MARAKO 2

1Eri ka fi Kaperinaumua dika o'du azini ma vᴜtia, e'yo erini ovᴜzᴜ joari nga ku ra. 2'Ba nga di yi okᴜ kakaᴜ, 'dini pari azini aceni ani kᴜ, kani jotilia ogogo 'de yo; eri nga e'yo olᴜ yi tia. 3Yi nga emu 'ba azorᴜ rua acozari beri eji ra; 'ba su 'du eri ejini. 4Ka econi yini emuzarᴜ vᴜnia ogogo 'ba ongᴜlᴜmᴜrᴜ dri kᴜ, yi nga jo erini ovᴜzᴜ aleniari ma dri zi ra; ka zi 'bo, yi nga pari 'ba acozarᴜrini lazᴜri osi va. 5Yesuni a'ita yini ndreria, nga 'yo 'ba acozarᴜri ma tia kini, Mva, e'yo onzi mini ovᴜ wuzarᴜ. 6Te 'ba karanini azini ri 'dale indi, yi nga agata ga yi asia kini, 7Agu 'di e'yo 'yo 'dini a'disi ya? Eri di Mungu o'da o'da fo! A'di eco e'yo onzi wuzarᴜni, te alᴜ a'dule Mungu'i kᴜ ya? 8Yesuni niria i ma asia coti kini yi agata ga 'dini yi ma alia, nga di 'yo yi ma tia kini, Emi di agata ga 'dini emi asia a'disi ya? 9Ngori ovᴜ ewa kokorᴜ aga rani, 'yozᴜ 'ba acozarᴜri ma tia, Mi e'yo onzi ovᴜ wuzarᴜ, kani 'yozᴜ, Mi enga, mi 'du pari mini, mi aci-ri’i ya? 10Te emi ma ni ani Mvi 'bani ovᴜ okpo be nyakua e'yo onzi wuzᴜ —eri nga 'yo 'ba acozarᴜri ma tia— 11Ma yo mi tia, Mi enga, mi 'du pari mini, mi mvi mi vile joa. 12Eri nga enga ra, 'du i ma pari coti fᴜ amve va yi milia dria; fe ani yi dria nga osu tᴜ, yi nga ani Mungu rᴜ inzi, kini, Ama ndreni oku 'dini kᴜ fo! 13Eri nga fᴜ dika miri tia; 'ba ongᴜlᴜmᴜrᴜ dria nga mu eri vᴜ, eri nga yi imba ra. 14Erini agaria eri nga Levi Alifayo mvini ndre, erini riria pari 'bani musoro 'bezᴜria, eri nga 'yo tinia, Mi bi ma vᴜti. Eri nga enga ra, nga eri ma vᴜti bi coti. 15Te eri eca 'dini, erini riria nyaka nyaria Levi vile joa, 'ba musoro okᴜpi diyi pi 'ba onzi be karakaraᴜ yi nga ri va Yesu be, 'ba erini imbale 'diyi pie. Yi ovᴜ karakaraᴜ, yi adri eri ma vᴜti bi. 16Karani 'ba Farisaini vile 'diyi ka ndre eri ta nya 'ba onzi piyi be, 'ba musoro okᴜpi 'diyi pie, yi nga 'yo 'ba erini imbale 'diyi ma tia kini, Eri di ta nya 'ba musoro okᴜpi 'diyi pi be 'ba onzini pie a'disi ya? 17Yesu ka eri ra, eri 'yo yi tia kini, 'Ba rua alarᴜ be 'diyi leni ojoᴜ kᴜ, te 'ba rua onzi 'diyi; ma emuni 'ba kililirᴜ omve kᴜ, te 'ba onzi 'diyi'i. 18'Ba Yohanani imbale 'diyi pi 'ba Farisaini be yi adri nyaka 'da; yi nga emu 'yo tinia kini, 'Ba Yohanani imbale 'diyi pi 'ba Farisaini imbale 'diyi be, yi adri nyaka 'da, te ‘ba mini imbale 'diyi 'dani nyaka kᴜ a'disi ya? 19Yesu nga 'yo yi tia kini, 'Ba izioni omvele omua 'diyi eco nyaka 'dazarᴜ de nga izioni yi be indi ya? De izioni yi be indi econi yini nyaka 'dazarᴜ kᴜ. 20O'du yini izioni 'duzᴜ yi eseliasiri nga eca ra, yi nga di nyaka 'da etu 'dasi ndo. 21'Ba alᴜni soni bongo ojile kᴜri egazarᴜ bongo okuri ma ruaa kᴜ, o'dini yini 'baleri kazᴜ cezᴜ okuri ma ruaa kᴜ, talani kazᴜ anyazᴜ onzikanyarᴜ aga ra kᴜ. 22'Ba alᴜni toni patiefi ma su o'diri enyi okuri ma alia kᴜ, patiefi su kazᴜ enyi asizᴜ kᴜ, patiefi su pi nga i eza enyi be iri tro ani ; te yi patiefi ma su o'diri to enyi o'diri ma alia. 23Eri nga eca 'dini, erini agaria nga anya beri ma aliasi o'du sabatonisi, 'ba erini imbale 'diyini aciria yi 'ba anya dri ondi. 24'Ba Farisaini nga 'yo tinia kini, Mi ndre, 'ba mini yi afa azitani a'ile 'yele etu sabatonisi kᴜri 'ye a'disi ya? 25Eri nga 'yo yi tia kini, Emi lani nga e'yo Daudini 'yeleri kᴜ ya? eri ka ovᴜ afa nyaza kokorᴜ, azini ka ovᴜ abirisi, 'ba ovᴜpi eri be 'diyi pie dria. 26Emi lani e'yo erini fizᴜ Mungu vile joa ewu Abiatarini ovᴜzᴜ kuhani amborᴜrisi, erini mikate ecetarᴜri nyazᴜ, mikate nde yini ogale nyakokorᴜ pe lᴜ kuhani dri a'duleri, azini erini fezᴜ 'ba ovᴜpi eri be 'diyi dri indiri kᴜ ya? 27Eri nga 'yo yi tia kini, Yi 'ba ndra sabato 'ba dri, yi 'bani ndra 'ba sabato dri kᴜ; 28Mvi 'bani eri di ovᴜ Opi sabatoni indi.

will be added

X\