E'YO ECEZA 5

1Te ma ndre 'ba ripi ogᴜŋa ma driari ma dri ndiria buku indi sizarᴜ alenia azini ngᴜkᴜnia, opizarᴜ ci eceta tini opizᴜ aziri 'diyisi. 2Ma ndre malaika okporᴜni e'yo olᴜria o'duko urusi, A'di ma onyi fu dri buku zizᴜ azini eceta tini opizᴜ 'diyi ondizᴜni ya? 3'Ba alᴜni 'bua, kani nyakua, kani va nyaku ma etia, ecopi buku nde zipi, kani eri ndrepini yo. 4Te ma wᴜ tᴜ yini 'ba alᴜni dri fupi buku zipi, kani eri ndrepini isule kᴜrisi. 5Te 'ba 'wara ma azi alᴜ 'yo ma tia, Mi wᴜ kᴜ; mi ne, Kami suru Yudani, Ola Daudiniri, aga dri fuzᴜ buku pi zizᴜ, eceta erini aziri 'diyi be ra. 6Azini ma ndre ogᴜŋa pi ma eselia anyapa idrirᴜ su 'diyi be, azini 'ba 'wara ma eselia, Kabilomvani pa soria, ekile lile 'borile, o'yᴜni aziri, mileni aziri, mile nde 'diyi yi Orindi Munguni aziri ti opele wudrikuru dria ma alia 'diyi. 7Eri emu buku 'du 'ba ripi ogᴜŋa driari ma dri ndiria. 8Eri ka buku 'du 'bo, anyapa idrirᴜ su 'diyi pi 'ba 'wara kali iri drini su 'diyi be, yi eco yi va Kabilomva ma palaa, yi dria alᴜ alᴜ ovᴜ o'di be, azini lu'bu melerᴜ gapi obiese arikarirᴜri be tre tre 'diyi be, yi zita 'ba alatararᴜ 'diyini. 9Yi ngo ongo o'dirᴜ, 'yozᴜ, Mi fu dri buku 'duzᴜ, ecetani tini opizᴜ 'diyi zizᴜ ra, a'disikᴜ li ndra mi ra, te ari minisi mi je 'ba Mungu dri engazᴜ suruti dria ma eselia, ti 'yoza pie, 'ba pie, suru pie dria, 10mi 'ba yi ovᴜzᴜ opi nyazanirᴜ azini atalaᴜ edeta edepi 'diyirᴜ Mungu dri; yi nga opi nya nyakua ra. 11Te ma ndre ra, azini ma eri malaika kakaᴜ ma o'duko ogᴜŋa ma ageia, anyapa idrirᴜ 'diyi pie, 'ba 'wara 'diyi pie; kalafe yini alifᴜ mᴜdri pale alifᴜ mᴜdri, azini alifᴜ pale alifᴜ lakokorᴜ; 12yini 'yoria o'duko urusi, Kabilomva lile 'bori fu dri okpo pi a'izᴜ, lonyi pie, ondᴜa pie, okpo opiniri pie, inzita pie, diza pie, asi ndriza pie dria! 13Afa dria Munguni o'bale 'diyi 'buari pie, nyakuari pie, nyaku etiari pie, miri driari pie, afa dria ovᴜpi afa 'diyi ma alia 'diyi pie dria, ma eri yini 'yoria kini, Asi ndriza pi, inzita pie, diza pie, okpo opiniri pie ma ovᴜ 'ba ripi ogᴜŋa driari vᴜ, azini Kabilomva vᴜ 'dani 'dani! 14Anyapa idrirᴜ su 'diyi ‘yora, Amena! 'Ba 'wara eco yi va inzizᴜ.

will be added

X\