1 Kawˇrenˍhtuˆ 13

1Ngaˬ lehˬ chaw yaˇ ve tawˇ hkawˇ leh mvuhˇ naw ma tcuh yaˇ ve tawˇ hkawˇ yaw puiˉ ve htawˇ, ha‸ pehnˇ ve maˇ cawˬ k'o, bo lo k'oˍ dawˆ ve awˬ hkawˇ leh shehnˍ hehˆ ve awˬ hkawˇ hk'e ceh ngaˬ hpeh‸ ve yoˬ. 2Ngaˬ bon maˍ puiˉ ve maˇ k'oˆ, faˉ taˍ ve hk'a peu-eˬ leh cuˇ yiˍ hk'a peu-eˬ hta‸ ngaˬ shiˍ ve maˇ k'oˆ, hk'aw teˇ hpaˍ hta‸ jiˆ k'ai g'a tuˬ yonˍ ve nyi ma hk'a biˇ cawˬ ve maˇ k'oˆ, ha‸ pehnˇ ve maˇ cawˬ k'o, ngaˬ te‸ chiˉ awˬ bon maˇ cawˬ. 3Ngaˬ ve mawˇ jeˬ hk'a peu-eˬ shu hta‸ pehˬ piˇ tanˇ piˇ leh, ngaˬ awˬ to hta‸ ka‸ aˬ miˍ tuˉ tanˇ piˇ ve htawˇ, ha‸ pehnˇ ve maˇ cawˬ k'o, ngaˬ te‸ chiˉ awˬ bon maˇ g'a. 4Ha‸ pehnˇ ve lehˬ, dawˇ zuhˬ gaˇ zuhˬ leh ha k'aˉ puiˉ ve yoˬ. Ha‸ pehnˇ ve lehˬ maˇ hkawehˉ puiˉ, maˇ caˆ muiˬ puiˉ, nyi ma uiˍ ve mvuh ve maˇ cawˬ. 5Ha‸ pehnˇ ve lehˬ, maˇ shawˍ maˇ caˆ maˇ te puiˉ, a shu yawˇ awˬ to awˬ pon maˇ ca puiˉ, nyi ma maˇ zuhˆ puiˉ, shu awˬ hk'oˆ venˇ baˆ maˇ taˍ puiˉ. 6Ha‸ pehnˇ ve lehˬ, maˇ hteˇ maˇ cawˇ ve awˬ hk'aw lo maˇ ha lehˬ puiˉ. Ya‸ hk'aˇ hteˇ ve cawˇ ve awˬ hk'aw lo ha lehˬ puiˉ ve yoˬ. 7Ha‸ pehnˇ ve lehˬ hk'a peu-eˬ hta‸ hkanˍ puiˉ ve, hk'a peu-eˬ hta‸ yonˍ puiˉ ve, hk'a peu-eˬ hta‸ dawˇ law puiˉ ve leh, hk'a peu-eˬ hta‸ yeunˇ hkanˍ puiˉ ve yoˬ. 8Ha‸ pehnˇ ve lehˬ maˇ luˬ puiˉ. Ya‸ hk'aˇ, bon maˍ ve maˇ k'oˆ, tawˇ laiˉ ceuˬ yaw chiˇ mvuh ve maˇ k'oˆ, shiˍ puiˉ ve cuˇ yiˍ maˇ k'oˆ, hk'a peu-eˬ mehˉ k'ai tuˬ yoˬ. 9Chi beu‸ ngaˬ hui shiˍ taˍ ve lehˬ, maˇ biˇ sheˍ. Ngaˬ hui bon maˍ ve ka‸ maˇ biˇ sheˍ. 10Ya‸ hk'aˇ, biˇ ve awˬ ceuˬ gaˬ la htaˇ, maˇ biˇ ve teˇ hpaˍ mehˉ k'ai tuˬ yoˬ. 11Ngaˬ yaˇ ehˉ hpeh‸ chehˇ htaˇ, yaˇ ehˉ hk'e ngaˬ tawˇ yaw ve, yaˇ ehˉ hk'e ngaˬ nyi ma cawˬ ve leh, yaˇ ehˉ hk'e ngaˬ dawˇ nyi ve yoˬ. Ya‸ hk'aˇ, ngaˬ chaw mawˇ hpeh‸ la htaˇ, yaˇ ehˉ ve awˬ liˇ awˬ hk'aˇ teˇ hpaˍ hta‸ ngaˬ baˬ taˉ ve yoˬ. 12Chi beu‸ lehˬ, maˇ kehˬ da‸ ve mehˆ g'euˆ awˬ hk'aw lo ngaˬ hui nyi chehˇ ve hk'e yoˬ. Ya‸ hk'aˇ oˇ htaˇ gaˬ k'o, mehˆ hpfuhˇ tawˍ da‸ leh g'a mawˬ da‸ tuˬ yoˬ. Chi beu‸ ngaˬ hk'a biˇ maˇ shiˍ sheˍ. Ya‸ hk'aˇ, chi beu‸ G'uiˬ sha ngaˬ hta‸ shiˍ taˍ ve hk'e, oˇ htaˇ gaˬ k'o ngaˬ hk'a biˇ shiˍ tuˬ yoˬ. 13Chi beu‸ lehˬ, yonˍ ve, dawˇ law ve leh ha‸ pehnˇ ve, chi shehˆ ceuˬ cawˬ taˍ ve yoˬ. Ya‸ hk'aˇ, chi shehˆ ceuˬ awˬ hk'aw lo uiˍ jaˇ ve lehˬ ha‸ pehnˇ ve teˇ ceuˬ yoˬ.

will be added

X\