BA RUMIA 8

1'Dini curu’do e'yo liza ovᴜni 'ba ovᴜpi Kristo Yesu alia 'diyi ma dria kᴜ. 2Te azita Orindi idrini Kristo Yesu ma aliarini trᴜ ma azita e'yo onziniri pi ma alia draniri be. 3Te Mungu 'ye e'yo ndra azitani ecole 'yele kᴜ erini ovᴜle okpo kokorᴜ ruasirisiri, ndra erini i Mvi ma ti epele rua be ekile rᴜa e'yo onzi be 'dorile e'yo onzi edezᴜrisi; 'dini Mungu li ndra e'yo onzi ovᴜpi rᴜa ma aliari ma e'yo, nde eri ra, 4'dini 'yeta onyirᴜ azitaniri ma 'ye i ama 'ba acipi e'yo ruani ma vᴜtia kᴜ, te Orindi ma vᴜtia 'diyi ma alia. 5Te 'ba acipi e'yo ruani ma vᴜtia 'diyi adri asisile dro e'yo ruani ma dria'i, te 'ba acipi Orindi ma vᴜtia 'diyi adri vini asisile dro e'yo Ori-ndini ma dria'i. 6Te asisile e'yo ruani ma driari eri dratani, te asisile e'yo Orindini driari eri idri pi asi anzurᴜ be. 7Te asisile e'yo ruani ma driari eri Mungu be ari'borᴜ; erini azita Munguni inzile kᴜrisi, a'disikᴜ eri econi inzizarᴜ kᴜ; 8'dini 'ba e'yo ruani ma vᴜti bipi 'diyi econi ayiko fezarᴜ Mungu dri kᴜ. 9Te Orindi Munguni ka ovᴜ emi alia, emi ovᴜni e'yo ruani ma vᴜti bizᴜ kᴜ te e'yo Orindini. Te 'ba azini ka ovᴜ Orindi Kristoni be kᴜ, 'ba nde ovᴜni 'ba erini kᴜ. 10Te Kristo ka ovᴜ emi alia, rᴜa ovᴜ drazarᴜ e'yo onzisi, te orindi ovᴜ idrirᴜ e'yo onyinisi. 11Te Mungu Yesuni engapi 'ba draza ma eseliari ma Orindi ka adri emi alia, eri'i Kristo Yesuni engapi 'ba draza ma eseliari nga idri fe rua emini ecopi drazarᴜ 'diyi dri indi, Orindi erini ovᴜpi emi aliarisi. 12'Dini, ma adripi, ama ovᴜni mari be rᴜa vᴜ kᴜ, adrizᴜ e'yo ruani ma vᴜti bizᴜ 13te emi ka adri e'yo ruani ma vᴜti bizᴜ emi nga dra ra, te emi ka 'yeta ruani fu Orindisi emi nga ovᴜ idrirᴜ. 14Te 'ba dria Orindi Mungunini yi dri celeni 'diyi yi anzi Munguni. 15Te emi a'ini ndra orindi emi 'bazᴜ ati'borᴜ uri fezᴜ dika kᴜ, te emi a'i ndra orindi emi 'bazᴜ anzirᴜ, amani owᴜzᴜ ani, Baba! Ata! 16Orindi ma ngᴜlᴜpi eri e'yo eti nze orindi amani be kini ama ovᴜ anzi Munguni. 17Te di ama ka ovᴜ anzini ama ovᴜ vini 'ba ngapi lonyi Munguni nyapi 'diyi, ama nga eri nya tualᴜ Kristo be, ama ka candi ni eri be tualᴜ ka, yi nga diza fe ama dri eri be tualᴜ ndo. 18Te ma ega ama econi candi ewu 'dorini o'bizarᴜ diza ngapi i ecepi ama vᴜ ndori be kᴜ. 19Te afa dria Munguni 'bale 'diyi yi eceta anzi Mungunini ngazᴜ yi ecezᴜri te avasi; 20te afa dria Munguni 'bale 'diyi, Mungu 'ba yi e'yo toko dri fupi kᴜ 'diyi ma palaa, te afa nde 'diyini lelerisi kᴜ te Mungu yi 'bapi 'dinileri leni. 21Mungu le afa erini 'bale 'diyi ma ovᴜ a'itasi ani luzᴜ drile, kini eri nga yi ma ngᴜlᴜpi trᴜ indi ombeza e'yo mazani 'dirisi, 'dini yi ma fi trᴜta dizarᴜ anzi Mungunirini ma alia beni. 22Ama ni ra afa dria Munguni 'baleri yi dria tualᴜ owᴜ, yi ovᴜ nga rᴜa suza be okporᴜ ekile mva azosirile, kpere curu'do; 23kiri yi'i yo, te ama 'ba Orindi Munguni a'ipi ekile oriefi okorile 'diyi indi, ama vini indi, ama ota ama asia, e'yo Munguni ngazᴜ ama 'bazᴜ anzi inirᴜ, erini ngazᴜ rᴜa amani onzezᴜri tezᴜ. 24Te ama ovᴜ pazarᴜ e'yo teza 'dirisi. Te e'yo 'bani nele rari tezᴜ eri tezani yo. Te 'ba ka e'yo ne ra, eri di vini te e'yo tezasi a'disi ya? 25Te ama ka afa amani nele kᴜri te, ama te eri asi tezasi. 26Ekile be 'dirile Orindi eri okpo-ako amani ma aza ko; te ama nini Mungu zizᴜ onyirᴜ kᴜ, te Orindi ngᴜlᴜpi eri zi ama dri otaza be, awᴜ be 'bani 'yole tisi kᴜri. 27Te Mungu asi ale ndapiri eri ni e'yo Orindini eyikileri, Orindini zile 'ba alatararᴜ dri ekile Munguni lelerile-risi. 28Te ama ni ra Mungu eri eci e'yo dria tualᴜ onyirᴜ 'ba eri lepi 'diyi dri, 'ba ndra erini omvele ekile erini opelerile 'diyi. 29Te eri ope 'ba erini nile ndra okokele 'diyi ra, yi ma si yi ekile i Mvi ma wurale, 'dini eri eco ovᴜzarᴜ mva okoriro adripi kakaᴜ 'diyi ma eselia. 30Te eri omve 'ba erini opele ndra drio 'diyi indi; azini 'ba erini omvele 'diyi eri la 'ba barᴜ indi; azini 'ba erini lale 'ba barᴜ 'diyi eri fe ndra yi dri diza indi. 31Te di ama 'yo ngoni e'yo 'diyisi ya? Mungu ka ovᴜ amanirᴜ, a'di eco a'di 'dizᴜ ama beni ya? 32Eri'i i Mvi ma ngᴜlᴜpi kᴜpi kᴜ, te eri fepi ama dri driari, eri ngani afa dria fe ama dri tualᴜ eri be indi endra kokorᴜ kᴜ ya? 33A'dini nga asᴜ sᴜ 'ba Munguni opeleni 'diyi ma ruaani ya? Te Mungu ma ngᴜlᴜpini yi la 'ba barᴜni; 34a'dini nga e'yo li yi ma dria yi ndezᴜni ya? Te Kristo Yesu dra ra, agapiri Mungu enga eri 'ba draza eselia ra, eri'i ovᴜpi Mungu ma dri ndiari, eri Mungu zi ama drini. 35A'dini ama esele co ale Kristoniri beni ya? Kani candini ya? Kani ocokoni ya? Kani inzatani ya? Kani likini ya? Kani ovᴜzᴜ pililirᴜri ya? Kani ovᴜzᴜ ogogo dra ma siari ya? Kani omba 'ba olizᴜ seisiri ya? 36Erini ovᴜle sizarᴜrile, Mi ma e'yosi 'ba yi ama fu etuzu ; yi ma milia ama ovᴜ ekile be kabilo yini lele olile oli 'diyile. 37Yo, te adarᴜ e'yo 'diyi ma aliasi dria ama aga ada eri'i ama lepirisi. 38Te ma ni adadarᴜ kani dra, kani idri, kani malaikani, kani e'yo angᴜ urua 'diyi, kani e'yo andrᴜri, kani e'yo droziri, kani okpo amborᴜ 'diyi, 39kani e'yo ovᴜpi uru 'diyi, kani e'yo va ele 'diyi, kani afa azini dria ovᴜpi indi 'diyi, yi econi ama esele cozarᴜ ale Munguni Kristo Yesu Opi amani ma aliari be kᴜ.

will be added

X\