E'YO ECEZA 19

1E'yo 'diyi ma vᴜtia ma eri o'duko ekile o'duko amborᴜ 'ba ongᴜlᴜmᴜrᴜ kakaᴜ 'bua 'diyinirile, 'yozᴜ kini, Haleluya! Pata pi, diza pie, okpo pie ovᴜ Mungu amanirini, 2a'disikᴜ e'yo liza erini ovᴜ adarᴜ azini kililirᴜ; eri li okᴜ awuoᴜrᴜ ali o'bapi tᴜ nyaku ezapi ali o'baza erinisiri ma e'yo 'bo, azini eri ofe ari ati'ba ini 'diyini ma arioti eri dria. 3Yi nga 'yo pale iri, Haleluya! Acika erini tu uru 'dani 'dani. 4'Ba 'wara kali iri drini su 'diyi pi eco yi va Mungu ripi ogᴜŋa driari inzizᴜ, anyapa idrirᴜ su 'diyi be, kini, Amena. Haleluya! 5O'duko nga di efᴜ ogᴜŋa vᴜ, kini, Emi inzi Mungu amani, emi ati'ba erini dria, emi 'ba eri rᴜpi 'diyi, 'ba nyiri 'ba 'wara pie dria. 6Ma eri ekile o'duko 'ba ongᴜlᴜmᴜrᴜ kakaᴜ 'diyinirile, azini ekile yi kakaᴜ ma o'dukole, azini o'duko angᴜ liza okporᴜ 'diyinirile, kini, Haleluya! Opi Mungu amani, Okpo E'iri eri angᴜ nya opirᴜni. 7Ama ma ovᴜ ayikosi, nyoŋa be tᴜ, ama ma fe diza eri dri, a'disikᴜ o'du Kabilomvani okᴜ bizᴜri eca 'bo, amurᴜoᴜ erini ede i 'bo; 8fe erini bongo mile be nyiriari suzᴜ i ruaa dizarᴜ, alarᴜ— bongo mile be nyiriari eri 'yeta kililirᴜ 'ba alatararᴜ 'diyini. 9Eri 'yo ma tia, Mi si 'dini, 'Ba omvele omu Kabilomvani okᴜ bizᴜri nyazᴜ 'diyi yi drilebarᴜ. Eri 'yo ma tia, E'yo 'diyi yi e'yo adarᴜ Munguni 'diyi. 10Ma nga di ma eco va eri ma palaa eri inzizᴜ, te eri 'yo ma tia, Mi 'ye 'dini kᴜ! Ma ovᴜ ati'boni trotro mile, azini adripi mini e'yo Yesuni ma eti nzepi 'diyile. Mi inzi Mungu'i. A'disikᴜ e'yo Yesuni ma eti nzeza eri orindi e'yo olᴜza nabilerini. 11Ma ndre 'bu zi i ti mgborᴜ, te mi ne, akanya emverᴜ! 'Da 'ba ripi driniari ma ru Asi Ada'i azini Adarᴜ'i; eri e'yo li azini a'di 'di e'yo kililirᴜrisi. 12Mileni di aci ma andre drilele, oku ndrizarᴜ kakaᴜ ovᴜ eri ma dria; eri ru be sizarᴜ, te 'ba alᴜni nini kᴜ, kiri eri ma ngᴜlᴜpi nini. 13Eri su bongo yini sᴜle ari ma aliari i ruaa, omve rᴜni E'yo Munguni'i. 14Asikari ongᴜlᴜmᴜrᴜ 'bua, ripi akanya emverᴜ ma dria, bongo mile be nyiriari emverᴜ azini alarᴜ supi yi rᴜaa 'diyi bi vᴜtini. 15Sei cizarᴜ efᴜ eri ma tilia, eri ma oga suru ndᴜ ndᴜ ani, eri nga yi oce kali ayarᴜsi; eri nga tᴜ pari aoko adrarᴜ Mungu Okpo E'ini ma patiefi ma su nzizᴜri ma dria. 16Si ru bongo erini ma ruaa, azini eri ma opilia 'dini, MELEKI MELEKINI AZINI OPI OPINI. 17Ma ndre malaika alᴜni pa soria etu ma alia, eri oyᴜ o'duko urusi 'yozᴜ aria dria sapi 'bu ma eselia agadua 'diyi ma tia kini, Emi emu, emi okᴜ emi tualᴜ omu amborᴜ Mungunia, 18emi ma nya opi piyi zarᴜ, 'ba asikari dri cepi 'diyi pie, 'ba ombarᴜ 'diyi pie azini akanya za pie, 'ba ripi yi ma dria 'diyi pie, ma nya 'ba dria zarᴜ, kari'ba pie ati'ba be, 'ba nyiri 'diyi pie, 'ba 'wara be. 19Ma ndre nguru nderi, opi nyakua 'diyi pie, asikari ongᴜlᴜmᴜrᴜ yini be, okᴜ yi tualᴜ a'di 'dizᴜ 'ba ripi akanya driari be, asikari ongᴜlᴜmᴜrᴜ erini pie. 20Yi bi ngurᴜ pi nabi inzorᴜ tali erini ani 'ba ovᴜpi eceta nguruni be eri ma wura inzipi 'diyi icizᴜ 'diyi 'yepi eri ma miliari be. O'be yi iri tro idrirᴜ aci mirile vepi barutisiri ma alia. 21Ofu 'ba acepi 'diyi sei 'ba ripi akanya ma driarini, efᴜpi eri ma tiliarisi; aria dria nga di tra za yinisi.

will be added

X\