BA RUMIA 13

1'Ba dria alᴜ alᴜ ma inzi 'ba 'ba dri cepi yi ma drilia 'diyi ma e'yo. Te 'ba drilerᴜ azini Munguni 'bale kᴜni yo, te ovᴜpi indi 'diyi Mungu ope yini. 2Ka'dini 'ba ka 'ba drilerᴜ ma ti ga eri e'yo Munguni peleri ga, te 'ba gapi 'diyi nga e'yo liza isu yi ma dria ceni. 3Te 'ba 'ba dri cepi 'diyi yi feni uri 'ba azi onyirᴜ 'yepi 'diyi dri kᴜ, te 'ba azi onzi 'yepi 'diyi dri. Mi le ovᴜ opi ma milia uri kokoru ya? Mi 'ye onyirᴜ, 'dini eri nga mi inzi beni, 4te eri azi Munguni nga mi 'yezᴜ onyirᴜ. Te mi ka onzi 'ye, mi ma ovᴜ urisi, te eri ovᴜni sei be toko kᴜ ; te eri azi Munguni nga, adra omvizᴜ 'ba onzi 'yepi 'diyi vᴜ. 5E'yo 'disi emi ma inzi yi e'yo adranisi a'dule kᴜ, te e'yo niza emi aliarisi indi. 6E'yo 'disi emi adri musoro fe indi, te yi ovᴜ 'ba azi Munguni ngapi 'diyi e'yo 'diri 'yezᴜ 'dani. 7'Dini emi ofe 'ba dria dri kililirᴜ ekile dri fupi emini fezᴜ yi dririle, kani musoroni emi ma fe musoro, kani luwaloni, emi fe luwalo, kani rᴜtani emi ma rᴜ yi ra, kani inzitani emi fe inzita. 8Emi ma ovᴜ mari be 'ba alᴜni vᴜ kᴜ, kiri 'ba lezᴜ a'dule ; te 'ba agyi ini lepiri eri 'ye azita dria 'bo. 9Te azita 'diyi kini, Mi 'ba ali kᴜ, Mi 'di 'ba kᴜ, Mi ogu kᴜ, Mi 'ba li afasi kᴜ, te azita azini ka ovᴜ indi, yi dria okᴜ yi tualᴜ e'yo 'di ma alia, kini, Mi ma le mi agyini mini mi lelerile. 10Ale 'yeni onzi i agyi vᴜ kᴜ; 'dini azita 'yezᴜ driari eri aleni. 11Azini indi emi ni ewu 'dori ma e’yo ra, kini etu orᴜzᴜ o'duari eca curu'do 'bo. A'disikᴜ curu'do pata amani eri ogogo aga etu ndra amani a'izᴜriari ra; 12inini 'ye i de de, angᴜni 'ye ati ati. 'Dini ama ma trᴜ azi inini ra, ama ma su afa suza om-bani etuniri'i; 13ama ma aci kililirᴜ ekile etusirile, amani ama okᴜzᴜ ewa tia atizᴜ ewasi kᴜ, ovᴜzᴜ mile aci be ali 'bazᴜ kᴜ, ovᴜzᴜ awatasi ma'yala be kᴜ indi. 14Te emi ma su Opi Yesu Kristo'i, emi ma fe geri li ruani 'yezᴜ kᴜ.

will be added

X\