E'YO ECEZA 21

1Ma ndre 'bu o'dirᴜ nyaku o'dirᴜ be; a'disikᴜ 'bu okori pi nyaku okori be aga 'bo, yi mirini dika yo. 2Ma ndre vini aku alatararᴜ, Yerusalemu o'dirᴜri, erini esiria 'buarisi va engazᴜ Mungu vᴜ, edezarᴜ ngonde ekile amuruoᴜni i osule onyiafasi agupi ini dririle ; 3ma eri o'duko amborᴜni efᴜria ogᴜŋa vᴜ 'yozᴜ kini, Mi ne, pari Munguni ovᴜzᴜri ovᴜ 'ba be, eri nga ovᴜ yi be tualᴜ, yi nga ovᴜ 'ba erini, Mungu ngᴜlᴜpini nga ovᴜ yi be, nga ovᴜ Mungu yini; 4eri nga mindre ini yi ma miliasi dria, dra ngani ovᴜ dika kᴜ, awᴜ wᴜza pi lulu gaza pie, rua suza pie, ngani ovᴜ dika kᴜ ; e'yo oko 'diyi aga 'bo. 5Eri'i ripi ogᴜŋa driari ‘yora, Mi ne, ma afa dria 'ba o'dirᴜ. Eri ‘yora, Mi si, a'disikᴜ e'yo 'diyi yi e'yo 'yole asi adasi azini adarᴜ 'diyi. 6Eri 'yo ma tia, Yi 'ye yi 'bo! Ma Alifa'i azini Omega'i, 'di e'dozani azini asizani. Ma nga yi a'di yi idrinirini fe toko avasi 'ba ovᴜpi yi avijo beri dri. 7'Ba agapiri nga afa 'diyi isu i ma afarᴜ, ma nga ovᴜ Mungu erini, eri nga ovᴜ mva mani. 8Te 'ba urioᴜrᴜ 'diyi pi, 'ba a'ipi kᴜ 'diyi pie, 'ba afa ngule onziri 'yepi 'diyi pie, 'ba 'ba 'dipi 'diyi pie, 'ba ali o'bapi 'diyi pie, 'ba olerᴜ 'diyi pie, 'ba wura toko inzipi 'diyi pie, 'ba dria inzo lipi 'diyi pie, pari yini nga ovᴜ aci mirile vepi aci pisi barᴜti beri ma alia; 'diri dra iriri'i. 9Malaika aziri ovᴜpi okele aziri inzata aziri vile asizᴜ 'diyini gazᴜ yi ma alia tre 'diyi be 'diyi ma azi alᴜ nga emu e'yo 'yo ma be kini, Mi emu 'dole, ma nga mi dri amurᴜoᴜ, okᴜ Kabilomvaniri ece. 10Eri nga ma 'du Orindi alia, ji oni amborᴜ azini izᴜrᴜ ma dria, nga ma dri aku alatararᴜ Yerusalemuni ece, erini esiria 'buarisi va engazᴜ Mungu vᴜ, 11eri diza Munguni be, diza erini ovᴜ ekile oni aje nyapi agapi tᴜri ma dizale, ekile oni jasipe ovᴜpi alarᴜ glasilerile. 12Eri abi kalirᴜ be amborᴜ azini izᴜrᴜ, kali nde ma tile yi mᴜdri drini iri, kalitile 'diyi ma alia malaika mᴜdri drini iri indi; si ru kalitile 'diyi ma dria ci, 'diyi anzi Israelini ma suru mᴜdri drini iri 'diyini; 13woko etuni efᴜrialerᴜria kalitile na, woko andralerᴜria kalitile na, woko urulerᴜria kalitile na, woko etuni 'derialerᴜria kalitile na. 14Abi kalirᴜ aku ageiari ovᴜ ndu be mᴜdri drini iri, si ru mᴜdri drini iri yi ma ruaa ci, 'ba mᴜdri drini iri Kabilomvani ti opele 'diyini. 15'Ba e'yo nzepi ma beri ovᴜ ozᴜ afa o'bizᴜ edele melesiri be aku pi o'bizᴜ, kalitileni 'diyi pie, abini pie. 16Aku nde ma kalati su dria trotro, oconi ovᴜ trotro walani be; eri nga aku o'bi ozᴜsi, isu eri ekile mailo alifᴜ alᴜ tᴜrᴜ towile; oconi pie, walani pie, izᴜni ururi pie ovᴜ dria trotro. 17Eri nga abini o'bi ra, isu eri wuale tᴜrᴜ alᴜ drini kali su drini su, 'bani adrile o'bile wualesirile, te malaika o'bini. 18Si abi rua jasi-pesi, te aku nde ovᴜ mele alarᴜ ekile oni talatala alarᴜrile. 19Ede abi kalirᴜ aku ageiari ma ndu ndrizarᴜ oni ndᴜ ndᴜ dria aje nyapi tᴜ 'diyisi; abi ndu okori jasipeni, iriri eri safirani, nari eri kalakedoni, suri eri emerodeni, 20towiri eri sarado-nukisini, aziari eri sadiusini, aziriri eri kurusolitoni, arori beruleni, oromiri eri topazeni, mᴜdriri eri kurusoparasoni, mᴜdri drini alᴜri eri huakintoni, mᴜdri drini iriri eri ametusitoni. 21Kalitile mᴜdri drini iri yi nyoro ndrizarᴜ aje nyapi tᴜ mᴜdri drini iri 'diyi, kalitile alᴜ alᴜ vᴜsi nyoro alᴜ alᴜ, geri amborᴜ aku eselesiri eri mele alarᴜ, ekile oni talatala dizarᴜrile. 22Ma ndreni hekalu aku nde ma alia kᴜ, a'disikᴜ Opi Mungu Okpo E'i pi Kabilomva be yi ovᴜ hekalu erini. 23Aku nde leni etᴜ pi mba be dizᴜ eri ma alia kᴜ, a'disikᴜ diza Mungunini dile eri ma alianirisi, Kabilomva ovᴜ tala erinirᴜni. 24Suru yi nga aci diza erini ma alia ; opi nyakua 'diyi nga diza yini inzitarᴜri eji alenia, 25yi ngani kalitile erini opi etusi alᴜni kᴜ—inini ovᴜle 'dale yorisi; 26yi nga diza suruni pi eji ofi alenia inzita yini be. 27Te afa dria alatara kokorᴜ 'diyi pi ngani fi alenia alᴜni kᴜ, 'ba afa ngule onziri 'yepi 'diyi pie, 'ba inzo lipi 'diyi pie, te kiri 'ba runi sile Kabilomva ma buku idriniri ma alia 'diyi nga fini.

will be added

X\