MARAKO 11

1Yi ka eca Yerusalemu pi vᴜ ogogo, Betefage pie, Betani pie, oni Mizeituni ma etia, eri nga 'ba erini imbale 'diyi ma azi iri 'diyi ma ti pe. 2'yo yi tia kini, Emi mu fi aku ovᴜpi emi driliaria; coti emini firia eri ma alia emi nga akanyamva isu 'izarᴜ, 'ba alᴜni nga rizᴜ drinia kᴜri'i; emi etrᴜ eri, eji eri. 3'Ba azini ka 'yo emi tia, Emi 'ye 'dini a'disi ya? emi nga 'yo kini, Opi le erini, eri nga eri ti pe coti dika 'doa. 4Yi nga mu, nga akanyamva isu 'izarᴜ jotilia, geri aritia amve; yi nga eri trᴜ ra. 5'Ba pa sopi 'daa 'diyi ma azi nga 'yo yi tia kini, Emi a'di 'ye, emi akanyamva trᴜ a'disi ya? 6Yi nga 'yo yi tia Yesuni te 'yolerile; yi nga a'i yi dri ani. 7Yi nga akanyamva nderi eji Yesu vᴜ, nga bongo yini o'be eri ngᴜkᴜa, eri nga ri drinia ani. 8'Ba kakaᴜ nga bongo yini aja va geria; 'ba azini nga pati arakala bi be yini gale va nga alia 'diyi aja. 9'Ba mupi drilenia 'diyi pi 'ba mupi vᴜtinisi 'diyi be nga oyᴜ uru kini, Hosana! Asi ndriza 'ba emupi Opi ma rᴜsiri dri! 10Asi ndriza suru emupi a'bi amani Daudiniri dri! Hosana 'bua tᴜ! 11Eri nga fi Yerusalemua hekalᴜa; eri ka afa olu dria 'bo, etuni 'yeria 'deria 'boria eri nga fᴜ mu Betania, 'ba mᴜdri drini iri 'diyi be. 12Dru 'dini, yi ka fᴜ Betaniasi 'bo, abiri nga eri fu ra. 13Erini elio pati bi beri ndreria re 'dani, eri mu ra, kani eri nga afa isu ruania yani. Eri ka eca vᴜnia ogogo, eri isuni afa kᴜ, kiri pati bini a'dule, erini ovᴜle ewu elioni kazᴜri'i kᴜrisi. 14Eri nga e'yo 'yo tinia kini, 'Ba alᴜni ma nya efi mini dika 'dani 'dani kᴜ. 'Ba erini imbale 'diyi nga e'yo eri ra. 15Yi nga eca Yerusalemua. Eri nga fi hekalua, eri 'ba 'ba afa ozipi 'diyi pi ofᴜ amve, 'ba afa olepi hekalua 'diyi be, eri nga 'ba silingi ofᴜpi 'diyi ma mesa pi ogᴜ va, 'ba a'balaᴜ ozipi 'diyi ma kiti be; 16eri a'ini 'ba azinini afazᴜ jizᴜ agazᴜ yi be hekalu alesi kᴜ. 17Eri nga 'ba imba, nga 'yo yi tia kini, Yi sini ndra 'dini kᴜ ya, kini, Yi nga jo mani omve jo Mungu zizᴜ suru dri driari'i? Te emi 'ba eri oji 'ba afa opapi 'diyinirᴜ. 18Kuhani amborᴜ piyi karani pie nga e'yo 'diri eri ra, yi nga 'ba geri ndru eri dri jazᴜ; yini ovᴜle erisi urisirisi, te 'ba ongᴜlᴜmᴜrᴜ dria osu tᴜ eri ma imbatasi. 19Etuzu ondre vᴜsi ondre vᴜsi eri adri fᴜ aku amborᴜasi amve. 20O'bitisi yini agaria, yi ndre elio pati nde 'wi 'bo, olani be dria. 21Peteroni e'yo egaria i asia nga 'yo tinia kini, 'Ba 'ba Imbapiri, mi lu! Elio mini trile ajeri 'wi teketeke 'bo. 22Yesuni e'yo omviria, nga 'yo yi tia kini, Emi ovᴜ ai'ta be Mungu vᴜ. 23Ma 'yo emi tia ndi ndi, 'ba azini ka 'yo oni 'diri ma tia, Mi nze mi ra, mi 'be mi miri alia; ka e'yo ndᴜni ega i asia kᴜria, te ka a'i e'yo erini 'yoleri nga i 'ye ra, e'yo nde nga i 'ye eri dri ra. 24E'yo 'disi ma 'yo emi tia ndi ndi, e'yo dria emini zile emini a'ile Mungu tiari, emi ma a'i emi asia kini emi bi e'yo nde 'bo, te yi nga ovᴜ emini ra. 25Te etu dria emini pa soria e'yo ziria Mungu tia, emi ka ovᴜ e'yo be 'ba azini vᴜ, emi kᴜ e'yo nde ja; Ata emini 'buari ma kᴜ ezata emini ja ani. 26Te emi ka e'yo kᴜ ja kᴜ, Ata emini 'buari ngani vini ezata emini kᴜ kᴜ indi. 27Yi nga eca Yerusalemua dika. Erini aciria hekalua, kuhani amborᴜ piyi karani pie, 'ba 'wara 'diyi be nga emu vᴜnia, 28yi nga 'yo tinia kini, Mi e'yo 'diyi 'ye okpo ngorisi ya? A'di fe mi dri okpo 'diri e'yo 'diyi 'yezᴜni ya? 29Yesu nga 'yo yi tia kini, Ma nga e'yo alᴜ zi emi tia; emi omvi mani, ma nga di okpo ngori mani ani e'yo 'diyi 'yezᴜ yari ma e'yo olᴜ emi tia. 30Baputizi Yohanani enga 'bua, kani 'ba vᴜ ya? Emi omvi mani. 31Yi nga e'yo ozi yi eselia ceni ceni, kini, Ama ka 'yo, 'Bua, eri nga 'yo, Ka'dini emi a'ini eri kᴜ a'disi ya? 32Te ama ka 'yo, 'Ba vᴜ, —te yi ovᴜ 'ba ongᴜlᴜmᴜrᴜsi urisi, 'ba driani a'ile kini Yohanani nabi adadanirisi. 33Yi nga e'yo omvi Yesu tia kini, Ama nini kᴜ. Te Yesu nga 'yo yi tia kini, Ma'i alᴜ indi, ma ngani okpo ngori mani e'yo 'diyi 'yezᴜ aniri ma e'yo olᴜ emi tia kᴜ.

will be added

X\