MATAYO 27

1Te angᴜni atiria o'bitisi, kuhani amborᴜ 'diyi pi 'ba 'wara 'ba drilia 'diyi be dria nga ti eci pari alᴜa e'yo Yesunisi eri fuzᴜ beni; 2yi nga eri ombe, nga eri ji fe gavena Pilato dri. 3Etu 'dasi Yudasi 'ba eri fepiri, ka ndre yi li dra eri dria 'bo, eri nga di i asi oja, nga silingi kali na omvi kuhani amborᴜ piyi dri 'ba 'wara be, 4kini, Ma eza ra, mani 'ba ezata kokorᴜri ma ari fele razᴜrisi. Te yi ‘yora, 'Di e'yo amani ngoa ya? 'Di e'yo mini. 5Eri nga silingi 'be, kᴜ hekalu alia, nga mvi mu i ti ra. 6Kuhani amborᴜ nga silingi 'du, nga 'yo kini, Econi yi 'bazarᴜ pari afa Munguni ma ta mbazᴜria kᴜ, yini ovᴜle ari ma ajenirisi. 7Ka e'yo ede 'bo, yi nga ani amvu 'ba imvᴜ sipirini je, ani'ba sazᴜ. 8'Dini omve amvu nderi Amvu Arini, ecazᴜ kpere andrᴜ. 9'Dini e'yo nabi Yeremiani 'yoleri eca i paria 'yeke, kini, Yi 'du silingi kali na, 'ba aje lile driniari ma aje, anzi Israelini lileniri, 10yi fe di yi ani amvu 'ba imvᴜ sipirini jezᴜ, Opini e'yoni azile ma tiarile. 11Yesu nga pa so gavena ma milia; gavena nga eri zi kini, Mi meleki 'ba Yahudini ya? Yesu nga 'yo eri tia, Mi 'yo 'yeke. 12Kuhani amborᴜ 'diyi pini asᴜ sᴜria eri rᴜaa 'ba 'wara 'diyi be, eri omvini e'yo alᴜni kᴜ. 13Pilato nga di 'yo ani eri tia, Mi erini e'yo ambo ambo yini sᴜle mi ruaa 'dini 'diyi kᴜ ya? 14Te eri omvini eri tia e'yo ani alᴜ 'dinini kᴜ ; 'dini gavena nga ani osu tᴜ. 15Te omu nde vᴜsi, gavena adri 'ba arurᴜ yini pele alᴜri trᴜ fe 'ba ongᴜlᴜmᴜrᴜ dri. 16O'du 'dasi yi ovᴜ 'ba bile arujoa, ru kupi tᴜ, omvele Baraba'iri be. 17Yini ti okᴜria, Pilato nga 'yo yi tia, Emi le ma trᴜ emi dri a'di'i ya? Baraba'i kani Yesu yini omvele Kristo'iri ya? 18Te eri ni ra kini yi fe eri a'yasi. 19Ka ri ogᴜŋa e'yo lizᴜri ma dria . 'bo, okᴜ erini nga 'ba ti pe eri vᴜ, kini, Mi ma fi 'ba kililirᴜ 'dari ma e'yo ma alia e'yo erini lizᴜ onzi alᴜni kᴜ; ma isu andrᴜ candi kakaᴜ orobi dri eri ma e'yosi. 20Te kuhani amborᴜ 'diyi pi 'ba 'wara be imba 'ba ongᴜlᴜmᴜrᴜ 'diyi ma bile Barabani a'izᴜ'i, Yesu ma dri jazᴜ. 21Te gavena nga e'yo omvi, 'yo yi tia, 'Ba iri 'diyi ma eselia, emi le ma ma trᴜ emi dri a'di'i ya? Yi ‘yora, Baraba'i. 22Pilato nga 'yo yi tia kini, Ma nga di Yesu omvele Kristo'iri 'ye ngoni ya? Yi dria nga ‘yora, Ma di eri pati rᴜaa. 23Eri nga 'yo ra kini, A'di e'yosi ya? E'yo onzi erini ezaleri ngoni ya? Te yi otre okposi, yi ‘yora, Ma di eri pati ruaa. 24'Dini Pilato ka ndre i econi e'yo azini 'yezarᴜ kᴜ, te otreta efᴜ anini, eri nga yi 'du i dri ojizᴜ 'ba ongᴜlᴜmᴜrᴜ ma milia, eri ‘yora, Ma ovᴜ e'yo kokorᴜ, 'ba 'diri ma ari ovᴜni ma dria kᴜ; 'di e'yo emini. 25'Ba ongᴜlᴜmᴜrᴜ dria nga e'yo omvi kini, Ari erini ma ovᴜ ama dria, azini anzi amani ma dria indi. 26Eri nga di Barabani trᴜ yi dri; ka Yesuni co 'bo, nga di eri fe dizᴜ pati ruaa. 27Asikari gavenani nga di Yesuni ji riidri yi vileria, yi nga asikari ongᴜlᴜmᴜrᴜ okᴜ dria eri vᴜ. 28Yi ka afa suza eriniri otrᴜ dria 'bo, yi nga bongo ekarᴜ su eri ma ruaa'i, 29yi nga oci ekila okurᴜ, nga sᴜ drinia, yi nga ozᴜ fe eri dri, dri ndiria. Yi nga kᴜmᴜti osi eri drilia, nga eri ede, kini, Mi zi mi ci ci, Meleki 'ba Yahudini la! 30Yi nga cucu wᴜ eri ruaa, nga ozᴜ nderi pa eri ma dri gbazᴜ. 31Yi ka eri ede fudri 'bo, yi nga bongo takari trᴜ eri rᴜaarisi ra, nga vini afa suza eriniri su'i, nga eri ji dizᴜ pati ruaa. 32Yini fᴜria, yi fu dri 'ba Kureniari be, ma ru Simoni'i; yi nga eri bi okposi, pati alaza erini 'duzᴜ. 33Yi ka eca pari yini omvele Gologataria (efini pari dri falaniri'i), 34yi nga patiefi ma su osale zaoji beri fe mvu eri dri; te eri ka ajini 'bi 'bo, eri leni mvu kᴜ. 35Yi nga eri di pati ruaa, nga afa suza erini awa yi ma eselia odrisi 'bezasi; 36yi ri va eri agei tezᴜ 'daa. 37Yi si e'yo eri ndepiri, 'ba eri eri ma drilia uru, 'dini kini, 'DIRI YESU OPI YAHUDINIRI'I. 38Etu 'dasi yi di oguoᴜ iri pati ruaa eri be indi, alᴜ dri ndiria, aziniri dri ejia. 39'Ba agapi geria 'diyi nga eri o'da, yini yi dri yaria, 40kini, Mi 'ba hekalu anzᴜpi, sipi o'du nari, mi pa mi ngᴜlᴜpi Mi ka ovᴜ Mvi Munguni, mi si pati alaza ma siarisi va. 41Kuhani amborᴜ 'diyi pi 'ba waraga sipi 'diyi pie, 'ba 'wara pie. nga eri ede 'dinile indi, 'yozᴜ kini, 42Eri pa 'ba azini ra; te eri econi i ngᴜlᴜpi pazarᴜ kᴜ. Eri Meleki Israelini; eri ma si pati alaza ma siarisi va, ama nga di eri a'i ani. 43Eri ovᴜ ndra a'itasi Mungu vᴜ; Mungu ka eri le ra, ma pa eri curu'do; ndra erini 'yole kini, Ma Mungu ma Mvi'i-risi. 44Oguoᴜ yini dile pati rᴜaa eri be 'diyi fe drinza eri dri tro tro indi. 45Te engazᴜ etu azia cazᴜ etu oromi angᴜ dria nga ovᴜ bizarᴜ. 46Etu ka eca ekile oromile Yesu nga 'yo o'duko urᴜsi kini, Eli, Eli, lama sabakitani? efini kini, Mungu mani, Mungu mani, mi kᴜ ma a'disi ya? 47Te 'ba pa sopi 'daa 'diyi ma azini ka eri ra, yi nga ‘yora, 'Ba 'diri eri Eliyani omve. 48Coti 'ba alᴜ yi eselia nga nzᴜ, nga ezekeze 'du, nga eri fe ga tre patiefi ma su drazarᴜsi, nga eri 'ba ozᴜ sia, nga fe eri dri mvuzᴜ. 49'Ba acepi 'diyi nga ‘yora, Mi kᴜ, ama ndre nga kani Eliyani nga emu eri pa ra yani. 50Yesu ka oyᴜ uru o'duko urusi dika 'bo, nga kᴜ orindi ini fᴜ ra. 51Mi ndre, bongo hekalu ale alizᴜri asi i iri, engazᴜ uru ecazᴜ va; nyaku oya oya, kata asi yi ra; 52nyadri ozi yi mgborᴜ, 'ba alarᴜ kakaᴜ o'du kopi 'diyi ma avᴜ enga ra; 53engata erini ma vᴜtia yi fᴜ nyadri aliarisi, fi aku alatararᴜ ma alia, nga yi e'da 'ba kakaᴜ dri. 54Te 'ba asikari tᴜrᴜ alᴜ ma driliari pi 'ba Yesu ma agei tepi eri be 'diyi be, ka oyakia pi ndre afa ovᴜpi 'yezarᴜ 'diyi be, yi ovᴜ urisi tᴜ, yi ‘yora, Adarᴜ, 'ba 'diri eri Mungu Mvi'i! 55Okᴜ kakaᴜ Yesu ndrepi ziri 'diyi ovᴜ 'dale indi, yi bi ndra Yesu vᴜti engazᴜ Galilia, eri aza kozᴜ azisi ; 56yi ma eselia Maria Magadaleni pi, Maria Yakobo pi ma andri Yose beri pie, anzi Zebedayoni ma andri pie. 57Etu ka 'de ra, 'ba afa e'irᴜ engapi Arimateari, ma ru Yusufu'i, eri alᴜ indi 'ba Yesuni imbaleri, 58'ba 'diri nga mu Pilato vᴜ Yesu ma avᴜ a'izᴜ. Pilato nga di azi ma fe eri dri ra. 59Yusufu nga avᴜni 'du, nga eri ombe bongo emve alarᴜrisi, 60nga eri 'ba gᴜle o'dirᴜ erini gale oni ruaari ma alia; eri nga era amborᴜ gᴜ gᴜle tilia ci. nga mvi ra. 61Maria Magadaleni pi Maria andiniri be, yi ovᴜ 'dale indi riria nyadri ma drilialerᴜ. 62Drusi, o'du edezaniri ma vᴜtia, kuhani amborᴜ 'diyi pi 'ba Farisaini be nga yi okᴜ Pilato vᴜ, 63kini, Opi, ama ega 'ba 'ba icipi 'dari 'yo ndra erini de ovᴜria idrirᴜrisi, kini, O'du na ma vᴜtia ma nga enga ra. 64Ka'dini mi azi 'ba ma te nyadri ma agei okposi, kpere o'du nani agaria, 'ba erini imbale 'diyi kazᴜ emuzᴜ avᴜni oguzᴜ, 'yozᴜ 'ba tia kini, Eri enga 'ba draza eselia 'bo, 'dini kᴜ; 'dini icita vileri ma onzi nga okoriniri aga ra. 65Pilato nga 'yo yi tia, Emi ovᴜ 'ba angᴜ tepi 'diyi be; emi mu, emi te eri agei okporᴜ emini nilerile. 66Yi nga mu ra, nga nyadri ma agei te okporᴜ, yi nga eceta 'ba era ruaa ci, de 'ba angᴜ tepi 'diyi yi be tualᴜ.

will be added

X\