E'YO ECEZA 18

1E'yo 'diyi ma vᴜtia ma ndre malaika azinini engaria 'buarisi esizᴜ va, eri okpo be amborᴜ; nyaku ovᴜ mvezarᴜ diza erinisi. 2Eri oyᴜ uru o'duko okporᴜsi kini, Babuloni amborᴜri e'de va 'bo, eri e'de va 'bo! Eri oja i pari orindi onzi 'diyini adrizᴜrirᴜ, azini pari orindi alatara kokorᴜ dria 'diyini yi ta mbazᴜrirᴜ, azini pari aria alatara kokorᴜ dria, 'bani ngule onzi 'diyini yi ta mbazᴜrirᴜ indi ; 3a'disikᴜ suru dria o'de va patiefi ma su awu erini ali o'bazᴜrinisi 'bo, opi nyakua 'diyi o'ba ali erisi ra, 'ba afa ozipi nyakua 'diyi ofᴜ afa e'irᴜ lonyi erini i enyazᴜri ma okposi. 4Ma eri o'duko azini engapi 'buari kini, Ba mani la, emi ma efᴜ eri ma aliarisi ra, emi kazᴜ ti ecizᴜ eri be azi onzi erini ma alia kᴜ, emi kazᴜ inzata isuzᴜ eri be kᴜ indi; 5a'disikᴜ azi onzi erini okᴜ yi tualᴜ cazᴜ trᴜa 'bua urᴜ, azini Mungu ega ezata erini. 6Mi ofe eri ekile erini ofelerile, mi ofe eri paleko iri 'yeta erini 'yele 'diyi vᴜsi ; okelea erini afa osazᴜri ma alia mi osa afa eri dri paleko iri. 7Ekile erini diza fele i ngᴜlᴜpi dririle, azini erini i enyale lonyi inisirile, mi ma ofe eri dri inzata pi candi be 'dipi. Erini 'yole i asia kini, Ma ri okᴜ opirᴜrirᴜ, ma ovᴜni awᴜzioᴜni kᴜ, ma ngani candi ndre alᴜni kᴜ, 'dinirisi, 8e'yo 'disi inzata erini 'diyi nga eca o'du alᴜ ma alia, yi 'di : dra pi, awᴜ wuza pi, liki pie, eri nga ovᴜ vezarᴜ acisi kicikici indi; a'disikᴜ Opi Mungu e'yo erini lipiri ovᴜ okporᴜ. 9Opi nyakua ndra ali o'bapi erisi, yi enyapi eri be lonyi erinisi 'diyi nga awᴜ wᴜ azini lulu ga, yini aci eri vepiri ma acika ndrelerisi; 10yini pa soria re inzata erini ma urisi, 'yozᴜ kini, Eyawaye! Eyawaye! aku amborᴜ Babuloni ye! aku okpo beri ye! E'yo liza mini eca sawa alᴜ ma alia coti 'doni! 11'Ba afa ozipi nyakua 'diyi nga awᴜ wᴜ erisi, nga lulu ga eri ma e'yosi indi, a'disikᴜ 'ba alᴜni afa yini ejileri jezᴜni dika yo; 12afa ejiza melerᴜri pi, dahaburᴜri pie, oni aje nyapi tᴜri pie, nyoro ndrizarᴜ aje nyapi tᴜri pie, bongo mile be nyiriari pie, bongo okalakokalarᴜri pie, lasirᴜri pie, ekarᴜri pie; azini pati dria aji be arikarirᴜ 'diyi pie, afazᴜ dria edele ewasisi 'diyi pie, afazᴜ dria edele pati aje nyapi tᴜrisi 'diyi pie, molasiri pie, ayasiri pie, oni ndrizarᴜrisiri pie; 13madalasini pie, afa aji be arikarirᴜri pie, obiese vele veri pie, odᴜ rua efizᴜri pie, odᴜ arikarirᴜri pie, patiefi ma su pie, mizeitu odᴜ pie, anyafᴜra inikinirᴜri pie, nganu pie, ti pie, kabilo pie, akanya pie, gari akanyani pie, 'ba rua pie, orindi 'bani pie. 14Patiefi mi asini lele avasi 'diyi kᴜ mi ra, afa osorᴜ 'diyi pi avi mi dri dria afa ndrizarᴜ 'diyi be ra, 'ba ngani yi isu dika alᴜni kᴜ! 15'Ba afa 'diyi ozipi ofᴜpi afa e'irᴜ eri ma e'yosi 'diyi nga pa oso re inzata erini ma urisi, awᴜ wᴜria azini lulu garia, 16kini, Eyawaye! Eyawaye! aku amborᴜri ye! bongo mile be nyiriari pi supi okalakokalarᴜri pie, ekarᴜri pie, mele pi supi i ruaa onyiafarᴜ oni aje nyapi tᴜri pie, nyoro ndrizarᴜ aje nyapi tᴜri pieri ye! 17Lonyi amborᴜ 'dopi ja dri sawa alᴜ ma alia coti 'doni ya! Ba oguru ma ti opipi 'diyi dria alᴜ alᴜ, 'ba dria acipi yi dria kani angᴜ ngoria 'diyi pie, 'ba azi ngapi oguru ma alia 'diyi pie, 'ba dria azi ngapi miria 'diyi pie, oso pa re, 18yi nga otre uru yini aci eri vezᴜri ma acika ndrelerisi, kini, Aku i sipi aku amborᴜ 'dirileri ngori ya? 19Yi nga irifᴜra omvᴜ yi dria, nga otre uru, awᴜ wᴜria azini lulu garia kini, Eyawaye! Eyawaye! aku amborᴜri ye! pari 'ba dria ovᴜpi oguru be miri ma alia 'diyini ofᴜzᴜ afa e'irᴜ lonyi erini tᴜrisiri ye! Ja eri ma dri sawa alᴜ ma alia coti 'doni ya! 20Mi 'bu la, mi ma ovᴜ ayikosi erisi, emi 'ba alatararᴜ 'diyi la, 'ba ti opele 'diyi pie, nabi pie, a'disikᴜ Munguni e'yo emini lile eri ma driarisi! 21Malaika alᴜ okporᴜri nga di oni ekile oni anya 'izᴜrileri 'du 'be miri alia, kini, Yi nga Babuloni, aku amborᴜri, 'be va rugbu okposi 'dini, yi ngani eri isu dika alᴜni kᴜ; 22'ba ngani 'ba o'di copi 'diyi pi ma o'duko eri mi alia dika alᴜni kᴜ, 'ba ongo ngopi 'diyi pie, 'ba ejeleko vᴜpi 'diyi pie, 'ba gᴜka vᴜpi 'diyi pie dria; 'ba ondᴜoᴜrᴜ afa dria ndᴜ ndᴜ edepi 'diyi ngani e'da mi alia dika alᴜni kᴜ; 'ba ngani oni anya 'izᴜri ma awᴜ eri mi alia dika alᴜni kᴜ; 23diza talani ngani di mi alia dika alᴜni kᴜ ; 'ba ngani izio pi ma o'duko, amurua ma o'duko be, eri mi alia dika alᴜni kᴜ ; a'disikᴜ 'ba mini afa ozipi 'diyi ovᴜ ndra 'ba amborᴜ nyakua, azini mi ici ndra suru dria ole minisi. 24Te yi isu nabi pi ma ari eri ma alia, 'ba alatararᴜ 'diyi pie, 'ba dria yini ofule nyakua 'diyi pie dria.

will be added

X\