MATAYO 24

1Yesu nga fᴜ hekalua, mu geria; 'ba erini imbale 'diyi nga eca eri vᴜ jo siza hekaluni 'diyi ecezᴜ eri dri. 2Eri nga e'yo omvi, 'yo yi tia, Emi ndreni afa 'diyi dria kᴜ ya? Ma 'yo emi tia ndi ndi, oni alᴜni ngani ace 'doa adrozarᴜ agyi dria asᴜkokorᴜ kᴜ. 3Erini riria oni Mizeituni ma dria, 'ba erini imbale 'diyi nga eca eri vᴜ de eri a'dule, kini, Mi olᴜ ama tia, afa 'diyi nga ovᴜ a'dᴜngare ya? Azini emuta mini ma eceta, asiza angᴜ wudrikuruniri be, nga ovᴜ ngoni ya? 4Yesu nga e'yo omvi, 'yo yi tia, Emi te emi agei, 'ba alᴜni kazᴜ emi icizᴜ kᴜ. 5Te 'ba kakaᴜ yi nga emu ma rusi, 'yozᴜ, Ma Kristo'i; yi nga 'ba kakaᴜ ici ra. 6Emi ka e'yo ombani pi eri e'yo kuza ombani be, emi ovᴜ mile be emi asi ma oti kᴜ, te e'yo 'diyi ngani ece emuzᴜ kᴜ; te asizani nga yo. 7Te suruni nga enga omba 'dizᴜ suru azini be, opi nyazani nga omba 'di opi nyaza azini be, liki pi nga ovᴜ oyakia be angᴜ ndᴜ ndᴜ ma alia: 8te e'yo 'diyi dria nga candi ma eti e'dozᴜri. 9Yi nga di emi fe inzata vᴜ, 'ba nga emi fu ra; suru dria yi nga emi ngu onzi ma rusi. 10Ewu 'dasi 'ba kakaᴜ nga aba aba, yi nga yi fe ceni, yi nga yi ngu onzi yi eselia ceni ceni. 11Te nabi inzorᴜ kakaᴜ yi nga enga ra, nga 'ba kakaᴜ ici ra. 12E'yo onzini gale trerisi, 'ba kakaᴜ ma letani nga ambi ra. 13Te 'ba ovᴜpi asi teza be cazᴜ asizaniriari nga i pa ra. 14Te e'yo bari suruni 'diri nga ovᴜ olᴜzarᴜ angᴜ wudrikuru drisi dria, e'yo eti nzezᴜ suru dria dri indi; o'du asizaniri nga di eca ndo. 15Emi ka afa onzikanyarᴜ 'ba dri jazᴜ, nabi Danielini e'yoni 'yoleri ndre, erini pa soria pari alatararia ('ba waraga lapiri ma va e'yo 'diri), 16o'du 'dasi 'ba ovᴜpi Yudia 'diyi ma apa di oni dria; 17'ba ovᴜpi jo dria ururi ma si va afa jo inia 'diyi o'duzᴜ kᴜ; 18'ba ovᴜpi amvᴜari ma emvi vile afa suza ini 'duzᴜ kᴜ. 19Te candi okᴜ ovᴜpi okporovᴜrᴜ 'diyi pi dri, ba fepi 'diyi be, o'du 'dayisi! 20Emi zi Mungu kini o'du emini apazᴜri ma ovᴜ ewu egbenisi kᴜ, kani sabatosi kᴜ indi. 21Te ewu 'darisi inzata nga ovᴜ amborᴜ tᴜ, drio engazᴜ nyaku eti 'bazᴜrisi ecazᴜ kpere andrᴜ ovᴜni ndra 'dini kᴜ, vᴜtinia ngani ovᴜ vini 'dinile dika kᴜ indi. 22O'du 'dayi ka ovᴜ lizarᴜ kᴜ, 'ba alᴜni econi te i pazarᴜ kᴜ; te 'ba opele 'diyi ma e'yosi, o'du 'dayi nga ovᴜ lizarᴜ ra. 23O'du 'dasi 'ba azini ka 'yo emi tia, Mi ndre, Kristoni 'doa, kani, 'Dia; emi ma a'i kᴜ. 24A'disikᴜ Kristo inzorᴜ piyi nabi inzorᴜ 'diyi be nga enga ra, yi nga eceta amborᴜ 'ye tali be, 'dini, ka eco ra, yi ma ici 'ba opele 'diyi indi beni. 25Mi ndre, ma olᴜ emi tia oko. 26'Dini yi ka nga 'yo emi tia, Mi ndre, eri roko dria, emi fᴜ kᴜ; Mi ndre, eri ovᴜ jo aliza ma alia, emi ma a'i kᴜ. 27Te ekile ovini gale etuni efᴜrialerᴜ, erini i e'dale kpere kala etuni 'derialerᴜriarile, Mvi 'bani ma emutani nga ovᴜ 'dinile. 28Roko nga yi okᴜ pari avᴜni ovᴜzᴜria 'daa. 29Te inzata o'du 'dayini ka i de ra, coti etuni nga ovᴜ bizarᴜ, mba ngani angᴜ mve kᴜ, 'bi'bio nga o'de 'buarisi ra, okpo 'bua 'diyi nga oya oya; 30o'du 'dasi Mvi 'bani ma ecetani nga i e'da 'bua, suru nyakua 'diyi dria nga di ovᴜ lulu gaza be, yi nga Mvi 'bani ndre erini emuria iriti 'buari ma alia, okposi azini diza amborᴜ be ; 31eri nga malaika erini ti ope gᴜka ma awᴜ amborᴜ be, yi nga 'ba opele erini 'diyi okᴜ oli kala sua 'diyi vᴜsi, engazᴜ 'bu ma kalati alᴜria cazᴜ aziniri vᴜ. 32Emi ma oni di e'yo o'beza elio patini: arakala ma drile ka eca arorᴜ, pati bi o'dirᴜ ka edi 'bo, emi ni kini eli eca ogogo. 33'Dinile indi emi'i, emi ka e'yo 'diyi ndre dria ra, emi ni kini eri ovᴜ ogogo, va jotilia. 34Ma 'yo emi tia ndi ndi, a'bianzi ewu 'dorini ngani yi de alᴜni kᴜ, de nga afa 'diyi dria 'yeni yi kᴜ. 35'Bu pi nyaku be nga yi de ra, te e'yo mani ngani i de alᴜni kᴜ. 36Te o'du 'dari pi ma e'yo etu 'dari be 'ba alᴜni nini kᴜ, kani malaika 'bua 'diyi, kani Mvi'i ti, te Ata a'dule nini. 37Te ekile o'du Noanisirile, Mvi 'bani ma emutani nga ovᴜ 'dinile. 38Te ekile 'bani ndra ovᴜle o'du yi tizani nga ecazᴜ kᴜriarisile, yi nya, yi mvᴜ, yi bi okᴜ, yi fe okᴜ, ecazᴜ o'du Noani fizᴜ maburᴜaria, 39yi nini afa azini kᴜ, de nga yi tiza emuni yi o'duzᴜ dria kᴜ; Mvi 'bani ma emutani nga ovᴜ 'dinile. 40O'du 'dasi 'ba iri nga ovᴜ amvᴜa; alᴜri nga ovᴜ 'duzarᴜ, aziniri nga aceni. 41Okᴜ iri nga ovᴜ anya 'iria oni dria; alᴜri nga ovᴜ 'duzarᴜ, aziniri nga aceni. 42Emi ovᴜ mile be, emini o'du Opi eminini emuzᴜri nile kᴜrisi. 43Te emi ma ni 'di, jo e'i ka ndra etᴜ oguoᴜni emuzᴜ kani ngoriari ni ra, eri ndra te mile be, ngani ndra a'i yini eri ma jo eti lᴜzᴜ kᴜ. 44Awa'dini emi ma ovᴜ di edezarᴜ ngonde ; te Mvi 'bani rga emu etu emini egale kᴜria. 45Ka'dini ati'bo asi ada be, ondᴜarᴜ, opini ani 'bale ati'ba jo inia 'diyi ma drilia, nyaka fezᴜ yi dri etu vᴜsiri a'di'i ya? 46Ati'bo opini emule eri isule 'ye 'diniri eri drilebarᴜ. 47Ma 'yo emi tia ndi ndi, eri nga eri 'ba afa erini ovᴜzᴜ yi be 'diyi ma drilia dria. 48Te ati'bo onzi 'dari ka 'yo i asia, Opi mani eri i dri ici 'dale, 49ka e'do ati'ba eri ma agyirᴜ 'diyi co co, ka afa nya, ka afa mvu 'ba ewa mvupi 'diyi be, 50opi ati'bo 'darini nga eca o'du erini egale kᴜria, azini etu erini nile kᴜria, 51eri nga eri ale ali iri, eri nga eri ma e'yo 'ba 'ba lokiri be 'diyi be tualᴜ; 'dale awᴜ pi nga ovᴜ si ciza beni.

will be added

X\