TITO 1

1Paulo, ati'bo Munguni, 'ba Yesu Kristoni tini peleri, a'ita 'ba Munguni opele 'diyiniri ma e'yosi, azini nita 'bani e'yo adarᴜ nizᴜ dri fupi adriza 'bani ani Mungu inzizᴜri-ni lelerileri ma e'yosi indi, 2asi teza idri 'dani 'dani Mungu ecopi inzo lizarᴜ kᴜrini azile ewu ndra driorisiri tezᴜ; 3eri e'da e'yo erini ewuni dri furia 'yekeria, e'yo olᴜza fele kᴜle ma dri azita Mungu ama Papirinirisiri ma alia; 4Tito, mva mani adarᴜ a'ita ama-ni mi be alᴜri ma aliari vᴜ : 'Yeta anzutiri asi anzurᴜ be, engazᴜ Mungu Ata vᴜ azini Kristo Yesu ama Papiri vᴜ. 5E'yo mani ndra mi kᴜzᴜ Kire-teari 'di, mi ma ede e'yo yini 'yele kᴜ 'diyi kilili, azini mi ma ope 'ba 'wara aku ambo ambo 'diyi vᴜsi ekile mani azile mi tia 'borile; 6'ba nde ma ovᴜ 'ba 'bani asᴜ sᴜzᴜ ruania kᴜrirᴜ, agupi okᴜ alᴜ beri, anzi erini ma ovᴜ 'ba e'yo a'ipi, 'bani yi ma ru 'yole onzi acita saarᴜsi kani edematarasi kᴜ 'diyi. 7A'disikᴜ 'ba kanisa andripiri ma ovᴜ 'ba 'bani asᴜ sᴜzᴜ ruania kᴜrirᴜ, erini ovᴜle 'ba azi Munguni ma agei tepiri'irisi; 'ba e'yo 'yepi ini lelerile kᴜ, adra 'bapi mbele kᴜ, lepi ewa mvupi kᴜ, 'ba copi kᴜ, orodri isule geri onzisiri ndrupi kᴜrirᴜ; 8te eri ma ovᴜ 'ba omu aipi avasi wa'dirᴜ, e'yo onyirᴜ lepi, asi e'yere be, e'yo kililirᴜ be, alatararᴜ, 'ba i ma ngᴜlᴜpi ta mbapirirᴜ ; 9e'yo adarᴜ i ojapi kᴜri ovᴜpi imbatani lelerileri bipi cirirᴜ, eri ma eco ani 'ba imbazarᴜ imbata alarᴜsi, azini 'ba agata gapi 'diyi ndezarᴜ e'yosi indi. 10A'disikᴜ 'ba edema tara be, e'yo toko toko o'yopi 'ba icizᴜ 'diyi yi kakaᴜ, tᴜni 'ba agele liza be 'diyi ma eselia; 11mi ma oga yi ma tile e'yo 'yoko si, yi adri aku ndᴜ ndᴜ oja pi pi a'ita kᴜzᴜ yini imbata 'ba ma imba kᴜri imbaria orodri isule geri onzisiri ma e'yosi. 12'Ba alᴜ yi ma eselia, nabi yi ma ngᴜlᴜpiniri, ‘yora, 'Ba Kiretea 'diyi ovᴜ etuzu 'ba inzo lipi 'diyirᴜ, obau onzirᴜ, ovᴜoᴜrᴜ nyaka nyapi lᴜ'i 'diyi. 13E'yo eti nzeza 'diri ovᴜ adarᴜ. E'yo 'dirisi mi ma ega yi dria okposi, yi ma ovᴜ ani okporᴜ a'ita ma alia, 14yi asi 'bazᴜ e'yo o'yoza toko toko o'dᴜkorᴜ 'ba Yahudini 'diyini erizᴜ kᴜ, kani azita 'ba e'yo adarᴜ kᴜpi 'bo 'diyini erizᴜ kᴜ indi. 15Afa dria ovᴜ alarᴜ 'ba alarᴜ 'diyi dri, te 'ba ondirᴜ e'yo a'ipi kᴜ 'diyi dri afa alᴜni ovᴜni alarᴜ kᴜ; te asisile yini azini ondᴜa yini e'yo onyirᴜ pi ma esele cozᴜ e'yo onzi beri eza yi 'bo, ovᴜ ondirᴜ. 16Yi e'da tisi kini yi ni Mungu ra, te yi ga eri si 'yeta yini 'yelerisi; yi ovᴜ afa ngule onzirile, e'yo eriza kokorᴜ, yi funi dri azi onyirᴜ 'yezᴜ alᴜni kᴜ.

will be added

X\