E'YO ECEZA 6

1Te ma ndre Kabilomvani eceta tini opizᴜ 'diyi ma azi alᴜ ziria, ma eri anyapa idrirᴜ su 'diyi ma azi alᴜni 'yoria, ekile o'duko angᴜ lizanilerisi, kini, Mi emu! 2Ma ndre ra, te mi ne, akanya emverᴜ, azini 'ba ripi eri ma ngᴜkᴜari ovᴜ osu be ; yi fe ekilaza driari eri dri, eri fᴜ ani agazᴜ omba ma alia, azini eri ma nga aga ani beni. 3Eri ka eceta iriri zi ra, ma eri ra anyapa idrirᴜ iririni 'yoria kini, Mi emu! 4Akanya azini efᴜ ra, eri akanya ekarᴜ; yi fe 'ba ripi eri ma ngᴜkᴜari dri eri ma nze asi anzurᴜ nyakuarisi ra, 'ba ma ofu yi ceni ceni beni; yi fe sei amborᴜ eri dri. 5Eri ka eceta nari zi 'bo, ma eri anyapa idrirᴜ narini 'yoria kini, Mi emu! Ma ndre ra, te mi ne, akanya inirᴜ; azini 'ba ripi eri ma ngᴜkᴜari ovᴜ afa afa nziza o'bizᴜri be i ma dria. 6Ma eri ekile o'duko efᴜpi anyapa idrirᴜ su 'diyi ma eseliarile kini, Nganu gobea alᴜ silingi alᴜsi, te anya gobea na silingi alᴜsi ; te mi ma eza odᴜ pi patiefi su be kᴜ. 7Eri ka eceta suri zi ra, ma eri o'duko anyapa idrirᴜ surini 'yoria kini, Mi emu! 8Ma ndre ra, te mi ne, akanya forotorᴜ, azini 'ba ripi eri ma ngᴜkᴜari rᴜni Dra'i; Pari 'ba drazaniri bi vᴜtinini. Yi fe okpo yi dri angᴜ wudrikurᴜ ma esele su ma azi alᴜri ofuzᴜ sei pisi, likisi, drasi, nguru asea 'diyisi. 9Eri ka eceta towiri zi ra, ma ndre pari edeta edezᴜri ma etia orindi 'ba yini ofule e'yo Mungunisi, azini e'yo eti nzeza yini nzelerisi 'diyini; 10yi otre o'duko urusi kini, Mi Opi Agapi Tᴜri, alatararᴜ azini adarᴜ, mi kᴜ e'yo likokorᴜ, azini avᴜ arioti amani ofekokorᴜ 'ba nyakua 'diyi ma ruaa cazᴜ ewu ngopi ya? 11Yi fe afa suza izᴜrᴜ emverᴜ yi dri dria; nga 'yo yi tia kini yi ma li nga ande were, cazᴜ ati'ba yi ma azirᴜ azini yi ma adripirᴜ, 'bani ngale ofule yile 'diyi ma kalafeni cazᴜ i paria dria 'boria. 12Te ma ndre ra eri ka eceta aziari zi ra, oyakia amborᴜ oya angᴜ, etu oja i inirᴜ ekile gunia cale anyapa ma podosirile, azini mba oja i dria arile, 13azini 'bi'bio 'bua 'diyi lu va nyakua ekile elioni efi kapi nga kᴜ 'diyi lule va oli amboni eri oyalenirile; 14wu 'bu ekile 'bani waraka tralerile, onze oni izᴜrᴜ dria alᴜ alᴜ piyi, angᴜ yi lipi miri alia 'diyi be, yi ma pariasi ra. 15Opi nyakua 'diyi pi, 'ba amborᴜ 'diyi pie, 'ba asikari dri cepi 'diyi pie, 'ba afa e'ipirᴜ 'diyi pie, 'ba okporᴜ 'diyi pie, ati'bo jeza dria 'diyi pie, kari'ba pie dria, yi ozi yi oni ojia azini kata oni dria 'diyi ma eselia ; 16yi 'yo ani oni piyi ma tia kata be, Emi e'de ama dria, ama ozizᴜ 'ba ripi ogᴜŋa driari ma milia, azini adra Kabilomvanirisi ; 17a'disikᴜ etu amborᴜ yini adra 'bazᴜri eca di 'bo; eco a'dini pa sozarᴜni ya?

will be added

X\