FILIPIA 1

1Paulo pi Timoteo be, ovᴜpi ati'ba Kristo Yesuni 'diyi, 'Ba alatararᴜ dria Kristo Yesu ma alia ovᴜpi Filipia 'diyi pi vᴜ, 'ba kanisa andripi 'diyi pie, 'ba kanisa ma aza kopi 'diyi pie : 2'Yeta anzutiri pi ma ovᴜ emi vᴜ asi anzurᴜ be engazᴜ Mungu Ata amani pi vᴜ Opi Yesu Kristo be. 3Ma awa'difo 'yo Mungu mani vᴜ paleko dria mani e'yo emini egaria, 4zita mani ma alia dria ma adri Mungu zi emi dria ma e'yosi etuzu ayiko be, 5emini ti ecile ma be e'yo barini kuzᴜ engazᴜ o'du ndra oko 'darisi ecazᴜ kpere o'du curu'dorisi. 6Te ma a'i e'yo 'diri ma asia ada kini, Mungu azi onyirᴜ e'dopi emi aliari nga fe azi ndeni i dezᴜ dri fuzᴜ kilili cazᴜ kpere o'du Yesu Kristoniria. 7Mani emi dria ma e'yo egazᴜ 'dinileri eri 'yeke, a'disikᴜ e'yo eminirini ovᴜle ma asiarisi, azini mani de ovᴜria ombe-zarᴜ kani mani de agata garia e'yo bari ma e'yosi azini e'yo olᴜria okposi, emi dria ovᴜ ti ecizᴜ ma be 'yeta anzutirisi. 8Te Mungu ovᴜ 'ba e'yo mani ma eti nipiri, eri ni kini ava emini dria va ma tᴜ leta avasi Kristo Yesuniri ma alia. 9Te ma zi Mungu 'dini, kini, leta avasi eminiri ma zo nga drile dika dika nita pi ma alia ondᴜa e'yo eti vazᴜri be dria, 10emi ma ama ani e'yo agapi onyisi ra 'diyi yi a'izᴜ beni, emi ma ovᴜ ani asi alarᴜ be azini onzi kokorᴜ kpere cazᴜ o'du Kristo-niria, 11emi ma ga tre efi 'yaza e'yo kililirᴜni ovᴜpi geri Yesu Kristonisiri be, diza pi fezᴜ ani Mungu dri inzita be. 12Te ma le emi ma ni, ma adripi, e'yo ndra yi 'yepi ma ruaa 'diyi efᴜ tᴜni e'yo barini kuzᴜ, 13te geri 'disi asikari dria aku opini ma agei tepi 'diyi, 'ba azini pie dria, yi ni ra ma ovᴜ ombezarᴜ Kristo ma e'yosi ; 14azini adripi Opi ma alia 'diyi ma esele tᴜ tᴜni isu a'ita o'dirᴜ anzirikᴜ mani ma e'yosi, ovᴜzᴜ ani asi tezasi e'yo Munguni olᴜzᴜ uri kokorᴜ aga ra. 15Adarᴜ 'ba azini yi e'yo Kristoni olᴜ ma'yalasi azini abalasi, te 'ba azini 'diyi olᴜ asi onyirᴜsi. 16'Ba nde 'diyi yi e'yo olᴜ leta avasirisi yini nile Mungu 'ba ma 'doa e'yo bari ma eti nzezᴜrisi; 17te 'ba azini 'dayi yi e'yo Kristoni olᴜ awatasi, asi alarᴜsi kᴜ, yini egale candi erezᴜ ma dri anzirikᴜ ma ombezᴜri ma driarisi. 18Te e'yo ngoni ya? Geri driasi, kani asi inzorᴜsi, kani asi adarᴜsi, yi Kristoni olᴜ'i; e'yo 'dirisi ma ovᴜ ayikosi, adarᴜ ma nga ovᴜ ani ayikosi 'dani. 19Te ma ni ra e'yo 'diri nga ofᴜ ma dri patarᴜ, zita eminisi azini Orindi Yesu Kristoni ovᴜpi fezarᴜ ma dririsi ; 20te ma ovᴜ asi tezasi azini ma ega asi driasi ma ngani ovᴜ drinzasi e'yo alᴜnisi kᴜ, te curu'do ekile driorile, mani e'yo olᴜle uri kokorᴜrisi, Kristo ma ovᴜ inzizarᴜ rua maniri ma alia, kani idrisi, kani dratasi. 21Te mani ovᴜzᴜ idrirᴜri eri Kristo'i, te drazᴜ rari eri orodrirᴜ. 22Te ka ovᴜ mani ngazᴜ ovᴜzᴜ idrirᴜ ruasiri'i, 'diri nga ovᴜ ma dri efi 'yaza azi mani 'yelerini. Ka'dini ma nini kᴜ ma nga ngonileri pe ya. 23Asi mani le e'yo 'diyi iri tro. Ma le dri kozᴜ muzᴜ ovᴜzᴜ Kristo be ra 'bo, 'di onyirᴜ aga dria. 24Te agapi rari le ma ma ovᴜ rᴜa ma alia 'dani e'yo eminisi. 25Te mani e'yo a'iria ma asia 'dinile ma ni ra ma nga ovᴜ 'dani, ma nga ovᴜ emi be dria emini zozᴜ ani drile a'ita ma alia ayikosi, 26emi ma enya emi tᴜ aga ra Kristo Yesu ma alia e'yo manisi beni, mani ecale emi eselia dikarisi. 27Te di, acita emini ma ovᴜ ekile e'yo barᴜ Kristonirini lelerile, ka'dinile ma ka eca emi vᴜ emi ndrezᴜ, kani ma ka eca kᴜ, ma ma eri e'yo emini, kini, emi so pa okporᴜ orindi alᴜsi, azini emi 'di a'di tualᴜ asi alᴜsi a'ita e'yo barinirisi ; 28emi ma 'ye urisi ari'ba emini ma e'yosi alᴜni kᴜ. E'yo 'diri ovᴜ yi dri ecetarᴜ dri jaza yini ecezᴜ, te eri vini ecetarᴜ pata emini engapi Mungu vᴜri ecezᴜ indi. 29Te eri ovᴜ fezarᴜ emi dri Kristosi, kiri eri a'izᴜ a'dule kᴜ, te candi nyazᴜ eri ma e'yosi indi, 30emini ovᴜria a'di be tro tro ekile emini ndrele ma vᴜ, azini emini erile curu'do ovᴜ ma vᴜ indirile.

will be added

X\