FILIPIA 2

1Asi omiza ka ovᴜ Kristo ma alia ci, kani asi omiza letani, kani ti ecita Orindini, kani asi ndriza ale beri, kani yikini, 2emi ma fe ayiko mani ma ga tre, emini ovᴜle dria asi alᴜsi, ovᴜzᴜ leta alᴜ be, asisile alᴜ be, egata alᴜ be indirisi. 3Emi ma 'ye e'yo awatasi kᴜ, kani afᴜ onzisi kᴜ indi, te asisile afᴜ kokorᴜsi emi dria alᴜ alᴜ ma inzi emi agyi aga emini emi ngᴜlᴜpi inzilerile. 4Emi alᴜ alᴜ ma ega e'yo emi ngᴜlᴜpini a'dule kᴜ, te emi dria alᴜ alᴜ ma ega e'yo 'ba azinini indi. 5Emi ma ovᴜ asisile ndra ovᴜpi Kristo Yesu ma aliari be emi ma alia, 6eri'i ovᴜpi wura Munguni beri egani ndra e'yo ini ovᴜzᴜ Mungu be tro trori ovᴜ afa ini arile bizᴜ i ma ngᴜlᴜpinirᴜri'i kᴜ, 7te eri 'ba i ngᴜlᴜpi ovᴜzᴜ tokorᴜ, erini wura ati'boni 'duria, erini i ojaria ovᴜzᴜ wura 'baniri be. 8Te erini wura 'ba adaniri isuria 'bo, eri 'ba i va ovᴜzᴜ inzita kokorᴜ, e'yo erizᴜ kpere dra tia, ada drata pati rᴜaari'i. 9E'yo 'disi Mungu 'ba eri uru inzizarᴜ tᴜ, ru ru azini 'diyi agapi driari fezᴜ eri dri, 10'dini ru Yesu'irisi 'ba dria ma osi kᴜmᴜti va, kani 'ba 'bua 'diyi, kani 'ba nyakua 'diyi, kani 'ba angᴜ valerᴜa 'diyi, 11azini andre dria ma e'da Yesu Kristoni Opi'i, diza fezᴜ Mungu Ata dri ani. 12'Dinile, 'ba mani lele 'diyi, ekile emini e'yo mani erile o'du dria-rile, kiri mani ovᴜria emi be indiria a'dule kᴜ, te curu'do agapiri mani ovᴜria yoria, emi ma nga azi pata eminirini rutasi azini rua yaza be; 13a'disikᴜ eri'i e'yo 'yepi emi alia fepi emini e'yo onyirᴜ erini leleri lezᴜ azini 'yezᴜ indirini ovᴜle Mungu'irisi. 14Emi ma 'ye e'yo dria onota kokorᴜ azini agata gaza kokorᴜ, 15emi ma ovᴜ ani e'yo kokorᴜ, inzo kokorᴜ, anzi Munguni ezata kokorᴜ, 'ba ambo be yi ojapi lokirirᴜ 'diyi ma eselia; emi e'da yi ma eselia ekile talale wudrikurua, 16emini e'yo idrini eceria ; mani ngazᴜ ma enyazᴜ ani o'du Kristoniria, mani nzᴜle toko kᴜ, kani mani ma ecandile azisi oye kᴜrisi. 17Te yi ka nga ari mani osᴜ edetarᴜ, edeta kani azi ngaza a'ita eminirini ma dria, ma ovᴜ di ayikosi tualᴜ emi be dria. 18'Dinile emi ma ovᴜ vini ayiko be, ovᴜzᴜ ayikosi ma be tualᴜ indr. 19Te ma ega ma asia Opi Yesu ma alia, Timoteo ma ti pezᴜ emi vᴜ mbelerᴜ, mani e'yo emini nizᴜ, asi mani omizᴜ ani beni. 20A'disikᴜ ma vᴜ 'ba azini ovᴜpi asisile 'dinileri be, ngapi e'yo emini egapi asi adarᴜrisiri alᴜni yo. 21Te 'ba dria yi e'yo yi ma ngᴜlᴜpini ndru, yi ndruni e'yo Yesu Kristoni kᴜ. 22Te emi ni e'yo onyirᴜ erini, erini azi ngazᴜ ma be e'yo barini kuzᴜ ekile mvani adrile azi ngale ata berileri ra. 23E'yo 'disi ma ega ma asia eri ti pezᴜ mbele, ma ka nga e'yo ngapi i 'yepi ma vᴜri ni 'bo; 24te ma ovᴜ a'itasi Opi ma alia egazᴜ ace were ma ngᴜlᴜpini nga ca emi vᴜ ra. 25Te ma milia eri onyirᴜ ma ma pe adripi mani Epafrodito ma ti emi vᴜ, eri 'ba azi ngapi ma be ovᴜpi asikarirᴜ ma be tualᴜ, 'ba emini tini epele alio mani ma aza kozᴜri'i; 26te eri ovᴜ avasi tᴜ lezᴜ emi dria ndrezᴜ, azini eri ovᴜ candisi tᴜ emini erile kini eri ovᴜ azorᴜrisi. 27Eri ovᴜ ndra azorᴜ ada, 'ye dra ra. Te Mungu 'ba yiki eri vᴜ, te eri vᴜ a'dule kᴜ, ma vᴜ indi, ma kazᴜ candi isuzᴜ candi azini ma dria kᴜ. 28E'yo 'disi ma pe eri ma ti emi vᴜ avasi aga ra, 'dini emi ka eri ndre ra emi ma ovᴜ ani ayikosi, te ma'i indi, candi mani ma azi ma nze i ra. 29E'yo 'disi emi ma a'i eri Opi ma alia ayiko driasi; te emi ma inzi 'ba 'dinile 'diyi inzi, 30a'disikᴜ erini ndra 'yele drale azi Kristoni ma e'yosi, erini idri ini adile dra dririsi, eri ma fe ani azi emini ma ma aza kozᴜ acepi nga 'yele kᴜrini i dezᴜ kililirᴜ beni.

will be added

X\