E'YO ECEZA 12

1Eceta amborᴜ e'da i 'bua : okᴜ etu supi i ruaa, ovᴜpi mba be i ma pa ageleari, eri ma dria ekilaza 'bi'bio mᴜdri drini iri beri ci; 2eri ovᴜ okporovᴜrᴜ, eri otre mvaazoni eri e'dulerisi, erini ovᴜria rua suza be e'yo mva osizanisi. 3Eceta azini e'da i 'bua indi: mi ne, uri ambo ekarᴜ, ovᴜpi dri be aziri o'yᴜ be mᴜdriri, eri ma dri aziri 'diyi ma dria oku opini aziri. 4Sobini okᴜ 'bi'bio 'bua 'diyi ma esele na ma azi alᴜri ra, o'be yi va nyakua. Uri nde so pa okᴜ te 'yepi osipiri ma drilia, okᴜ nde ka nga osi ra eri ma nya mva erini ani beni. 5Eri osi agiamva, ngapi suru dria ma dri cepi kali ayarᴜsiri; yi ari mva erini eri 'duzᴜ Mungu vᴜ ogᴜŋa erinia, 6te okᴜ nde apa roko dria, pari Munguni edele eri driria, ma fe nyaka eri dri 'dale o'du alifᴜ alᴜ drini tᴜrᴜ iri drini kali azia. 7Omba nga di ovᴜ 'bua : Mikaeli mu malaika erini be omba 'bazᴜ uri nde be ; te uri pi malaika erini be 'ba omba ra, 8te yi agani kᴜ, isuni pari yini 'bua dika kᴜ. 9Yi 'be uri amborᴜ nderi va, eri uri oku drio, omvele 'Ba asᴜ Sᴜpiri'i, azini Satani'iri, eri 'ba wudrikuru dria icipiri—yi 'be eri va nyakua, o'be vini malaika erini 'diyi va eri be indi. 10Ma eri o'duko amborᴜ 'bua kini, Pata pi eca 'bo, okpo pie, opi nyaza Mungu amanirini pie, Kristo eriniri ma okpo opirᴜri pie, a'disikᴜ 'be 'ba adripi amani 'diyi ma asᴜ sᴜpi, asᴜ sᴜpi yi ruaa Mungu amani ma milia etusi inisiri va 'bo. 11Yi nde eri ari Kabilomvanisi, azini e'yo eti nzeza yinirisi; yi leni idri yi ma ngᴜlᴜpini kᴜ kpere yini draria. 12E'yo 'disi mi 'bu la, emi ma ovᴜ ayikosi 'ba ovᴜpi mi alia 'diyi be! Te candi nyaku dri miri be, a'disikᴜ 'ba 'ba asᴜ sᴜpiri esi va emi vᴜ adra amborᴜ be tᴜ, erini nile ewu ini ace wererisi! 13Uri ka ndre 'be i va nyakua ra, eri nga okᴜ nde agiamva osipiri inza. 14Te yi fe opile iri aji amborᴜni 'diyi okᴜ nde dri, eri ma sa ani uri ma miliasi i paria roko dria, pari nderia yi nga nyaka fe eri dri ewu alᴜ, azini ewu iri, ewu ma ali be. 15Uri nga yi wu i tilesi yi arale okᴜ ma vᴜtisi, lezᴜ yi arani eri 'duzᴜ. 16Te nyaku ko okᴜ ma aza, nyaku nga i tile zi yi ara urini wule i tilesiri mvuzᴜ. 17Uri ovᴜ adrasi okᴜ vᴜ, eri fᴜ mu omba 'bazᴜ eri ma ori acepi, 'ba azita Munguni ma ta mbapi e'yo Yesuni ma eti nzepi 'diyi be. Eri so pa cinya miri tiari ma dria.

will be added

X\