MATAYO 2

1Yesuni osiria Betelehemu Yudiaaria ewu Herodeni ovᴜzᴜ opirᴜrisi, mi ndre, 'ba ondᴜarᴜ engapi kala etuni efᴜrialerᴜria 'diyi nga eca Yerusalemua, kini, 2Mva osile opi 'ba Yahudinirᴜri ngoa ya? A'disikᴜ ama ndre 'bi'bio erini etuni efᴜria, ama eca eri ma ru inzizᴜ ani. 3Opi Herode ka eri 'dini, asini oti oti, 'ba Yerusalemua 'diyi be dria; 4eri nga kuhani amborᴜ okᴜ dria, karani 'ba nde 'diyini be, nga pari Kristoni osizᴜri zi yi tia. 5Yi nga e'yo omvi eri tia, Betelehemu Yudiaari ma alia; a'disikᴜ nabi si ndra e'yoni 'dini: 6Mi Betelehemu angᴜ Yudaniari, mi ovᴜni werearᴜ tu opi Yudaa 'diyi ma eselia, 'dini kᴜ; 'ba 'ba dri cepirini ngale efᴜle mi ma aliarisi, ngapi suru mani Israeliniri ocepiri'i. 7Herode nga di 'ba ondᴜarᴜ 'diyi omve oyokolosi, nga zi yi tia o'du 'bi'bioni e'dazᴜri olᴜzᴜ i tia kilili; 8nga yi ti pe Betelehemua, nga 'yo, Emi mu e'yo mvani ozi kililirᴜ, emi ka eri isu ra emi pe e'yoni ma ti ma vᴜ, ma'i indi ma ma emu eri inzizᴜ beni. 9Yi ka e'yo opi ma tiari eri 'bo, yi mu ra; te mi ndre, 'bi'bio ndra yini ndrele etuni efᴜriari nga dri ce yi drilia, de nga emuni pa sozᴜ 'bua pari mvani ovᴜzᴜri ma drilia kᴜ. 10Yi ka 'bi'bioni ndre ra, yi asi ovᴜ ayikorᴜ tᴜ; 11yi ka fi joa 'bo yi nga odekᴜa ndre andri Mariamu be, yi nga kᴜmᴜti osi va runi inzizᴜ; nga afa yini lonyi ta mbazᴜ 'diyi ma ti ozi ra, afa feza fezᴜ eri dri, mele pi, obiese pie, odᴜ arikarirᴜri be. 12Munguni yi imbaria orobisi kini ma mvi 'dale Herode vᴜ kᴜ, yi nga mvi angᴜ yinia geri azinisi. 13Yi ka mvi 'bo, mi ndre, malaika Opini nga i e'da Yusufu vᴜ o'du koria orobisi, kini, Mi nga, mi 'du mva andri be, mi apa Misiria, mi ovᴜ 'dale 'dani kpere mani 'yoria mi tiaria; Herodeni 'yele lele mva ndrule drini jazᴜrisi. 14Eri nga di nga, mva jizᴜ andri be inisi, apazᴜ Misiria ra; 15eri ovᴜ 'dale kpere Herodeni draria; e'yo Opini 'yole geri nabi vᴜrisiri ma 'ye i ani, kini, Ma omve mva mani engazᴜ Misiriarisi 'bo. 16Etu 'dasi Herode ka ndre 'ba ondᴜarᴜ ede i ma e'yo 'bo, eri ovᴜ di aokosi tᴜ, eri nga 'ba ti pe agupianzi Betelehemu pia angᴜ ageinia 'diyi be dria 'diyi ma dri jazᴜ dria, e'dozᴜ anzi eli be iri 'diyisi, azini anzi capi 'dipi kᴜ 'diyi dria, ekile o'du erini nile kililirᴜ 'ba ondᴜarᴜ ma tiarile. 17E'yo nabi Yeremiani 'yoleri nga di i 'ye ani 'yeke, kini : 18O'duko eri i Ramaa, awᴜ pi lulu gaza ambori be, Rakelini anzi ini owᴜ; leni ma omi i asi kᴜ, yini ovᴜle yorisi. 19Te Herode ka dra 'bo, mi ndre, malaika Opini e'da i Yusufu vᴜ orobisi Misiria, kini, 20Mi nga, mi ji mva andri be, mi mu angᴜ Israelinia; 'ba ndra mva ma dra ndapi 'diyi odra 'bo. 21Eri nga enga ra, nga di mva ji andri be fizᴜ angᴜ Israelinia. 22Te eri ka eri kini Arikelao nya di opi Yudiaa ati Herode ma pariani, eri rᴜ mvizᴜ vile; Munguni eri imbaria orobisi, eri nga i oja vile, nga fi kala Galilinia. 23Eri nga mu ri ovᴜ aku omvele Nazaretiria; e'yo nabini 'yoleri ma 'ye i 'yeke ani, kini, Yi nga eri omve 'ba Nazaretini.

will be added

X\