MATAYO 28

1O'du sabatonini deria, angᴜni 'baria atiria o'du alᴜsi, Maria Magadaleni pi emu nyadri ndrezᴜ Maria andiniri be. 2Mi ndre, oyakia amborᴜ oya angᴜ; malaika Opini esi va engazᴜ 'bua, nga eca era gᴜle tiari gᴜzᴜ amve, nga ri drinia. 3Wura erini e'da i ovile, afa suza erini emverᴜ sile. 4Eri ma urisi 'ba angᴜ agei tepi 'diyi ma rua ya ya, yi nga ofᴜ 'ba drazale. 5Te malaika nga e'yo omvi 'yo okᴜ tia kini, Emi rᴜ kᴜ; te ma ni ra emi Yesu ndra dile pati rᴜaari nda. 6Te eri 'doa yo; eri enga 'bo, ekile erini ndra 'yolerile. Emi emu 'doa, pari te erini lazᴜri ndre. 7Emi mu mbele e'yo olᴜ 'ba erini imbale 'diyi ma tia, kini, Eri enga 'ba draza eselia 'bo, te mi ndre, eri mu emi drilia oko Galilia; emi nga eri ndre 'dale. Mi ndre, ma olᴜ emi tia 'bo. 8Yi enga gᴜle tiarisi mbele, urisi azini ayiko amborᴜsi, yi nga nzᴜ e'yo olᴜ 'ba erini imbale 'diyi ma tia. 9Mi ndre, Yesu fu dri yi be, nga ‘yora, Ma zi emi ci ci! Yi emu eri ma pa bi, eri inzizᴜ. 10Yesu nga di 'yo yi tia, Emi rᴜ kᴜ ; emi mu, emi olᴜ ma adripi tia kini yi ma mu Galilia, yi nga ma ndre 'dale. 11Yini de muria, mi ndre, 'ba angᴜ ma agei tepi 'diyi ma azini mu aku amborᴜa, nga e'yo dria ovᴜpi 'yezarᴜ 'diyi olᴜ kuhani amborᴜ piyi ma tia. 12Yi ka yi ti okᴜ tualᴜ 'ba 'wara be, ka e'yo ede 'bo, yi fe silingi kakaᴜ asikari dri, 13kini, Emi 'yo kini 'Ba erini imbale 'diyi emu inisi avᴜni oguzᴜ, de amani o'du koria. 14E'yo 'di ka nga ca gavena ma bilia ra, ama nga eri imba eri ojazᴜ, ama nga e'yo emi driari trᴜ ra. 15Asikari nde nga silingi a'i, nga 'ye 'bani yi imbalerile ; e'yo 'diri ku 'ba Yahudini ma eselia wakaka ecazᴜ kpere andrᴜ. 16Te 'ba erini imbale mᴜdri drini alᴜ 'diyi nga mu Galilia, oni dria, pari Yesuni azile yi driria. 17Yi ka eri ndre ra, yi inzi eri; te 'ba azini a'ini kᴜ. 18Yesu nga emu 'yo yi tia kini, Okpo dria 'bu pi ma alia nyaku beri ovᴜ fezarᴜ ma dri. 19Emi mu ani, emi oja suru dria 'ba ma vᴜti bipirirᴜ, emi fe baputizi yi dri ru Atanisi, Mvinisi, Orindi Alatararᴜnisi, 20yi imbazᴜ e'yo dria ndra mani azile emi tia 'diyi ta mbazᴜ; te mi ndre, ma ovᴜ emi be o'du vᴜsi dria, kpere angᴜ wudrikuruni i deria.

will be added

X\