FILEMONA 1

1Paulo, 'ba arurᴜ Kristo Yesu ma e'yosiri, Timoteo adripi amani be, Filemona 'ba azi ngapi ama be tualᴜ amani leleri pi vᴜ 2Apia amvipi amani pie, Arikipo asikarirᴜ ama be tualᴜri pie, kanisa i okᴜpi jo mini ma aliari pie: 3'Yeta anzutiri pi ma ovᴜ emi vᴜ asi anzurᴜ be engazᴜ Mungu Ata amani vᴜ azini Opi Yesu Kristo vᴜ. 4Ma awa'difo fe Mungu mani vᴜ o'du dria, mani e'yo mini egaria Mungu ziza mani ma alia, 5mani leta mini avasiri pi, a'ita mini be Opi Yesu vᴜ azini 'ba alatararᴜ 'diyi vᴜ driari ma e'yo erilerisi; 6ma zi kini ti ecita a'ita minirini ma fe 'ba ma ni e'yo onyirᴜ dria alᴜ alᴜ ovᴜpi ama alia Kristosiri. 7Te ma adri ovᴜ ayiko be tᴜ azini asi omiza be tᴜ leta mini avasirisi, ma adri la, a'disikᴜ 'ba alatararᴜ 'diyini okpo o'dirᴜ isule yi ma asia mi dririsi. 8E'yo 'dirisi, ma ka tro ovᴜ okpo be Kristo ma alia azita azizᴜ mi dri e'yo dri fupi ciri 'yezᴜ ra ti, 9leta ma e'yosi ma azini azitarᴜ kᴜ, te ma matᴜ 'ba mi vᴜ—ma'i mbazaᴜ Paulo, curu'do 'ba arurᴜ Kristo Yesu ma e'yosiri'i— 10ma matᴜ 'ba mi vᴜ ma mvi Onesimo ma e'yosi, mani tile mani ovᴜria arujoari'i. 11(Eri koni ndra mi aza onyirᴜ kᴜ, te curu'do eri ama aza ko mi be onyirᴜ.) 12Ma omvi eri ma ngᴜ-lᴜpi mi vᴜ dika, eri asi mani ma adari'i. 13Ma le te eri ma ta mba ma be 'doa, eri ma ko ani ma aza mi paria, pari yini ma ombezᴜ e'yo barisiri ma alia; 14te ma leni e'yo alᴜni 'ye asisile mini nikokorᴜ kᴜ, 'dini e'yo onyirᴜ mini ma ovᴜ mini ecole e'yo andini 'yezarᴜ kᴜrisi 'dini kᴜ, te mi asini lele cenirisi. 15Te kani eri ovᴜ esele cozarᴜ mi be ewu were e'yo 'disi yani, mini ani eri a'izᴜ dika ovᴜzᴜ mi be 'dani 'dani, 16ati'borᴜ dika kᴜ te aga ati'bo ra, adripi ovᴜpi lezarᴜrirᴜ, tᴜni ma dri, te agapiri mi dri, e'yo ruanisi azini e'yo Opinisi indi. 17Mi ka ega ma mi agyini, mi ma a'i eri ekile mini ma alilerile. 18Te eri ka ndra onzi 'ye mi vᴜ, kani nya marini yani, mi si e'yo nderi ma dria. 19Ma'i Paulo, ma ti dri ma'i ma nga eri ofe ra—te di mari mini ma vᴜri eri mi ngᴜlᴜpi'i, ma ka e'yoni 'yo mi tia kᴜ ti. 20E, ma adri, ma le te ayiko isu mi vᴜ Opi ma alia. Mi ma fe okpo o'dirᴜ ma asia Kristo ma alia fo. 21Te mani nile mi nga e'yo 'diri a'i rarisi, ma si mi vᴜ ani, te ma ni ra mi nga 'ye aga e'yo mani 'yoleri ra. 22Te mi ede pari omuni lazᴜri ngonde ma dri indi, a'disikᴜ ma ovᴜ asi tezasi egazᴜ ma nga ovᴜ fezarᴜ emi dri, emini Mungu zilerisi. 23Epafra, 'ba arurᴜ ma be tualᴜ Kristo ma aliari pi zi mi ci ci, 24Marako pie, Arisitariko pie, Dema pie, Luka pie, 'ba azi ngapi ma be tualᴜ 'diyi. 25'Yeta anzutiri Opi amani Yesu Kristoni ma ovᴜ orindi mini be. Amena.

will be added

X\