MATAYO 25

1Suru 'buari eri ovᴜ di ekile ezoanzi mᴜdrile, yi 'du tala yini, fᴜ mu dri fu izio be. 2Yi ma eselia, towi 'diyi ondᴜa kokorᴜ, towi 'diyi ondᴜa be. 3Te ondᴜa koko 'diyi 'du tala yini, te 'duni odᴜ yi be kᴜ; 4te ondᴜa be 'diyi 'du odᴜ cupa alia ci tala yini be. 5Te izioni i dri iciria 'dale, o'du e'do yi 'be kaukau, yi nga di o'du ko ndo. 6Te iniayii, 'ba oyᴜ urᴜ, Mi ndre, izio eca 'bo! Emi fᴜ mu dri fu eri be. 7Ezoanzi 'dayi nga di enga dria urulesi, nga tala yini ede. 8Te 'ba ondᴜa kokorᴜ 'diyi nga 'yo 'ba ondᴜarᴜ ma tia kini, Emi fe ama dri odᴜ emini ma azi; tala amani inyu yi ra. 9Te 'ba ondᴜa be 'diyi nga e'yo omvi kini, Econi kᴜ, ngani dri fu ama dri emi be alᴜni kᴜ ; emi mu di 'ba ozipi 'diyi vᴜ, emi je emi ngᴜlᴜpi dri. 10'Ba 'diyini muria jeria, izio eca ra, ezoanzi te ovᴜpi edezarᴜ 'diyi fi eri be omu okᴜ bizaniria; yi nga jotile opi ci. 11Vilerisi ezoanzi acepi 'diyi eca . indi, yi ‘yora, Opi, opi, mi zi jotile ama dri fo! 12Te eri e'yo omvi, ‘yora, Ma 'yo emi tia ndi ndi, ma nini emi kᴜ. 13'Dini emi ma ovᴜ mile be, emini o'du nile etu be kᴜrisi. 14Te eri ovᴜ ekile 'ba mupi angᴜ andiniarile, eri omve ati'ba ini, eri nga afa ini fe kᴜ yi dri; 15eri fe talanto towi 'ba alᴜri dri, aziniri dri iri, aziniri dri alᴜ; ekile yi alᴜ alᴜ ma okponi ovᴜlerile. Eri mu di angᴜ andinia. 16'Ba talanto towi 'dupiri nga mu coti, azi ngazᴜ yi be, nga azini isu drinia towi. 17'Dinile 'ba talanto iri 'dupiri isu azini drinia iri. 18Te 'ba talanto alᴜ 'dupiri nga mu 'bile ga, nga opi ini ma silingi zi nyakua. 19O'du kakaᴜ ma vᴜtia opi ati'ba 'dayini nga eca ra, nga afa yini ma kalafe la yi be. 20'Ba talanto towi 'dupiri nga talanto towi azini eji, kini, Opi, mi kᴜ ndra ma dri talanto towi; mi lu, ma isu azini towi 'di'i. 21Opi erini 'yo eri tia, Onyirᴜ, mi ati'bo onyirᴜ asi ada be; mi ovᴜ ndra asi ada be afa weresi, ma nga mi 'ba afa kakaᴜ ma drilia; mi fi ayiko opi minini ma alia. 22'Ba talanto iri 'dupiri nga emu indi, nga ‘yora, Opi, mi kᴜ ndra ma dri talanto iri; mi lu, ma isu azini iri 'di'i. 23Opi erini 'yo eri tia, Onyirᴜ, mi ati'bo onyirᴜ asi ada be; mi ovᴜ ndra asi ada be afa weresi, ma nga mi 'ba afa kakaᴜ ma drilia; mi fi ayiko opi minini ma alia. 24'Ba talanto alᴜ 'dupiri nga emu indi, nga ‘yora, Opi, ma ni mi drio mi agu okporᴜni, mi lo pari mini 'yale kᴜria, mi okᴜ pari mini rile kᴜria indi; 25mani rᴜlerisi, ma mu talanto mini zi nyakua ani. Mi lu, afa mini 'do'i. 26Te opi erini nga e'yo omvi, 'yo eri tia, Mi ati'bo onzi ovᴜ be! Mi ni ra ma lo pari mani 'yale kᴜria, azini ma okᴜ pari mani rile kᴜria indi? 27Ka'dini eri ndra onyirᴜ mi ka ndra silingi mani fe 'ba afa agei tepi 'diyi dri, mani emviria ma nga ndra afa mani isu ereni be. 28Emi 'du talanto eri driarisi, emi fe eri 'ba ovᴜpi talanto mᴜdri beri dri. 29Te 'ba dria ovᴜpi afa beri dri yi nga afa azini fe drinia, afa yini nga aga tᴜ; te 'ba afa kokorᴜri, 'ba nga afa erini ovᴜzᴜ eri beri pa drinia ra. 30Emi 'be ati'bo aza koza kokorᴜri angᴜ iniciciria amve; 'daa awᴜ pi nga ovᴜ si ciza beni. 31Te Mvi 'bani ka eca diza erini be, malaika pie dria, eri nga di ri ogᴜŋa erini dizarᴜri ma dria. 32Suru dria yi nga yi okᴜ eri milia, eri nga yi ma esele co ekile 'ba kabilo ocepirini kabilo pi ma esele cole ndri berile; 33eri nga kabilo 'ba eri ma dri ndiria, te eri nga ndri 'ba dri ejia. 34Etu 'dasi Meleki nga di 'yo 'ba ovᴜpi dri ndiria 'diyi ma tia, Emi emu, emi 'ba ma Atini asi ndriza fele yi dri 'diyi, emi ma nya suru ovᴜpi edezarᴜ ngonde emi dri engazᴜ nyaku eti 'bazᴜrisiri emi ma afarᴜ; 35te ma ovᴜ ndra abirisi, emi fe ndra nyaka ma dri ra ; ma ovᴜ ndra yi avijosi, emi fe ndra ma dri yi mvu ra; ma ovᴜ ndra ani'borᴜ, te emi fe ma dri jo lazᴜ ra; 36ma ovᴜ ndra pililirᴜ, te emi fe ndra afa suza ma dri ra; ma ovᴜ ndra azorᴜ, te emi emu ma ndrezᴜ ra; ma ovᴜ ndra arujoa, te emi emu ndra ma vᴜ ra. 37'Ba kililirᴜ 'diyi nga di e'yo omvi eri tia kini, Opi, ama ndre mi ovᴜ abirisi, ama fe mi dri nyaka a'dᴜngare ya? azini yi avijosi, te ama fe mi dri afa mvuza a'dᴜngare ya? 38Ama ndre mi ovᴜ ani'borᴜ, ama fe pari mi dri lazᴜ a'dᴜngare ya? kani mi ovᴜ pililirᴜ, ama fe afa suza mi dri a'dᴜngare ya? 39Ama ndre mi ovᴜ azorᴜ, kani arujoa, te ama emu mi ndrezᴜ a'dᴜngare ya? 40Meleki nga e'yo omvi, nga 'yo yi tia, Ma 'yo emi tia ndi ndi, emini eri 'yele adripi mani nyiria 'diyi ma azi alᴜ dririsi, emi 'ye ndra eri ma dri. 41Vilerisi eri nga di 'yo 'ba ovᴜpi eri dri ejia 'diyi ma tia indi, Emi nga ma ageiarisi ra, emi dria ovᴜpi otrizarᴜ 'diyi, emi ma fi aci 'dani 'dani ovᴜpi edezarᴜ ngonde 'ba 'ba obepiri pi dri malaika erini beria. 42A'disikᴜ ma ovᴜ ndra abirisi, te emi feni nyaka ma dri kᴜ; ma ovᴜ ndra yi avijosi, te emi feni afa mvuza ma dri kᴜ; 43ma ovᴜ ndra ani'borᴜ, te emi feni jo lazᴜ ma dri kᴜ; ma ovᴜ ndra pililirᴜ, te emi feni afa suza ma dri kᴜ; ma ndra azorᴜ azini arᴜjoa, te emi emuni ma ndrezᴜ kᴜ. 44'Ba 'diyi nga di e'yo omvi, nga 'yo eri tia, Opi, ama ndre mi ovᴜzᴜ abirisi, kani yi avijosi, kani ani'borᴜ, kani pililirᴜ, kani azorᴜ, kani arujoa, azini ama koni mi aza azi ngazasi kᴜ o'du ngosi ya? 45Eri nga di e'yo omvi yi tia kini, Ma 'yo emi tia ada, ekile ndra emini eri 'yele 'ba nyiria 'diyi ma azi alᴜ dri kᴜrile, emi 'yeni eri ma dri kᴜ indi. 46'Ba 'diyi nga mu fi panga onzi 'dani 'daniria, te 'ba kililirᴜ 'diyi nga mu fi idri 'dani 'daniria.

will be added

X\