BA RUMIA 1

1Ma'i Paulo, ati'bo jeza Yesu Kristoni. Omve ndra ma ovᴜzᴜ 'ba ti pelerirᴜ, pe ndra ma ndᴜ e'yo bari Munguni olᴜzᴜ. 2Mungu azi ndra oko e'yo ba nderi geri nabi ini vᴜrisi, e'yo siza alatararᴜri ma alia, 3Mvi ini ma e'yo ecezᴜ, osipi ndra ruasi Daudi ma orirᴜ 4te ovᴜpi ecezarᴜ Mvi Mungunirᴜ okpo be Orindi e'yo alatararᴜnirisi, erini engale 'ba draza ma eseliarisiri. Eri Yesu Kristo, Opi amaniri'i. 5Erisi ama isu asi ndriza pi azi 'ba ti pelerini be, fezᴜ 'bani e'yo a'itani erizᴜ rᴜtasi suru dria ma eselia, ru erinisi. 6Te emi ovᴜ 'ba 'diyi ma azirᴜ indi, Yesu Kristoni emi omvele ovᴜzᴜ 'ba inirᴜrisi. 7'Ba dria Munguni lele Rumia, Munguni omvele ovᴜzᴜ alatararᴜ 'diyi vᴜ: 'Yeta anzutiri pi ma ovᴜ emi vᴜ asi anzurᴜ be engazᴜ Mungu Ata amani pi vᴜ Opi Yesu Kristo be. 8Okorisi ma awa'difo 'yo Mungu mani vᴜ Yesu Kristosi emisi dria, a'ita emini ma e'yoni kule wudrikuru dria ma aliarisi. 9Mungu mani azi ngazᴜ vᴜnia orindi manisi e'yo barᴜ Mvi inirini ma aliari eri e'yo mani ma eti nzeni, kini ma zi i tia emisi 'dani 'dani. 10Zita mani ma alia ma zi o'du dria, ka adri ba, Mungu ka le ra, eri ma zi euru'do geri onyirᴜ ma dri muzᴜ emi vᴜ, ewuni agale izᴜ 'borisi. 11Te ma le emi ndre avasi, afa feza orindiniri fezᴜ emi dri emi 'bazᴜ okporᴜ ani, 12'dini ama ma omi ama asi ama eselia emi be, a'ita amanisi amani amani. 13Ma le emi ma ni, ma adripi, pale kakaᴜ ma adri ega ma asia muzᴜ emi vᴜ (te e'yo azini oga ma muko si ecazᴜ kpere andrᴜ), ma ma isu Kristo ma ori emi eselia indi, ekile mani isule suru azi 'diyi ma eseliarile. 14Ma mari be 'ba Girikirᴜ 'diyi vᴜ azini 'ba jururᴜ 'diyi vᴜ, 'ba ondᴜa be 'diyi vᴜ azini 'ba ondᴜa kokorᴜ 'diyi vᴜ ci: 15'dini ekile mani ecolerile, ma le avasi e'yo bari olᴜzᴜ emi 'ba Rumia 'diyi vᴜ indi. 16Te ma ovᴜni drinza be e'yo barisi kᴜ : erini ovᴜle okpo Munguni pata fezᴜ 'ba alᴜ alᴜ a'ipiri dririsi, okoni 'ba Yahudini dri, te 'ba Girikini dri indi. 17E'yo bari nde ma alia e'yo kililirᴜ Munguniri e'da i 'ba a'ipi 'diyi ma milia yini a'ile a'irisi; ekile erini ovᴜle sizarᴜrile, 'Ba kililirᴜri nga ovᴜ idrirᴜ a'itasi. 18Te adra Munguni engapi 'buari e'da i 'ba ambo be Mungu inzipi kᴜ 'diyi vᴜ, 'ba e'yo onzi 'yepi 'diyi vᴜ indi, yini e'yo adarᴜri ogale e'yo onzi yinisirisi. 19Te e'yo Munguni 'bani ecole nileri e'da i ce yi ma milia, Munguni e'yo nderi ecele yi milia 'borisi. 20A'disikᴜ e'dozᴜ ewu Munguni nyaku 'bazᴜrisi, okpo erini i depi kᴜri pi e'yo erini ovᴜzᴜ Mungurᴜri be, yi e'yo erini 'bani ecole nele kᴜ 'diyi, e'da yi ra, fezᴜ yi vazᴜ afa erini o'bale 'diyisi. E'yo 'disi 'ba nde 'diyi econi e'yo omvizarᴜ Mungu vᴜ kᴜ ; 21a'disikᴜ yini Mungu nile rari ti, yi inzini eri Mungule kᴜ, feni vini awa'difo eri dri kᴜ indi, te yi aba yini asisile drole saarᴜrisi azini asi yini ondᴜa kokorᴜri bi i inieicirᴜ. 22Yini 'yoria yi 'ba ondᴜarᴜni de di yi aza aza, 23te yi oja Mungu ecopi drapi kᴜri ma diza ekile wura 'ba ecopi drazarᴜrinile, azini arianile, azini anyapa pa be su 'diyinile, azini afa acipi agatisi 'diyinile indi. 24E'yo 'disi Mungu kᴜ yi ava onzi yi asini lele 'yeleri 'yezᴜ, e'yo drinzarᴜ 'yezᴜ yi ma ruaa yi eselia, 25a'disikᴜ yi oja e'yo adarᴜ inzorᴜ, yi inzi tᴜ afa 'bale 'ba 'diyi, azi ngazᴜ yi dri Mungu afa dria 'bapiniri ma paria, eri'i ovᴜpi inzizarᴜ 'dani 'daniri! Amena. 26E'yo 'disi Mungu kᴜ yi ava onzikanya drinzarᴜri ma alia. Okᴜ yini yi oja e'yo okᴜni adrile 'yele yi ruaari, yi 'ye e'yo ecopi okᴜ ruaa kᴜri. 27'Dinile agupi indi yi kᴜ lazᴜ okᴜ be ekile 'bani adrile lalerile, yi rua ve ava onzikanyarosi agupi ma eselia agupi azi 'diyi be e'yo onzikanya drinzarᴜ 'yezᴜ, azini yi a'i panga 'yekeri yi ma ngᴜlᴜpi ma ruaa ekile yini e'yo onzikanyarᴜ 'yelerile. 28Te erini ovᴜle yi milia onyirᴜ Mungu ma ovᴜ yi ma eyikiza alia kᴜrisi, Mungu kᴜ yi asisile onyi kokori be e'yo onzi drinzarᴜri 'yezᴜ. 29Yi ga tre e'yo onzikanyarᴜ driasi, e'yo onzi pie, li 'bazᴜ 'ba azini ma afasiri pie, asi onzi pie. Gazarᴜ ma'yalasi, 'ba 'diza pie, awata pie, lokiri pie, 'ba nguza pie, yi ovᴜ 'ba 'ba ndropi 'diyi, 30'ba 'ba esᴜpi 'diyi, 'ba Mungu ngupi onzi 'diyi, 'ba asi oka be 'diyi, 'ba asi afᴜ be 'diyi, 'ba yi enyapi tᴜ 'diyi, 'ba e'yo onzi o'dirᴜ ndrupi 'diyi, 'ba yi tipi 'diyi ma ti eripi kᴜ 'diyi, 31'ba ovᴜpi ondᴜa kokorᴜ 'diyi, 'ba e'yo aziza yini ojapi 'diyi, 'ba ale kokorᴜ 'diyi, 'ba yiki kokorᴜ 'diyi. 32Yi'i yini azita kililirᴜ Munguni, kini 'ba e'yo onzi 'diyi 'yepi 'diyi ma isu dratari nile rari ti, yi ma ngᴜlᴜpi 'yeni kiri 'dini a'duleni kᴜ, te yi a'i vini 'ba 'yepi 'dinile 'diyi barᴜ indi.

will be added

X\