MATAYO 21

1Yi ka eca Yerusalemua ogogo, ecazᴜ Betifagea, kpere Oni Mizeituniria 'bo, Yesu nga di 'ba erini imbale iri 'diyi ma ti ope, 2'yozᴜ yi tia kini, Emi fi aku ovᴜpi emi driliaria, te coti emi nga akanya isu 'izarᴜ, mva erini be tualᴜ; emi trᴜ yi, eji yi ma vᴜ. 3'Ba azini ka e'yo azini 'yo emi tia, emi nga 'yo kini, Opi le yi ra; eri nga yi ti pe coti. 4E'yo 'ye i 'dini, e'yo ndra nabini 'yoleri ma eca i paria 'yeke ani, 'yozᴜ, 5Emi olᴜ Zioni zi ma tia, Mi ndre, meleki mini emu mi vᴜ, eri asi e'yere be, eri ri akanya dria, akanyamva werearᴜri ma dria indi. 6'Ba erini imbale 'diyi mu ra, nga 'ye Yesuni azile yi tiarile; 7yi eji akanya mva be, nga bongo yini o'be akanya ngᴜkᴜa; eri nga ri drinia. 8'Ba ongᴜlᴜmᴜrᴜ kakaᴜ nga bongo yini aja geria; 'ba azini nga pati arakala ga, aja geria indi. 9'Ba ongᴜlᴜmᴜrᴜ mupi drilenia 'diyi pi nga oyᴜ uru, 'ba vᴜtini bipi 'diyi be, yi ‘yora, Hosana Daudi mvi vᴜ! 'Ba emupi Opi ma rusiri ma ovᴜ asi ndriza be! Hosana 'bua urᴜ tᴜ! 10Eri ka fi Yerᴜsalemua, aku amborᴜ dria oya oya, 'yo kini, 'Di a'di'i ya? 11'Ba ongᴜlᴜmᴜrᴜ ‘yora, 'Di nabi Yesu engapi Nazareti Galiliniari'i. 12Yesu eri fi hekalu Munguniria, eri nga 'ba dria afa ozipi azini afa olepi hekalua 'diyi odro amve, eri nga mesa 'ba silingi ofᴜpi 'diyini ogᴜ va, kiti 'ba a'balaᴜ ozipi 'diyini be. 13Eri 'yo yi tia, E'yo si i 'dini kini, Yi nga jo mani omve jo Mungu zizaniri'i; te emi oja eri oji oguoᴜnirirᴜ. 14'Ba mile draza be azini 'ba acozarᴜ 'diyi nga eca eri vᴜ hekalua, eri nga yi ati ra. 15Te kuhani amborᴜ piyi 'ba waraga sipi 'diyi be ka tali erini 'yele 'diyi ndre, anzi oyᴜpi uru hekalua 'yopi, Hosana Daudi mvi vᴜ! diyi be 'bo, aoko nya yi tᴜ; 16yi 'yo eri tia, Mi eri e'yo yini 'yoleri ra ya? Yesu nga 'yo yi tia, E, ma eri ra; te emi lani nga 'dini kᴜ ya, kini, Mi 'ba inzita kililirᴜ e'yo efᴜpi anzi nyiri piyi ma tilia odekᴜa pierisi ra. 17Eri kᴜ yi ra, nga fᴜ aku amborᴜasi muzᴜ Betania, eri la 'dale. 18Erini emviria aku amboria o'bitisi, eri nga ovᴜ abirisi. 19Erini elio pati ndreria ger kalaa, eri eca etinia, te eri isuni afa rᴜania kᴜ te biko a'dule. Eri nga 'yo eri tia, Mi 'ya efi dika kpere 'dani 'dani kᴜ! Elio pati nderi 'wi coti. 20'Ba erini imbale 'diyi ka ndre 'bo, yi osu osu, kini, Elio pati 'wi coti 'doni ngoni ngoni ya? 21Yesu nga e'yo omvi, 'yo yi tia, Ma 'yo emi tia ndi ndi, emi ka ovᴜ a'itasi, emi asi ka oti kᴜ, emi ngani tali elio patini 'ye a'dule kᴜ, te emi ka 'yo oni dori ma tia, Mi nze mi, 'be miria, eri nga ovᴜ 'yezarᴜ ra. 22Azini afa dria dria emini a'ile Mungu zizasi 'diyi, emi ka ovᴜ a'ita be, emi nga yi isu ra. 23Erini firia hekalua, 'ba kuhani amborᴜ piyi 'ba 'wara 'ba ma drilia 'diyi be nga eca eri vᴜ erini 'ba imbaria, 'yozᴜ kini, Mi 'ye 'dini okpo ngonirisi ya? A'di fe mi dri okpo 'dirini ya? 24Yesu nga e'yo omvi, 'yo yi tia, Ma'i, ma vini nga e'yo alᴜ zi emi tia indi ; emi ka omvi ma dri ra, ma nga e'yo mani e'yo 'diyi 'yezᴜ okpo ngonirisiri olᴜ emi tia ani. 25Baputizi Yohanani eri enga ngoa ya? 'Bua kani 'ba vᴜ ya? Yi nga yi ozi yi eselia ceni ceni kini, Ama ka 'yo 'Bua, eri nga 'yo ama tia, Emi a'ini di kᴜ a'disi ya? 26Te ama ka ‘yora, 'Ba vᴜ, ama rᴜ 'ba ongᴜlᴜmᴜrᴜ; 'ba driani a'ile kini Yohanani nabinirisi. 27Yi nga e'yo omvi, 'yo Yesu tia, Ama nini kᴜ. Eri nga di 'yo yi tia ani, Dini ma olᴜni vini alᴜ emi tia e'yo mani e'yo 'diyi 'yezᴜ okpo ngonirisiri kᴜ. 28Emi ega ngoni ya? 'Ba azini ovᴜ anzi be iri ; eri eca mva okori vᴜ, eri ‘yora, Mva mani, mi mu andrᴜ azi nga amvu zabibunia. 29Eri omvi e'yo, ‘yora, Ma leni kᴜ; te vilerisi eri nga i asi oja, mu ra. 30Eri eca mva iriri vᴜ, eri 'yo e'yo te alᴜrile ; eri nga e'yo omvi, Ma mu ra, ma ata; te eri muni kᴜ. 31'Ba iri 'diyi ma eselia, a'di 'ye e'yo i atini lelerini ya? Yi ‘yora, Okori'i. Yesu nga 'yo yi tia, Ma 'yo emi tia ndi ndi, 'ba musoro okᴜpi 'diyi pi okᴜ ali o'bapi 'diyi be nga fi suru Munguni ma alia emi drilia oko. 32A'disikᴜ Yohana eri emu emi vᴜ geri e'yo kililirᴜnisi, te emi a'ini eri kᴜ, te 'ba musoro okᴜpi 'diyi pi okᴜ ali o'bapi 'diyi be a'i erini; te emi'i, emi ka ndre 'dini 'bo ti, emi ojani emi asi vilerisi eri a'izᴜ kᴜ. 33Emi eri e'yo o'beza azini. Agu azini eri jo e'ini, eri isi zabibu pati amvu alia, to kali ageinia ci, ga 'bile alenia patiefi ma su nzizᴜ, si jo izᴜrᴜ angᴜ agei tezᴜ, eri kᴜ eri 'ba ageini tepi 'diyi dri, nga mu angᴜ andinia. 34Ewu efinirini kazᴜri ka eca ogogo, eri pe ati'ba erini ma ti 'ba amvᴜ agei tepi 'diyi vᴜ, efi kaza erini a'izᴜ; 35te 'ba amvu agei tepi 'diyi nga ati'ba erini obi ci, alᴜri yi co co, aziniri yi fu kai, aziniri yi o'be onisi. 36Dika eri nga ati'ba azini ma ti ope, kakaᴜ aga oko 'diyi ra ; yi nga yi 'ye dria alᴜrile. 37Te vilerisi eri nga mvi ini ma ti pe yi vᴜ, kini, Yi nga ma mvini inzi ra. 38Te 'ba amvu agei tepi 'diyi ka mvini ndre 'bo, yi nga 'yo yi eselia ceni ceni, 'Di karimva angᴜ nyapiri'i; emi emu, ama fu eri, ama pa angᴜ erini amanirᴜ. 39Yi bi eri, yi nga eri 'be amvᴜ zabibuniasi amve, yi fu eri ra. 40E'yo 'disi opi amvu zabibuni ma e'ini ka eca, eri nga 'ba amvu agei tepi 'diyi 'ye ngoni ya? 41Yi 'yo eri tia, Eri nga 'ba onzi 'diyi ma dri ja onzi, eri nga amvu zabibuni fe kᴜ 'ba amvᴜ agei tepi azini, ngapi efi kaza fepi eri dri ewu yini vᴜsi 'diyi dri. 42Yesu 'yo yi tia, Emi lani e'yo siza ma alia kᴜ ya, kini: Oni 'ba jo sipi 'diyini gale siri, oni 'diri ofᴜ ovᴜzᴜ jo kalati ma oni drirᴜri'i, oni drirᴜ nde 'diri enga Opi vᴜ, eri ovᴜ ama milia e'yo osutarᴜni. 43E'yo 'disi ma 'yo emi tia, suru Mungunini nga ovᴜ pazarᴜ emi dri, eri nga ovᴜ fezarᴜ suru andini efi eriniri kapiri dri. 44'Ba e'depi oni 'dori ma driari nga ovᴜ nyozarᴜ, te 'ba dria erini e'dezᴜ driniari nga ovᴜ erezarᴜ irifᴜrale. 45'Ba kuhani amborᴜ piyi 'ba Farisaini be ka e'yo o'beza erini eri ra, yi ni ra eri e'yo 'yo yisi. 46Te yi ka geri nda eri bizᴜ, yi rᴜ 'ba ongᴜlᴜmᴜrᴜ, yini a'ile kini eri nabinirisi.

will be added

X\