬ. 35Ngaˬ chi hk'e k'oˆ ve lehˬ, nawˬ hui awˬ pon awˬ bon cawˬ tuˬ ngaˬ k'oˆ ve yoˬ. Ngaˬ nawˬ hui hta‸ va htaw ve maˇ heˆ. Ya‸ hk'aˇ, nawˬ hui lehˬ, keunˍ ve cawˇ ve hk'e te leh, nyi ma htawˇ hpfuhˆ nawˬ hpfuhˆ maˇ cawˬ ve awˬ hk'aw lo Jawˇ mawˇ Yeˍsuˆ awˬ pon kanˉ hk'a deh‸ te tuˬ, ngaˬ chi hk'e k'oˆ ve yoˬ. 36Awˬ pa teˇ g'aˇ lehˬ, yawˇ ve awˬ yaˇ miˇ, yaˇ miˇ haˉ te ve awˬ yanˇ ponˬ leh, awˬ hpawˇ maˇ heuˆ ve teˇ ceuˬ maˇ da‸ teh‸ dawˇ ve k'o, awˬ yaˇ miˇ awˬ hpawˇ heuˆ gaˇ ve hk'e heuˆ piˇ lawˬ-o‸. Awˬ pa lehˬ, venˇ baˆ te ve maˇ heˆ. Yawˇ huiˉ maˬ hta‸ heuˆ da‸ tcuh-o. 37Ya‸ hk'aˇ, a shu htawˇ maˇ k'oˆ, nyi ma yeˬ leh yawˇ ve yaˇ miˇ hta‸ awˬ hpawˇ maˇ heuˆ tcuh ka‸ hpeh‸ chehˇ ve awˬ hk'oˆ, yawˇ te gaˇ ve hk'e te hpeh‸ leh, yawˇ hta‸ awˬ hpawˇ maˇ heuˆ tcuh tuˬ nyi ma awˬ hk'aw lo dawˇ cheˆ taˍ ve k'o, yawˇ da‸ ve hta‸ te ve yoˬ. 38Hk'e te leh, yawˇ ve yaˇ miˇ hta‸ awˬ hpawˇ heuˆ tcuh ve chaw lehˬ da‸ ve hta‸ te ve yoˬ. Maˇ heuˆ tcuh ve chaw htawˇ, leuˉ leh da‸ ve hta‸ te ve yoˬ. 39Awˬ miˇ ma lehˬ, yawˇ ve awˬ hpawˇ maˇ suh ve ceh ceh, yawˇ ve awˬ hpawˇ geh hpeh ka taˍ ve yoˬ. Yawˇ ve awˬ hpawˇ suh peuˬ k'o, yawˇ heuˆ gaˇ ve chaw hta‸ k'aw‸ heuˆ hpeh‸ ve yoˬ. Ya‸ hk'aˇ, Jawˇ mawˇ Yeˍsuˆ hta‸ cuˇ ve awˬ hk'aw lo ceh tiˉ heuˆ hpeh‸ ve yoˬ. 40Ngaˬ dawˇ ve lehˬ, maˇ k'aw‸ heuˆ leh chehˇ hpeh‸ ve k'o, leuˉ leh yawˇ pon ha lehˬ tuˬ cawˬ ve yoˬ. Ngaˬ chi hk'e k'oˆ ve lehˬ, G'uiˬ sha ve Awˬ ha hpu cawˬ leh k'oˆ ve teh‸ dawˇ ve yoˬ.

will be added

X\