E'YO ECEZA 22

1Eri ece ma dri yi ara idrini, mile be alatararᴜ glasile, efᴜpi ogᴜŋa Mungu pini ma alia Kabilomva beria, 2rapi geri amborᴜ erini ma eselia agaduari ; yi ara ma tia 'aa'dosi azini 'aa'dasi pati idrini indi, efi 'yapi suruti ndᴜ ndᴜ mᴜdri drini iri, efi kapi mba vᴜsi mba vᴜsiri; pati nde ma bi ovᴜ aroni suru ma azo atizᴜ. 3Otrita ngani ovᴜ dika 'de kᴜ, te ogᴜŋa Mungu pini Kabilomva beri nga ovᴜ alenia; ati'ba erini yi nga azi nga eri inzizᴜ, 4yi nga mile erini ndre, eri ma runi nga ovᴜ yi ma andretia. 5Ini ngani ovᴜ dika kᴜ; yi leni diza talani kani diza etᴜni kᴜ, a'disikᴜ Opi Munguni ngale diza fele yi drinirisi ; yi nga opi nya 'dani 'dani. 6Eri 'yo ma tia, E'yo 'diyi yi e'yo 'yole asi adasi, azini adarᴜ 'diyi. Opi, Mungu nabi ma orindiniri, epe malaika erini ma ti e'yo ngapi yi 'yepi mbele 'diyI ecezᴜ ati'ba erini ma tia. 7Mi ne, ma emu mbele. 'Ba e'yo ondriza buku 'diri ma aliari ta mbapiri eri drilebarᴜ. 8Ma'i, Yohana, ma 'ba e'yo 'diyi eripiri azini ndrepiri. Mani eriria, mani ndreria, ma eco ma va malaika e'yo 'diyi ecepi ma driri ma palaa eri inzizᴜ; 9te eri 'yo ma tia, Mi 'ye 'dini kᴜ! Ma ovᴜ ati'boni mile trotro azini adripi mini nabirᴜ 'diyile, azini 'ba e'yo buku 'diri ma aliari ta mbapI 'diyile. Mi inzi Mungu'i. 10Eri 'yo ma tia, Mi 'ba eceta e'yo ondriza buku 'diri ma alia 'diyi ma dria tini ecizᴜ ci kᴜ, a'disikᴜ ewuniri inyia. 11'Ba e'yo ezapiri ma eza nga ini 'dani, 'ba ovᴜpi onzikanyarᴜri ma ovᴜ nga ini onzikanyarᴜ 'dani, 'ba ovᴜpi kililirᴜri ma 'ye nga ini kililirᴜ 'dani, 'ba ovᴜpi alatararᴜri ma ovᴜ nga ini alatararᴜ 'dani. 12Mi ne, ma emu mbele, panga mani ovᴜ ma be, mani ngazᴜ ani 'ba dria alᴜ alᴜ ofezᴜ azi yinini ovᴜlerile. 13Ma Alifa'i azini Omega'i, okori azini vileri, e'dozani azini asizani. 14'Ba afa suza yini ojipi 'diyi yi drilebarᴜ, 'dini yi ma eco ani muzᴜ pati idriniri vᴜ, ma fi ani kalitilesi aku nde ma alia. 15Amvelerᴜ oce yi indi, 'ba olerᴜ pie, 'ba ali o'bapi 'diyi pie, 'ba 'ba 'dipi 'diyi pie, 'ba wura toko inzipi 'diyi pie, 'ba dria inzo lepi azini lipi 'diyi pie. 16Ma Yesu'i, ma pe malaika mani ma ti e'yo 'diyi ma eti nzezᴜ emi tia kanisa dri. Ma ovᴜ ola Daudini azini ori erini, 'bi'bio leleᴜrᴜ dipi angᴜ trasiri'i. 17Orindi pi amurᴜoᴜ be yi ‘yora, Emi emu. 'Ba e'yo eripiri ma 'yo indi, Emi emu. 'Ba ovᴜpi yi avijosiri ma emu; 'ba lepiri ma mvu yi idriniri tokorᴜ. 18Ma e'yo eti nze 'ba dria e'yo ondriza buku 'diri ma aliari eripi 'diyi ma tia, kini: 'Ba azini ka e'yo azini o'ba e'yo 'diyi ma dria, Munguni nga inzata ovᴜpi sizarᴜ buku 'diri ma alia 'diyi o'ba eri ma dria; 19'ba azini ka e'yo sile buku e'yo ondriza 'dirini ma alia 'diyi ma azi nze, Munguni nga pari erinI nze pati idrini pi vᴜsi aku alatararᴜri be ra, yini e'yoni sile buku 'diri ma alia'diyi. 20'Ba e'yo 'diyi ma eti nzepiri 'yo 'dini, Adada, ma emu mbele. Amena. Mi emu fo, Opi Yesu! 21'Yeta anzutiri Opi Yesuni ma ovᴜ 'ba alatararᴜ be dria. Amena.

will be added

X\