MATAYO 20

1Te suru 'buari si i ekile agu jo e'irᴜ fᴜpi o'bitisi drio 'ba azi ngapi 'diyi ayᴜzᴜ, ejizᴜ amvᴜ ini zabibuni ma aliarile. 2Ka ede e'yo 'ba ayᴜa 'yepi 'diyi be kini yi nga dinari alᴜ a'i o'du alᴜ alᴜsi 'bo, eri pe yi ti amvᴜ ini zabibuniria. 3Eri fᴜ etu na, eri nga 'ba azini ndre pa soria cuua azi kokorᴜ; 4eri 'yo 'ba nde 'diyi tia, Emi mu amvᴜ zabibunia indi; ma nga afa fe emi dri kililirᴜ. Yi mu ra. 5Eri fᴜ dika etu azia azini etu oromi, eri nga 'ye 'dinile tro tro. 6Eri fᴜ sawa mᴜdri drini alᴜ, eri nga 'ba azini isu pa soria; nga 'yo yi tia, Emi so pa 'doa azi kokorᴜ o'du alᴜ pi a'disi ya? 7Yi nga 'yo eri tia, 'Ba alᴜni ama ayᴜle kᴜrisi. Eri 'yo yi tia, Emi'i indi, emi mu amvᴜ zabibunia. 8Etu ka 'de ra, 'ba amvu zabibuni ma e'i nga 'yo 'ba erini azi ma driliari ma tia, Mi omve 'ba ayᴜa 'yepi 'diyi, mi ofe oya yini, mi e'do 'ba vile 'diyisi cazᴜ 'ba oko 'diyi vᴜ. 9'Ba te fipi sawa mᴜdri drini alᴜsi 'diyi emu ra, yi a'i dinari alᴜ alᴜ. 10'Ba oko 'diyi ka eca ra, yi osu yi nga afa a'i aga ra; te yi'i indi, yi a'i dinari alᴜ alᴜ. 11Yini eri a'iria yi ono ono jo e'i dri, 12yi ‘yora, 'Ba vile 'diyi nga azi etu alᴜ a'dule, te mi 'ba yi ama be tro tro, ama'i 'ba andepi kai azi okporᴜ o'du alᴜni pisi etu driza be 'diyi. 13Te eri nga e'yo omvi, 'yo 'ba alᴜ yi ma eseliari ma tia, Ma agyi, ma 'yeni mi onzi kᴜ; mi edeni e'yo ma be dinari alᴜ a'izᴜ kᴜ ya? 14Mi 'du miniri, mi mvi; ma le 'ba vile 'diri ofe ekile mani mi ofelerile. 15Econi mani 'yezarᴜ afa maniri be mani lelerile kᴜ ya? Kani mi mile onzi mani ovᴜle onyirᴜrisi ya? 16'Dini 'ba vile 'diyi nga ovᴜ 'ba oko 'diyirᴜ; 'ba oko 'diyi 'ba vile 'diyirᴜ. 17Yesuni turia Yerusalemua, eri nga 'ba erini imbale mᴜdri drini iri 'diyi 'du kalaa, nga 'yo yi tia geria oyokolosi, 18Emi ndre, ama tu Yerᴜsalemua; yi nga Mvi 'bani fe kuhani amborᴜ piyi dri 'ba waraga sipi 'diyi be, 'ba 'diyi nga e'yo li drinia eri fuzᴜ, 19yi nga eri fe 'ba jururᴜ 'diyi vᴜ eri ecandizᴜ, eri cozᴜ, eri dizᴜ pati ruaa, te o'du nasi eri nga enga ra. 20Vᴜtinia anzi Zebedayoni ma andri nga eca eri vᴜ anzi erini be, nga kᴜmᴜti osi tinia, e'yo azini a'izᴜ eri dri. 21Eri nga 'yo eri tia, Mi le a'dᴜni ya? Eri nga 'yo eri tia, Mi azi anzi mani iri 'diyi ma ri, alᴜ mi dri adaria, alᴜ mi dri ejiria, suru mini ma alia. 22Te Yesu nga e'yo omvi, nga ‘yora, Emi nini e'yo emini a'ileri kᴜ. Eco emini mvuzarᴜ ejea mani ngazᴜ mvuzᴜrisi ra ya? Yi 'yo eri tia, Ama eco ra. 23Eri nga 'yo yi tia, Ejea mani mvuzᴜrisi emi nga mvu ra ada; te rizᴜ ma dri adaria azini ma dri ejiriari, fezaniri eri e'yo mani yo, te eri 'ba ma Atani eri edele ngonde yi dri 'diyini. 24'Ba mᴜdri ka e'yo 'diri eri ra, yi ovᴜ aokosi adripi iri 'diyi vᴜ. 25Te Yesu nga yi omve i vᴜ, nga ‘yora, Emi ni ra 'ba 'ba jurᴜ dri cepi 'diyi adri yi ma drilia opirᴜ, 'ba amborᴜ yini adri yi ayᴜ okposi. 26Te eri ngani ovᴜ 'dinile emi eselia kᴜ; te 'ba ka le ovᴜ 'ba amborᴜ emi eselia, eri ma ovᴜ 'ba emi ma aza kopirirᴜ, 27te 'ba ka le ovᴜ 'ba okorirᴜ emi eselia, eri ma ovᴜ ati'bo emini; 28'dinile Mvi 'bani emuni 'bani eri aza kozᴜ azisi 'dini kᴜ, te 'ba aza kozᴜ, azini idri ini fezᴜ 'ba kakaᴜ onzezᴜ. 29Yini fᴜria Yerikoarisi, 'ba ongᴜlᴜmᴜrᴜ kakaᴜ bi eri vᴜti. 30Mi ndre, 'ba mile draza be iri yini riria geri kalaa, yi ka eri kini Yesuni agani, yi otre urᴜ kini, Opi, mi ovᴜ yikisi ama vᴜ, mi Daudi mvi la! 31'Ba ongᴜlᴜmᴜrᴜ ega yi ma dria, kini yi ma ovᴜ ciri ; te 'ba 'diyi otre urᴜ aga ra, 'yozᴜ kini, Opi, mi ovᴜ yikisi ama vᴜ, mi Daudi mvi la! 32Yesu nga pa so ci, nga yi omve, nga ‘yora, Emi le ma 'ye emi dri a'dᴜni ya? 33Yi nga 'yo eri tia, Opi, mile amani ma ovᴜ zizarᴜ fo! 34Yesuni ovᴜria asi ndriza be, nga yi ma mile elo ; coti yi ndre angᴜ ra, yi nga eri vᴜti bi.

will be added

X\