MARAKO 15

1O'bitisi coti, kuhani amborᴜ piyi 'ba 'wara pie, karania pie, 'ba e'yo amapi 'diyi pie dria nga yi ti otᴜ tualᴜ, nga Yesuni 'i ji fe Pilato dri. 2Pilato nga zi tinia kini, Mi Opi 'ba Yahudini ya? Eri omvi e'yo, 'yo tinia kini, Mi 'yo ra. 3Kuhani amborᴜ yi nga asᴜ sᴜ ruania kakaᴜ. 4Pilato nga zi tinia dika kini, Mi omvini e'yo kᴜ ya? Mi ndre, yi asᴜ sᴜ mi ruaa 'dopi 'doni. 5Te Yesu omvini e'yo dika kᴜ; Pilato nga osu ani osu osu. 6Omu nya ngare vᴜsi eri adri 'ba arᴜrᴜ alᴜ trᴜ yi dri, 'ba yini zileri'i. 7Ombe 'ba azini arujoa, runi Baraba'i, eri 'ba omba 'bapi opi be, 'ba 'ba 'dipi omba nde alia 'diyi ma azi. 8'Ba ongᴜlᴜmᴜrᴜ tu di vᴜnia, e'do zi tinia eri ma 'ye erini adrile 'yelerile. 9Pilato nga e'yo omvi yi tia kini, Emi le ma trᴜ emi dri Opi 'ba Yahudini ya? 10Erini vale kini kuhani amborᴜ yi fe eri i dri ma'yalasirisi. 11Kunani amborᴜ nga 'ba ongᴜlᴜmᴜrᴜ ma bile imba, kini bani eri ma trᴜ yi dri Barabani'i. 12Pilato nga e'yo omvi yi tia dika kini, Ma nga 'ye ngoni 'ba emini omvele Opi 'ba Yanudiniri be ya? 13Yi nga otre uru dika kini, Ma di eri pati ruaa! 14Pilato nga 'yo yi tia kini, A'disi ya? Onzi erini 'yeleri ngoni ya? Te yi nga otre uru aga ra, kini ma di eri pati ruaa. 15Pilato, erini leria ayiko fezᴜ 'ba ongᴜlᴜmᴜrᴜ dri, nga Barabani trᴜ yi dri ani; te eri ka Yesuni co 'bo, eri fe eri yi dri dizᴜ pati ruaa. 16Asikari nga eri ji ofi riidri ma alia, adani opijo omvele Praito-riori'i; yi nga asikari ongᴜlᴜmᴜrᴜ omve dria tualᴜ. 17Yi nga bongo ondralakondralarᴜ su ruania, yi oci ekila okurᴜ, nga sᴜ drinia. 18Yi 'ba eri zi, kini, Mi zi mi ci ci, Opi 'ba Yahudini loᴜ! 19Yi nga eri dri ogba ozᴜsi, yi nga cucu wᴜ rᴜania, nga kᴜmᴜti osi tinia, nga eri inzi ra. 20Yi ka eri dri inza 'bo, yi nga bongo ondralakondralarᴜ nderi trᴜ eri ruaasi, nga eri vile bongori su'i. Yi nga di eri ofᴜ amve, ji dizᴜ pati ruaa. 21Yi nga 'ba agapi geria engapi aseari omi okposi pati alaza eriniri 'duzᴜ; eri Simoni 'ba Kureneni, Alegezanda pi ma ata Rufusi beri'i. 22Yi nga eri eji pari omvele Gologotaria (efini pari dri falaniri'i). 23Yi nga eri dri patiefi ma su osazarᴜ aro beri fe, te eri mvuni kᴜ. 24Yi nga eri di ra, nga bongo erini awa awa, yini yi 'beria odrisisi, 'ba alᴜ alᴜni isu ngoni yari nizᴜ. 25Eri etu na, yi nga eri di pati ruaa. 26E'yo eri tozᴜri ma e'yo siza si i uru 'dini, OPI YAHUDINIRI'I. 27Yi di oguo iri pati ruaa eri be indi, alᴜ dri ndiria, alᴜ dri ejiria. 28E'yo siza 'ye i i paria 'yeke, kini, La eri 'ba e'yo ezapi 'diyi ma azirᴜ. 29'Ba agapi geria 'diyi ri eri o'da o'da, yini yi dri oyaria, kini, Ha! Mi 'ba hekalu anzᴜpi eri sipi o'du nari mi'i, 30mi pa mi ngᴜlᴜpi, mi si pati ruaarisi va! 31'Dinile kuhani amborᴜ, yini eri oguria yi eselia karania be, nga 'yo kini, Eri opa ndra 'ba azini 'diyi ra, te econi erini i ngᴜlᴜpi pazarᴜ kᴜ. 32Kristo Opi 'ba Israeliniri ma esi pati ruaarisi va cucuru'do, ama ma ndre, ama ma nga eri a'i ani beni! 'Ba yini dile pati ruaa eri be 'diyi ede eri 'dini indi. 33Etu ka eca azia, angᴜ nga bi inicici oro dri dria kpere etu oromi. 34Etu oromisi Yesu nga oyᴜ o'duko urusi, kini, Eloi, Eloi, lama sabakitani? efini kini, Mungu mani, Mungu mani, mi kᴜ ma 'bo a'disi ya? 35'Ba azini pa osopi ageinia 'diyi ka eri ra, yi ‘yora, Mi lu, eri Eliyani omve. 36'Ba alᴜ nga nzᴜ ezekeze sᴜ patiefi ma su drazari ma alia, erini i tozᴜ alenia tre, nga eri 'ba ozᴜ sia, nga fe eri mvu ani, kini, Emi kᴜ nga, ama ndre kani Eliyani emu eri 'du va yani. 37Yesu nga oyᴜ o'duko urusi, nga kᴜ i avani fᴜzᴜ ra. 38Bongo hekalu ale alizᴜri nga i asi iri, engazᴜ uru kpere ele. 39Mbasa asikari tᴜrᴜ alᴜ ma drilia pa sopi i otipi eri beri ka ndre erini kᴜria i avani fᴜria 'dini, eri nga 'yo kini, Adada de ndra agu 'diri Mungu ma Mvi'i! 40De ndra okᴜ azini yi indi, ri eri ndre re; yi ma eselia Mariamu Magadaleni pi, Mariamu Yakobo wereri pi ma andrirᴜ Yose beri pie, Salome be; 41okᴜ 'diyi eri vᴜti bipi azi ngapi eri dri erini ovᴜria Galilia 'dale 'diyi; okᴜ azini be kakaᴜ tupi eri be Yerusalemua 'diyi. 42Ka eca ondresi, erini ovᴜle o'du Edezanirisi, 'di o'du sabato driliari'i, 43Yusufu 'ba Arimateaari, eri 'ba e'yo amapi 'bani inzile tᴜri, eri indi suru Munguni ma mile gapiri, eri nga emu ra, nga fi uri kokorᴜ Pilato vᴜ, nga Yesu ma avᴜ a'i. 44Pilato nga osu osu kani eri 'de 'bo yani; erini mbasa asikari tᴜrᴜ alᴜ ma driliari omveria i vᴜ, nga zi tinia kani eri 'de te drio 'bo yani. 45Eri ka e'yo ni mbasa tia 'bo, eri nga a'i avᴜni fe Yusufu dri. 46Eri nga di mu bongo emverᴜ je, nga avᴜni e'du va, nga eri ombe bongo emverᴜ ndesi, nga eri 'ba gᴜle yini gale oni aliari ma alia; eri nga era amborᴜ gᴜ gᴜle tilia ci. 47Mariamu Magadaleni pi Mariamu Yose ma andrirᴜri be yi nga pari yini eri 'bazᴜri ndre indi.

will be added

X\