MATAYO 12

1Ewu 'dasi Yesu nga aci nga anyani ma alia etu sabatonisi ; 'ba erini imbale 'diyi ovᴜ abirisi, yi nga e'do anya dri ondizᴜ nyazᴜ. 2Te 'ba Farisaini ka ndre ra, yi nga 'yo eri tia kini, Mi ndre, 'ba mini imbale 'diyi yi e'yo azitani a'ile 'ba ma 'ye etu sabatonisi kᴜri 'ye. 3Te eri nga 'yo yi tia, Emi lani e'yo Daudini 'yele, erini ovᴜria abirisi, 'ba ovᴜpi eri be 'diyi beri kᴜ ya? 4e'yo erini fizᴜ jo Munguniria, erini mikate ecetarᴜri nyazᴜ; azita oga mikate nde eri dri azini 'ba ovᴜpi eri be 'diyi dri nyakokorᴜ, te a'i kuhanini nyazᴜ a'dule. 5Te emi lani 'diri azita alia kᴜ ya? kini kuhani hekalua o'du sabatonisi yi sabato eza, te yi ovᴜni e'yo be kᴜ. 6Te ma 'yo emi tia, 'ba hekalu agapi ambosi rari 'doa ci. 7Emi ka te e'yo 'dori ma efi ni ra, Ma le yikini, ma leni afa feza edetarᴜri kᴜ, te'do emi lini e'yo onzi 'ba e'yo kokorᴜ 'diyi ma dria kᴜ. 8Te Mvi 'bani eri Opi sabatoniri. 9Eri nga aga 'dasi, nga fi pari 'bani yi okᴜzᴜria. 10Te mi ndre, 'ba indi dri ondrizarᴜ be 'daa. Yi nga zi eri tia kini, Azita a'i 'ba rᴜa atizᴜ o'du sabatonisi ya? —yi ma sᴜ asᴜ ruania beni. 11Eri nga 'yo yi tia, Agu ngori emi eselia kabilo be alᴜ, kabilo 'diri ka 'de 'bilia o'du sabatonisi, eri ngani eri ebi nze 'biliarisi kᴜ ya? 12'Ba agani kabilo onyisi tᴜ kᴜ ya? 'Dini azita a'i 'bani e'yo onyirᴜ 'yezᴜ sabatosi ra. 13Eri nga 'yo 'ba takari ma tia, Mi ejᴜ mi dri. Eri nga eri ejᴜ ra; drini nga ati teketeke ekile azinirile. 14Te 'ba Farisaini nga fᴜ ra, nga ti eci tualᴜ yi eselia e'yo ndruzᴜ eri ruaa eri dri jazᴜ. 15Yesuni e'yo niria, ŋga angᴜ 'dari kᴜ ra. 'Ba kakaᴜ nga eri vᴜti bi ; eri nga yi rua ati dria, 16eri nga e'yo azi yi tia okposi, ma e'da eri'i kᴜ. 17E'yo nabi Isayani 'yoleri ma eca ani 'yeke, kini : 18Mi ndre ati'bo mani, mani peleri, mani lele, ayiko fepi ma asiari. Ma nga Orindi mani 'ba eri dria, eri nga e'yo liza olᴜ 'ba jururᴜ ma tia. 19Eri ngani agata ga kᴜ, eri ngani otre kᴜ, 'ba azini ngani eri ma o'duko eri geria kᴜ; 20ozᴜ anyupi anyuri, nyoni eri kᴜ, baka onyipi 'bori, inyuni eri kᴜ, de nga eri peni e'yo liza ma ti 'ba dria agazᴜ kᴜ; 21'ba juruni nga ovᴜ asi teza be eri ma rusi. 22Yi nga di 'ba orindi onzi be, mile kokorᴜ e'yo 'yopi kᴜri, eji eri vᴜ, eri nga eri ati ra, 'dini 'ba e'yo 'yopi kᴜri nga e'yo 'yo, nga angᴜ ndre indi. 23'Ba ongᴜlᴜmᴜrᴜ dria nga osu tᴜ, nga ‘yora, 'Di Daudi mvi'i kᴜ ya? 24Te 'ba Farisaini ka eri ra, yi nga ‘yora, 'Ba 'diri droni orindi onzi kᴜ, pe lᴜ Beelizebuli opi orindi onziniri ma okposi. 25Erini egata yini niria, eri nga 'yo yi tia, Opi nyaza dria i esele copi awatasi ceniri nga ovᴜ ezazarᴜ, azini aku dria, kani joni, i esele copi ceni ceniri ngani pa so kᴜ; 26Satani ka Satanini dro ra, co i esele awatasi 'bo; ka'dini opi nyaza erini nga pa so ngoni ngoni ya? 27Ma ka orindi onzi dro okpo Beelizebulinisi, anzi emini yi yi dro okpo a'dinisi ya? E'yo 'disi yi nga ovᴜ 'ba e'yo emini lipi 'diyi. 28Te ma ka orindi onzi dro Orindi Munguni ma okposi, ece bani suru Munguni eca emi vᴜ 'bo. 29'Ba eco fizarᴜ 'ba okporᴜ ma joa, afa erini opazᴜ, ngoni ngoni, ka eri oti okorisi ci ka kᴜ ya? Eri nga di afa jo erinia 'diyi opa ndo. 30'Ba ka ovᴜ ma be kᴜ, eri ovᴜ ari'bo mani; ka afa okᴜ ma be kᴜ, eri afa mani ere ere. 31'Dini ma 'yo emi tia, yi nga e'yo onzi dria ma e'yo kᴜ 'ba dri ra, a'data be, te a'data Orindi o'dazᴜri ngani i kᴜ alᴜni kᴜ. 32'Ba ka e'yo onzi 'yo Mvi 'bani ma ruaa, yi nga e'yo erini kᴜ ra; te 'ba ka Orindi Alatararᴜ o'da, ngani ovᴜ kᴜzarᴜ, kani ewu 'dorisi, kani emupirisi kᴜ. 33Kani emi 'ba pati onyirᴜ, efi erini onyirᴜ indi; kani emi 'ba pati onzi, efi erini onzi indi ; te 'ba yi pati ni efi erinisi. 34Emi uri ma anzi! Emi ovᴜpi onzi 'diyi, emi eco e'yo onyirᴜ 'yozarᴜ ngoni ngoni ya? Te e'yo gapi asia treri, tini 'yo'i. 35'Ba onyirᴜ nga afa onyirᴜ ofᴜ lonyi erini onyirᴜ ma alia, 'ba onziri nga afa onzi ofᴜ lonyi erini onziri ma alia. 36Ma 'yo emi tia, e'yo dria efi kokorᴜ 'bani 'yoleri, yi nga e'yo nze drinia o'du e'yo lizᴜrisi; 37te e'yo mini nga ovᴜ lazarᴜ kilili e'yo mini 'yolerisi, e'yoni vini nga mi nde e'yo mini 'yolerisi. 38Vilerisi 'ba waraga sipi 'diyi ma azi 'ba Farisaini be nga e'yo omvi eri tia kini, 'Ba 'ba Imbapiri, ama le eceta ndre mi vᴜ. 39Te eri nga e'yo omvi, 'yo yi tia, A'bianzi onzi azini awurᴜ 'diyi yi eceta nda; te ngani eceta fe yi dri kᴜ, pe eceta nabi Yonaniri a'dule. 40Te ekile Yonani ovᴜle o'du na etusi inisi e'bi amborᴜ ma aliarile, 'dinile Mvi 'bani nga ovᴜ o'du na etusi inisi nyaku ma alia. 41'Ba Ninevea 'diyi nga pa oso o'du e'yo lizᴜrisi a'bianzi 'doyi be, yi nga e'yo li yi ndezᴜ, yini ndra yi asi ojale e'yo Yonani olᴜlerisirisi te mi ndre, 'ba Yonani agapi ambosi rari 'do! 42Okᴜ melekirᴜ engapi angᴜ urulerᴜari nga enga o'du e'yo lizᴜrisi a'bianzi 'doyi be, eri nga e'yo li yi ndezᴜ, erini engale angᴜ ma kalatia emule ondᴜa Sulemanini erizᴜrisi; te mi ndre, 'ba Sulemanini agapi ambosi rari 'do! 43Orindi onzi ka fᴜ 'ba ma alia 'bo, eri aci angᴜ yi kokorᴜria ande liza ndruzᴜ, te eri isuni kᴜ. 44Eri nga di 'yo kini, Ma nga dri da vile, jo mani ndra ibizᴜria; ka eca ra eri isu eri toko, kozarᴜ alarᴜ, edezarᴜ indi. 45Eri nga di mu orindi onzi aziri i agapi onzisi ra 'diyi okᴜ i vᴜ, yi nga fi ovᴜ 'daa; agu nde ma e'yo vileri nga eca onzi aga okori ra. Eri nga ovᴜ 'dini a'bianzi onzi 'doyi vᴜ. 46Erini e'yo 'yoria 'ba ongᴜlᴜmᴜrᴜ ma tia, mi ndre, andri pi oso pa amve adripi be, le e'yo 'yo eri be. 47'Ba alᴜ nga 'yo eri tia, Mi ndre, mi andri pi pa oso amve mi adripi be, le e'yo 'yo mi be. 48Te eri nga e'yo omvi, 'yo 'ba e'yo 'yopiri ma tia, Andri mani a'di'i ya? Ma adripi yi a'di piyi ya? 49Eri nga i dri ejᴜ 'ba erini imbale 'diyi vᴜ, nga ‘yora, Mi ndre, ma andri ma adripi be. 50'Ba ka e'yo ma Ati ovᴜpi 'buarini leleri 'ye, agu nderi ma adripi, ma amvipi, azini ma andri'i.

will be added

X\