E'YO ECEZA 7

1Di ma vᴜtia ma ndre malaika su 'diyini pa soria nyaku ma kalati su 'diyia, yi bi oli nyakua su 'diyi ci, oli kazᴜ lizᴜ nyakua, kani miria, kani pati azini ma rᴜaa dria kᴜ. 2Te ma ndre malaika azinini eturia engazᴜ kala etuni efᴜrialerᴜria, eri eceta afa ti opizᴜ Mungu idrirᴜriniri be; eri oyᴜ uru o'duko urusi malaika su yini okpo fele yi dri nyaku pi ezazᴜ miri be 'diyi ma tia, 3kini, Emi eza nyaku pi, miri pie, pati 'diyi pie dria kᴜ, cazᴜ amani eceta o'bazᴜ ati'ba Mungu amanirini ma andretiaria. 4Ma eri 'ba yini eceta o'bale yi ma dria 'diyi ma kalafe, eri alifᴜ tᴜrᴜ alᴜ drini kali su drini su, yi 'ba eceta a'ipi engazᴜ suruti ndᴜ ndᴜ anzi Israelini 'diyini ma eselia dria 'diyi: 5engazᴜ suru Yudani ma eselia yi o'ba eceta 'ba alifᴜ mᴜdri drini iri 'diyi ma dria, engazᴜ suru Reubenini ma eselia 'ba alifᴜ mᴜdri drini iri, engazᴜ suru Gadini ma eselia 'ba alifᴜ mᴜdri drini iri, 6engazᴜ suru Aserini ma eselia 'ba alifᴜ mᴜdri drini iri, engazᴜ suru Nafutalini ma eselia 'ba alifᴜ mᴜdri drini iri, engazᴜ suru Manaseni ma eselia 'ba alifᴜ mᴜdri drini iri, 7engazᴜ suru Simeonini ma eselia 'ba alifᴜ mᴜdri drini iri, engazᴜ suru Levini ma eselia 'ba alifᴜ mᴜdri drini iri, engazᴜ suru Isakarini ma eselia 'ba alifᴜ mᴜdri drini iri, 8engazᴜ suru Zebulunini ma eselia 'ba alifᴜ mᴜdri drini iri, engazᴜ suru Yusufuni ma eselia 'ba alifᴜ mᴜdri drini iri, engazᴜ suru Benyaminini ma eselia yi o'ba eceta 'ba alifᴜ mᴜdri drini iri 'diyi ma dria. 9E'yo 'diyi ma vᴜtia ma ndre ra, te mi ne, 'ba ongᴜlᴜmᴜrᴜ amborᴜ 'ba alᴜnini ecole lale kᴜ, engapi suruti dria pi ma eselia, suru dria pie, 'ba pie, ti 'yoza pie dria 'diyini pa soria ogᴜŋa ma drilia azini Kabilomva ma drilia, suzarᴜ afa suza izᴜrᴜ emverᴜsi, azini ndende be yi dria; 10yi oyᴜ urᴜ o'duko urusi kini, Pata eri Mungu amani ripi ogᴜŋa driarini azini Kabilomvani! 11Malaika dria oso pa kurᴜ ogᴜŋa ma ageia, 'ba 'wara pie, anyapa idrirᴜ su 'diyi pie; nga di yi eco o'bukurᴜ va ogᴜŋa ma drilia Mungu inzizᴜ, 12kini, Amena! Asi ndriza pi. diza pie, ondᴜa pie, awa'difo pie, inzita pie, okpo pie, okpo e'yo 'yezᴜri pie, ma ovᴜ Mungu amani vᴜ kpere 'dani 'dani! Amena. 13'Ba 'wara ma azi alᴜ omvi e'yo ma tia, kini, 'Ba osule afa suza izᴜrᴜ emverᴜsi 'diyi a'di piyi ya, yi ibi enga ngole ya? 14Ma 'yo eri tia, Opi mani la, mi ni yi mi'i. Eri nga di 'yo ma tia, Ba 'diyi 'ba efᴜpi inzata amborᴜri ma alia, yi ma bongo ojipi 'bazᴜ emverᴜ Kabilomva ma arisi 'diyi. 15E'yo 'disi yi ovᴜ ogᴜŋa Munguni ma drilia, azi ngazᴜ eri dri hekalu erini ma alia etu zu ini be rra; 'ba ripi ogᴜna driari nga hema ini aso yi ma dria. 16Yi ngani ovᴜ abiri be dika kᴜ, yi avijo ngani yi fu dika kᴜ ; etu ngani 'de yi ma rᴜaa onzi kᴜ, driza be dria. 17A'disikᴜ Kabilomva ovᴜpi ogᴜŋa ma eseliari nga yi oceni, eri nga vini yi dri ce yi a'di idrini 'diyi vᴜ; te Munguni nga mindre yi ma inilia 'diyi ini dria.

will be added

X\