MATAYO 10

1Eri nga 'ba erini imbale mᴜdri drini iri 'diyi omve i vᴜ, eri nga okpo fe yi dri orindi onzi odrozᴜ, azini azo dria atizᴜ dra be dria. 2'Ba ti opele mᴜdri drini iri 'diyi ma ru yi 'di'i: okori Simoni omvele Petero'iri pi adripi erini Andarea be; Yakobo Zebedayo mvi pi adripi erini Yohana be; 3Filipo pi Baritolomayo be; Tomasi pi Matayo 'ba musoro sopiri be; Yakobo Alifayo mvi pi Tadayo be; 4Simoni Kananiari pi Yudasi Isikarioteni, 'ba eri o'di nyapiri be. 5Yesu nga 'ba mᴜdri drini iri 'diyi ma ti pe, nga e'yo azi yi tia kini, Emi fi geri 'ba jurunia kᴜ, emi ma fi vini 'ba Samariaa 'diyi ma akua kᴜ indi, 6te agapiri emi mu suru Israelini ma kabilo avipi 'diyi vᴜ. 7Te emini muria emi olᴜ e'yo, 'yozᴜ kini, Suru 'buari eri eca emi vᴜ ogogo 'bo. 8Emi ati 'ba rᴜa onzi be 'diyi, emi enga 'ba draza, emi 'ba 'ba ofᴜ be 'diyi alarᴜ, emi odro orindi onzi. 'Ba fe emi dri toko, emi fe 'ba dri toko indi. 9Emi ma ji mele pi, dahabu pie, mola be enyi emi opileari ma alia kᴜ; 10emi 'du jᴜrᴜa acitaniri pi, koti iri pie, enyiriko paari pie, kali pie dria kᴜ; te onyirᴜ 'ba azi ngapiri ma isu nyaka erini. 11Aku amborᴜ kani were emini fizᴜ aleniaria dria, emi ndru 'ba onyirᴜ aku nderi ma alia, emi la 'daa de nga emi fᴜni kᴜ. 12Emi ka fi joa, emi zi yi ci ci. 13Te jo ka ovᴜ onyirᴜ, asi anzurᴜ emini ma ovᴜ eri ma dria; te eri ka ovᴜ onyirᴜ kᴜ, asi anzurᴜ emini ma emvi emi vᴜ. 14Te 'ba azini ka emi a'i kᴜ, ka e'yo emini 'yoleri eri kᴜ, emini fᴜria jo 'daria, kani aku 'daria, emi oya irifᴜra emi paari. 15Ma 'yo emi tia ndi ndi, o'du e'yo lizᴜrisi candi aku 'darini nga candi angᴜ Sodomu pini Gomora beri aga ra. 16Emi lu, ma emi ti ope ekile kabilo 'balau eselia; emi ma ovᴜ di ondᴜa be ekile urile, azini e'yo onzi kokorᴜ a'balaᴜle. 17Emi te emi agei 'ba ma e'yosi; te yi nga emi fe 'ba e'yo amapi 'diyi dri, yi nga emi co pari yini yi okᴜzᴜria, 18yi nga emi ji 'ba 'ba dri cepi 'diyi pi ma milia opi amborᴜ be ma rusi, emini e'yo eti nzezᴜ yi dri, 'ba jururᴜ 'diyi dri indi. 19Te yi ka emi fe ra, emi asi ma oti geri ngoni, kani e'yo ngoni, emini ngale 'yolerisi kᴜ; e'yo emini ngale 'yoleri nga ovᴜ fezarᴜ emi dri etu 'dasi; 20te ovᴜni emi'i e'yo 'yozᴜ kᴜ, te Ati emini ma Orindini e'yo 'yo emi aliani 21Adripini nga adripi fe drazᴜ, atini nga mvani fe indi, anzi yi nga enga 'ba yi tipi 'diyi ma ruaa yi fezᴜ drazᴜ; 22'ba dria yi nga emi ngu onzi ma rusi. Te 'ba ka ovᴜ asi teza be kpere ewu asizaniria, eri nga i pa ra. 23Te 'ba ka emi inza aku 'dari ma alia, emi apa aku azini vᴜ; te ma 'yo emi tia ndi ndi, econi emini aku dria Israelini dezarᴜ kᴜ, de nga Mvi 'bani ecani kᴜ. 24'Ba yini imbaleri agani 'ba eri imbapiri kᴜ, ati'bo agani opi erini kᴜ; 25fu dri 'ba yini imbaleri dri ovᴜzᴜ 'ba eri imbapirile, ati'boni ovᴜzᴜ opi erinile. 'Ba ka ndra jo e'ini omve Beelizebuli'i, yi ngani 'ba eri ma joa 'diyi omve 'dini aga ra kᴜ ya? 26Te emi rᴜ yi kᴜ; afa opizarᴜri alᴜni ngani ovᴜ e'dakokorᴜ kᴜ, azini afa zizarᴜ dria nga ovᴜ nizarᴜ. 27E'yo mani 'yole emi tia ini aliari, emi ma olᴜ diza alia ; e'yo emini erile emi bileari, emi oyᴜ urᴜ jo dria. 28Emi rᴜ 'ba rua fupi ra, te ecopi orindi fupi kᴜ 'diyi kᴜ; te agapiri emi rᴜ 'ba ecopi orindi pi dri japi rua be Jehanumaari'i. 29Burᴜa iri 'ba jeni sente alᴜsi kᴜ ya? Te alᴜ yi ma eselia e'deni nyakua emi atini nikokorᴜ kᴜ. 30Te ka dribi efi emi dria 'diyi ti, yi ovᴜ dria lazarᴜ. 31E'yo 'disi emi asi ma oti kᴜ; emi aga burᴜa kakaᴜ onyisi ra. 32'Ba dria ma e'dapi 'ba ma miliari, ma nga vini eri e'da ma Ati ovᴜpi 'buari ma milia ra; 33te 'ba dria alᴜ alᴜ ma gapi 'ba ma milia siri, ma nga vini eri ga ma Ati ovᴜpi 'buari ma milia si. 34Emi osu ma eca asi anzurᴜ ejizᴜ nyakua 'dini kᴜ; ma eca asi anzurᴜ ejizᴜ kᴜ, te seini. 35Te ma eca esele coza ejizᴜ 'ba pi ma eselea ati be, zamva pi andri be, idria pi edra be; 36azini 'ba ma ari'ba yi 'ba eri vile joa 'diyi. 37'Ba azini ka ati kani andri le aga ma ra, eri funi dri masi kᴜ; 'ba azini ka i mvi kani i zi le aga ma ra, eri funi dri masi kᴜ ; 38'ba ka pati eri dizᴜri 'du ma vᴜti bizᴜ kᴜ, eri funi dri masi kᴜ. 39'Ba ka idri erini isu ra, eri nga eri avi ra; te 'ba ka idri erini avi masi, eri nga eri isu ra. 40'Ba emi a'ipiri a'i ma ra, azini 'ba ma a'ipiri a'i 'ba ma ti pepiri'i. 41'Ba nabi a'ipi ru nabinisiri nga nabi ma oya isu ra, 'ba 'ba kililirᴜri a'ipi 'ba kililirᴜri ma rusiri nga 'ba kililirᴜri ma oya isu ra. 42'Ba ka yi mvuza ambizarᴜ fe 'ba nyiri 'diyi ma azi dri 'ba imbaleri ma rusi a'dule, ma 'yo emi tia ndi ndi, oya erini ngani avi alᴜni kᴜ.

will be added

X\