MATAYO 6

1Emi te emi agei emi ma 'ye e'yo kililirᴜ emini 'ba ma milia, ma ndre ani emi beni kᴜ; emi ka 'ye 'dini, emi ngani oya isu Ati emini ovᴜpi 'buari vᴜ kᴜ. 2Mi vᴜ gᴜka mi milia mini afa awaria 'ba aliorᴜ dri kᴜ, ekile 'ba lokiri be 'diyini 'yele pari 'bani yi okᴜzᴜria azini geria, 'ba nde ma inzi yi ani benirile. Ma 'yo emi tia ndi ndi, yi bi oya yini 'bo. 3Te mini afa awaria 'ba aliorᴜ dri, dri eji mini ma ni e'yo dri ndi minirini 'yeleri kᴜ, 4feta mini 'ba aliorᴜ driri ma ovᴜ ani ndindirᴜ; te mi Ati mi ndrepi pari ndindirᴜriari nga mi ofe ra. 5Emi ka Mungu zi, emi ma ovᴜ 'ba lokiri be 'diyile kᴜ; yini lele pa sozᴜ Mungu zizᴜ pari 'bani yi okᴜzᴜria azini geri aritia, yi ma e'da ani 'ba ma milia benirisi. Ma 'yo emi tia ndi ndi, yi bi oya yini 'bo. 6Te mini ziria, mi fi jo aliza mini ma alia, mi opi jotile mini ci, mi zi mi Ati ovᴜpi pari ndindirᴜriari ma tia, te mi Ati mi ndrepi pari ndindirᴜriari nga mi ofe ra. 7Te emini ziria emi ma 'yo e'yo toko toko 'ba jururᴜ 'diyini 'yelerile kᴜ; yini osule yi nga ovᴜ erizarᴜ e'yo 'yoza yini kakaᴜsirisi. 8E'yo 'disi emi si 'ba 'diyile kᴜ, te Ati emini ni e'yo emini leleri de nga emi zini eri tia kᴜ. 9Emi zi 'dini: Ata amani ovᴜpi 'buari, Ru mini ma ovᴜ inzizarᴜ. 10Suru mini ma emu, E'yo mini leleri ma 'ye i Nyakua ekile 'buarile. 11Mi fe andrᴜ ama dri nyaka dri fupi etu andrᴜsiri; 12Mi kᴜ mari amani, Amani mari 'ba afa amani nyapi 'diyini kᴜle 'borile; 13Mi ji ama obeta alia kᴜ, Te mi pa ama 'ba onzi dri. 14Emi ka 'ba ma ezata kᴜ ra, Ata emini 'buari nga ezata emini kᴜ indi; 15te emi ka 'ba ma ezata kᴜ kᴜ, Ata emini ngani vini ezata emini kᴜ kᴜ indi. 16Emi ka nyaka 'da, emi ma ovᴜ 'ba lokiri be mile onyupi candisi 'diyile kᴜ, a'disikᴜ yi oja yi ma andreti onzi, yi ma e'da 'ba nyaka 'dapirirᴜ 'ba ma milia ani beni. Ma 'yo emi tia ndi ndi, yi bi oya yini 'bo. 17Te mi ka nyaka 'da, mi efi mi dri odᴜsi, mi oji mi mile, 18'dini mi ma e'da 'ba nyaka 'dapirile 'ba ma milia kᴜ, te Ata mini ovᴜpi pari ndindirᴜari dri a'dule; Ata mi ndrepi pari ndindirᴜari nga mi ofe ra. 19Emi mba afa emini lonyirᴜ ma ta nyakua, pari oduduni afa mbezᴜ, afani urizᴜ uriria, pari oguoᴜni jo ma eti lᴜzᴜ afa oguzᴜria kᴜ, 20te emi mba afa emini lonyirᴜ ma ta 'bua, pari oduduni afa mbezᴜ, afani urizᴜ kᴜria, oguoᴜni jo ma eti lᴜzᴜ afa oguzᴜ kᴜria. 21Te asi mini nga ovᴜ pari mi lonyini ovᴜzᴜria 'daa. 22Tala ruaari eri mileni. E'yo 'disi mile mini ka ovᴜ alarᴜ, mi rua driani nga ovᴜ diza be; 23te mi mile ka ovᴜ onzi, angᴜ bizani nga ga mi ruaa tre. Diza ovᴜpi mi aliari ka ovᴜ inirᴜ, ini nde nga ovᴜ amborᴜ ngopi ya 24'Ba econi azi ngazarᴜ opi iri dri kᴜ; te eri nga alᴜri ngu onzi, nga aziniri le'i, kani eri nga i ebi alᴜri be, nga aziniri 'ba aparakarᴜ. Econi emini azi ngazarᴜ Mungu dri indi, afa nyakuari dri indi, 'dini kᴜ. 25E'yo 'disi ma 'yo emi tia, emi ma asi ma oti idri emini ma e'yosi, kini emi nga a'di nya ya, emi nga a'di mvu ya, 'dini kᴜ ; kani rua emini ma e'yosi, emi nga a'di su ya kᴜ. Te idri agani nyaka kᴜ ya? Rua agani bongo kᴜ ya? 26Emi lu aria 'bua 'diyi: yi rini ori kᴜ, loni kᴜ, okᴜni ero alia kᴜ, te Ata emini 'buari eri yi esᴜ nyakasini. Emi agani yi onyisini kᴜ ya? 27A'di'i emi eselia eco i ma zota erezarᴜ wuale alᴜsi asi otizasini ya? 28Emi ovᴜ asi otizasi bongo suzasi a'di e'yosi ya? Emi ega ojo asea 'diyi ma zota; yi ngani azi kᴜ, pini baka kᴜ indi; 29te ma 'yo emi tia, Sulemani'i ti, diza eriniri be dria, suni i yi ma azile kᴜ. 30Mungu ka afa suza fe afa idiza asea ovᴜpi andrᴜ indi te yini ngale 'bele dru aciari dri 'dini, eri ngani emi osu tᴜ aga 'diyi ra kᴜ ya, emi 'ba a'ita be were 'diyi la? 31Emi asi ma oti kᴜ, 'yozᴜ kini, Ama nga a'di nya ya? Ama nga a'di mvᴜ ya? Ama nga a'di su ya? 32'Diyi dria afa 'ba juruni ndale 'diyi; te Ata emini ovᴜpi 'buari ni ra kini emi le afa 'diyi dria ra. 33Emi nda oko suru Munguni pi e'yo kililirᴜ erini be, te afa 'diyi dria nga ovᴜ fezarᴜ emi dri erenirᴜ. 34Emi asi ma oti e'yo drᴜsirisi kᴜ; drᴜ ma asini nga oti i ma ngᴜlᴜpisi. O'du alᴜ ma e'yo onzi ca erisi ra.

will be added

X\