MATAYO 26

1Eri nga eca 'dini, Yesu ka e'yo 'diyi de dria 'bo, eri 'yo 'ba erini imbale 'diyi ma tia, 2Emi ni o'du iri ka aga ra, omu agaza 'ba drilesiri nga eca, Mvi 'banini nga ovᴜ fezarᴜ dizᴜ pati ruaa. 3Etu 'dasi kuhani amborᴜ piyi 'ba 'wara 'ba drilia 'diyi be, nga yi okᴜ tualᴜ kuhani amborᴜ omvele Kaifa'iri vile iriia, 4yi nga e'yo otᴜ tualᴜ Yesuni bizᴜ lokirisi, eri fuzᴜ. 5Te yi ‘yora, Ma bi eri o'du omu nyazᴜrisi kᴜ, omba kazᴜ fᴜzᴜ 'ba ma eselia kᴜ. 6Yesuni ovᴜria Betania, Simoni 'ba ofᴜ beri vile joa, 7okᴜ azini nga eca eri vᴜ, eri ovᴜ lu'bu odᴜ aje nyapi tᴜrini be, eri nga eri osᴜ eri ma dria erini riria nyaria. 8Te 'ba erini imbale 'diyi ka ndre ra, yi ovᴜ aokosi, kini, Eza odᴜ 'dini a'di 'yezᴜ ya? 9Eco te odᴜ 'diri ozi silingi kakaᴜsi, fezᴜ 'ba aliorᴜ dri. 10Te Yesuni e'yo niria, nga 'yo yi tia, Emi okᴜ 'diri ecandi 'dini a'disi ya? Te eri 'ye 'yeta onyirᴜ ma dri. 11Te 'ba aliorᴜ yi ovᴜ emi be etuzu, te ma'i, ma ovᴜni emi be etuzu kᴜ. 12Te erini odᴜ osᴜzᴜ ma ruaari, eri 'ye eri ma 'bazᴜ ngonde tezᴜ ma sazᴜ. 13Ma 'yo emi tia ada, pari dria 'bani e'yo barᴜ 'diri olᴜzᴜria angᴜ wudrikurᴜ dria ma alia, e'yo okᴜ 'dirini 'yeleri nga ovᴜ olᴜzarᴜ indi eri ma e'yo egazᴜ. 14Etu 'dasi 'ba alᴜ 'ba mᴜdri drini iri eselia, runi Yudasi Isikariote'i, nga di mu kuhani amborᴜ vᴜ, 15kini, Ma ka eri fe emi dri ra, emi nga le ma dri a'di fe ya? Yi ede e'yo eri be silingi fezᴜ kali na. 16E'dozᴜ o'du 'darisi eri nga etu onyirᴜ nda eri fezᴜ. 17O'du oko mikate akufi kokorᴜnisi, 'ba erini imbale 'diyi nga emu Yesu vᴜ, kini, Mi le ama ede omu agaza 'ba drilesiri mi dri nyazᴜ ngoa ya? 18Eri ‘yora, Emi mu aku amborᴜa afa vᴜ, emi 'yo eri tia, 'Ba 'ba Imbapiri ‘yora, O'du mani eca ogogo; ma nga omu agaza 'ba drilesiri nya 'ba mani imbale 'diyi be mi vile joa. 19'Ba erini imbale 'diyi nga di 'ye Yesuni azile yi tiarile; yi ede omu agaza 'ba drilesiri ra. 20Etu ka 'de ra, eri nga ri nyaka nyazᴜ 'ba erini imbale mᴜdri drini iri 'diyi be; 21yini nyaria, eri ‘yora, Ma 'yo emi tia ndi ndi, 'ba alᴜ emi eseliari nga ma fe ari'ba dri. 22Yi nga ovᴜ candisi tᴜ aga ra, nga 'ba 'yo eri tia alᴜ alᴜ, kini, Opi, eri ma'i ya? 23Eri nga e'yo omvi kini, 'Ba dri osᴜpi ma be oteku ma alia 'diri nga ma fe ari'ba drini. 24Te Mvi 'bani mu ra, yini sile eri ma e'yosi 'borile, te candi agu nde 'diri dri erini Mvi 'bani fele ari'ba dririsi! Agu 'dari ka ndra osi kᴜ, eri ndra eri dri 'yeke. 25Yudasi 'ba eri fepi ari'ba driri nga e'yo omvi kini, Rabi, eri ma'i ya? Eri nga 'yo eri tia, Mi 'yo 'yeke. 26Yini nyaria, Yesu nga mikate 'du, nga asi ndriza a'i drinia, nga aleni anyo, nga di fe 'ba erini imbale 'diyi dri, kini, Emi 'du, emi nya; 'dori rua mani. 27Eri nga erejea 'du, ka awa'difo fe drinia 'bo, nga eri fe yi dri, kini, Emi dria ma mvᴜ 'di ma alia; 28te 'dori eri ari mani azizani, ovᴜpi osᴜzarᴜ 'ba kakaᴜsi e'yo onzi wuzᴜri. 29Te ma 'yo emi tia, engazᴜ curu'do ma ngani efi zabibu ma orirᴜ 'diri ma su mvu alᴜni kᴜ, de nga o'du mani ngazᴜ eri mvuzᴜ o'dirᴜ emi be suru ma Atiniria 'dari ecani kᴜ. 30Yi ka ongo ngo 'bo, yi fᴜ mu oni Mizeituni ma dria. 31Etu 'dasi Yesu nga di 'yo yi tia, Emi dria nga aba aba e'yo manisi ini 'dorisi; te e'yo ovᴜ sizarᴜ 'dini, Ma nga 'ba kabilo ocepiri co, kabilo o'birᴜ nga ovᴜ erezarᴜ. 32Te engata mani ma vᴜtia, ma nga mu emi drilia Galilia. 33Te Petero nga e'yo omvi, 'yo eri tia, 'Ba dria ka aba e'yo minisi aba aba ti, ma'ini, ma ngani aba alᴜni kᴜ. 34Yesu nga 'yo eri tia, Ma 'yo emi tia ndi ndi, ini 'dorisi de nga a'uata 'beni cere kᴜ, mi nga ma ga si pale na. 35Petero nga 'yo eri tia, Ka ovᴜ kini ma ma dra mi be ra ti, ma econi mi gazarᴜ alᴜni kᴜ. Ba erini imbale 'diyi nga 'yo dria 'dinile indi. 36Yesu nga di eca yi be pari omvele Getesemani'iria, nga 'yo 'ba erini imbale 'diyi ma tia, Emi ri 'doa, mani muria Mungu ziria 'dale. 37Eri nga Petero pi 'du anzi Zebedayoni iri 'diyi be, nga 'ba ovᴜ candisi azini asi otiza be tᴜ. 38Eri nga di 'yo yi tia, Ma asi ovᴜ candisi aga ra, kpere drata mani vᴜ; emi te 'doa, emi ko o'du kᴜ, emi te ma be. 39Eri nga mu drile were, nga avᴜ va Mungu ziria, kini, Ata mani, ka eco ra erejea 'diri ma ovᴜ 'duzarᴜ ma vᴜrisi; te mani lelerile kᴜ, lᴜ mini lelerile. 40Eri nga emu 'ba erini imbale 'diyi vᴜ, nga yi isu o'du koria, nga 'yo Petero tia, Dini okpo emini funi dri emini tezᴜ mile be etu alᴜ ma be kᴜ ya? 41Emi ko o'du kᴜ, emi ovᴜ mile be, emi zi Mungu indi, emi kazᴜ fizᴜ obeta ma alia kᴜ; orindi ovᴜ avarᴜ ra 'bo, te rua ovᴜ okpo kokorᴜ. 42Eri nga mu Mungu zizᴜ dika pale iririsi, kini, Ma Ati, ka di econi 'duzarᴜ kᴜ pe ma ma mvᴜ eri, e'yo mini leleri ma 'ye i ra. 43Eri nga emu dika, nga yi isu o'du koria, yi ma mileni ovᴜle nzizarᴜ o'dusirisi. 44Eri nga yi kᴜ dika, nga mu Mungu zi pale narisi, nga e'yo takari 'yo dika. 45Eri nga di emu 'ba erini imbale 'diyi vᴜ, nga 'yo yi tia, Cᴜru'do emi ko di o'du, emi li ava; mi ndre, etu eca ogogo 'bo, Mvi 'bani ovᴜ fezarᴜ 'ba ezata be 'diyi ma dria. 46Emi enga, ama mu; mi ndre, 'ba ma fepi ari'ba driri eca ogogo. 47Erini nga e'yo 'yoria, mi ndre, Yudasi, 'ba mᴜdri drini iri 'diyi ma azi alᴜ, nga eca 'ba ongolᴜmᴜrᴜ kakaᴜ be, yi ma dria sei piyi kali pie, yi enga kuhani amborᴜ piyi vᴜ 'ba 'wara 'ba drilia 'diyi be. 48'Ba eri fepiri fe yi dri eceta, kini, 'Ba mani o'boloni ndrᴜleri eri bani eri'i; emi bi eri ci. 49Eri nga eca Yesu vᴜ coti, nga ‘yora, Mi zi mi ci ci, Rabi! Eri nga eri ma o'bolo ndrᴜ avasi. 50Yesu nga 'yo eri tia, Ma agyi, mi 'ye e'yo mini emuzᴜri. Yi nga di emu ani dri o'ba Yesu ruaa, nga eri bi ra. 51Mi ndre, 'ba ovᴜpi Yesu be 'diyi ma azi alᴜ nga i dri ejᴜ, nga sei ini nze, nga ati'bo kuhani amborᴜni ga, nga bini li va. 52Yesu nga 'yo eri tia, Mi omvi sei mini i paria; te 'ba dria sei 'dupiri nga dri ja seisi ra. 53Kani mi egani kini ma econi ma Ati zizarᴜ ma etozᴜ, erini ngazᴜ curu’do ma dri malaika ma ongᴜlᴜmᴜ legionirᴜ mᴜdri drini iri 'diyi fezᴜ, kani aga 'diyi ra kᴜ ya? 54Te ka 'dini kᴜ, e'yo siza 'yopi kini ma ovᴜ 'yezarᴜ 'dini 'diyi nga eca 'yeke ngoni ngoni ya? 55Etu 'dasi Yesu nga 'yo 'ba ongᴜlᴜmᴜrᴜ ma tia, Emi efᴜ ma bizᴜ ekile emini efᴜle 'ba afa opapiri ma ruaa, sei pisi kali berile ya? Ma adri ndra ri etuzu hekalua 'ba imbazᴜ, te emi bini ma kᴜ. 56Te e'yo 'diri 'ye i dria 'bo, e'yo nabini sile 'diyi ma eca 'yeke beni. 'Ba erini imbale 'diyi dria nga eri kᴜ ra, nga apa ra. 57'Ba Yesuni bipi 'diyi nga eri eji Kaifa kuhani amborᴜri vᴜ, pari 'ba waraga sipi 'diyi pini yi okᴜzᴜ 'ba 'wara be 'boria. 58Te Petero nga eri vᴜti bi ziri, cazᴜ kpere kuhani amborᴜ ma iriia, eri nga fi alenia, nga ri va 'ba azi 'yepi 'diyi be, e'yo asizᴜri ndrezᴜ. 59Kuhani amborᴜ 'diyi pi 'ba e'yo amapi 'diyi be dria nga e'yo eti nzeza inzorᴜ nda Yesu ruaa, yi ma fu eri beni, 60te yi isuni kᴜ, ka tro 'ba e'yo eti inzorᴜ nzepi 'diyi emu kakaᴜ ti. Te vilerisi 'ba iri nga emu, 61nga 'yo ra kini, Agu 'diri ‘yora, Ma eco hekalu Munguni anzᴜzarᴜ ra, eri sizᴜ dika o'du na. 62Kuhani amborᴜ nga pa so uru, nga 'yo eri tia, Mi omvini e'yo alᴜni kᴜ ya? E'yo 'ba 'diyini asᴜ sᴜzᴜ mi ruaari ngoni ya? 63Te Yesu ovᴜ ciri. Kuhani amborᴜ nga di 'yo eri tia, Ma fe mi dri oyo so Mungu idrirᴜ ma rusi, mi olᴜ ama tia, kani mi Kristo Mungu Mvi'i ada ya? 64Yesu nga 'yo eri tia, Mi 'yo 'yeke. Te ma 'yo mi tia, engazᴜ curu’do emi nga Mvi 'bani ndre rizᴜ Okpo ma dri ndiria, erini emuria iriti 'bua 'diyi ma alia. 65Kuhani amborᴜ nga afa suza ini asi, kini, Eri o'da Mungu 'bo. Ama 'ba e'yo eti nzepi 'diyi le dika a'disi ya? Mi ndre curu'do, emi eri o'datani 'bo. 66Emi ega ngoni ya? Yi nga e'yo omvi kini, Fu dri drazᴜ ra. 67Yi nga di e'do cucu wᴜ milenia, nga eri osi; 'ba azini nga eri osa yi dri agelesi, 68kini, Mi ondri e'yo ama tia, mi Kristo! A'di gba mini ya? 69Peteroni riria jo ma riidria amve, zamva alᴜ nga emu eri vᴜ, kini, Mi ovᴜni ndra Yesu Galiliari be kᴜ ya? 70Te 'ba 'diyi ma milia dria eri ga si, kini, Ma nini e'yo mini 'yoleri kᴜ. 71Te erini firia ecazᴜ jotilia, zamva azini nga eri ndre ra, nga 'yo 'ba 'daa 'diyi ma tia, kini, Agu 'diri ovᴜ ndra Yesu 'ba Nazaretini be. 72Eri nga ga dika oyo soza be, kini, Ma nini agu 'diri kᴜ. 73Etu were ma vᴜtia, 'ba pa sopi 'daa 'diyi nga emu 'yo Petero ma tia, Mi indi, mi 'ba yini ada ada, te ti 'yoza minini mi ecelerisi. 74Eri nga di 'ba i otrizᴜ oyo soza be, kini, Ma nini agu 'diri alᴜani kᴜ. Coti a'uata nga cere 'be. 75Petero nga di e'yo ndra Yesuni 'yoleri ega, kini, De nga a'uata 'beni cere kᴜ mi nga ma ga si pale na. Eri fᴜ amve, nga wᴜ mindresi tᴜ.

will be added

X\