BA RUMIA 11

1Ka'dini ma 'yo, Mungu eri 'be suru eriniri ra ya? Alᴜni yo! Te ma'i indi ma ovᴜ 'ba Israelini, Iburahimu ovᴜ a'bi mani, suruti mani eri Benyaminini. 2Mungu 'beni suru erini, ndra erini nile okori kᴜ. Emi nini e'yo sizani 'yole Elia ma e'yosiri kᴜ ya, e'yo erini asᴜ sᴜzᴜ 'ba Israelini ma ruaa Mungu vᴜri ya? 3Opi, yi ofu nabi mini 'bo, yi asᴜ pari edeta edezᴜ mi dri 'diyi va 'bo, ace kiri ma'i a'dule, te yi ndru ma fuzᴜ indi. 4Te Mungu omvi e'yo eri tia ngoni ya? Ma kᴜ 'ba alifᴜ aziri ma ngᴜlᴜpinirᴜ, kᴜmᴜti osipi Baali drilia kᴜ 'diyi. 5Eri ovᴜ 'dini indi o'du 'dorisi, 'ba jolokorᴜ erini pele 'yeta anzutirisi 'diyi indi. 6Te eri ka yi ope 'yeta anzutirisi, eri ovᴜni azisi kᴜ ; eri ka ovᴜ azisi, 'yeta anzutiri ovᴜni di 'yeta anzutiri kᴜ. 7Ka'dini ngoni ya? E'yo ndra 'ba Israelini ndruleri, yi isuni kᴜ. Te 'ba opele 'diyi isuni, te acepi 'diyi ma asi ovᴜ mbazarᴜ, 8ekile e'yo sizani 'yolerile, Mungu fe ndra yi dri orindi o'du kozaniri, mile ecopi nepi kᴜri, azini bile ecopi eripi kᴜri, ecazᴜ kpere andrᴜ. 9Daudi 'yo vini indi, Mi 'ba mesa yini ma ovᴜ gbagbale, azini vᴜlᴜvᴜlᴜle, ekile kᴜmᴜ pa sizᴜrile, ekile panga ofezᴜ yi vᴜrile; 10mi obi yi mile ci yi kazᴜ ndrezᴜkᴜ, te mi fe ngᴜkᴜ yini ma avu va 'dani. 11'Dini ma 'yo, pa yini aba ra 'dini yi ma 'de va ya? Alᴜni yo! Te e'deza yinisi pata eca suru dria vᴜ, ma'yala 'bazᴜ Israeli ma alia. 12Te e'deza yini ka lonyi fe 'ba wudrikuruni dri, azini omviza yini wereri ka lonyi fe suru dria dri, agapi tᴜri, zota yini zozᴜ tre treri nga lonyi amborᴜ eji ngopi ya! 13Te ma 'yo emi 'ba suru azini 'diyi vᴜ. Mani ovᴜle 'ba tini pele suru azini 'diyi vᴜri'irisi, ma inzi azi mani ma'i, 14kani geri awa'disi ma eco ani ma'yala 'bazᴜ ma adripi ruasi 'diyi ma asia, 'dini ma eco yi azini 'diyi opazarᴜ. 15Te 'beza yini ka fe 'ba wudrikuruni ti ecizᴜ Mungu beni, Munguni ngazᴜ yi a'izᴜ i vᴜri nga ovᴜ ngoni ya? Eri ovᴜni idri dra ma vᴜtiari'i kᴜ ya? 16Te anya kapi okori eri ka ovᴜ alatararᴜ, anya dria eri ovᴜ 'dinile indi; te pati ola ka ovᴜ alatararᴜ, pati arakala eri ovᴜ 'dinile indi. 17Te Mungu ka ndra pati arakala azini 'diyi onyo ra, ka mi mizeitu pati aseari sᴜ mizeitu pati ngaari ma ruaa, 'dini mi mvu su azini odᴜ ola mizei-tuniari'i, 18te mi ma ovᴜ asi afᴜ be pati arakala azini 'diyi 'bazᴜ tokorᴜ kᴜ. Mi ka ovᴜ asi afᴜsi ti, mi ma avi kᴜ mi edreni pati olani kᴜ, te pati ola eri mi edreni. 19Kani mi nga 'yo, Onyo ndra pati arakala azini 'diyi ma sᴜzᴜ ani parinia beni. 20Tandi! Onyo yi a'itaakosi, te mi pa so a'itasi. Mi ma ovᴜ egata asi afᴜsiri be kᴜ, te mi ovᴜ urisi. 21Te Mungu ka ndra arakala adari kᴜ kᴜ, eri ngani mi kᴜ kᴜ indi. 22'Dini emi ndre asi ndriza Munguni pi asi oka erini be: 'ba e'depi va 'diyi vᴜ asi okani, te mi vᴜ asi ndrizani mi ka te 'dani asi ndriza nderi ma alia; te ka 'dini yo eri nga mi li va indi. 23Te yi indi, yi ka te a'itaako yini ma alia 'dani kᴜ, eri nga yi sᴜ dika, te Mungu eri ovᴜ okpo be yi osᴜzᴜ dika ra. 24Te eri ka ndra mi li va mi vile mizeitu pati esele aseari ma aliarisi, mi sᴜzᴜ esele onyirᴜ mi sipi kᴜri ma ruaa; te eri ngani vini yi osᴜ mizeitu pati esele yi vileri ma alia indi aga ra kᴜ ya? 25Te ma leni emi ovᴜ e'yo niza kokorᴜ kᴜ, ma adripi, e'yo zizarᴜ 'dirisi, 'dini emi kazᴜ ovᴜzᴜ ondᴜarᴜ emi ngᴜlᴜpi ma milia kᴜ ; emi ma ni kini 'ba Israelini ma esele azini ma asi eca mbazarᴜ 'bo, eri nga ovᴜ 'dini 'dani de nga ewu pele 'ba suru dria azini 'diyi driri gani tre kᴜ, 26te 'dini Israeli dria yi nga yi pa ra; ekile erini ovᴜle sizarᴜrile, Ba 'ba Aripiri nga enga Zionia, eri nga asi Mungu inzizᴜ kᴜri nze suru Yakoboni ma aliarisi ; 27te 'diri eri e'yo aziza mani ngale azile yi vᴜ o'du mani ngazᴜ e'yo onzi yini wuzᴜrisiri'i. 28E'yo barisi, yi ovᴜ ari'barᴜ emi ma e'yosi; te e'yo pezasi yi ovᴜ lezarᴜ a'bi yini ma e'yosi. 29Te afa feza Munguni fele 'yeta anzutirisi 'diyi ojani yi kᴜ. 30Te ekile emini ndra Mungu inzile kᴜ, te curu'do emini yiki isule inzitaako 'ba nde 'diyini ma e'yosirile, 31te 'dinile indi curu'do ama isu 'ba 'diyi inzini ndra kᴜ yiki emini ma e'yosi, 'dini yi'i vini indi ma isu yiki curu’do ra. 32Te Mungu ombe 'ba dria inzitaako alia, 'dini eri eco ani yiki fezarᴜ 'ba dria dri beni. 33'A 'a, ondᴜa Munguni ma lonyi e'yo niza beri ma alini zo 'doni ya! 'Ba econi e'yo erini lile 'diyi vazarᴜ kᴜ, azini 'ba econi leti erini 'diyi ma pamvᴜ bizarᴜ kᴜ! 34A'dini adri asisile Opini nini ya? A'dini adri e'yo ama eri drini ya? 35A'dini adri afa fe Mungu dri oko eri ma nga arotini ofe eri dri ani ndonini ya? 36Te afa dria efᴜ erisi, afa dria so pa erisi, afa dria yi ovᴜ eri vᴜ. Diza ma ovᴜ eri vᴜ 'dani 'dani. Amena.

will be added

X\