TITO 2

1Te mi'i, mi 'yo e'yo yi sipi imbata alarᴜri be 'diyi. 2Mi ma imba 'ba 'wara agupirᴜ 'diyi ovᴜzᴜ mile be yi agei tezᴜ e'yo driasi, inzita be, asi e'yere be, ovᴜzᴜ okporᴜ a'ita pi ma alia, leta pie, asi teza pie. 3Mi ma azi okᴜ 'wara 'diyi 'dinile indi, acita yini ma si i ekile 'ba alarᴜ 'diyinirile, yi ma di 'ba ma aji kᴜ, yi ma ovᴜ ewa ma ati'barᴜ kᴜ; te yi ma ovᴜ 'ba e'yo onyirᴜ imbapi 'diyirᴜ, 4yi ma imba ani okᴜ o'dirᴜ 'diyi agupi yini lezᴜ avasi anzi yini be, 5yi ma ovᴜ asi e'yere be, alarᴜ, 'ba aku yini ma azi ngapi 'diyi, ovᴜzᴜ asi onyirᴜ be, agupi yi ma ngᴜlᴜpini ma e'yo inzizᴜ, 'ba kazᴜ e'yo Munguni o'dazᴜ kᴜ. 6Mi ma imba agupi o'dirᴜ 'diyi 'dinile indi ovᴜzᴜ asi e'yere be. 7E'yo dria ma alia mi ma ece mi ngᴜlᴜpi ovᴜzᴜ eceta 'yeta onyirᴜnirirᴜ, imbata mini alia mi ma ece e'yo lokiri kokorᴜri pi, e'yo inzitarᴜri pie, 8e'yo olᴜza alarᴜ 'bani ecole onzozarᴜ kᴜri pie, 'dini drinza ma bi 'ba 'ba dri arupiri ani, erini ovᴜle e'yo onzi be 'yozarᴜ ama dria alᴜni kᴜrisi. 9Mi ma imba ati'ba opi yini inzizᴜ, ayiko fezᴜ yi dri e'yo driasi; yi ma omvi e'yo agatasi kᴜ, 10yi ma ovᴜ drisisi be kᴜ, te yi ma ece asi adarᴜ e'yo driasi, fezᴜ imbata Mungu ama Papirini i e'dazᴜ ani ndrizarᴜ e'yo dria ma alia. 11Te 'yeta anzutiri Munguni e'da i 'bo, pata ejizᴜ 'ba dria dri, 12ama imbazᴜ ama ma ga adriza onzi amani ani Mungu inzizᴜ kᴜri pi, li nyakuniri be, ama ma ovᴜ wudrikuru curu'dori ma alia asi e'yeresi, e'yo kililirᴜri pie, adriza amani ani Mungu inzizᴜri pie; 13ama ma lu e'yo teza drilebarᴜ amaniri vᴜ, eri e'daza diza Mungu amborᴜ ama Papiri Yesu Kristoni e'dazᴜri'i; 14eri fe ndra i ngᴜlᴜpi amasi, eri ma onze ama e'yo onzi dria ma alia ani, azini eri ma oji ini 'ba ovᴜzᴜ suru i ma ngᴜlᴜpinirirᴜ, azi onyirᴜ 'yezᴜ asi driasi. 15Mi ma 'yo e'yo 'diyi; mi ma omi 'ba asi, mi ma ece e'yo kililirᴜ 'ba dri okpo driasi. 'Ba alᴜni ma 'ba mi aparakarᴜ kᴜ.

will be added

X\