BA RUMIA 2

1E'yo 'disi mi econi e'yo omvizarᴜ e'yo lizasi kᴜ, mi'i, mi 'ba e'yo lipiri ; 'dini mini e'yo 'ba azinini liria mi e'yo mi ma ngᴜlᴜpini li, mini e'yo nde 'diyi 'yele indirisi. 2Te ama ni ra e'yo liza Munguni ovᴜ e'yo adarᴜ vᴜsi 'ba e'yo 'diyi 'yepi 'diyi vᴜ. 3Te mi'i, mi 'ba e'yo 'yepi 'dini 'diyi ma e'yo lipiri te mi ma ngᴜlᴜpi mi vini 'ye 'dini indi, mi ega mi nga eco apazarᴜ e'yo liza Mungunirisi ra ya? 4Kani mi onyi Munguni ma lonyi, asi e'yere pie, asi teza pie, mi yi 'ba dria toko ya? Mi nini asi ndriza Munguniri eri mi ese asi ojaza vᴜri kᴜ ya? 5Te asi mbaza minisi mini mi asi ojale kᴜrisi, mi adra ma ta mba okᴜzᴜ mi ngᴜlᴜpi ma ruaa ewu adrani Munguni ngazᴜ e'yo liza ini kililirᴜri ecezᴜrisi. 6Te eri nga 'ba dria alᴜ alᴜ ofe ekile azi yinini ovᴜlerile: 7'ba dria andepi azi onyirᴜsi kᴜ, te diza ndrupi inzita pie, e'yo mapi kᴜri pie 'diyi, Munguni nga yi dri idri 'dani 'daniri fe; 8te 'ba agata gapi, 'ba e'yo adarᴜ gapi si e'yo onziri ma vᴜti bipi 'diyi, eri nga yi dria adra 'ba aoko be. 9Candi pie, ocoko pie, 'ba dria alᴜ alᴜ azi onzi 'yepi 'diyi vᴜ, okoni 'ba Yahudini vᴜ, te vini 'ba Girikini vᴜ indi, 10te drza, inzita pie, asi anzurᴜ pie nga ovᴜ 'ba dria e yo onyirᴜ 'yepi 'diyi vᴜ, okoni 'ba Yahudini vᴜ, te vini 'ba Girikini vᴜ indi. 11A’disikᴜ Mungu ma milia 'ba ovᴜni ndᴜ ndᴜ kᴜ. 12Te 'ba dria e'yo onzi 'yepi azita kokorᴜ 'diyi nga dri ja azita kokorᴜ, te 'ba dria azita be ra ti, e'yo onzi 'yepi 'diyi, azitani nga yi ma e'yo lini. 13Te 'ba azita eripi kiri bilesi 'yepi kᴜ 'diyi ma e'yo ovᴜni kililirᴜ Mungu ma milia kᴜ, te 'ba azita 'yepi ra 'diyi nga ovᴜ lazarᴜ 'ba barᴜni. 14'Ba suru jururᴜ ovᴜpi azita kokorᴜ 'diyi ka e'yo azita ndeni 'ye ceni, 'ba 'diyi yini ovᴜria azita kokorᴜ ti, yi ovᴜ azita be yi ma ngᴜlᴜpisi. 15A'disikᴜ yi ece azi azitani ovᴜ sizarᴜ asi yinia, nita yini e'yo onziri pi nizᴜ e'yo onyirᴜri berini e'yo eti nzeria indi, egata yini ndᴜ ndᴜ 'diyini yi toria kani e'yo yi ma driari trᴜria, 16o'du Munguni ngazᴜ e'yo ovᴜpi zizarᴜ asi 'bani ma alia 'diyi lizᴜ Yesu Kristosirisi, ekile e'yo bari mani olᴜlerile. 17Mi'i, mi ka mi omve 'ba Yahudini, mi ka vini ega mi nga mi pa mini azita ma vᴜti bilerisi, ovᴜzᴜ asi afᴜ be mini Mungu a'ilerisi, 18mi ka e'yo Munguni leleri ni, azini e'yo onyirᴜ agapi dria 'diyi a'i, azitani mi imbalerisi, 19mi ka ega adarᴜ mi ovᴜ 'ba 'ba mile kokorᴜ 'diyi ma dri cepiri'i, mi ega mi 'ba diza e'dapi 'ba ini alia 'diyi vᴜri'i, 20mi ega mi 'ba ondᴜa fepi 'ba e'yo nipi kᴜ 'diyi driri'i, mi ega mi 'ba anzi imbapiri, azini mi ovᴜ e'yo niza azini e'yo adari dria ma e'daza be azita alia— 21ka ovᴜ 'dini, mi 'ba 'ba azini imbapiri'i 'di, mi imbani mi ngᴜlᴜpi indi kᴜ ya? Mi 'ba olᴜpi 'ba ma ogu kᴜri, mi vini ogu indi ya? 22Mi 'ba olᴜpi 'ba ma 'ba ali kᴜri, mi vini ali 'ba indi ya? Mi 'ba wura toko 'diyi ngupiri, mi vini afa hekalu yini aliari ogu indi ya? 23Mi 'ba ovᴜpi asi afᴜ be mini azita a'ilerisiri, mi vini Mungu dri drinza fe mini azita ezalerisi ya? 24Ekile erini ovᴜle sizarᴜrile, Suru ndᴜ ndᴜ yi ovᴜ Mungu ma ru o'dazᴜ e'yo eminisi. 25Te agele liza eri orodrirᴜ mi ka azita 'ye raria; te mi ka azita 'ye kᴜ agele liza mini eri ovᴜ ekile agele lile kᴜrile. 26'Ba agele likokorᴜri ka onyi azitani ma ta mba ra, yi ngani lizaako eriniri la ekile lizarᴜrile kᴜ ya? 27'Dini 'ba agele liza ruasiri lipi kᴜri ka azita 'ye ceni, eri ngani mi azita siza be agele lile te azita ezapi rari ma e'yo li kᴜ ya? 28'Dini 'ba ovᴜni 'ba Yahudinirᴜ e'yo amvelerᴜrisi kᴜ, azini agele liza ovᴜni kiri amvelerᴜ ruasi kᴜ. 29Te 'ba yi ovᴜ 'ba Yahudinirᴜ alialerᴜ, azini lita nderi eri asiniri, orindisi, azita sizasi kᴜ. 'Ba 'dinile 'diyi inzita isu Mungu vᴜ, 'ba vᴜ kᴜ.

will be added

X\