MATAYO 18

1Etu 'dasi 'ba erini imbale 'diyi nga eca Yesu vᴜ, nga ‘yora, A'dini nga ovᴜ amborᴜ suru 'buarima aliani ya? 2Eri nga mva were omve i vᴜ, nga eri 'ba pa sozᴜ yi ma eselia, 3eri nga ‘yora, Ma 'yo emi tia ndi ndi, emi ka emi oja ovᴜzᴜ anzi nyiri nyirile kᴜ, emi ngani fi suru 'buaria alᴜni kᴜ. 4E'yo 'disi 'ba azini ka i oja afᴜ kokorᴜ ekile mva were 'dirile, 'ba nderi eri 'ba amborᴜ suru 'buari ma alia. 5Te 'ba azini ka mva were 'dinileri alᴜ a'i ma rusi, eri a'i ma'i ; 6'ba azini ka anzi nyiri nyiri ma a'ipi 'diyi ma azi alᴜ fe aba ra, onyirᴜ yi ma ombe oni amborᴜ anya 'izᴜri eri ombelea, ma 'be eri yi alirᴜ miriniri ma alia. 7Candi nyaku dri e'yo 'bani abazᴜ 'diyisi! E'yo 'bani abazᴜ ani 'diyi ma emu ecekokorᴜ, te candi 'ba nde e'yo 'bani ani abazᴜri ejipiri dri! 8Mi dri, kani mi pa, ka fe mi aba aba, mi li eri va, mi 'be mi ageiarisi ziri; eri onyirᴜ mi dri fizᴜ idria dri utrulu be, kani pa dulurᴜ beri, aga yini mi 'bezᴜ aci inyukokorᴜ ma alia dri iri be, kani pa iri beri ra. 9Mi mile ka fe mi aba aba, mi nze eri, mi 'be eri mi ageiarisi ziri ; eri onyirᴜ mi dri fizᴜ idria mile alᴜ beri aga yini mi 'bezᴜ Jehanuma aciniria mile ir beri ra. 10Emi ma ovᴜ mile be emi ma ede anzi nyiri 'diyi ma azi alᴜni kᴜ; te ma 'yo emi tia kini malaika yini 'bua 'diyi yi Ata mani ovᴜpi 'buari ma mile ndre etu dria. 11Te Mvi 'bani emu afa avipiri pazᴜ ra. 12Emi osu ngoni ya? Agu alᴜ ka ovᴜ kabilo be tᴜrᴜ, yi ma eselia alᴜ ka avi eri dri ra, eri ngani kali oromi drini oromi 'diyi kᴜ oni dria, muzᴜ te avipiri ndruzᴜ kᴜ ya? 13Eri ka eri isu ra, ma 'yo emi tia ndi ndi, eri ovᴜ ayiko be erisi aga kali oromi drini oromi avipi kᴜ 'diyisiri ra. 14'Dinile Ati emini ovᴜpi 'buari leni anzi nyiri 'diyi ma azi alᴜni ma ja dri yi eselia kᴜ. 15Mi adripi ka mi eza ra, mi mu eri imba, emi irisi a'dule. Eri ka mi ti eri ra, mi isu mi adripi 'ba minirᴜ 'bo. 16Te eri ka eri kᴜ, mi ji 'ba alᴜ, kani 'ba iri mi be indi, 'dini e'yo dria ma so pa 'ba e'yo eti nzepi 'ba iri kani na 'diyi ma tisi ani. 17Eri ka e'yo yini 'yoleri ga si, mi 'yo kanisa tia ; eri ka e'yo kanisani ga si, eri ma ovᴜ mi dri ekile 'ba jurule, kani 'ba musoro okᴜpirile. 18Ma 'yo emi tia ada, afa dria emini ombele nyakuari nga ovᴜ ombezarᴜ 'bua, azini afa dria emini trᴜle nyakuari nga ovᴜ trᴜzarᴜ 'bua indi. 19Ma 'yo emi tia dika kini 'ba iri emi eselia ka ti eci tualᴜ nyakua e'yo alᴜ alᴜ dria yini zile 'diyisi, Ata mani ovᴜpi 'buari nga eri 'ye yi dri. 20Te pari 'ba iri kani 'ba na yini yi okᴜzᴜ tualᴜ ma rusiria, pari 'daa ma indi yi eselia. 21Vᴜtinia Petero nga di eca, nga 'yo eri tia, Opi, adripi mani nga ma eza pale si ka, mani e'yo onzi erini kᴜzᴜ ya? Kpere ecazᴜ pale aziri ya? 22Yesu nga 'yo eri tia, Ma 'yoni emi tia, Ecazᴜ pale aziri, 'dini kᴜ; te, Ecazᴜ kali aziri pale aziri. 23E'yo 'disi suru 'buari ovᴜ ekile agu melekirᴜ lepi afa erini lazᴜ nizᴜ kani si ya, ati'ba erini berile. 24Erini 'baria laria, yi nga 'ba alᴜ mari erini nyapi talanto alifᴜ mᴜdriri eji eri vᴜ; 25te erini ovᴜria afa kokorᴜ mari ofezᴜrisi, opi nga azi yi ma fe eri ozizᴜ, okᴜ pie, anzi pie, afa erini ovᴜzᴜ yi be 'diyi be dria, mari nde ofezᴜ. 26Ati'bo nde nga di i eco va eri inzizᴜ, kini, Opi, mi 'ye ma be e'yere, ma nga afa ofe mi dri dria ra. 27Opi ati'bo ndeni nga ovᴜ yikisi eri vᴜ, nga eri trᴜ ra, nga mari nde kᴜ eri dri ra. 28Te ati'bo nde 'dari nga fᴜ, nga ati'ba i agyirᴜ 'diyi ma azi isu alᴜ, ndra mari erini nyapi silingi tᴜrᴜ alᴜri ; eri nga eri bi ombelekoa nzizᴜ, kini, Mi ofe mari mini nyaleri. 29'Dini ati'bo eri ma agyirᴜ nga i eco va, nga matᴜ 'ba eri vᴜ, kini, Mi 'ye ma be e'yere, ma nga mi afa ofe ra. 30Te eri leni kᴜ, te eri mu eri 'bezᴜ arujoa, ecazᴜ erini ngazᴜ mari erini nyaleri ofezᴜria. 31'Dini ati'ba agyirᴜ 'diyi ka e'yo yi 'yepi 'diyi ndre ra, yi ovᴜ candisi tᴜ, yi nga emu e'yo dria yi 'yepi 'diyi olᴜ opi yini ma tia. 32Opi erini nga di eri omve, nga ‘yora, Mi'i, mi ati'bo onzini, ma kᴜ ndra mari 'dari mi dri dria ra, mini matᴜ 'bale ma vᴜrisi; 33eri ovᴜni onyirᴜ mini ovᴜzᴜ yikisi ati'bo mi agyirᴜri vᴜ, ekile ndra mani ovᴜle yikisi mi vᴜrile kᴜ ya? 34Opi erini nga ovᴜ adrasi, nga eri fe 'ba 'ba ecandipi 'diyi dri, ecazᴜ erini ngazᴜ mari erini nyaleri ofezᴜ driaria. 35Ati mani ovᴜpi 'buari nga 'ye emi be 'dinile indi, emi alᴜ alᴜ ka emi adripi ma e'yo kᴜ asi driasi kᴜria.

will be added

X\