BA RUMIA 7

1Emi nini kᴜ, ma adripi—te ma 'yo 'ba azita nipi ra 'diyi ma tia— azita ovᴜ opirᴜ 'ba drilia kiri de' bani ovᴜzᴜ idri beria ya? 2Te okᴜ eri ka ovᴜ agupi be, azita ombe eri ci agupi erini vᴜ de agupi indi ; te agupi ka dra ra, trᴜ eri azita agupi nderi-niasi. 3Te eri ka mu agupi azinia de agupi erini ovᴜ idrirᴜ, 'ba nga eri omve okᴜ ali 'bapirirᴜ. Te agupi ka dra ra, trᴜ eri azita nderiasi ra, 'dini eri ka mu agupi azinia ti, eri ovᴜni okᴜ ali 'bapirirᴜ kᴜ. 4Ekile 'dirile, ma adripi, emi indi emi dra ndra azita vᴜsi geri rua Kristonisi, 'dini emi eco ovᴜzᴜ azinini, eri Kristo Munguni engale 'ba draza eseliari'i, 'dini emi eco ori tizarᴜ Mungu dri ani. 5Te amani ndra ovᴜria e'yo ruani ma alia, ava e'yo onzini ovᴜpi azitasi 'diyi 'ye ndra azi okposi ama rᴜa ma esele ndᴜ ndᴜ 'diyi ma alia, fezᴜ amani ori tizᴜ dratani. 6Te curu’do onze ama azita ma aliasi 'bo, ama dra e'yo ndra ama ombepiri vᴜsi 'bo, ama ma nga di azi ati'barᴜ e'yo o'dirᴜ orindini-risi, e'yo oku azita sizarᴜnirisi kᴜ. 7Ka'dini ama a'di 'yo ya? Azita eri e'yo onzini ya? Yo, alᴜni yo! Te ma nini ndra e'yo onzi kᴜ, azita ka ndra eri ece kᴜ. Te ma nini ndra li kᴜ, azita ka 'yo kᴜria, Mi 'ba li kᴜ. 8Te e'yo onzi isu geri azita alia ma bizᴜ, eri fe ava onzi dria enga ma alia. Azita ka ovᴜ yo, e'yo onzi ovᴜ avᴜrᴜ. 9Andra ma ovᴜ idrirᴜ azitani ovᴜzᴜ yoria, te azita ka eca ra e'yo onzi enga di ra, te ma'i ma dra ra; 10te azita nde idri ejipiri, ma vᴜni eji dratani. 11Te e'yo onzi eri isu geri azita nderisi, eri ici ma ra, fᴜ ma ani erisi. 12Awa'dini, azita eri ovᴜ alatararᴜ, dika e'yo dria alᴜ alᴜ azitani 'yole 'diyi yi alarᴜ, azini kililirᴜ, azini onyirᴜ. 13Ngoni ya? E'yo onyirᴜ eca ma dri drarᴜ ya? Alᴜni yo! Te e'yo onzi e'da i ngᴜlᴜpi ovᴜzᴜ onzi erini dra fele ma alia e'yo onyirᴜsirisi, 'dini azitasi e'yo onzi eco ecazarᴜ onzi aga ra. 14Te ama ni ra azita eri ovᴜ e'yo orindini; te ma'i, ma ovᴜ 'ba ruani, ovᴜzᴜ ati'bo jezarᴜ e'yo onzi-ni. 15Te e'yo mani 'yeleri ma nini kᴜ. Te e'yo mani lele 'yeleri ma 'yeni kᴜ, te e'yo mani ngule onziri ma 'ye'i. 16Te ma ka e'yo mani lele kᴜri 'ye, ma a'i de 'di, azitari onyirᴜ. 17'Dini curu'do ma ngᴜlᴜpi 'yeni e'yo nderini kᴜ, te e'yo onzi ovᴜpi ma aliari 'yeni. 18Te ma ni ma asia, ma rua ma ngᴜlᴜpi ma alia e'yo onyirᴜ alᴜni yo. Te lezarᴜni, ma le ra, te okpo mani e'yo onyirᴜ 'yezᴜni yo. 19Te ma 'yeni e'yo onyirᴜ mani lele 'yeleri kᴜ, te e'yo onzi mani lele 'yele kᴜri ma vini eri 'ye'i. 20Te ma ka e'yo mani lele 'yele kᴜri 'ye, ma ngᴜlᴜpi 'yeni e'yo nderi ma'ini kᴜ, te e'yo onzi ovᴜpi ma aliari 'yeni. 21'Dini ma isu azita 'diri, mani leria e'yo onyirᴜ 'yeria, e'yo onzi ovᴜ de ma be ci. 22Te ma ovᴜ ayikosi azita nde Mungunisi asi mani alia, 23te ma ne ma rᴜa esele alia azita ndᴜri omba 'bazᴜ azita asisileni be, ma agazᴜ ma 'bazᴜ ati'bo azita e'yo onzini ovᴜpi ma rua eseliari vᴜ. 24Eyawaye! Ma ovᴜ 'ba candirᴜ tᴜ . A'dini nga ma pa rua dra be 'dorisiin ya? 25Awa'difo Mungu vᴜ Yesu Kristo Opi amanirisi! Ka'dinile, asisilesini ma ngᴜlᴜpi ovᴜ ati'borᴜ azita Munguni vᴜ ada, te ruasini azita e'yo onziniri vᴜ.

will be added

X\