E'YO ECEZA 17

1Te malaika aziri ovᴜpi okele be aziri 'diyi ma azi alᴜ emu ra, nga e'yo 'yo ma be kini, Mi emu 'doa, ma nga okᴜ awuoᴜrᴜ ali o'bapi tᴜ ripi yi kakaᴜ ma driari ma e'yo liza lile driniari ece mi dri; 2eri'i opi amborᴜ nyakua 'diyini ndra ali o'bazᴜ eri beri, 'ba ovᴜpi nyakua 'diyini atizᴜ patiefi ma su eri ma ali o'bazanirisiri'i. 3Te eri 'du ma Orindi alia jizᴜ roko dria, ma ne okᴜni riria ngurᴜ ekarᴜ ma dria.. nguru nderi ma rua ga tre rᴜ Mungu o'dazᴜ 'diyisi, eri dri be aziri, o'yᴜ be mᴜdri. 4Okᴜ nderi su bongo okalakokalarᴜri pi i ruaa bongo ekarᴜri be, su vini i ruaa mele pi onyiafarᴜ, oni aje nyapi tᴜ 'diyi pie, nyoro ndrizarᴜ aje nyapi tᴜ 'diyi pie, eri ma dria okelea melerᴜ afa ngule onzi 'diyi pini gazᴜ alenia tre afa alatara kokorᴜ eri ma ali o'bazani 'diyi beri; 5si rᴜ eri andretia e'yo zizarᴜ 'dini: BABULONI AMBORU, OKU AWUOURU ALI O'BAPI 'DIYI PI MA ANDRI E'YO NGULE ONZI NYAKUA 'DIYI BERI'I. 6Ma ne okᴜ nderi ovᴜ atizarᴜ 'ba alatararᴜ 'diyi ma arisi, azini 'ba Yesu ma e'yo eti. nzepi 'diyi ma arisi indi. Ma ka eri ne ra, ma osu tᴜ osuta amborᴜsi. 7Malaika nga di 'yo ma tia, Mi osu a'disi ya? Ma nga e'yo zizarᴜ okᴜ nde pini ece mi dri, nguru eri jipi ovᴜpi dri be aziri o'yᴜ mᴜdriri be. 8Nguru mini ndreleri ovᴜ ndra indi, te eri curu'do yo, te eri 'ye efᴜ 'bile asikokorᴜria muzᴜ dri jazᴜ; 'ba ovᴜpi nyakua, yini yi ma rᴜ sile buku idrini ma alia engazᴜ ewu nyaku ma eti 'bazᴜria kᴜ 'diyi nga osu osu yini nguru ndreria, a'disikᴜ eri ndra indi, te eri curu’do yo, te eri nga eca ndo. 9Asisile ondᴜa beri eri 'do'i: dri aziri yi oni izᴜrᴜ aziri, okᴜni rizᴜ yi ma dria 'diyi; 10opi aziri yi indi, towi 'diyi o'de 'bo, alᴜri ace indi, aziniri ecani nga kᴜ; eri ka nga emu ra eri ma ovᴜ ewu were. 11Nguru ovᴜpi ndra indi te curu’do yori, eri ma ngᴜlᴜpi vini opi arori'i, eri ovᴜ 'ba aziri 'diyi ma azi alᴜ, te eri mu dri ja ra. 12O'yᴜ mᴜdri mini ndrele 'diyi yi opi mᴜdri opi nyapi nga kᴜ 'diyi, te yi nga okpo isu ovᴜzᴜ opirᴜ sawa alᴜ, nguru nde be tualᴜ. 13Yi ovᴜ asisile be alᴜ, nga okpo yini fe okpo opirᴜri be nguru nderi dri; 14yi nga a'di 'di Kabilomva be, te Kabilomvani nga yi aga ra, erini ovᴜle Opi opini azini Meleki melekinirisi, azini 'ba ovᴜpi eri be 'diyi yi 'ba omvele, 'ba opele, 'ba asi adarᴜ be 'diyi. 15Eri 'yo ma tia, Yi nde mini ndrele okᴜ awuoᴜrᴜ ali o'bapirini rizᴜ driniari, 'diri 'ba pie, 'ba ongᴜlᴜmᴜrᴜ pie, suru pie, ti 'yoza pie. 16O'yᴜ mᴜdri mini ndrele 'diyi azini nguru nde yi nga okᴜ awuoᴜrᴜ ali o'bapiri ngu onzi ; yi nga eri kᴜ pirini azini pililirᴜ, nga za eri rᴜaari nya, nga eri eve acisi kicikici, 17a'disikᴜ Mungu 'ba e'yo yi asia e'yo erini leleri 'yezᴜ, ovᴜzᴜ asisile be alᴜ, opi nyaza yini fezᴜ nguru dri, cazᴜ kpere e'yo Munguni 'yole 'diyini ngazᴜ yi 'yezᴜria. 18Okᴜ mini ndrele 'diri eri aku amborᴜ opi nyapi opi nyakua 'diyi ma driari'i.

will be added

X\