MARAKO 14

1De ace o'du iri ci cazᴜ omu agaza 'ba drilesiri pi nyazᴜ, omu mikate akufi kokorᴜri be; kuhani ambo 'diyi e'yo ndru karani be eri bizᴜ lokirisi eri 'dizᴜ. 2Te yi 'yora, O'du omu nyazᴜrisi kᴜ, 'ba nde kazᴜ iyikiyi zozᴜ kᴜ. 3Erini ovᴜzᴜ Betania Simoni 'ba ofᴜ beri vile joa, erini atiria nyaka nyaria, okᴜ azini nga emu odᴜ efiza be lu'bua tre, eri odᴜ alarᴜ arikarirᴜ silingi nyapi kakaᴜri ; eri agba lu'bu, odᴜ osᴜzᴜ eri ma dria ani. 4Te e'yoni 'de 'ba azini ma asia onzi, yi 'yo yi eselia kini, Yi odᴜ arikarirᴜ eza 'dini a'disi ya? 5eco ndra odᴜ arikarirᴜ 'diri ozi silingi tᴜrᴜ tᴜrᴜ na afa azi be, awazᴜ 'ba aliorᴜ dri. Yi nga eri onzi onzi. 6Te Yesu 'yo ra kini, Emi kᴜ eri; emi eri ecandi a'disi ya? Eri 'ye ma dri azi onyirᴜ 'bo. 7A'disikᴜ emi ovᴜ tᴜalᴜ 'ba aliorᴜ 'diyi be o'du dria, etu dria emini leleria emi eco yi 'ye onyirᴜ ra; te emi ovᴜni ma be o'du dria kᴜ. 8Eri 'ye di erini ecolerile 'bo; eri efi di ma rua odᴜ arikarirᴜsi oko, de nga sani ma kᴜ. 9Ma 'yo emi tia ndi ndi, pari dria yini e'yo bari olᴜzᴜ, kani ngoaria oro dri dria, yi nga afa okᴜ 'dirini 'yeleri ma e'yo olᴜ indi, eri ma e'yo egazᴜ. 10Yudasi Isikariote, 'ba mᴜdri drini iri 'diyi ma azi, nga fᴜ mu kuhani ambo 'diyi vᴜ, eri ma o'di nyazᴜ yi vᴜ. 11Yi'i, yi ka e'yo eri 'bo, yi ovᴜ ayikosi, yi azi silingi fezᴜ eri dri ra. Eri nga o'du onyirᴜ eri ma o'di nyazᴜri ndru ra. 12O'du oko 'bani mikate akufi kokorᴜri nyazᴜria, etu yini omu agaza 'ba drilesiri liria, 'ba erini imbale 'diyi nga 'yo tinia kini, Mi le ama fᴜ mu pari mini agaza 'ba drilesiri nyazᴜri ede ngole ya? 13Eri nga 'ba erini imbale 'diyi ma ti pe iri, nga 'yo yi tia kini, Emi mu fi aku amborᴜa, agupi imvᴜ yi beri be driari nga dri fu emi be; emi bi vᴜtini, 14te pari erini fizᴜria, emi 'yo jo e'i nde ma tia kini, 'Ba 'ba Imbapiri ‘yora, Jo omuni amani ngazᴜ agaza 'ba drilesiri nyazᴜ 'ba mani imbale 'diyi beri ngoa ya? 15Eri nga jo aliza urulerᴜ amborᴜ ece emi dri, edezarᴜ ngonde; emi ede afa amani 'daa. 16'Ba erini imbale 'diyi nga fᴜ ra, nga fi aku amborᴜa, nga isu erini 'yolerile; yi nga omu agaza 'ba drilesiri ede ra. 17Ka eca ondresi, eri nga emu 'ba mᴜdri drini iri 'diyi be. 18Yini riria nyaka nyaria, Yesu 'yo ra kini, Ma 'yo emi tia ndi ndi 'ba alᴜ emi eselia nga ma o'di nya ra, ‘ba nyapi ma beri'i. 19Yi 'ba ovᴜ candisi, yi nga 'yo eri tia, yi alᴜ alᴜ, kini, 'Do ma'i ya? 20Eri nga 'yo yi tia kini, Eri 'ba mᴜdri drini iri ma azi, dri sᴜpi otekua alia ma beri'i. 21Te Mvi 'bani mu ra, yini ndra sile erisirile, te candi agu Mvi 'bani ma o'di nyapi 'dari dri! Ka ndra agu 'dari osi nyakua kᴜ 'yeke. 22Yini nyaka nyaria eri nga mikate 'du, eri ka zi Mungu tia 'bo, eri nga aleni anyo awazᴜ yi dri, kini, Emi 'du; 'di rua mani. 23Eri nga okele 'du indi, eri ka awa'difo 'yo drinia 'bo, eri fe yi dri, yi dria nga mvu ani erisi. 24Eri 'yo yi tia, Di ari mani e'yo azizani, rapi ‘ba kakaᴜsiri. 25Ma 'yo emi tia ndi ndi, ma ngani efi zabibuni 'yaleri ma su mvu dika kᴜ, kpere etu 'dasi mani o'dini mvuria suru Munguni ma aliaria. 26Yi ka ongo ngo 'bo, yi fᴜ mu oni Mizeitunia. 27Yesu nga 'yo yi tia kini, Emi nga aba dria aba aba; yini sile 'borile, Ma nga 'ba kabilo ocepiri co ra, kabilo nga yi ere ani. 28Te ma ka enga 'bo, ma nga mu emini oko drile Galilia. 29Petero nga 'yo eri tia kini, 'Ba dria ka aba ra ti, te ma'ini yo. 30Yesu 'yo tinia kini, Ma 'yo mi tia ndi ndi, o'du va 'dosi, ini va 'dirisi, de nga a'uata 'beni cere paleko iri kᴜ, mi nga ma ga si paleko na. 31Te eri nga 'yo okposi tᴜ kini, Ka tro ma dra mi be ndro ti, ma ngani mi ga si 'de kᴜ. Yi dria 'yo 'dini. 32Yi nga mu pari omvele Getesemani iria; eri nga 'yo 'ba erini imbale 'diyi ma tia kini, Emi ri nga 'doa, mani Mungu ziria. 33Eri ji i be Petero pi, Yohana pie, Yakobo be; eri 'ba ota ota ambo, eri 'ba ovᴜ candisi tᴜ. 34Eri nga 'yo yi tia kini, Orindi manini ombᴜ ombᴜ candisi tᴜ, kpere dra ma tia; emi te nga 'doa, emi ma ovᴜ mile be. 35Eri mu drile were, nga i eco va, nga zi kini ka eco ra etu 'diri ma aga i driasi ra. 36Eri 'yo ra kini, Baba, Ata, e'yo dria eco mini ra; mi 'du okele 'diri ma vᴜrisi ra; te e'yo mani leleri'i kᴜ, te mini leleri'i. 37Eri nga emu yi isu o'du koria, eri nga 'yo Petero ma tia kini, Simoni la, mi o'du ko ya? Mi econi tezarᴜ mile be etu alᴜ kᴜ ya? 38Emi ma ovᴜ mile be, emi zi, emi kazᴜ fizᴜ obeta ma alia kᴜ; orindi emini avarᴜ ada, te rua emini ovᴜ okpo kokorᴜ. 39Eri nga mu Mungu zi dika, e'yo tekari ma vᴜ 'yozᴜ. 40Eri nga emu dika yi isu o'du koria, mile yinini ovᴜle nzizarᴜrisi; yi nini yi ma omvi tinia ngoni yari kᴜ. 41Eri nga emu pale narisi, eri 'yo yi tia kini, Emi ko di o'du curu'do, emi li di vini ande emini indi. Fu dri ra, etu eca 'bo; emi lᴜ, yi Mvi 'bani ma o'di nya eri fezᴜ 'ba onzi 'yepi 'diyi ma dria. 42Emi enga, ama mu; mi lu, 'ba ma o'di nyapiri eca va 'di. 43Coti, erini nga e'yo 'yoria, Yudasi 'ba mᴜdri drini iri 'diyi ma azi nga eca 'ba ongᴜlᴜmᴜrᴜ be, sei piyi abeleku be yi ma dria ci; yi ibi emu kuhani amborᴜ piyi vᴜ, karani pie, 'ba 'wara pie. 44'Ba eri ma o'di nyapiri fe te yi dri eceta 'bo, kini, 'Ba amani ama o'dele eri be ndrᴜtasiri bani eri'i; emi bi eri kirikiri, emi ji eri, ma apa kᴜ. 45Eri ka eca 'bo, eri nga mu vᴜnia coti, kini, 'Ba 'ba Imbapiri! Eri o'de eri o'bolo ndrᴜzasi. 46Yi nga yi dri o'ba ruania, nga eri bi ci. 47'Ba alᴜ pa sopi ageiniari nga eli nze, nga kuhani amborᴜ ma ati'bo ma bi ga mgbiri va. 48Yesu nga e'yo omvi, 'yo yi tia kini, Emi efᴜ sei piyi emi dria abeleku be ma bizᴜ, emini oguoᴜ bilerile ya? 49Ma ovᴜ ndra emi be etuzu, 'ba imbaria hekalua, te emi bini ndra ma kᴜ. Te e'yo 'ye i 'dini, e'yo siza ma 'ye i ani beni. 50'Ba nga di eri kᴜ ra, nga apa dria. 51'Ba azini karilaᴜrᴜ nga vᴜtini bi yi be, 'be suka i ruaa 'be 'be; yi nga eri bi indi, 52te eri nga suka kᴜ yi dri, apa pililirᴜ. 53Yi nga Yesuni ji kuhani ambori vᴜ; kuhani amborᴜ piyi, 'ba 'wara pie, karani be dria, nga yi okᴜ tualᴜ vᴜnia. 54Petero bi vᴜtini re, kpere fizᴜ kuhani amborᴜri ma riidria; eri ovᴜ riria asikari be aci tia, aci yᴜria. 55Kuhani amborᴜ piyi 'ba e'yo amapi 'diyi be dria, yi ndru e'yo eti nzele Yesu ruaari eri 'dizᴜ; te yi isuni kᴜ. 56A'disikᴜ 'ba kakaᴜ yi nga e'yo eti nze eri ruaa inzorᴜ, te e'yo eti yini nzeleri ecini yi tualᴜ kᴜ. 57'Ba azini nga enga ra, nga e'yo eti nze inzorᴜ eri ruaa kini, 58Ama eri ndra erini 'yoria kini, Ma nga hekalu sile 'ba ndi ma drisi 'diri anzᴜ ra, ma nga andini yini sile drisi kᴜri si o'du na. 59Te ka tro 'dini ti, e'yo eti yini nzeleri ecini di yi tualᴜ 'de kᴜ. 60Kuhani amborᴜri nga enga uru 'ba eselia, eri nga zi Yesu tia kini, Mi omvini e'yo kᴜ ya? E'yo eti yini nzele mi ruaari ngoni ya? 61Te eri ovᴜ ndi, eri omvini e'yo kᴜ. Kuhani amborᴜri nga zi tinia dika, nga 'yo kini, Mi Kristo Mungu Asi Ndriza beri ma Mvi'i ya? 62Yesu kini, Ma eri'i; emi nga Mvi 'bani ndre erini riria Okpo ma dri ndiria, azini erini emuria iriti 'bua 'diyi be. 63Kuhani amborᴜ nga i ma bongo asi ra, kini, Ama di kiri 'ba e'yo etini nzepi 'diyi le a'disi ya? 64Emi eri di o'data erini 'bo. Emi ega ngoni ya? Yi dria nga e'yo erini li kini e'yo nde eri ra, ma dra ra. 65'Ba azini 'ba cucu wᴜ ruania, azini yi eri mile a'bᴜ ci, yi nga eri osi dri otᴜzasi, nga 'yo tinia kini, Mi ondri e'yo! Asikari nga eri a'i osatasi. 66Peteroni de ovᴜria ele riidria, zamva azi ngapi kuhani amborᴜ vile 'diyi ma azi nga emu ra; 67erini Peteroni ndreria aci yᴜria, eri nga mile sᴜ ruania, kini, Mi ovᴜ te Yesu Nazarenioᴜrᴜri be indi fo! 68Eri ga si, kini, Ma nini e'yo mini 'yoleri kᴜ, ma vani kᴜ indi. Eri nga fᴜ fi jo 'bileko etia ; a'uata nga cere 'be. 69Zamva ndeni eri ndreria, nga 'ba 'yo dika 'ba pa sopi 'daa 'diyi ma tia kini, 'Di 'ba yini ma azi. 70Te Petero nga ga si dika. 'Di ma vᴜtia were 'ba pa sopi 'daa 'diyi nga 'yo Petero tia kini, Mi 'ba yini ma azi ada; mi 'ba Galilini. 71Eri 'ba i otri, oyo piyi so kini, Ma nini agu emini e'yoni 'yole 'diri kᴜ. 72Coti a'uata nga cere 'be paleko iri. Petero nga e'yo te Yesuni 'yole eri tiari ega i asia, kini, De nga a'uata 'beni cere paleko iri kᴜ, mi nga ma ga si paleko na. Erini e'yoni egaria i asia, eri nga wᴜ wᴜ.

will be added

X\