MATAYO 16

1'Ba Farisaini piyi nga eca 'ba Sadukayoni be eri o'bizᴜ, nga zi eri tia eri ma ece eceta engapi 'buari yi dri. 2Te eri nga e'yo omvi, 'yo yi tia kini, Ka eca ondresi, emi adri 'yo, Angᴜni nga ovᴜ onyirᴜ, 'buni ovᴜle ekarᴜrisi. 3Te o'bitisi, Andrᴜ angᴜ mile onzi, 'buni ovᴜle ekarᴜ azini iritini ovᴜle inirᴜrisi. Emi ni 'bu ma mile amazᴜ ra 'bo, te eceta ewuniri emi econi amazᴜ kᴜ. 4A'bianzi onzi ali o'bapi 'diyi yi eceta nda, te yi ngani eceta fe yi dri kᴜ, pe lᴜ eceta Yonani. Eri nga yi kᴜ ra, mu ra. 5'Ba erini imbale 'diyi nga ca 'aa'dasi, te yi ma dri avi mikate jizᴜ ra. 6Te Yesu nga 'yo yi tia, Emi ndre emi te emi agei akufi 'ba Farisaini pini ma e'yosi 'ba Sadukayonibe. 7Yinga e'yo ega yieselia, 'yo kini, Ama ejini mikate kᴜ. 8Yesu ka ni ra eri nga ‘yora, Emi a'ita be were 'diyi la, emi e'yo ega emi eselia emini ovᴜle mikate kokorᴜrisi a'disi ya? 9Emi vani nga kiri kᴜ, emi egani mikate towi 'ba alifᴜ towi driri kᴜ ya? Emi o'du ndra evᴜ si ya? 10Kani mikate aziri 'ba alifᴜ su driri, emi o'du abaka si ya? 11Emi vani kᴜ kini ma 'yoni e'yo mikateni emi tia kᴜ ngoni ngoni ya? Te emi te emi agei akufi 'ba Farisaini pini ma e'yosi 'ba Sadukayoni be. 12Yi nga di va ani kini eri 'yoni e'yo agei tezᴜ akufi mikateni ma e'yosi kᴜ, te yi agei tezᴜ imbata 'ba Farisaini pini ma e'yosi 'ba Sadukayoni be. 13Yesu ka eca angᴜ Kaisari Filipiniria, eri nga 'ba erini imbale 'diyi zi kini, 'Ba kini Mvi 'bani eri a'di'i ya? 14Yi nga ‘yora, 'Ba azini kini Yohana baputizi fepiri'i, 'ba azini kini Eliya'i, azini kini Yeremia'i kani 'ba nabirᴜ 'diyi ma azi. 15Eri nga 'yo yi tia, Te emi'i, emi kini ma a'di'i ya? 16Simoni Petero nga e'yo omvi, ‘yora, Mi Kristo Mungu idrirᴜri ma Mvi'i. 17Yesu nga e'yo omvi 'yo eri tia, Mi ovᴜ drilebarᴜ, Simoni Yona mvi! Te rua pi ari be eceni e'yo 'diri mi drini kᴜ, te ma Ati ovᴜpi 'buari'i. 18Te ma 'yo mi tia, mi Petero'i, ma nga kanisa mani si kata 'dori ma dria, azini Pari 'ba drazaniri ma kalitile ngani eco eri ndezarᴜ kᴜ. 19Ma nga kifungula suru 'buarini 'diyi fe mi dri, afa dria mini ombele . nyakuari nga ovᴜ ombezarᴜ 'bua, azini afa dria mini trᴜle nyakuari nga ovᴜ trᴜzarᴜ 'bua indi. 20Vᴜtinia eri nga di 'ba erini imbale 'diyi imba ci yi ma 'yo 'ba alᴜni ma tia kini eri Kristo'i kᴜ. 21Engazᴜ etu 'dasi Yesu 'ba e'yo ece 'ba erini imbale 'diyi ma tia kini i ma mu Yerusalemua candi isuzᴜ 'ba 'wara piyi dri 'ba kuhani amborᴜ pie, 'ba waraga sipi 'diyi be, kini i nga ovᴜ fuzarᴜ, te o'du nasi i nga enga ra. 22Petero nga eri bi, nga 'ba ega eri dria 'yozᴜ kini, 'Dini yo fo, Opi la! E'yo 'diri ma 'ye i mi ruaa alᴜni kᴜ. 23Te eri oja i, nga 'yo Petero tia, Mi da mi vile ma ngᴜkᴜa, Satani! Mi ma dri kᴜmᴜrᴜ, mini e'yo Munguni egale kᴜ te e'yo 'bani egale'irisi. 24Yesu nga di 'yo 'ba erini imbale 'diyi ma tia, Ba azini ka le mu ma vᴜtia, eri ma ga i ma ngᴜlᴜpi si, ma 'du pati alaza ini, ma bi ma vᴜti. 25'Ba ka le idri ini pa ra eri nga idri nde avi ra, te 'ba ka idri ini avi e'yo manisi eri nga eri isu ra. 26Te agu ka angᴜ wudrikuru nya dria, eri nga orodri ngoni isu idri erini ka avi ra ya? Agu nga afa ngoni ofe idri ini ma paria'i ya? 27Te Mvi 'bani nga emu diza Ata erinini be, malaika erini pie; etu 'dasi eri nga di afa ofe 'ba dria alᴜ alᴜ dri, azi yini ngaleri vᴜsi. 28Ma 'yo emi tia ndi ndi, 'ba pa sopi 'doa 'diyi ma azini indi, yi ngani dra ma aji o'bi kᴜ, de nga yi ndreni Mvi 'banini emuria suru ini ma alia kᴜ.

will be added

X\