BA RUMIA 5

1Amani ovᴜria lazarᴜ 'ba barᴜ amani a'ilerisi, ama ma ovᴜ asi anzurᴜ be Mungu vᴜ Opi amani Yesu Kristosi. 2Eri ma e'yosi indi ama fi a'itasi 'yeta anzutiri amani pa sozᴜ aleniari ma alia, vini indi ama ma ovᴜ ayikosi diza Munguni tezᴜ. 3Kiri 'diri a'dule kᴜ, te ama ovᴜ ayikosi inzata ma alia, a'disikᴜ ama ni ra inzatani asi teza fe, 4te asi tezani eri ama dri adriza onyirᴜ e'yoni 'ba sizᴜri fe, adriza onyirᴜri fe amani asi 'bazᴜ e'yo drileri ma dria, 5te asi 'bazᴜ e'yo drileri ma driari feni drinza kᴜ, ale Mungunirini i dale asi amani ma alia Orindi Alatararᴜ erini fele ama dri 'borisirisi. 6Te o'du ndra amani ovᴜzᴜ nga okpo kokorᴜrisi, ewu ka eca kilili 'bo Kristo dra 'ba Mungu gapi si 'diyisi. 7'Ba ma e'yo ka ovᴜ kililirᴜ ti, eri ewarᴜ 'ba isuzᴜ drazᴜ eri ma paria— te kani agu azini nga i ma asi imba drazᴜ 'ba onyirᴜ ma paria yani. 8Te Mungu ece ale i ngᴜlᴜpini ama vᴜ, a'disikᴜ amani ovᴜria ndra nga 'ba onzini ti, Kristo dra amasi. 9'Dini amani ovᴜria lazarᴜ 'ba barᴜ ari erinisi 'boria, agapiri ama nga di ama pa adra Munguni ma alia erisi. 10Te Mungu ka ama eri ma ari'barᴜ 'diyi a'i ti ecizᴜ i be Mvi ini ma dratasi, agapiri erini ama a'ile ti ecizᴜ i be 'borisi, ama nga ama pa Mvi nde ma idrisi. 11Kiri 'diri a'dule kᴜ, te ama ovᴜ ayikosi Mungu alia Opi amani Yesu Kristo, amani ani ti eciza Mungu beri isuzᴜ erisiri ma e'yosi. 12'Dini ekile e'yo onzini efile ndra nyakua 'ba alᴜ ma e'yosirile, te indi e'yo onzi ndesi dra efini, e'yo 'disi dra obi 'ba dria yini dria 'yele onzirisi 13ndra oko de azita ecani kᴜ e'yo onzi ovᴜ nyakua, te azitani ovᴜria yoria, ajini e'yo onzi ma ru kᴜ. 14Te e'dozᴜ ndra Adamusi cazᴜ Musasi dra ovᴜ ndra opirᴜ 'ba dria ma driliani, eri obi 'ba dria yi ka e'yo onzi 'ye Adamuni 'yelerile kᴜ ti, te Adamuni ecetarᴜ 'ba ngapi emupi vileri ecezᴜ. 15Te afa Munguni fele avasiri ovᴜni ekile ezata nderile kᴜ. Te dra ka 'ba bi kakaᴜ ezata 'ba alᴜnisi, agapi tᴜri 'yeta anzutiri Munguni azini afa erini fele 'yeta anzutiri 'ba alᴜ Yesu Kristonisiri aga tᴜ 'ba kakaᴜ vᴜ. 16Te afa feza nderi ovᴜni ekile e'yo ecapi ezata 'ba alᴜni ezalerisirile kᴜ. Te e'yo liza eca ndra ezata alᴜsi 'ba ndezᴜ, te afa feza avasiri eca ezata kakaᴜ ma e'yosi 'ba lazᴜ 'ba barᴜ. 17Te 'ba alᴜ ma ezatasi dra ka ovᴜ opirᴜ 'ba alᴜ nde ma e'yosi, agapi tᴜri 'ba 'yeta anzu-tiri pi isupi tᴜ, afa feza 'ba lazᴜ 'ba barᴜri be 'diyi, yi nga ovᴜ opirᴜ idri alia 'ba alᴜ Yesu Kristosi. 18'Dini ekile be ezata alᴜsi e'yo liza bi 'ba dria yi ndezᴜ, 'dinile vini indi 'yeta barᴜ alᴜsi feza eca 'ba dria vᴜ yi lazᴜ barᴜ, idri fezᴜ yi dri. 19Te ekile eritaako 'ba alᴜnisi 'ba kakaᴜ eca 'ba onzi 'diyirᴜ, 'dini vini indi 'ba alᴜni e'yo erilerisi 'ba kakaᴜ eca 'ba barᴜ. 20Te azita fi ndra erenirᴜ, 'dini e'yo onzi ma ezu i ani, te pari e'yo onzini ezᴜzᴜria 'yeta anzutiri ezᴜ di aga tᴜ, 21'dini ekile be ndra e'yo onzini ovᴜle opirᴜ 'ba dri dra fezᴜrile, 'dini vini indi 'yeta anzutiri ma ovᴜ opirᴜ 'ba lazᴜ barᴜ, idri 'dani 'dani fezᴜ Yesu Kristo Opi amanirisi.

will be added

X\